وتواصل زينة الاعتراف : البنت سندتني لحد ما وصلت الباب وبعدها ركبت مع صهيب في العربية ومشيت معاهو. الشرطي قال ليها :ده كلو عملتيهو انتي؟ ياخي انتي شيطاانة. اعوذ بالله ولا حول ولا قوة الا بالله. انتي تعبتينا معاك تعب ..لكن الحمد لله قدرك جابك المستشفي عشان ربنا يسهل مهمتنا في القبض علي مجرمة زيك .. وانتي قلتي لي صهيب ده اسمو الكامل منو؟ قالت ليهو اسمو صهيب فلان الفلاني ((اللفظة السودانية التي تستخدم للشخص المبهم هههه)) ووصفت ليهو مكان شغلو. قال ليها والعمارة الجابوك منها بالاسعاف دي اساسا سكانها كلهم قديمين مافي الا واحد مستاجر جديد ليهو زي اسبوع. اسمو عطية الحجاز. علاقتك شنو بيهو؟ قالت ليهو والله انا ما بعرف زول بالاسم ده؟ . قال ليها طيب العمارة دي مش جيتيها ليك قريب اسبوع. قالت ليهو ايوة صح. الشرطي :انتي قلتي ما بتعرفي عطية الحجاز ..وجيتي ليك اسبوع. وعطية برضو ليهو اسبوع. وانتي الجابك الشقة قلتي صهيب. والزول المستاجر في الفترة دي واحد مافي غيرو. استحالة يكونو عطية وصهيب مؤجرين شقتين. لانو الشقة المؤجرة في الاسبوع ده شقة واحدة وبما انك ما بتعرفي عطية فالمانع شنو من انو عطية ده هو نفسو صهيب ...ايوووا كويس ..كدة اللغز اتحلا. وبما انو زينة لسه حالتها الصحية ما بتسمح تطلع من المستشفي. وضعو ليها حرس بوليس. قدام الغرفة عشان ما تهرب رغم انها ما حتقدر لانو خلاص زي ما قالت هي الفاس وقعت في الراس. الشرطة تاني استدعت مالك العمارة للتحقيق. اها لمن حققو معاهو وشافو الاوراق الثبوتية للمستاجر لقوها مزورة باآسم واحد اسمو عطية الحجاز. لانو من خلال التحقيقات واكتشافات الشرطة توضح انو عطية ده اساسا متوفي ليهو قريب خمسة سنوات. وبي كدة الشرطة تاكدت تماما انو صهيب ده هو ذاااتو عطية لكن كيف حيقبضوهت لانو مشترك في الجريمة حنعرف في الحلقات الجاية كدي نمشي شويةعلي سمية دي نشوفها خبرها شنو سمية الحبوبة قافلاها في الغرفة وتاني مافي طريقة تتطلع والحاجة الكويسة انو ما شالو التلفون منها وسمية ذاتها مجرمة وعمر مجرم اكتر من ابوها ههههه. اها اتصلت ليهو وبتتكلم براااحة معاهو عشان هتلر ما تسمعها. قالت ليهو اسمعني في موضوع خطير وضروري وارجع لي سريع رصيدي حيخلص وما بقدر احول رصيدي انا مسجونة فصل الخط منها ورجع ليها تاني. اها مالك يا قلب في شنو. وده منو الساجنك ده عشان اجي اكسر راسو قالت ليهو الموضوع انو اهلي قررو يزوجوني لولد عمتي وانا ما عايزاهو وفي نفس الوقت ما بقدر اوريهم سبب الرفض شنو لانو لو عرفو بعلاقتي بيك وانو نحنا متزوجين حيضبحووني من الرقبة لي حدها وانا ما بتزوجو نهائيا. وهسه حبوبة قافلة علي الغرفة وحارساني يرة يعني حتي طريقة للهروب مافي قال ليها يا سكر انتي ما بتعرفي السياسية. قالت ليهو اي بعرفها بس انت لي سالت قال ليها السياسة دي ماشي بيها العالم كلو وحاكمين بيها دول. لي انتي ما تستخدميها قالت ليهو كيف يعني وضح اكتر قال ليها انتي حبوبتك والغيرها بالسياسة بتمشيها علي كيفك. والمثل بقول اتمسكني لمن تتمكني. انتي هسه اقفلي الخط مني وامشي اضربي الباب لحبوبتك حتفتحو وتجيك جوة واكيد حتقول ليك عايزة شنو قولي ليها يا حبوبة انا موافقة علي كلامك وانك عايزة ود عمتك وبرضو قولي ليها انا غبية وما بعرف مصلحتي وين وانا اسفة لاني اتكلمت معاك بقلة ادب وبدون اسلوب واعتذري منها ونزلي ليك دمعة دمعتين عشان قلبها يحن بعد ده ممكن تتطمن ليك وتفك الحصار عنك اها بعد انتهت من كلامها مع عمر. طوالي مشت عملت نفس القالو ليها
