حنتابع زينة ونشوفها بعد طلعت من الداخلية مشت وين مع صهيب .. زينة لمن ركبت العربية مع صهيب ..قالت ليهو انا تعباانة شديد وحاسة نفسي ما قادرة ..وديني المستشفي ..انا لمن اتصلت ليك قبل المرة الاخيرة ..قلت ليك خلاص انا في لحظات ولادة وانت ما اشتغلت بي غير قلت لي اتصرفي وانقذي حالك ... انا بس عايزاك توديني المستشفي ...قال ليها انتي جنيتي؟ عارفة لو وديتك المستشفي حندخل في سين وجيم ..وانتي عارفة الشرطة ما بتريحنا. وهسه بكون اكتشفو جريمتك وبفتشو عليك .. انا عندي شقة في العمارات ببوديك تقعدي فيها وما في زول بجيب خبرك ..وحاجيب ليك ممرضة تتابعك . فعلا ..وصلها لحد الشقة وقال ليها انا عندي شغل بجيك المساء.. اثناء ما هو معاها وقبل يطلع تلفونو اتصل ...رد ..اهلا ..اسمعي هنا. انا جاي ما تكرهينا الله يلعنك. شكلو. ف التلفون كان بتكلم مع مرة ...واتاريها دي مرتو ...متزوجين ليهم فترة طووويلة وعندو منها بنت و3اولاد .. اها قال ليها سمية مالها وكيف ماجات.خلاص اقفلي يلا مسافة السكة واكون معاك ..وطلع طوالي ..سايق العربية ..بسرعة شديدة. لحد ما وصل البيت. اها لقي شادية مرتو ..قال ليها سمية بنتي مالها .. شادية قالت ليهو. :سمية من امس ما جات البيت ما عارفاها وين؟ قال ليها كيف يعني ما عارفاها وين؟ دي مسئووليتك انتي " شادية قالت ليهو ..لحظة يا استاذ انا سمية اتصلت لي قالت لي انا من الجامعه ماشية بيت ناس حبوبة ..قلت ليها اتصلتي لابوك كلمتيهو؟ قالت لي اي اتصلت كلمتو '. قال ليها لالا ما اتصلت لي ولا شي. شادية : وانت ذاااتك امس بايت وين؟ انت لو بايت في البيت كان عرفت بنتك في ولا ماافي. قال ليها انتي مالك ومالي. ابيت ولا ما ابيت انا مافي شي مطفشني من البيت غير وشك القبيح ده .. قالت ليهو قبيح ولا ما قبيح ..خلينا في بنتك دي. انا الصباح اتصلت اصبح ليها. لانها امس قالت. مصدعة قلت اشوف الصداع خف ليها ولا لا؟ وفعلا لقيت تلفونها مقفول ..لمن اتصلت لحبوبتها. قالت البنت ما جاتها اصلا '. وسالتني قالت لي ..هي البنت وين مشت لمن بتسالينا منها .. والله خجلت عديل وهسه راسي شاطب ..سمية دي تكون وين. بتكون مشت لصحبتها في الداخلية. صهيب طوالي قام فيها. داخلية شنو تدخلي النار الحمراء ان شاء الله م تجيبي سيرة الداخلية هنا؟ الله يقطع الداخليات والساكنين فيها. هنا شادية قاطعتو ..قالت ليهو. هسه انا جبت ليك سيرة شيطان كدي اتصل لصحبتها . وفعلا شادية اتصلت لصحبة سمية ..بعد السلام والسؤال عن الحال والخبر. قالت ليها سمية دي ما لاقيتيها ولا جاتك ف الداخلية ولا اتصلت ليك؟ . قالت ليها لا والله يا خالتي . نحنا ذاتنا عندنا مشكلة في الداخلية. في بنت ولدت ورمت الطفل في الحمام. ونحنا من امس الصباح تحقيق شديد والله ما خلونا مشينا الجامعة. شادية قالت ليها الله يحفظنا ويحفظ بناتنا ويحفظكم .. اها وقفلت الخط وبقت محتارة في بنتها سمية وين مشت؟ . الجاية هنشوف سمية وين مشت؟ وبرضو حنمشي علي زينة نشوف حالها كيف ..والتطورات الجديدة شنو
