على طول وجلسنا ناكل فوشار ونطالع التلفزيون ونسولف ..
يمكن سويت هالحركه عشان انسى توتري شوي
بعد فتره وانا كنت اتقلب احاول انوم لكن ماني قادره حتى اسكر عيوني
انا:ليلى نمتي
ليلى وهي بسابع نومه:همممممممم
تأفف وانقلبت للجهه الثانيه .. وكل شوي اغير وضعيتي .. قمت وانا مكشره .. والله ماهي حاااله هاذي
مسكت جوالي ودقيت على سيف
سيف بصوت كله نوم:صويلح ووجع قلت لك المناوبه ماهي علي اليوم
ضحكت عليه:صويلح اجل
سيف:شجن .. يو مسرع ما اشتقتي لي
انا:وع من زينك.. سولف
سيف تثاوب:داقه علي الساعه ثنتين ونص باليل تقولين لي سولف ..
انا:ايه عادي اجازه
سيف:والله انا واحد عندي دوام من الفجر .. وما نمت الا من ساعه
انا:مشكلتك
سيف:...............
صرخت:هييييييييه
سيف:هاه .. بسم الله الواحد ما يمديه ينام خمس دقايق .. صوتك فقع اذني
انا:هههههههه احسن عشان ما تنام والسماعه بأذنك
سيف يتثاوب من جديد:الا وش الي مصحيك .. لا تقولين اجازه وسهرانه لانك مشالله دجاجه انا عارفك
انا:لااا ........ بكرا بتزوج
سيف:جد ...!؟!!!؟ .. يووو عالبررررررركه الف الف الف مبرووك
انا ابتسمت:الله يبارك فيك
سيف:يوو والله ما توقعتها .. انتي تتزوجين
قلت بدلع:ليش انا وش فيني انشالله ما اتزوج
سيف:هه لا بس توكم صغار
عقدت حواجبي:توكم ؟؟ من تقصد .. انا ومين .. ؟
سيف:انتي ... و ولد عمك ..
سكت شوي .. اي واحد يقصد:ما فهمت عليك .. ؟
سيف:الي ابوه معنا .. ياربي مسويه تستحي
اخذت نفس:عبدالله ....
انفعلت فجأه:وهو وش دخله اصلا ؟؟
سيف:ايزي ايزي سوري ... عالعموم مبرووك
انا:لآ سيف قلي من وين جايب هالكلام من مخك
سيف يتثاوب للمره الثالثه:شجن وش فيك بس كنت مفتكر كذا
انا ولحد الحين منفعله مدري ليه:وهو على كيفك تفتكر .. والي مخليك تفتكر اصلا
سيف :مدري .. باين انه يحبك
انا:وانت وش دخلك
سكت شوي بس حسيت اني تسرعت يوم قلت له كذا .. حاولت اعالج الموقف:قصدي وش دراك
سيف:خلاص شجن فيني النوم .. مبروك منه المال ومنك العيال الي بتتزوجينه .. والله تستاهلين
انا:لالا .. اصبر .. وش الي خلاك تقول هالحكي
سيف:مشالله وش الي يهمك بحكيي ؟؟ مو انتي باين انك ما تطيقينه يعني مالك شغل من وين قلت هالحكي
انا:هاه .. لا بس .. عادي ابي اعررف
سيف:تراني دايخ
انا:خلاص قلي وش الي خلاك تقول كذا وانا اسكر بوجهك بعد
سيف:لااا .. شين وقوات عين
انا:انا شين ..؟ افاا ..
سيف يتثااوب
انا:هيه انت ترا حومت كبدي وش ذا النوم الي فيك .. وبعدين قلي يلا
سيف:مدري والله .. كذا باين انكم تحبون بعض .. سوري ما دريت انك
قال بأسلوب يضحك:مرتبطه يا مدام
ضحكت عليه:كيف يعني باين ااننا نحب بعض يا مدام
سيف:اول شي انا رجال ما يقالي يا مدام .. ثاني شي اقولك مدري انا شفتكم ذيك اليوم بالمستشفى وحسيت كذا ..
يتثاوب:شجن واللي يرحم والديك دايخ عيوني تولع وتطفي
انا:واكي باي
وسكرت بوجهه
قلت بصوت مسموع:مااا قد شفت ابيخ منه
رجعت احاول انوم .. ما عرفت .. كل تفكيري ببكره ووش بيصير .. خاايفه مره .. ما دريت اني بتوتر لهادرجه
فتحت جوالي وجلست اطالع الرقم .. ادق عليه ...؟ اكيد صاحي الحين هو يسهر مع اصحااابه دايم ..
دقيت لكن محد رد
تنهدت .. ورجعت ادق
رد علي واحد بس مو عبدالله:الو
انا عقدت حواجبي:الو السلام عليكم
الطرف الثاني:وعليكم السلام ..
انا:امم .. مين معي ؟
الطرف الثاني:وانتي وش عليييك .. لا تدقين مره ثانيه فاهمه ..
اسمع صوت من عنده:اوريك يا كلـ* انا ما قلت لك تقول هالحكي
شوي قرب الصوت اكثر:شجن حبيبتي اسف .. هذا واحد من الشباب ههههههههههه
انا:ايه تخليه يرد على جوالك ويقول لي لا عاد تدقين .. عبدالله انت وش فيك انا مرررره متوتره ومحتاااجه اكلمك .. انسى شوي وبلاها هالانانيه فكر بغيرك يعني انت عارف اني ما عندي احد غيرك اقدر اقوله كل الي
فجأه سكتت .. انا وش جالسه اقول .. ؟؟ جالسه احاسبه لانه ما يبي يكلمني ..؟ هو الغلطان الحين .. ؟؟؟ لا هو ما سوى شي كل ذمبه انه يحبني وانا وحده غبيه جالسه ابي اكلمه واعلمه قد ايش انا متوتره عشان بكره وقد ايش انا فرحانه لانو بتصير عندي حياة جديده .. وبكبر وبيكون عندي اطفال وبـ ...... الخ الخ ...
حسيت بشي غريب كان ودي اني اقفل بوجهه وابكي وخلاص .. حاولت بس ما عرفت كنت ابي اسمع وش بيقوول
لكنه ظل ساكت ..
انا بإنفعاال:لا تسككككت قووووول اي شي
عبدالله بهدوء:ايش اقول ..
وضحك:ههههههههههههههه تصدقيييييين انك تووحفه .. واللهي ما قد شفت زيييييييييك على وجه الكره الارضيه .. هههههههههه
انا عقدت حواجبي:عبدالله شفيك تضحك .. انا ما قلت شي يضحك .. وبعدين ايش حبيبتي هاذي اول مره تقولها .. هيه انت شارب شي
عبدالله بصوت حزين غير الصوت الي قبل شوي:لا من جد ما قد شفتك زيك هه .. يعني داقه علي .. وانتي بتتزوجين بكره ..
