#ولد_عمي ( الجزء الثالث من سلسلة اقرباء ولكن )
الفصل الثالث عشر
الصافي
جيت روحت بيها بعد حلقتها اللي فعلا عجبتني مليانة مشاعر وحب ووصلت عندها وواضح ان جو الحلقة طاغي عليها لان البسمة مافارقتش وجهها
رحيق .. شنو رايك في الحلقة
الصافي .. الحق مسمعتهاش لاني مكنتش قاعد في المعرض ونسيت نفتح الراديو في السيارة
الصافي
حد يسئلني ليش نكرت اني سمعت حلقتها من البداية للنهاية نقوللكم مانعرفش ليش
رحيق باحباط .. اه
الصافي .. على شنو كانت الحلقة
رحيق بهدوء .. عن الحب وجنونه
الصافي .. غريبة حسيتك بعيدة عن الموضوع هذا بالذات باختياراتك اللي فاتن
رحيق .. بسبب كلامك فخطر عليا الموضوع هضا
الصافي .. اه
وبدون اي كلام وصلو وتغدو زي المعتاد الصافي جايب غذاء من برا ومشن الايام عادي وبدون اي تقدم في علاقتهم وكانت معظم الوقت تقضي فيه في حواشين هلها والسبلة ان الصافي لاهي في معرضه الجديد تقول فتحته جت معاهم بيش يلقو السبلة ولا اي خبر عن زين رغم ان الصافي مابطلش تدوير على خوه وكمل السمستر الاول وانتشر خبر حمل وتين اللي الدعوات كلها تمت موجهة لرحيق والصافي بأن حتى هما يرزقهم الذرية الصالحة ويوم رحيق طلبت من الصافي انه يرفعها لجيهان ورفعها ليها وبعد السلامات وبعد الضيافة خلتهن ام جيهان برواحهن لانها عارفة ان بينهن حكي مايحكوش فيه قدام حد وخشو لدار جيهان
جيهان .. كنك يا رورو شنو فيك
رحيق .. نا نحب الصافي
جيهان بضحكة .. صح النوم
رحيق .. شنو قصدك
جيهان .. يارفيقتي انتي تحبي الصافي من لما وعيتي على الدنيا لكن بسبب انك تميتي مسمية لزين خلاك ماعرفتيش احاسيسك شنو معناها وهذا ليش كنتي مشتتة في مشاعرك وكنتي رغم انك تخافي صافي وماتحبيش تحكمه الا انك كنتي في نفس الوقت تغاري عليه موت وماتتحملي فيه شئ وممكن تو دماغك صفى بعد ماقعدتي في حوش بروحك مع الصافي ومعاها ارتحتي من رباط زين
رحيق بصدمة .. معقولة انتي عارفتيني اكثر مني
جيهان .. انتي صاحبتي ونفهم تصرفاتك وكنت عاذراتك لكن لما صارت اللخبطة وهربت زين وخلاتك تصيري فعلا مرت الصافي عندك علم كنت فرحانة ليك بشكل مش طبيعي لكن خفت نواجهك بشعورك وقتها تنفري من كلامي وتنكريه فقلت نسكت نين تعيشي معاه ووقتها تو تبان مشاعرك
رحيق بحب .. يوم ضمني لحضنه لما رقدنا في حوش اهله ويوم باسني كنت كأني في النعيم ووقتها فعلا حسيت بأني نحب الصافي لكن ماعرفتش كيف نعبر للصافي وهو من يومها كأنه من ارتكب جريمة واي وقت يحاول مايقعدش فيه معاي مايقصرش تخيلي مرات نروحو اخر الليل بواجد ورغم اصرار امي امل اننا نباتو الا هو شئ يسكر في راسه وخفت نحكيله على حبي ليه يطلع مايحبنيش وننصدم صدمة عمري
جيهان .. به كيف بديري تو
رحيق .. والله ماني عارفة وتصدقي حتى السمستر الجديد بيبدا ماخاطريش نخشله واظني بنوقف
جيهان .. وشنو علاقة القرايا بحبك ليه
رحيق .. لان مع قرايتي الصافي باعد عليا واجد بسبب انه مايبيش يعطلني
جيهان .. به حاولي تلمحي له والله تبي مساعدة
رحيق .. كيف بتساعديني ترا
جيهان .. نكلم ناصر
رحيق بشهقة .. تبي الصافي يدفني
جيهان .. لا يا غبية نلمح لناصر يشوف شعور الصافي جيهتك شنو واذا فعلا الصافي يبادلك نفس الشعور هضاك الوقت نقولك اعترفي ليه ومش عيب انك تعترفي ليه بحبك انتي الاولى لانه في الاخير راجلك هو
رحيق .. ولو طلع مايبادلني شئ وقاعد عقله وقلبه عند حبيبته اللي بسببي انحرم منها
جيهان بتنهيدة .. وقتها سلمي امرك لربي وهو يدلك على الطريق الصحيح
رحيق .. ونعم بالله
أنت تقرأ
( سلسلة اقرباء ولكن) الجزء الثالث بعنوان ولد عمي
Kurzgeschichtenسلسلة اقرباء ولكن سلسلة متصلة ببعض وعشان تفهم الجزء الثالث لازم تكون قاري الاول والثاني التنزيل يومي باذن الله كالعادة
