اها حبوبتها فتحت الباب قال ليها خير ان شاء الله مالك بتكوركي. المهم سمية اتكلمت مع حبوبتها هتلر. وشكلها ما صدقتها وشاكة في كلام سمية. وسمية شفتة شديد عرفت انو حبوبتها حتشك في صدق كلامها. طوالي قالت ليها يا حبوبة لو عايزين تعقدو اعقدو هسه دي ما عندي مشكلة. حبوبتها قال ليها. بعقد ليك في الوقت البريحني والكلام ده ما بتحدديهو انتي ..والغرفة دي منها ما بتطلعي ..وطلعت منها وقفلت وراها الباب ..ورجعت تااااني سمية تفكر. قالت مافي حل الا اني ارجع لي عمر تاني. عملت ليهو مسكول. رجع ليها قالت ليهو حول لي رصيد سريع. .وبعدين بفهمك الحاصل. حول ليها الرصيد. وطوووالي اتصلت لي عمار .برة السودان. اها سلمت عليهو ودخلت في الموضوع تووووش .. قالت ليهو :يا عمار انا حاسة بيك زي الما عايزني لانو حبوبة اتخذت قرار بدلا عنك وده ظلم واذا انت لسه ما عايزني فمن حقك ترفض لانو دي حياتك وانا ما عايزة افرض نفسي عليك ولا اعذبك معاي. عمار هنا قاطعها : ومنو القال ليك انا ما عايزك. انا والله يا سمية فرحت جدا لمن حبوبة اختارتك لي انا من زمان بحبك وعايزك بالحلال. وما صدقت انو الفرصة جاتني لحد عندي ..ويا ستي ما تشيلي هم وانا لحد اخر نفس حاكون معاااك ..وان شاء الله ربنا يجمعني معاك علي خير. سمية خلاص كتمت معاها كتمة شديدة. ههه مااافي طريقة سيك سيك معلق فيك. فصللت منو الخط وشكلها يئست خلاص من الموضوع. اها رجعت لحبيب القلب عمر بي تلفون وحكت ليهو الحاصل. قال ليها اسمعي هنا انا الكلام ده كلو ما بنفع معاي. انا عندي ليك فكرة. رايك شنو اجيك في بيتكم. قالت ليهو كيف يعني تجيني في البيت. انت جنيت. قال ليها نصيييح واحسن منك. وبعرف اجيك كيف. وهسه بوريك فكرتي. اثناء ما بتتكلم معاهو باب الغرفة فتح فصلت الخط سريع وعملت فيها نايمة دي حبوبتها دخلت عاينت ليها ورجعت تاني قفلت الباب .. بالنسبة لي زينة الشرطة تاني رجعت تحقق معاها. اها سالوها من رقم تلفون صهيب ملتهم ليهو ... اها الشرطي عشان يتاكد انو ده الرقم قال ليها اتصلي عليهو واساليهو قولي ليهو تعال لي في الشقة ضروري ..افتحي السماعة الخارجية. فعلا زينة اتصلت ..تيت تيت ..وما رد ..تاني كررت الاتصال ..رد ليها صهيب :ياخي انتي ما عايزة تحلي عني لشنو. احذري ما تتصلي لي تاني. قالت ليهو لحظة بس اسمعني قال ليها ولا ثانية وفصل الخط منها طوالي .. الشرطي قال ليها كويس جدا. برضو حنقبضو حنقبضو. اها سمية لمن لقت فرصة اتصلت تاني لعمر قالت ليهو اها فكرتك شنو ؟ قال ليها انا حالبس نقاب واكون قريب من بيتكم ولمن ابوك يكون في انتي تديني جرس عشان انا لمن اجي داخل اسلم بس وما اضطر افتح وشي وما يكشفوني. وحاقول ليها بي صوت رقيق انا صحبة سمية حاسلم عليها واطلع. سمية قالت ليهو هوي دي مخاطرة قال ليها ختي في بطنك بطيخة صيفي. قالت ليهو خلاص اتفقنا ..