رجع لحالته الي قبل شوي:هههههههههههههههههههه وش تبين مني خلاص .. انا اكرهك اصلا ههههههه بس انتي ما تدرين .. اكرهك عارفه كيف اكرهك ههههههههههههههه .. والله ماهي حاله هاذي .. يعني انتي فاااااااااااااااااااااهمه اني احبك وداريه انتي وش تعنين لي وداريه انك انتي الشي الوحيد الي بقالي بهالدنيا من بعدهم .. ههههههه ولا وفوق كل هذااااا .. جايييه مسويه نفسك ما تدرين
فجأه صرخ:لكن بقولك وش الي ما تدرين عنه انتي حيوانه وحقيره انتي ما تدريييييين اني احبك .. ماهو همك الي انا فيه .. حيواااااااااااااااااااانه
شوي اسمع اصوات ناس حوله يهدونه وهو يصرخ ويقول حيوانه
انا تصمنت مكاني
هذا عبدالله ..؟ لا .. ماهو عبدالله .. ليش يكلمني كذااا ..!؟ لييييييش ..
انا توني ادري ان عبدالله ممكن انه يقول هالحكي لي او يصرخ بوجهي بهالطريقه ... بس هذا مو عبدالله .. ماهو الي انا اعرفه
خنقتني العبره ورميت الجوال وبديت ابكي .. وشوي شوي علا صوتي اكثر وبديت ابكي اكثر .. مدري وش الي جالس يصير
خلاص ابي كل يصير تمام زي قبل ما ادق عليه .. ابي .... ابي يرجع كل شي وراا ابي اعدل كل شي .. ابي انسى الي صار قبل شوي
شوي اسمع صوت ليلى:شجججن وش فيييييك ..؟
رفعت رااسي وحظنتها بقوه وانا اشهق من الصياح:قال عني حيوانه يا ليلى ... يكرهنننننني .. ليلىىىىى اخوي يكرهني يا ليلى يكرهننني
ليلى ماهي فاهمه شي بس تحاول تهديني:ما عليه ما عليه ما راح يصير الا العافيه
انا:اقولك يكرهني منتي فاهمه .....
قلت بإنفعال:كيف يقول انه يحبني بعدين يقول انه يكرهني بعدين يقول عني حيوانه وحقيره كييييف .. ليلى ... انا ...
حظنتها بقوه:ليلىىىىىىى عبدالله تغير .. لييييش تغير .... ليلى انا اكره حمد ... انا ما راح اتزوجه اكررهه
طلعت ماما وهي مرتاعه:خير وش صااير ؟؟ جاها كابوس؟؟؟!
ليلى:لا يا خالتي مدري شفيها تقول عبدالله تغير وتقول انها تكره حمد ومدري ايش وما تبي تتزوج
جتني ماما وطالعتني وهي مرتاااعه:وش فيك .. وش صااير لك يا بعد عمري وش فيييييييك
حظنتها:مااااااامااا .. مابي اتزوجه .. اكرهه يا ماما هو الي خلا عبدالله يكرهني .. كله منه .. ماما عبدالله قال عني حيوانه ... ماما عبدالله يكرهني ليش ..... انا ما سويت له شي ...
ماما تحاول تهديني:لا ما يقول عنك حيوانه يا بنيتي اذكري الله..اذكري الله
وانا ضليت ابكي ما كنت اسمع شي من كلامهم .. الا لما كانت ماما واقفه وتتكلم بالجوال
ماما:لا بس ... طيب قول لها .. لا هي كانت مره فرحانه ... لالا وش دعوه بقول لها انك كنت تستهبل بس .. ليش قلت هالحكي لها.... ايه ايه .. تبي تكلمها .. لا الله يخليك والله انها مدري وش فيها .. عبدالله البنت متعلقه فيك وانت بحسبة اخوها هي ما عندها اخوان .. مو وقتك جاي تقول لها هالحكي الله يهديك .... ايه خلاص هاذي المره الالف الي تعتذر فيها خلاص .. اج ... اجل بتكلمها ....
شوي تتكلم بجديه:عبدالله انت الي سببت كل هذا وعلى قولتك كان استهبال انا ماني رايقه لحركات مراهقه سخيفه بتكلم البنت وتقول لها هالكلام فاهم .. البنت بتتزوج وانت جالس تستهبل ..!
شوي بعد اخذ وعطا مدت لي الجوال:كلميه
انا طالعتها:مين ..
ماما:عبدالله
مسكت الجوال بتررد :لا مابي اكلمه هو يكرهني ..
ماما عصبت:وبعدين معكم .. بيقولك اسف وبتنتهي هالسالفه فاهمه ولا مو فاهمه .. بلا حركات بزران انتي وياه
مسكت الجوال وحطيته على اذني بهدوء .. شوي بكيت:انت تكرهني ؟؟
..:لا
انا ابكي:.........
عبدالله:خلاص اسف .. والله كنت .. كنت بس كذا .. خلاص شجن انسي كلامي كنت
انا بإنفعال:انت بايخ ليش تقول لي هالحكي اصلا مافي مبرر انا عارفه انت تكرهني مو ان
قاطعني:والله اسف خلاص قلت لك اسف فيها شي بعد .. ههههههه شجونه انا احبك في الله انتي اختي .. انتي زي فاتن كيف اكرهك .. والله لو اني داري انك حساسه كذا كان ما قلت لك هالكلام هههههههههههه
انا حسيت انه يمثل بس ضغطت على نفسي عشان اصدقه:وليش قلته ؟؟
عبدالله:لانو ماعجبتني فكرة انك تتزوجين وتتركيني .. يعني ما راح اشوفك زي اول .. بس اوعدك اطب عليكم كل يوم واتغدا معكم ....... وانام معكم بعد هه
انا ضحكت بين دموعي:هههه .. وتجي بكره
عبدالله:وبجي بكره .. مافي شي يسوى هالضحكه ..
انا:عبدالله انت من جدك كلامك هذا يعني انا زي فا
طالعت ماما .. وكلمت:جد يعني ؟
عبدالله:يو لازم تطولينها بروح العب بلوت مع الشباب باي
وسكر بوجهي بسرعه وتركني مبتسمه ..
كنت عارفه او شاكه ان هالكلام ماهو صح .. بس عشان ماما وبابا وكل الي حولي .. وعشاني انا بعد .. حاولت اصدق ..
وبعدين حسيت براحه .. يعني طول هالفتره كان يحبني زي ما يحب فاتن ..!؟
فجأه حسيت بشعور غريب ... قهر يمكن .. بس حاولت اتجنبه وغمضت عيوني عشان انام .. بس ما امداني
الله اكبر .. الله اكبر ..
