تنموومين
تأففت من قلب .. وقمت غسلت وجهي وتوضيت وصليت .. نزلت تحت وانا اشوف الدرجه اربع شوي وبيطح .. دايخه مره .. ليش حظرتها مقومتني .. لقيتها تحت تحوس بالصاله .. قلت بصوت نااعس وكالع من خشمي:وش السالفه؟
ماما طالعتي بعين حاده: انتي طلعتي امس؟؟
صحصحت شوي وقلت بإستنكار : لا .. كنت بطلع ما طلعت ..
ماما:يقول عمر انك طلعتي
انا جلست استوعب .. عمر .. من عمر .. ؟؟ ايييه عمر سواقنا الدبشه ذا .. عقدت حواجبي:والله ما طلعت .. وبعدين انتي اصلا ويا بابا تقولين اطلعي عادي
ماما قربت لي وهي متخصره وبعصبيه قالت:وما رجعتي الا الفجر
فتحت عيوني:وشوووو..؟؟ خيييير من قال ..
نزلت وانا معصبه:اووريه الكلـ* الحيوا* يتبلى علي .. والله لاكفخه بالجزمه ..
ماما:شجينه .. روحي لبوك
انا جلست ابي استوعب ماعرفت .. كل شي ملخبط اول شي تنفضني وهي معصبه وبعدين تقول ان السواق قال اني ما رجعت الا الفجر بعدين تقول لي شجينه ؟؟؟؟ قويه صراحتن .. رحت لابوي وانا راسي ملحوس
دخلت:بابا ليش ماما صارت مجنونه؟؟
تنهد بابا وحط كاس المويه الي بيده:امك خازها بليس لا تكلمينها بس .. تدور الشر
ضحكت بيني وبين نفسي ورحت جلست عنده وحطيت راسي على السرير:ابي انوووووم
بابا:دايخه؟
انا:مقومتني تقول لا ترجعين تنومين ..
رفعت راسي وانا مبوزه:لييش؟
بابا ضحك:ما عليك منها اقولك تدور الشر .. روحي تغدي بس ..
قلت بقرف:مااابي مالي خلق ..
تنهد بابا ولف وجهي عليه:لونك اصفر ليش ما تاكلين
تنهدت:مو حلو الاكل شسوي .. ماحب آكل
سكت بابا شوي وبعدين قال : طيب اطلعي كلي برا لا تجلسين كذا ما افطرتي ولا تبين تتغدين
سكت شوي وانا مبتسمه .. ياااي اطلع .. نسيت والله نسيت .. قمت بسرعه :بروح اغير ..
رجعت من جديد:بابا .. اخاف ماما تعيي؟
اشر لي بابا بيده وهو يهمس:روحي روحي بس ميب شايفتك ناديها لي
ضحكت عليه ورقيت فوق .. بدلت ولبست عباتي .. نزلت بشويش اناظر حولي ماما فيه ولا لا .. ناديت سوزان وطلعت ..
حر .. وريحة السواق الخايسه .. وصوت ايفرل لافين تغني ..
اشوف نخلات تجي وتروح بسرعه .. منن زمااان ما طلعت وجلست اقزقز خلق الله وهم بسياراتهم .. اناظر شويه الاقي همر اسود خطير اتش ثري .. والي راكبه واحد كشته ما تدخل مع الباب .. ومن وراه سياره قرمبع ونيت فيه خرفان والي يسوق واحد وجهه يلمع من العرق وواقفه على خشمه ذبانه .. ناس غير عن ناس وفرووق شاسعه كثيره .. وفوق كل هذا راعي الهمر جالس يكبس لراعي الونيت مدري والله وش كان يقول له ماعرف لغة السيارات خخخ
بس الهدف انو من تواضع لله رفعه .. حسيت اني جالسه اتفلسف .. رفعت راسي اناظر الفيصليه .. بطأت سرعه السياره .. شكلنا الحين بطريق الملك فهد .. يااااااليل .. ازحم طريق في الرياض كلها .. لا وفوق كذا من شطارتي جايه الظهر وقت الي يطلعون الناس من الدومات او يروحون لها ..
جلسنا بالزحمه نص ساعه ما بغينا نطلع .. عمر اقلقلني كل شوي يسأل ماما وين تبين روه .. ماما وين تبين روه .. انتفخ راسي من صوته الي كنه دجاجه مزنوطه .. لو اننا جايبين سواق سعودي اصرف خخ ..
بالنهايه قررت اروح ركا .. عند جامعة الملك سعود .. بابا يشتغل هناك ودايم يعلمني عن حركاات الطلاب مهبل بشكل غير طبيعي وخصوصا طلاب كلية التربيه خخ .. وش تطلع ذي بعد .. كلية التربيه .. الظاهر انها حقت الرسم والشخابيط .. ايييه الله يعين بس مدري وش يحبون في الرسم .. لا وهم الي مهبل لوول ..
