#ولد_عمي ( الجزء الثالث من سلسلة اقرباء ولكن )
الفصل الرابع
زين بهدوء ونظرة مافهمتهاش رحيق .. يوم فرحنا تو تعرفي رحيق صدقيني لاني مستحيل نبدا معاك حياة جديدة بدون مانكون موضح لك كل حاجة
رحيق بتنهيدة .. هانت قديش مازال على فرحنا شهرين حيمشن ومانحسش بيهن
امل .. صافي فيفو صبي نوض ولدي
الصافي بصوت ناعس .. نبوس ايديك وكرعيك فكيني منها فيفو هذي
امل بضحكة .. يعني صفصف احلى
الصافي وفتح عيونه .. ننضت يا امي
امل.. صبي العشاء واتي وبعدها بنحكي معاك موضوع
الصافي تعدل وقمعز.. ان شاءالله خير
امل .. خير صبي هيا
الصافي
وصبيت تعشينا بهدوء ومش عارف ليش حاسس بنظرات زين مش تمام
الصافي .. زين كنك في حاجة
زين .. لا عليش تقول هكي
الصافي .. غير تبحت فيا من بدري
زين .. يتهيالك
الصافي بضحكة .. على فكرة خش لدراي تو تلقى حاجة ليك محطوطة على الطاولة
امل .. شنو زعمك جايب هالمرة
زين .. تابلت زي بتاع رحيق
الصافي باستغراب .. كيف عرفت
زين بحب لخو يحترمه واجد ..طالما جبت لرحيق اكيد حتجيب ليا خوي ونعرفك بالذات انك عارف اني نعشق السامسونج زي رحيق
الصافي .. المهم يعجبك
زين بضحكة .. طالما لونه مش وردي ولا احمر اكيد بيعجبني
الصافي .. تخيلني جايبلك واحد هكي
زين .. كنت حنقعد مسخرة
معتصم .. ونا ماجبتلي شئ
الصافي بحب .. معقولة انت نخليك بلاش واحلى ايفون ليك
معتصم بفرحة .. والله جد
الصافي .. ومن امتى نكذب عليك
صلاح .. مش واجد مصاريف هكي يا ولدي بدل ماتخليهن لك وانت ان شاءالله بتفتح حوش قريب
الصافي .. الحمدلله يا باتي الخير واجد والمعرض اموره تمام التمام تي حتى نفكر نفتح معرض ثاني
صلاح .. ربي يزيدك من نعيمه يارب
امل .. امين يارب
زين باستغراب .. كيف بيفتح حوش قريب
امل بفرحة .. ندور في عروس للصافي وكان سخر الحال بالك نطلعو الفرح معاك
زين بتوتر .. اه منو لقيتوها والله مازال ادورو
امل .. في بالي وحدة نرجو يردو علينا
الصافي
طبعا ما ركزتش على كلام امي لانها ديمة تحكي هكي وديمة ادور على عروس ليا وانتبهت لتوتر زين ونظراته لباتي غريبة بس مابيتش نسئل
الصافي .. السفرة على من اليوم
زين .. على معتصم لكن عنده امتحان نضمها بداله نا
معتصم باستغراب .. منين جاك هالتواضع تي انت دالتك وادير في حالة
زين بضحكة .. جو بس حسستني هالحاجة الصعبة هي تنظيف النعمة من الصواني وحطهن في الغسالة
معتصم .. ان شاءالله ديمة الكرم هضا
امل .. لا مش ديمة لان خلاص يافالح اسبوع ويبدن امتحاناته وهو شهادة
زين .. ماتخافيش عليا يا امي انا قدها وقدود
الصافي .. تعرف لو تنجح المعرض الثاني حتكون انت المسؤول عليه بالذات بتكون ولية في رقبتك وراتب المحل اللي تو مش حيكفي مصاريفكم
صلاح .. صح يا الصافي جبتها بالمزبوط
الصافي .. شنو رايك زين
زين .. وحد يقدر يقول لا على اقتراح زي هذا
امل .. هيا يا الصافي صبي نبي نحكي معاك
الصافي .. به يمي نشرب الشاهي قبل
امل وبحتت في معتصم .. دير انت الشاهي
معتصم .. حاضر
أنت تقرأ
( سلسلة اقرباء ولكن) الجزء الثالث بعنوان ولد عمي
Kısa Hikayeسلسلة اقرباء ولكن سلسلة متصلة ببعض وعشان تفهم الجزء الثالث لازم تكون قاري الاول والثاني التنزيل يومي باذن الله كالعادة