قمت وانا اتفف:اذذذذن ..!؟
ليلى:ايه .. قومي صلي وتروووشي .. اليوم عرسك يا بنت
حظنت ليلى:لووولا متحمسه .. عبدالله بيجي بكره
ليلى تتنهدت:والله الفلم الي سويتوه قبل شوي .. من جد يعني قممممممممممه
ضحكت:اقول اسكتي عاد .. هو بس كان يستهبل
قامت وتركتني:ايه زين .. يلا انا بروح بيتنا
انا قمت وراها بسرعه:لااااااا بتجلسين خير
ليلى طالعتني:وفستاني.. واغراضي .. وبروح بيتنا اتروش وو
قاطعتها:ليلى ووجع كل شي بتسوينه هنا فاهمه ولا مو فاهمه
مسكت يدها وضغطت عليها:ولا برمي نفسي مع الدرج .. ااااااااااااه فرحانه ..
ليلى غمزت :مدري من الي تقول اكره حمد
ضربتها بخفيف:ما قلت اكرهه .. اصلا مدري وش الكلام الي طلع مني كذا
ليلى:هههههههههه ايه طيب
ماما طلعت من غرفتها:يلا الصلاة
طالعت ماما:ماما انا اسفه عشان قبل شوي والله مالي داعي حسيت اني بزر
ماما بنص عين:لا انتي ولا عبدالله .. المهم .. روحي صلي وتروشي ونامي لك شوي عشان بنطلع القصر الساعه تسع
قلت بهمس:قالت قصر قالت المشكله محد حاظر
ليلى:هههههههههههههههه
رحت اتروش طبعا مو اي ترويشه .. كنت احس اني بموووت من الخوف فجاه كذا كل ما اتذكر وش بسوي او وش بيصير تمر قشعريره بكل جسمي .. طلعت بعد ساعه كذا وانا اطالع حولي .. والروب علي وشعري يقطر مويه
اخذت نفس ومشيت للتسريحه جلست اطالع نفسي .. انا عروس ؟؟
ابتسمت كان شعور جميل .. انو فيه احد بالدنيا هاذي كلها اختارني من بين الف بنت عشاني انا .. يعني فيه شخص مهتم لوجودي
تذكرت فجأه انو جدتي هي الي سمتنا على بعض ..
يعني خلاص بعد اليوم انا بطلع .. بودع هالبيت .. بودع هالغرفه ..
لفيت حول نفسي وانا اطالعها اطالع جدرانها اطالع السرير غرفة الالعاب سابقا مرت علي ذكريات تسع سنين بغمضه عين
اخذت نفس طويل وانا اقول بيني وبين نفسي .. خلاص يا ماما انا بفككم من غثاي وبطلع من حياتكم للأبد ..
بدلت ملابسي .. لبست جينز وبلوزه ووقفت امشط شعري ..
دخلت ليلى:يلاا انتي وش تسوين .. خلينا نطلع القصر ..
انا:اف طيب بمشط شعري
ليلى تناظرني:يختي ما احس انك عروس .. ههههههههههه فيه عروس تلبس جينز وبلوزه بيوم زواجها
قلت بضحكه خفيفه:ايه انا .. الحين بنروح القصر ؟؟
ليلى:ايه امك تقول .. وابوك طلع من بدري مدري وش جلس يسوي .. الحين بنروح القصر نشوف الاوضاع وكذا وتجيك الكوافيره هناك
تنهدت:ليلى متأكده ان هالكوافيره كويسه
ليلى:هم ثلاث اصلا .. وبعدين ماما هي الي قالت لي عنهم .. تقول مررررره كويسين .. يلا يلا روحي البسي عباتك ..
انا:طيب البطاقات الي عطيتك اياها عطيتيها رغد والهنوف
ليلى:رغد ما شفتها بس قلت للهنوف تعطيها
انا تنهدت: طيب .. وين عباتي الواسعه .. ما شفتيها كانت هنا
ليلى تأشر:هاذي هي... هههههههه ريحتك حلوه
ناظرتها بنص عين:طبيعي توني متروشه ايش رايك
نزلنا وركبنا السياره
ماما:لازم تتأخرين
قلت بتوتر:ماما .. الحلى من وين جبتوه ؟
ماما:يا ربي انتي لا تشغلين بالك بالاشياء التافهه
انا:ماااماا .. مو تافه هذا حلى زواجي .. طيب ... واللبس حق الي بيقدمون القهوه ؟
ماما:ايه نفس الي اخترتيه
انا:طيب شغالات صح .. انا مابي حقات القصر
ماما:اففف .. والله يا بنتي كل شي زي ما قلتي هههههههه انا ما سويت كذا يوم جيت اعرس
انا:ماما .. وشو عرسي لازم كل شي يصير كويس .. كم الي بيجون ؟
ماما:عمانك وحريمهم وعيالهم وخالاتك وعيالهم وناس يعزون علينا .. .واهل المعرس ومعازيمهم
انا اخذت نفس:ايه مابي زحمه .. طيب والمصوره .. ؟
ماما:شجن وبعدين معك .. وش هالاسئله ليه مشغله بالك ..
انا التفت على ليلى بسرعه:فستاااني وينه ؟
ليلى ارتاعت مني:مدري ..!
ماما:ابوك وداه القصر .. شجن اركدي تراك اربكتيني معك
مسكت شنطتي بقوه وانا احس اني خايفه كيف بيعدي هاليوم .. اخذت نفس عميق وانا افكر واتخيل الاحداث الي بتصير اليوم
دخلت القصر .. طالعت الدرج الي تدربت عليه كثير .. وطالعت الطاولات .. كويس زي ما اخترتها سكري وذهبي ..
طالعت القصر كله وانا ارقى مع الدرج .. كل شي تمام .. ااااااه بس
الساعه سبع بالليل وصلو خالاتي ..
انا كنت لابسه الفستان وجاهزه .. كنت جااااايعه ما رضيت اتغدى بس افطرت ..
دخلت خالتي مووضي:شووووووفو القمر .. حبيبتي شجوووون مبروووك
جت تبوسني وانا رديت لها الابتسامه:الله يبارك فيك خالتي
طالعتني من فوق لتحت:والله قمر .. لو ان ولدي عموري كبير كان اخذتك له .. مشالله مشالله وش هالزين يا بنت غطيتي عليناا هه
ماما بثقه:ايه العروس وش رايك
خالتي موضي تفصخ عباتها:اهم شي اني انا وياك مطقمين
ضحكت عليها اجاملها وانا متوتره والكوافيره تكمل المكياج ..
ما طلبت منها تحط مكياج كثير ما احبه .. بس شادو خفيف ذهبي .. وقلت لها تكثر كحل .. وبلاش خفيف وحتى ما رضيت احط اساس الا بعد اصرار من ماما.. انا بصراحه كنت مبهوره بشكلي بس توقعت اكون احلا من كذا .. بس يمكن من الخوف حسيت كذا
شوي شوي خالاتي بدو يجون الغرفه .. وعيال عماني الصغار كل شوي يجون يسلمون وماما تصرخ عليهم .. بدو يجون المعازيم وماما طلعت بره .. وجلست انا وليلى
انا:ليلى .. مره خايفه ..