دايم بابا يسولف لي عن حركات شباب الجامعه ومدري ايش لدرجه حسستني انهم بزران .. بس ولو لاني انا احب الهبل رحت عند ركا .. لانو الحين وقت غدا وراح يطلعون يتغدون هنا .. يعني فله
وقف عمر السياره .. مع الحر والخياس تحسفت على نفسي انزل .. خليت عمر يروح يطلب لي ..
انا تأزمت من حالة الطفش الي اعيشها ..كنت مفتكره انو بلاقي هبل هنا بس شكل المكان مهجور ... اللهم تجي سيارة شاخطه الاغاني واصله لاخر الشارع وصراخ شباب .. وما تدوم الا خمس ثواني ..
جلست اطالع بالجامعه .. احسن جامعه بالرياض تقريبا .. بس المشكله انها للاولاد .. طبعا .. انا اتكلم عن المبنى الحلو الي قدامي مو جامعة عليشه حقت البنات كلن يقول انها مخيسه ..
انا ابي ادخل في ذي الي جالسه اطالع فيها الحين .. من كثر ما يسولف لي بابا عن جامعته الموقره كرهتها من كثر ما حبيتها .. كان ودي اني بزره عشان اروح معه يوم من الايام .. خخ عاد تخيلوني واقفه بوسط قاعه كلها شباب وبابا جالس يلقي محاظره وانا معي حلاوه وامصمص ..
تنهدت .. يبيلي افكر كويس وش بدخل .. اي تخصص اي جامعه مخي فاضي الحين .. مره تقطع قلبي ودي ادخلها .. حظه عبيد هو وخشته داخل هندسه وكل يوم يجي ..
بعد فترتن وجيزه اكتشتف واستوعبت ليش المكان مهجور .. لانو وبكل بساطه احنا بالصيف ومابه احد بالجامعه .. كان ودي اعطي نفسي كف على هالتفكير ..
جلست احورف بجوالي انتظر عمر ذا الدبشه كل هذا يطلب .. دقيت على بابا ونشبت له سوالف مالها داعي .. وجا بخاطري هالسؤال
:بابا .. الحين البنات مالهم قسم بجامعة الملك سعود ؟؟
بابا:الا بعليشه
انا:لالالا .. اقصد الي انت فيها .. حقت الشباب ..
بابا : ... ليش هالسؤال
انا:مجرد فضووول ..
بابا:مدري والله ماني متأكد .. الطب البشري الظاهر او انه العلوم التطبيقيه .. شي زي كذا .. بس انه عموما طب .. هذا تلقين فيه مبنى للبنات بس الله يهديهم الممرات والقاعات فيها بنات واولاد مع بعض ..
انا سكت شوي : عادي فلها يا بابا .. وش فيها
بابا:لا بس .. ما ينفع كذا مفروض يخصصون كليه في عليشه مع باقي الكليات للبنات مو يسوون الدعوه خلبليصه
انا ابتسمت .. نسبتي بثالث كويسه مع نسبة ثاني بتطلع تحفه .. وعندي بابا واسطه ليش ما ادخل .. تجربه جديده اني ادرس بمكان مختلط .. بس ثواني من السكوت قلت:بابا وش رايك اجي ؟
بابا :وين تجين ؟
انا:عندك .. نصير انا وياك نجي كل صبح مع بعض .. ههههههه وش صبح .. قصدي وقت الدوام ..
بابا:ايه يصير خير ..
يا مصله بابا .. سولفت معه شوي وسكرت يوم شفت عمر جاي ..
فتح الباب ودخل الكيس:ماما انا اعطي هذا رجال محاسب خمسه ريال فلوس مافي كفي عطيني انا خلاص ادفع من فلوس مال انا
سكت شوي وش يخربط ذا .. الكلـ* انا معطيتيه ميتين قطعه وحده على وجه بعشرين ريال هههههههه كل ذا ونقص خمسه .. يا ان ذا الرجال حاله من الغباء يبي خمسه بس مو عارفه .. عطيته واعتبرتها صدقه لوجه الله تعالي .. ههههه ..
طيب .. الحين وين باكل .. توه عمر بيحرك السياره الا قلت له يطفيها .. البرقر له طعم ثاني جوا السياره .. فصخت طرحتي عن الحر ورتبت مكاني وجلست اكل .. السياره مظلله والمكاان فااضي وانا ما وراي شي .. واناظر بالشارع والسيارات الا سياره توقف ..
طبعا لقافتي ما تركتني جلست ابحلق في راعي السياره
مشيته مو غريبه .. وشعره وطوله وكل شي .. ما كان باين من التظليله .. عقدت حواجبي ورحت للشباك وتفتحته .. جلست اناظر كويس .. هذاا ياااااااااااسر ..!! يا حليله والله اني مشتاقه له .. اكيد يحسبني نكبته عقب ذيك السالفه
الولد التفت وناظرني ثواني وابتسم .. جا عندي:هاااااااي
