#ولد_عمي ( الجزء الثالث من سلسلة اقرباء ولكن )
الفصل الحادي عشر
رحيق بخوف.. كنك يا الصافي في حاجة مضايقاتك
*الصافي ماردش عليها وهيا سكتت لان شافته كيف ضاغط على ايديه على الدومان بتاع السيارة وعرفاته انه واصل قمة العصبية فسكتت احسن
ووصلو للشقة نزلها وطلع طول ماردش عليها ولا كلمة وهيا قعدت في حيرتها واتصلت حتى بامها تسئل اذا في اخبار وصلت على زين ممكن تكون سبب في عصبيته وغضبه لكن قالت ليها امها ان مافي شئ وان اصلا الصافي اليوم ماجاش للحوش بكل *
ناصر .. اهدا بس غير فهمني كنك
الصافي بعصبية .. انت ماسمعتش حلقة رحيق اليوم
ناصر .. اه سمعتها كنها
الصافي .. شنو كنها تي هيا تحكي على زين واللي داره زين فيها يعني تحبه
ناصر بثقة .. رحيق ماتحبش زين يا الصافي
الصافي .. شنو عرفك انت وكيف ماتحبش زين وهيا كبرت معاه وهيا مسمية ليه اكيد تحبه
ناصر .. قلت لك ماتحباش حب الحبيب تحبه كولد عم كسند وعزوة ليها لكن حب الحبيب لا
الصافي .. غير منين جايب الثقة هذي بس
ناصر .. ليا مصادري
الصافي بتأفف .. به طمني وقولي من
ناصر .. من مانقدرش نقول لكن كون واثق ان رحيق مافيش حد في قلبها واذا في فمش زين
الصافي بتنهيدة .. انت عارف حاجة نا متأكد حتى باتي وعمي وخالي عارفين زين وين وليش دار هكي
ناصر .. ليش واثق هكي
الصافي .. باتي مش قالب الدنيا عشان يدور على زين دليل انه عارف وين وعمي اسامة عايش اموره تمام وكلنا عارفين زين بالنسبة لعمي شنو وزيد معاها امي وعمتي خلود مرتحات مش قالباتها مناحة على بعد زين ممكن مش عارفات ليش دار هكي لان في نظرة حزن في عيونهن الاثنين لكن مطمنات عليه انه بخير
ناصر .. اما انت مشروع محقق مش عادي
الصافي .. مش مسئلة محقق القصة اني بس عارف هلي كويس وعارف شنو زين ليهم اللي حصلوه بعد سنين وصرفو فلوس واجد بيش جاء
ناصر .. ربي يرجعه طيب وينعرف ليش دار هكي
الصافي .. امين يارب
*وطلع الصافي من عند صاحبه بعد ماهدا وروح للشقة لقاته رحيق بلهفة استغربها *
رحيق .. انت كويس
الصافي بهدوء.. كويس كنا شنو في
رحيق .. كنت متعصب وحطيتني وعديت بدون ولا كلمة وقعدت نستنى قلت بالك عنده شغلة مهمة لكن طولت انشغلت عليك
الصافي وهربت دقة من قلبه لكلامها ولهفتها عليه .. وليش ما اتصلتيش
رحيق .. خفت تعيط عليا
الصافي .. اتصلي امتى ماتبي انتي مرتي رحيق
*وعلى الكلمة هذي رحيق حست برجفة في قلبها ومعرفتش شنو سببها*
رحيق .. معليش يا الصافي ملحقتش انطيب غذاء بسبب خوفي عليك ومازالت ماعرفتش انسق اموري بين يومين العمل والغذاء
الصافي .. ولايهمك هنا يومين نجيبو غذاء من برا عادي واصلا نا كنت ناوي انجيب معاي غير في حاجة صارتلي ضايقتني نسيت نجيب تو بنطلع نصلي ونجيب معاي
رحيق .. به
*وطلع الصافي لصلاة العصر في الجامع وبعدها خطم على مطعم جاب غذاء ليه وليها وقعدو تغذو *
أنت تقرأ
( سلسلة اقرباء ولكن) الجزء الثالث بعنوان ولد عمي
Historia Cortaسلسلة اقرباء ولكن سلسلة متصلة ببعض وعشان تفهم الجزء الثالث لازم تكون قاري الاول والثاني التنزيل يومي باذن الله كالعادة