ليلى:لا تخافين ليش كذا هذا .. وقسم بالله تجننييييييين
انا:فيه ناس كثير جو ؟؟
موده بنت خالتي:لا عاديين .. انتي ليش متوتره
هاجر بنت خالتي بعد:وانتي ايش رايك عروس يعني
التفت على الكوافيره:خلاص مشكوره .. اذا تبين تروحين يعني
ابتسمت الكوافيره:لاا شو هالحكي ما خلصت .. لازم كمّل ميك اب
طالعت ليلى وانا اتأفف .. عطتني نظره بإبتسامه كأنها تشجعني
دخل واحد من عيال عماني الصغار اسمه مشعل .. ومد لي ورده بيضا على اصفر شويه
مشعل:مبروك يا العروسه
اخذت منه الورده وانا اضحك:الله يبارك فيك يا قلبي ..
ناظرته بخبث:من وين جايب الورده يا الدوبي
مشعل كان بثالث ابتدائي:ههههه جبتها من الكوشه
ضربته بالورده على راسه بشويش:خلاص مره ثانيه لا تسويها.. يا ويلك لو شافوك البزران الثانين وخلصو الورد
مشعل:اصلا امك صرخت علي
تنهدت بإبتسامه يا حبي لها ماما .. مسكت مشعل وقربته :تعال بقولك شي
مشعل:وشو
انا:شفت عبدالله
مشعل:ولد عمي زياد
انا:اييه عبدالله ولد عمي زياد .. جا ؟؟
مشعل:مدددري عنه ..
توه بيطلع الا مسكته:تعاااال .. روح شوف هو جا ولا لا
قال بدون نفس:وانا فاضي بروح العب مع
قاطعته بدلع:مو عشااني يا الدوب انا عروس
راح وهو يجرجر رجوله:طيب
ناديته:ارجع لا تجحد
موده:ههههههههههه وانتي وش عليك بعبدالله ولد خالتي ..
ناظرتها بنص عين:والله اخوي وابي اشوف جا ولا ما جا .. عشان اعرف يعني اذبحه ولا لا
هاجر:هههههههههههههه .. الله يخليكم لبعض يختي مدري وش الي مخليكم كذا اصحاب
قلت وانا طالع نفسي بالمرايه:اخوان لو سمحتي
دخلت ام حمد:الف الصلاة والسلام عليك يا حبيب الله محمد كلولولولولولولولولولوش
انا ارتعت والتفت لقيتها واقفه بكامل زينتها وطابه علي انا قمت وسلمت عليها
ام حمد:مشالله تبارك الله سم الله عليك من الحسد و.......
بدت تقول كلام كثير وتقرى علي وانا مبتسمه وعلى وجهي علامة استفهام
ام حمد:يا خوفي تهبلين بولدي
نزلت راسي وانا مستحيه .. وش الفايده يحرجون خلق الله
دخلت وراها حرمه
ام حمد:صالحه تعالي شوفي مرت ولدي
جت صالحه هاذي تبوسني:والله زين ما اخترتي يام حمد .. مشالله .. هاذي بنية عادل الله يرحمه
اخذت نفس عميق لما قالت عادل .. يعني تعرف بابا ..
ام حمد:اييه بنية عادل ولد حصه
بدو يتكلمون وانا سفهتهم وبديت افكر .. انا مو زوجة حمد الحين .. ؟؟!
ما وقعت ..!؟ هو على اساس ان هذي ملكه بس بقصر لانه ملكه وزواج مع بعض
التفت على ليلى وقلت بهمس:ليلى .. انا ما وقعت .. ؟!
ليلى:وقعتي ايش ..!؟
انا:الـ .. مدري بس انا مو زوجة حمد اصلا
دخلت ماما فجأه ومعها كتاب:يلا شجن وقعي ..
طالعت الساعه كانت ثمان .. بدري توهم يجيبونه ..
حطته قدامي ومدت لي القلم .. جلست اطالع الكتاب وانا سرحانه .. بمرجد توقيع صغير راح تتغير حياتي
مسكت القلم بس ما وقعت زي اي توقيع بالدنيا
اول شي رسمت نجمه .. وكتبت فوقها حرف الـ 'S' لانو حرفي .. وحطيت خطين عشوائيين عليهم .. ابتسمت وانا ارجع القلم لماما .. اتذكر هالتوقيع كنت انا وعبدالله وقتها نشخبط وهو علمني كيف ارسم نجمه .. واخترعت انا وياه هالتوقيع .. عمري ما راح انسى هالذكريات
طلعت ماما وهي عيونها مغرقه بالدموع قالت وهي عند الباب:جعل ربي يكتب الي فيه الخير
باركت لي ام حمد وصالحه هاذي وطلعوا .. وناس تدخل وناس تطلع وتجيني وحده تقول المسجل خرب تجي بعدها وحده تقول لا صلحناه وحده تجي تقول البوفيه تأخر بعدين يطمنوني انه وصل .. يعني حاله مستحاله من كل شي
فجأه جا مشعل
اول ما شفته كشرت بوجهي:ساعه الا ربع رايح تشوف وينه
مشعل وهو يلهث:وش اسوي ابوك قالي اشيل اغراض اوديها لامك ..
ضحكت على شكله المكسين وقلت بحنيه:طيب جا .. ؟
مشعل وهو يطلع:ايييه جا
تنهدت بإرتياااح ..
مر الوقت من غير ما احس .. كنت اقدر اسمع صوت راشد الماجد يغني .. كان الكولكشن الي اخترته كله راشد وعبد المجيد وكم اغنيه ثانيه .. والزفه خليتها مجرد موسيقى هاديه
انضرب الباب
موده تتأفف:يا ربي هالبزران وش يبون
انا:دخليهم عادي
ليلى:معطتهم وجه انتي بزياده
دخل فجاه بدر:سجن ؟
انا انصدمت بدر وش جابه هنا .. ؟ معقوله بابا عزم سيف .. طيب عزم سيف وش دخل بدر يجي .. يمكنه عزم اهل سيف كلهم
جا وسلم علي:صرتي علوسه ؟
ابتسمت له:ايه وش رايك فيني حلوه
بدر:ايه
قربت له:بدوري انت كيف جيت هنا مع مين
بدر:مع ماما
عقدت حواجبي:وعمو سيوفي جا ؟
هز بدر راسه:لا عمو سيوفي راح المدام
المدام .. هههههههه الدمام .. سيف بالدمام .. طيب انا امس بالليل مكلمته .. وش جاب بدر .. ؟
مسحت على راسه بإبتسامه
دخلت وحده لابسه فستان وردي .. جسلت اطالعها بصدمه ..
قلت لا اراديا:رغد .. ؟!
