( سلسلة اقرباء ولكن) الجزء الثالث بعنوان ولد عمي

الفصل الرابع عشر

#ولد_عمي ( الجزء الثالث من سلسلة اقرباء ولكن )

الفصل الرابع عشر ماقبل الاخير 

رحيق
من لما وعيت ونا في حضن الصافي حسيت روحي نبيع الدنيا كلها بس عشان هاللحظة ولقيت روحي نبوس في بداية لحيته ولما سمعت منه التصبيحة بصوته الناعس حسيت روحي كأني طايرة في السماء ولما سمعت كلمة نحبك مصدقتكش ورغم اني شككت في سمعي الا اني قررت نعترف بحبي ليه حتى نا ونتمسك بحبي وبندافع عليه حتى لو بعدها بيسيبني معاش يهمني وقتها لكن رده كان حضن قوي وبوسة كأنها الشهد وقديش تمنيت اني نقعد في حضنه طول العمر لكن دق امي امل على الباب طلعنا من عالمنا اللي غرقنا فيه
الصافي بصوت مليان شهوة .. مش وقتها بكل امي يعني ماخطرش نعترف ليك او تعترفي ليا الا في حوشنا هنا
رحيق بخدود حمر واحراج مش عارفة شنو ادير .. هيا نوض وراك ووراي شغل
الصافي .. انا اليوم بناخذ اجازة
رحيق ومازالت في حضن الصافي .. وللاسف نا مانقدرش
الصافي بتنهيدة .. نسيت بكل امنا صبي نفطرو مع هلنا وبعدها نمشو لشقتنا ومنها نرفعك للعمل وبعدها لنا قعدة طويلة
رحيق .. به

*وزاد حضنها الصافي كأنه مش مصدق اللي سمعه منها وكأنه بضمه ليها يأكد فلي سمعه منها وناضو فطرو مع هله وهلها وبعدها رفعها للشقة غيرت دبشها ورفعها للعمل اللي لاحظو كلهم انها بقمة السعادة

طارق .. ان شاءالله دووم  رحيق اليوم بسمتك في عيونك قبل فمك
رحيق .. تقدر تقول اخيرا وصلت لسعادتي صح مازالن قدامي عثرات لكن على الاقل قدرت نخطي في الطريق الصح
طارق.. ااايه شكل البرنامج مأثر حتى على ردودك
رحيق ..تقدر هكي تقول او تأثيري نا اللي واضح في البرنامج
طارق .. وحلقة اليوم كلها تفاؤل ومحبة

*ومشى البرنامج زي العادة وهو يحقق في اعلى رتم من باقي برامج المحطة ووتقريبا المحطة تفكر انها تزيد ساعات البرنامج او تزيد عدد الحلقات بس يبو يتناقشو مع رحيق بيش ايديرو التغيرات مع دورة الاذاعة الجديدة وجاء الصافي روح بيها وهو بروحه في قمة السعادة ولما وصلو للشقة وجهزت رحيق الغذاء اللي زي العادة جابه الصافي من مطعم*

الصافي .. رحيق من امتى عرفتي انك تحبيني
رحيق .. بالزبط مش عارفة لكن بعد اول مرة رقدنا فيها مع بعض في دارك وبعدها بعدت عليا حسيت بحاجات غريبة فيا (وباحراج وصوت واطي ) كأني نشتاق لك رغم وجودك احذاي كأن النظرة من عيونك تسعدني ولما مشيت لجوجو وقلت ليها اني نحبك ضحكت عليا
الصافي وهو يرفع في السفرة .. ليش
رحيق وراه بيش اضمها معاه .. قالت ليا صح النوم وفسرت ليا اني نحبك (وحكت له شنو الكلام اللي قالته ليها جيهان بالتفصيل )
الصافي .. واقتنعتي بكلامها
رحيق .. اه لان كلامها التفسير الوحيد لتصرفاتي معاك كانن
الصافي خذا رحيق لحضنه وهيا زادت ضماته .. نحبك نحبك نحبك ونعشقك لاخر عمري
رحيق وزادت حضناته .. من امتى
الصافي وباس راسها  .. من لما فتحت عيوني على شنو حب من لما كنتي صغيرة بقرونك الاثنين وبذيل الحصان اللي اديري في بكا عشان يديروه لك وماحد يعدل عليك نين نجي نا ونفك ضفايرك بيش ينجبرو يدروه لك من لما تلبسي في القفطان الوردي وشخشير كربلة وكندرتك البيضا وشريط شعرك الابيض نحبك من لما نطقتي اسمي
رحيق بحب .. فافي
الصافي بضحكة .. ياعيونه وروحه وعقله
وخذاها في بوسة طوووويلة وتبعتها بوسات اطول وماسيبها نين حس بي روحه خلاص معاش يقدر 
الصافي بتنهيدة .. نا ميت عليك ونبيك في التو واللحظة لكن تعرفي ( ورفع راس رحيق اللي خدودها رايحات زي النار ) بس مش تو نا نبي الليلة هيا ليلتنا نبيها مميزة
رحيق بصوت واطي .. وحتى نا هكي نبيها
الصافي .. شنو تبي ونا نجيبه لك مانبيكش اتعبي روحك بكل
رحيق باحراج .. ممكن نكلم جوجو تجي تاخذني للسوق نبي نجيب حاجات مانبيكش تشوفهن
الصافي بحب .. اكيد يا روحي وبه نا شنو اندير
رحيق .. بعد ما نا نطلع انت تطلع ومعاش تروح نين نرن عليك وتجيب العشاء معاك
الصافي.. انتي تأمري امر
وزاد حضنها اكثر كأنه يبي يتأكد انها فعلا ليه