قبل ما الشرطة تتصل لاهل سمية واللي معاها .. ناس ابوها وامها لمن وصلو بيت حبوبتهت لقو الحريق خفيف يعني البيت ما اتاثر كلو. المهم اتطمنو علي الاوضاع. وصهيب قال لي شادية ة انتي ارجعي البيت بعد ده لانو سمية براها. انا بقعد مع امي هنا وبجيكم بكرة الصباح . وفعلا شادية رجعت البيت وفتحت باب الشقة لمن دخلت غرفة سمية لقتها مافي ..فتشتها في اي مكان برضو ما لقتها خافت شديد ..قالت اكيد البنت دي مشت ليها مكان انا متاكدة. كدي اتصل ليها اتصلت لقت التلفون مقفول ... اتصرفت سريع اتصلت لصهيب حكت ليهو الحاصل .لمن سمع كلامها خلاص شبكتو طشت ..بس قال لي امو انا راجع البيت وبجيك تاني عندي اوراق مهمه نسيتها ما حب يقلق امو. ركب عربيتو وعلي البيت ..طوالي انفصم في شادية انتي السبب. ما جايبة خبر للبنت لمن هسه اختفت وانا متاكد بنتك دي مجرمة حتعمل لينا فضيحة. انا مش قلت ليك البنت دي ما تفارق عينك. وثم ثانيا انتي اي مكان الناس ماشيين ليهو انتي جارية وراهم . شادية قالت ليهو ..حبوبتها حارساها وقالت لي انتي م بتحرسيها لانو قلبك ممكن يحن عليها وتفتحي باب الغرفة انا العلي عملتو وهسه سيب الكلام الكتير وشوف البنت دي طارت وين. اها اتصلو لي كل صحباتها واهلهم م خلو زول. اخر زول سالوهو كان بتاع البقاله تحت العمارة ..قال ليهم سمية دي جاتها واحدة لابسة نقاب ..انصار سنة كدة ركبت معاها في عربية ومشت شكلها صحبتها. اها صهيب طوالي دخل البيت جوة ونهائيا ما خت في بالو انو المنقبة دي حتكون ولد اخر حل اتوصلت ليهو شادية انهم يبلغو الشرطة. صهيب قال ليها جنيتي يا مرة انتي ..نبلغ الشرطة كيف يعني ونقول ليهم شنو؟ والناس حتقول عننا شنو. ممكن تاني يالفو فينا زي ما عايزين. ممكن يقولو سمية مشت في طريق غلط ..لو بلغنا الشرطة حتحصل مشاكل كتيرة. قالت ليهو اها حنقعد ونكتف يديننا. قال ليها نفتش المستشفيات كلها احتمال هي وصحبتها حصل ليهم حادث واحنا ما جايبين خبر. اها اتوكلو علي الله انهم يفتشو المستشفيات ... بالنسبة لي زينة لسه مجرجرة تحقيقات وكل مرة يسالوها ويستجوبوها ..اخر مرة البوليس قال ليها. امكن انتي حكمك حيكون خفيف. انتي مشكلتك يا بنت الناس لو كان من البداية وبعد عرفتي الراجل ده عمل فيك كدة وبما انو رفعك من الطريق بي عربيتو واقنعك يوديك لبناتو ..هو كدة خضعك وغشاك عشان يقدر يخطفك بدون ما تحسي ويعمل العايزو وبعد ذلك يبتزك. هسه لو اتصرفتي واتصلتي بالشرطة ما كان حتكون عندك اي تهمة وموضوع ما كان اتطور اصلا ..كان الراجل ده حنتهمو بي جريمة اختطاف واغتصاب مع سبقزالاصرار والترصد.. لكن انتي خفتي واستسلمتي ليهو. وبي كدة ذاتك دخلتي في جريمة وضيعتي حقك بي يدك ..اها قال ليها اخر شي ..عايزين منك صورة للسيد صهيب ..عندها صور في تلفونها لصهيب ..ورتهم ليهو. وخلاص حفظو شكلو وكلها سويعات بسيطة وحيقبضوك يا صهيب .. اها صهيب فتتش قريب 3مستشفيات في الحوادث ما لقاها ..اخر امل انو يمشي المستشفي المرقدة فيها زينة ودخلو فعلا المستشفي وسالو وما لقوها برضو. اها صهيب قلبو حن ولا حب استطلاع ولا حس بشنو ما عارفة .. قال احسن امشي لاخر مرة غرفة زينة اتطمن عليها. ولسوؤ حظو ..لمن قرب من الغرفة شاف البوليس واقف برة ..عرف انو خلاص الموضوع اتكشف والشرطة اتدخلت فيهو واكيد رجلو جاية في القصة ..طوالي عايز يجري كدة البوليس وهو طالع من زينة شافو ليك .. وطوالي حصلو ثابت ثابت لكن صهيب جري جري لمن شادية اتخلعت الراجل ده مالو جري من شاف الشرطة. اها الشرطي حيقبضو ولا لا.