مدت يديها وحظنتني:صرتي عروووووس يا بننننتي
طالعتها كويس:رغووده وحشتييينيي موت
رغد:مبروووك يا العرووووس
انا:الله يبارك فييييك .. وانتي مبروك تزوجتي
رغد هزت راسها جا بدر يسحب طرف فستانها:خالتي رغد حلوه سجن صح
انا ورغد بوقت واحد:تعرفينه ؟
انا عقدت حواجبي:انا اعرف سيف دكتور بابا الي بدر يصير ولد اخوه
رغد سكتت شوي:سيف ..!؟ لحظه بدر ولد اختي ..!؟
فجأه ضحكنا
انا:مشالله اختك جاها ولد والله خبري فيها اخر مره كانت حامل
رغد تمسح على راس بدر:ايييه كانت حامل فيه .. اجل تعرفين سيف اخو رجل اختي ؟
هزيت راسي ..
ليلى:ايه تعرفه هو وخشته
رغد:وانتي بعد .!؟
ليلى تتنهد:ايييه .. حلو صح
رغد تغمز لليلى:تراه يدور على عروس
ضحكنا كلنا فجاه دخلت ماما : شجن يلا .. الزفه
انا قام قلبي يدق اكثر واكثر تكلمني ليلى وتكلمني رغد وموده وهاجر وانا ماني حول احد .. بس متووووووترررره مووت
طلعت بره الغرفه لقيت الاضواء مطفيه والمصوره جاهزه .. مغصني بطني وحسيت نفسي انكتم من الخوف .. غير كل هذا ابتسامتي ماني قادره امسكها من الفرحه ..
ماما تعدل فستاني وليلى تعدل بشعري ..
ماما:يلا ..
مشيت بهدوء زي ما تدربت وبدت الموسيقى الهاديه .. حطيت اول رجل عالدرج واخذت نفس عميق .. ثاني درجه .. واخذت نفس من جديد .. حسيت اني بطيح واتفشل او بيصير لي شي نسيت انتي متدربه على هالشي الف مره .. بطني مرره يعورني والورد بيدي ماسكته بقوه مرره وانا مو حاسه فيه
خلصت الدرج وتنهدت .. عديت الجزء الاصعب .. جلست اطالع الناس .. ما توقعت ان الحضور كثثثثثثثثثيرين لهادرجه
انا خبري فيها ملكه .. كان فيه ناس اعرفهم وفيه ناس لا .. وصوت الزغاريط والتصفير وناس تصلي على محمد الظاهر انهم خالاتي ..
والبنات الصغار يأشرون علي بفرحه وانا مبتسمه غصبن عني .. انا عروس يعني .. ياربي ماني قادره اتصور هالوضع الي انا فيه الحين ..
طلعت بشويش عالكوشه حسيت اني وطيت فستاني بس جتني ماما بسرعه وعدلته .. وفلاشات المصوره كانت تأذي عيني بس حاولت اني اتجنبها اطول فتره ممكنه
كل شي صار بسرعه فجأه لقيتني جالسه على الكرسي بالكوشه وقدامي صديقاتي يرقصون .. وانا اطالعهم بإبتسامه ..
مرره مبسوطه لدرجه ماني متخيلتها .. وحسيت ان التوتر الي فيني بدا يروح شوي
الحريم يرقون يسلمون علي .. مره اوقف للي يستاهل ومره اجلس اذا كانت وحده مو كبيره .. كنت اطالع فساتين الحريم هم تكلفو عشان ملكتي ولا لا ... وخصوصا اللي ما اعرفهم اللي من اهل حمد .. شوي جتني ماما تكلمني قالت بيدخل حمد الحين ..
بدى قلبي يدق .. ويدق ... ويدق .. وكل شوي ابلع ريقي ... ظلم المكان .. وانا وقفت انتظرهم يجون ..
من غير اي مقدمات لقيت حمد داخل بالبشت الاسود ومعه ابوه بو حمد .. ما كانت مشيتم هاديه مثل مشيتي اول ما دخلت ولا كان حمد شاق الابتسامه من الاذن للأذن مثلي
كان ثقل .. مررره ثقل .. كنت اطالع حمد يقرب واصوات الزغاريط وكل شي حولي مسوي جو انا ماني حاسه فيه
بس جالسه اشوف الشخص الي بيجي شريك حياتي الي بقضي باقي عمري معه ..
الانسان الي مفروض يكون ابو عيالي والي من الحين مفروض اعرف عنه كل شي لاني بعيش معه تحت سقف واحد
حمد كان اسمر سمار متوسط .. وشعره خفيف على شكل حرف الـ '' M '' يعني جهتين الشعر الي فوق حواجبه على طول داخله شويه وما كان شعره كثيف شكله يقصه .. كانت السكسوكه مرسومه على ذقنه بإتقان .. والنظاره الي على وجهه اول مره اشوفه صدمتني شوي بس على الاقل خلت شكله الطف ... كان وجهه عريض الحين صار ااصغر شوي ..
وكان جثته كبيره .. وشكله مره رزه بالبشت وبجمبه عمي بو حمد .. بالثوب والشماغ الابيض مرسم .. واهم شي الكرشه الي يومني صغيره كنت افتكره شايل بيبي فيها وانتظر بفارغ الصبر وقت الولاده
بغمضة عين كان حمد واقف جمبي وانا اتنفس بسرعه مدري هو خوف ولا ايش ... كنت اتذكر كلام ماما .. مو لازم احب حمد المهم الاحترام .. لازم ابدى حياة نظيفه من جميع النواحي إبتدائن بإخلاقي واحترامي لزوجي .. الخ
وهذا يحتم علي اطبق كل هالاشياء مع اهله بعد .. مد لي عمي بو حمد يده وسلمت عليه وانا ابلع ريقي .. بارك لي وانا سلكت له وكنت ابي ابين اني واثقه بنفسي وماني متوتره قد الامكان ..
اما حمد كان واقف وساكت .. جت المصوره لقطت لنا كم صوره احنا انا وحمد وعمي وشوي جت ام حمد والعنود .. العنود كانت متكشششششششششخه مررره .. بس فوق كل هذا كانت نفسها بخشمها ورافعته فووق ..
جلسنا انا وياه وبو حمد طلع .. جت وحده من بنات عماني صغنطوطه ومدت لحمد علبه كانت رافعتها بوساده ذهبيه ناعمه وصغيره من اختياري طبعا
فتح الصندوق .. خاتمين ذهبيين ... ما راح انسى لمعة الخاتم اول ما فتح العلبه .. اخذت نفس لا ارادي اول ما شقت الخاتم
خلاص هذا الي بيربطنا ببعض ..
