بجد آسفة جدا على التعطيل عليكن وان شاءالله زي العادة حنعوضكن بتنزيل فصول التأخير كلهن
#بنت_خالتي ( الجزء الثاني من سلسلة اقرباء ولكن )
الفصل الخامس عشر
انا وحطيت ايدي على خدي .. فعلا والله وشكله مازال قدامي واجد نعرفه على وتين بعد السنين هذين
امي .. كان تتذكر زمان لما سئلك باتك وانت عمرك 12 سنة كيف صابر على بعدها فقلت ليه نبيها تكبر وتكون شخصيتها وهذي شخصيتها شكلها كانت تساير فيك بيش ماتزعلش منها
كيان .. لكن ياسبعي انت عارف انك جرحت وتين هكي
انا بتنهيدة .. عارف والله عارف وربي يعيني ان شاءالله
اوس .. مش ملاحظين اننا نحكو في مكان مش لينا
انا وانتبهت اننا مازالنا في حوش عمي صلاح والتفتت لعمتي امل.. سامحينا عمتي على الازعاج اللي صار
عمتي امل بوجع علي صار لعيالها واللي داره ولدها .. ولايهمك يا ولدي الحوش حوشكم
انا جيت قربت منها .. عمتي اكيد زين عنده سبب مقنع ليش دار هكي غير اطمنو انه كويس والباقي كله ساهل
عمتي امل بخوف على ولد دلعاته واجد وحاسة بالندم .. يسمع منك ربي والله لو كان يطلع دلع بس وتهرب من المسؤلية اللي هو بروحه زن عليها رغم رفضنا ليدفنه الصافي وهو حي
انا .. هو مالياش حق ندخل بينكم لكن تبي الحق اصلا زين مش لعمر الزواج بكل
عمتي امل .. والله كلنا قلناها له هات من يسمع هو اصر والصافي ما منعش
انا.. والله هذي اللي محيرتني كيف الصافي وافق
عمتي امل .. سبب موافقة الصافي منع الفضيحة واي مصيبة تصير وللاسف هذا اللي صار
انا ومسكت ايديها .. تهون يا عميمة تهون الوقت يعالج كل شئ غير اهم حاجة الصافي مايضلمش رحيق بس
عمتي امل بثقة .. مستحيل الحاجة الوحيدة في اللخبطة اللي صارت متاكدة منها ان الصافي مستحيل يظلم رحيق
انا .. امنا روقي واضحكي بفرح بكريك وفرحتك الاولى وماتحسسوش الناس ان في غلط لان الناس حتى لو لحقها شك ولو بسيط لكن لما يشوفو فرحتكم حتبعد الشك وحيقولو اكيد لخبطة صايرة بس وماتخلوش رحيق تبان زعلانة بيش تزيد تاكد وتبعد اي شك
عمتي امل .. عندك حق يا ولدي وان شاءالله ربي يتمم شفاك يارب
انا.. ان شاءالله ... اسمحيلي تو (والتفتت لكانو) روحو الليلة باتو عندنا
كيان بضحكة .. بعد كف وتينك ما اعتقدش تابى لكن تو نحاول
انا .. حاولي والله ابعتيلي نجيكم
كيان .. تم
وطلعت نا واوس ومش عارف رغم ان مخططي كله فشل لكن حاسس بفرحة كبيرة جوايي وما تخيلتش روحي اني كنت تاعب للدرجة هذي
اوس .. افرح يا رفيقي وماتفكرش في بكرة وخليها على ربي لو كتبلك ربي تكمل حياتك بنص عين فالحمدلله وزي مايقولو (نص العمى ولا العمى كله ) ولو ربي كتبلك انك تصير (وبغصة ) اعمى نحن نكونو عيونك وبعدين العمى ماهوش هالاعاقة الكبيرة شوف قديش في اشخاص كفيفين وصلو لي اماكن عالية وحققو انجازات كبيرة زي طه حسين اديب وابو العلاء المعري شاعر واديب وتي حتى حسان بن ثابت شاعر النبي صلى الله عليه وسلم كان كفيف وبعدين نحن مستحيل نسيبوك وانت ذكي حتتعامل مع اعاقتك بقوة نا عارفك يا رفيقي
انا بتنهيدة .. وليش ماذكرتش الخيار الثالث
اوس .. مانيش حاطه في بالي لان ظني بربي خير والموت مانك ميت الا في الساعة اللي كتبها ربي لك
انا.. ونعم بالله
أنت تقرأ
(سلسلة اقرباء ولكن) الجزء الثاني بعنوان بنت خالتي
Contoسلسلة أقرباء ولكن هي سلسلة متصلة ببعض وعشان تفهم الجزء الثاني لازم من قراءة الجزء الاول منها بعنوان (بنت عمي) التنزيل يومي باذن الله اسعدني الوسام كثيرا وحتى قبل ان تنتهي.. حياة #7ابداع 9#ابداع 5#ابداع 6#ابداع #4ابداع