مسك الخاتم واخذ ايدي بكل برود وثقل .. طبعا حسيت ان هالثقل طبع فيه عشان كذا ما تحسست كثير .. دخل الخاتم بإصبعي وانا اطالعه وقلبي يدق بقوووه لان حمد قريب مني لهادرجه
مسكت الخاتم الثاني ومسكت يده الي كانت اكبر من يدي بكثير وكلها شعر .. تقززت شوي بس لحد الحين مبتسمه .. دخلت الخاتم بهدوء لكنه فجأه وقف ما رضى يدخل اكثر
سحب حمد يده مني بعنف ودخل الخاتم بقوه .. انا ارتعت من حركته بس قلت اكيد استحى
بعد فتره كذا قرر الاخ انه يكلمني
حمد:مبروك
انا حسيت اني توترت اكثر لمن سمعت صوته .. بلعت ريقي وقلت:الله يبارك فيك ..
وعم السكوت من جديد .. صوت راشد بأغنيه ( ادعي علي بالموت ) كان مالي القاعه .. الصوت قوي لدرجه حسستني اني اهتز بمكاني من الروعه .. مدري يمكن كنت انا الي ارتجف من الخوف .. لكن الخوف من وشو مدري
يمكن من المصير الي بيلاقيني او القدر الي دبست نفسي فيه .. بس كأني حاسه اني ما راح اندم ..
كنت ما اشوف هالناس الي تضحك .. بلا مبالاة .. كنت احس انو محد جا هنا عشاني انا _الا من رحم الله _
حسيت على كثرتهم وهي ملكه بس .. على قلة الي حضروا هالملكه معي بروحهم وبمشاعر الفرحه لي
حسيت ان الانوار كانت خافته مع اني غلطانه .. وحسيت ان صوت راشد هادي على عكس الي انا جالسه اسمعه الحين
حسيت اني لحالي عالكرسي الي انا جالسه فيه .. وحسيت اني بدخل عالم جديد
دموعي بدت تتجمع وكان لها اسباب كثيره .. اولها لمن طالعت بعيون ماما .. شفت فيهم دموع لكن ماهي دموع الام
ماما تستحق كلمة " خالتي " مجرد خاله ..
صحيح تعبت عشاني بس ما حسيت انها بتقدر تملا هالفراغ الي تشكل بداخلي
كنت وقتها بهالحظه محتاجه .. ام تكون معي تفرح .. وتفرحني معها
محتاجه امي هاله تعدل لي فستاني .. محتاجه امي هاله عشان تخليني انام وانا بالي متطمن وماني مرتبكه او متوتره
محتاجتها تبوس خدي وترفع لي معنوياتي ...
كنت محتاجه ابوي عادل يدخل مع حمد .. يبوس جبيني ويدعي لي بالتوفيق .. بهالحظه بس كنت محتاجته
يعطيني هدية زواجي بكل فرح .. يوصي حمد علي .. يعلمني قد ايش انا حلوه الحين .. وكيف صرت لمن كبرت ..
كنت بهالحظه محتاجه اخت .. تجي تروح .. تتطمن على شكلي كويس ولا لا .. تراقب كل شي .. تتأكد انو مافيه شي ناقص
وتبكي لانها بتفارقني .. بهالحظه كنت محتاجه اخت تعاتبني لانها بتودعني .. تعلمني انها راح تنام بسريري كل يوم عشان تحس بوجودي
كنت بهالحظه محتاجه اخ .. عفوا .. محتاجه عبدالله يكون حاظر هنا .. يحاول يكون زي ابوي تمام ويوصي حمد علي ..
يبتسم لي ويدعي لي .. ويسولف لحمد عني ويعلمه قد ايش انا هبله وبزره ..
كنت محتاجه بهالحظه اشياء .. لكن ما لقيتها .. بهالحظه بالذات ما لقيت هالاشياء الي ابيها ..
كل هالاسباب كانت كفيلة بنزول دمعتي .. الي الكل افتكرها دمعة فرح او دمعة فراق
لكن محد يدري عن الي بداخلي .. رغم انه مفروض يكون احلا يوم بحياتي كان اكثر يوم بحياتي حسيت فيه بالنقص
زوجي ما اعرف اي شي عنه .. الانسان الي جالس جمبي ما احس بأي شي اتجاهه
ماعندي ام تطالعني وتقرى علي من العين
ماعندي ابو يدخل معي ويبين للكل ان لي سند واني ماني لحالي
ماعندي اي شي يستاهل اني احس بالامتنان والفرحه ..
الا عبدالله يمكن .. ربي عوضني فيه .. لكن .. انا جرحته .. ومعترفه لنفسي بعد
وكانت الثواني تمر بطيئه جدن .. بس كنت اسمع صدى الاصوات حولي واحس اني مخنوقه وابي اطلع من هالمكان
فجأه ومن غير اي مقدمات سمعت صوت ماما تهزني
ماما:شجن يلا حبيبي قومي .. قومي
طلعت من دوامة التفكير الي دخلت فيها من شوي وتلفت حولي بروعه:هاه ..
المكان شبه فاضي .. الكل بصالة الطعام .. وحمد واقف ينتظرني اوقف .. طيب ليش ؟؟
اها بنطلع .. بدى قلبي يدق اكثر واكثر .. مابي اجلس معه بمكان لحالنا .. كنت خايفه ..
مسك ايدي عشان يساعدني انزل من الدرج ... نزلت بهدوء زي ما رقيت بهدوء وانا اتلفت حولي ..
وابتسامتي طفت .. بس ما اختفت .. كانت صغنونه مره مرسومه بوجهي ..
اول ما ترك حمد يدي حسيت بإرتياح مدري وش سببه .. بس لانه تركها
ماما تعدل شي بشعري: يلا عشاكم بالفندق ..
جا سؤال ببالي .. بس حاولت اسأل هالسؤال بهمس مدري ليه .. مستحيه من حمد يعني ..؟!
انا:مين بيوصلنا
ماما تطالع جوالها:والله ابوك يقول عبدالله..عاد انا مدري عبدالله ولد عمك ولا عبدالله اخو حمد
تكلم حمد فجأه:لا يا خالتي عبدالله اخوي
انا اول ما قالت ماما عبدالله ولد عمك كبرت ابتسامتي لا اراديا لكن يوم قال حمد عبدالله اخوه تحطمت
انا:ماما لا دقي على عبدالله ولد عمي خليه يوصلنا للفندق
سكت شوي خخخ كلهم عيال عمي
انا:اا قصدي عبدالله ولد خالتي
التفت حمد علي لكن اول ما حطيت عيني بعينه نزل راسه .. مدري مستحي ولا لا
حمد:لا خلاص اخوي برا ..
مسك يدي بعنف ومشى عشان الحقه .. عنيف هالانسان
ودعت ليلى وماما وكلن .. لانو من الفندق على طول بنطلع للمطار عشان شهر العسل مافي مجال للنقاش بأي شي .. مافي قعده
ركبت السياره .. وكنت اطالع عبدالله اخو حمد .. كلهم نفس الطقه يشبهون بعض .. عيال بباي
كان كلن ساكت لحد ما وقفت السياره عن فندق الرياض هوليدي إن ..
بالجناح فوق .. انا استغربت لمن لقيت ماما هناك شكلها وصلت قبلنا وفيه المصوره .. صح احنا ما صورنا ..
طالعت الساعه .. كانت 3 .. وراسي داير بي من التعب وكل شي .. كنا تونا بنصور لكن حمد اعترض ورفض الفكره رفض نهااائي
وانا ما قررت اني اناقشه .. كنت خايفه منه احسه عصبي وحار وعنيف ..
ماما طلعت وابو حمد جا سلم علينا مره ثانيه وطلع وعطاني هدية زواجي الي كانت عباره عن خاتم الماس .. ما كان احلى شي بس الهديه بتعبيرها مو محتواها
بس ما فضا الجناح انا خفت .. بدى قلبي يدق اكثر واكثر
التفت حمد علي وجلس يطالعني بحاجب مرفوع
اول ما رفعت راسي قال بإستهزاء:مشالله تستحين
انا استغربت من طريقته بالكلام.. وش فيه هذا ..!
حمد صرخ:اسمعي .. ارفي راسك وطالعيني لمن اكلمك
رفعت راسي بخوف وانا مرتاعه .. ليش يصرخ .. انا اخاف من الصراخ .. اشين شي عندي بالدنيا الصراخ .. مره اتوتر لمن احد يصرخ علي .. عشان كذا دموعي ما تجمعت بعيوني وبس الا نزلت بسرعه مره وانا ارفع راسي بشويش وبراسي الف سؤال وسؤال
طالعت حمد بخوف ما قدرت احط عيني بعينه .. يخوف
حمد:انا واحد كنت مملك وبتزوج وجيتي انتي قبل زواجي بأسبوعين مدري من وين نطيتي لي وسويتي مشاكل بيني وبين اهلي وبسبتك طلقت البنت الي عشقتها وبنيت احلامي معها .. فقلت لك من الحين وقد اعذر من انذر
ويبدى يصرخ:والله ثم والله لو قربتي لمي ولا كلمتيني بشي تافه او فكرتي حتى تطالعين فيني لا اذبحك هنا فاهمه .. انقلعي جوا واتركيني انام
انا شهقت من الصياح ودخلت الغرفه وسكرت الباب ابي احتمي منه ومن شكله الي يروع ومن كلامه الي خلاني ارتجف بمكاني
ليش طيب انا وش ذمبي يقول هالكلام .. اصلا مستحيل اهله يغصبونه رجال طول بعرض مغصوب
جلست عالسرير وبديت ابكي .. اكرهه الكلب الحيوان الحقير .. انا ابي اعرف وش سويت بحياتي عشان استاهل هذا كله
كل شي مر قدامي بسرعه .. كل شي صاار بسرعه غريبه.. بكيت وبكيت .. بيوم زواجي الي مفروض يكون احلا يوم بحياتي صارت لي كل هالاشياء
طيب وش اسوي يعني .. بتطلق وانا توني متزوجه .. ؟؟!
طيب .. هو ليش ما قال انه ما يبيني .. ليش بس ليش .. طيب ليش يصرخ علي .. ليش يكلمني كذا
كنت ابكي وافكر كثير .. بكيت لحد ما صدع بي راسي من البكي وما حسيت بروحي الا نايمه على صوت اذان الفجر ..
قمت على صوت ضرب عالباب .. ماهو خفيف طبعا .. فتحت عيوني وانا مكشره ..
حمد:قومي وجع كل هذا نوم
انا صرخت من القهر الي فيني كان ودي .. مدري ماعرف اعبر بس ودي اسوي به شي
انا:طيب قمت قمت
قلت بهمس:وجع جعلك اللي منب قايله يا حمار..
وحسيت بدموعي على طرف عيوني مره ثانيه .. قهرني الكلب المنحط السافل ال ال ال ... ال كل شي
طالعت المرايه .. كنت نايمه بفستاني .. والحكل سااايح على وجهي .. كان شكلي ساحره مو عروس .. دخلت الحمام وغسلت وجهي
طلعت وفككت شعري .. ودخلت اتروش ..
وانا بالحمام اسمع صوت حمد يضرب باب الغرفه:انتي اخلصي ..
انا خفت يا ربي صراخه يخوف .. سكرت المويه بسرعه وبروعه وبربكه ولبست الفوطه وطلعت بسرعه:طيب طيب بس ببدل ..
طالعت حولي ما لقيت الشنطه .. شكلها برا ..
توني بطلع الا تذكرت انو ما علي الا فوطه .. حقت الفندق بعد ..
خفت شويه وتوترت لو جا هذا وضرب الباب من جديد .. وبدى يصرخ زي قبل شوي كان مت فيذا من الروعه ..
فتحت الباب بشويش وطليت بوجهي .. لقيته جالس يعدل ثوبه قدام المرايه
تكلمت بهدوووء وبشويش خايفه انه يصرخ :ممكن تعطيني الشنطه ..
طالعني ثواني وتأفف وحرك الشنطه برجله لحد ما قربها لي وقال بنرفزه:اخلصي علينا
سحبت الشنطه لجوا وقلت بقهر:طيب
طلعت لي جينز وبلوزه وجلست اتحسب عليه .. تستاهل جعلك ما تتزوجها طول عمرك جعلك تتشوه ومحد يبيك .. جعلك تعيش عاله على غيرك يااااااارب ..
بديت افكر بوضعنا طيب .. خلاص انا تزوجت .. انا وحده متزوجه خلاص .. وش بسوي بعمري الحين .. معقوله يطلقني
وابقى طول عمري مطلقه محد يبيني .. طيب يمكن بعدين يغير نظرته فيني ويحس ان هالزواج كان مكتوب علي وعليه
بس مدري حسيت اني اكرهه ومافيه امل احببه فيني
حسيت اني ببكي من جديد بس مسكت نفسي .. لبست عباتي بسرعه ولفيت الطرحه وطلعت
حمد:اف ما بغيتي .. يلا شيلي شنطتك معك بننزل بنروح للمطار اهلك لهم ساعه هناك ..
انا كنت واقفه استوعب وش يقول .. اشيل شنطتي .. الكبيره الثقيله ..!؟
صرخ :يلا
نقزت من الروعه ودخلت اجيبها .. وقفت ثواني .. لا ما راح اطلعها من الغرفه اصلا ..
طلعت وحاولت اني اكون شجاعه قد ما اقدر
اخذت نفس عميق وفكرت الف مره وش بقول وتكلمت فجأه:ماني مطلعتها
وتنهدت بسرعه .. حتى هالكلمه التافهه ماني عارفه اقولها ..!؟
طالعني من فوق لتحت وقال:كيف يعني ؟؟
كنت بداخلي خايفه يعصب او يصارخ لكن ضغطت على اعصابي ومشيت بكل ثقه قدامه وطلعت:فيه ناس تشتغل اتوقع الفندق محترم لدرجه تعفيني من هالشي
اول ما طلعت من الجناح اخذت نفس عميييييق وانا اتحمد ربي ..
بديت افكر .. انا بحلم ولا بعلم .. حقيقه ولا خيال .. وااقع ولا احلام .. ؟!!؟!
الموقف الي صار امس مر بسرعه .. كل شي بغمضة عين .. يمكن من الصدمه ماني قادره استوعب الكلام الي قاله
يعني كان يحب وبيتزوج وجيت انا وخربت عليه .. والحين هو كارهني طبعا ..؟!
طيب وبعدين .. وش النهايه .. ببقى طول عمري معه كذا يصرخ علي بالشكل وانا اموت من الرعب .. وين احلامي وكلامي عن تأسيس بيت واطفال وشغل و و و ..!؟
حسيت اني غلطت اكبر غلطه بحياتي يوم وقعت بذاك الدفتر .. حسيت العبره بدت تخنقني .. كله منها جدتي .. وكله من ماما لانها رمتني هالرميه .. حسبي الله عليهم
طلع حمد وسكر الباب وبيده الشناط ..
قال بسخريه:غطي وجهك وامشي
قلت بقهر وبين دموعي:مابي وانت مالك دخل وجرب تناقشني بهالموضوع
ونزلت وانا منقهره .. امسح دمعتي وتطيح ثانيه .. اكره حمد مع اني ما عرفته .. كرهت نفسي اصلا يوم واقفت عليه
ياربيه انا وش حطيت نفسي فيه ..
طول الطريق للمطار كنت احاول اداري على دموعي وامسك نفسي لاني مابي ماما تشوفني بهالشكل
خلاص كفايه ربتني لهالحد انا مابي ازعجها زياده هي وبابا ..
تذكرت كلام عمي بهالحظه ( ماهو بأبوك .. )
تنهدت بحزن .. صح ماهو بابا .. بس يله شكل ماما تركتني اتزوجه بهالطريقه وانا ماعرف عنه اي شي يعني زي اي زواج تقليدي ممكن انه يصير بهالدنيا ..
كانت لحظتها يمكن تبي تفتك مني .. اروح ابين لها اني زعلانه ليش ..!؟
امسك نفسي احسن ..
ياربي ليش المطار بعيد .. يحطونه بآخر الدنيا مدري ليه .. اول ما دخلت المطار .. وطالعت حولي .. هالمره مو مثل المره الي راحت ..
هالمره ابي اطلع ولا عاد ارجع ابي اروح لحالي من غير حمد او اي احد ابي ابقى وحيده فتره اريح فيها اعصابي
حصلت ماما وبابا هناك استغربت شويه لانو مريض لكن برضو فرحت .. رحت حظنت ماما
انا:بتوحشييييني مووت
ماما:وانتي اكثر يا قلبي .. عاد ما صارت جالسه تودعيني كأنك ما راح ترجعين عيب الناس تطالعنا
بعدت عنها وانا اضحك:يا بعد عمري يا ماما
وبستها:مشكوووووره مشكوره مشكوره مرره
كنت بداخلي اناظرها وانا كارهتها وبنظرات حب بنفس الوقت مشاعر متناقضه خلتني ابكي غصبن عني
ماما تمسح دموعي:ليش ليش الصياح ؟
انا حاولت ابرر لها:لا بس .. لانو بشتاق لك انتي وبابا ..
حظنتها من جديد:انتبهي عليه كويس .. ولا تضيقين صدره .. واذا لقيتيه صاحي بنص الليل ومافيه النوم عطيه ايس كريم تراه يكيف عليه بهالوقت
بعدت ماما عني وهي تطالعني بإبتسامه:لآ توصيني بأبوك .. وصي نفسك بزوجك .. الله يكتب لك الي فيه الخير يا بنتي
قلت من قلب:ياااااااارب
التفت على بابا كان يكلم حمد وحمد يرد عليه بدون نفس .. طالعت بابا:بابا تكفى انتبه عليها كويس ..
بابا:امك بعيوني ههههه انتي انتبهي على نفسك هاه .. ولا تزعلين حمد .. هه
حمد باين انه يجامل:ههههه شدعوه عمي
بابا:ايه انت اللي لا تزعلها تراها بنتنا وما نرضا عليها ..
وكمل بابا بسخريه على شوية استهبال:عاد تراها شوي دلوعه
قلت بدلع:بااابااا ..
حمد يمشي:يلا نادو على رحلتنا مع السلامه
ماما وبابا:مع السلامه
بابا:في حفظ الرحمن
ماما:تروحون وترجعون بالسلامه
مشيت ورا حمد وانا اطالعهم .. محد جا يودعني الا هم .. وحمد ماجو اهله اراهن انهم بقريتهم الحين .. وانا طبعا من بيجي يودعني يعني .. اااه بس
اول ما ركبت الطياره تذكرت عبدالله .. يوم اقول للحرمه انه زوجي عشان يجلس جمبي .. ضحكت بيني وبين نفسي وجلست جمب الشباك
وبديت اسرح .. لو انه صدق زوجي .. ههههههههههه .. كان صرنا هبال .. وصارو عيالنا مهرجين .. وكل يووووم اجننه عشان يجيب لي ماكدو ..
تنهدت بإبتسامه وانا اطالع طيارات السعوديه بكل مكان .. وحده تطير ووحده تهبط .. اشتقت لعبدالله .. والله هو اكثر واحد ابتمشكل بسبته .. ما قد فارقته من تسع سنين ..
حتى سفرياتي قبل كنا نكلم بعض بس هالمره .. ما اعتقد ..
كانت مفاجئه ماما الي رحلة شهر العسل هذا .. كانت لماليزيا .. بلد العرسان هه .. قالو عرسان قالو ..
بس مدري كم بنقعد ولا ابي اكلم حمد عشان اعرف .. انا ماني صابره ارجع عشان .. يروح لشغله وانا الهى بنفسي .. من الحين بديت اكرهه ..
سرحت كثير وفكرت كثير .. نمت وقمت .. والاخ جمبي كنه صنم .. مرات احتاج الحمام بس مابي انزل نفسي لمستواه واقوله يبعد رجوله عشان اطلع .. انتظر لمن ينام واروح ..
رجعت من الحمام وجلست مكاني .. جلست اطالع حمد وهو نايم .. ماهو اوسم شي لكن شكله مقبول .. يوحي بأنه دكتور بهالنظارات .. يوم طالعته حسيت اني اكرهه .. انا كيف كنت متوقعه اعيش معه حياة سعيده وهو كان يكرهني زمان
اول اتذكر كويس كيف كان يزبد لي .. كان يضربني بس لاني لمست السيكل الاحمر حقه .. وكان يستحقرني بكل شي .. كنت اذا جيت بيتهم وجلست مع العنود نطالع سبيستون كان يستفزني .. يتركني ارجع بيتنا ابكي
اتذكر ذاك اليوم كويس .. لمن كنت عندهم نناظر ريمي .. كان وقتها توه بأول متوسط الظاهر .. ومبسوط بعمره ومسوي كبير علينا
