( سلسلة اقرباء ولكن) الجزء الثالث بعنوان ولد عمي

الفصل التاسع

#ولد_عمي ( الجزء الثالث من سلسلة اقرباء ولكن )

الفصل التاسع

امل .. كنت لما نشوف في الصافي كيف مهتم بيك من صغرك مايحبش يشوفك تبكي حتى لما كنتي تتعاركي مع زين كان يعارك فيه لانه عارف ان مافيش حد حيحكي مع زين ولما كبرتي شوي وزين قعد يهتم بيك واجد وانتي فرحانة باهتمام زين وماعدلتيش على الصافي زي ماكنتي اصغر وماتغيرتش معاملة الصافي ليك لكن بعدها ورغم اهتمام زين بيك رجعتي اتعلقي بالصافي وفي الوقت هضا بديتي تبلغي وبدت صرامة ووعارة الصافي معاك وكنت خايفة انه يخنقك بتحكماته وتخيلت حتى زين يتكلم لكن لقيت زين واقف يتفرج ومايناقشش في الصافي في تحكمه فيك رغم انه ليه الحق فيك قبل الصافي وحتى لما كنت نسئل فيه ليش ساكت على تصرفات الصافي في خطيبتك وانت الاولى كان يرد عليا ويقولي الصافي كبيرنا و ولد عمها قبل ماتكون خطيبتي ورغم عدم اقتناعي لكن مشيت كلامه واللي زاد حيرني ان زين بدى بارد معاك وزاد استغرابي وحيرتي رغم برود زين معاك اصراره على الزواج ومانعلمش بشنو اقنع الصافي بيش يصبي في صفه وهضا خلاص قطع اي امل عندي انك تبقي للصافي بدل زين ورغم تصرف زين اللي داره لكن ماحسيتش روحي حامقة منه لانه حققلي اللي نتمناه ومافيش حاجة في قلبي غير اني نطمن عليه بس
رحيق بحيرة .. يعني شنو تبيني اندير وزين حطني في موقف شوه فيه سمعتي
امل بهدوء.. بكرة في القاعة تفرحي زي اي عروس خذت حبيبها بيش اي حد شك في حاجة يسكر فمه ويرجعو لكلمة كيان لما يقولو اكيد لخبطو في الاسماء وانتي بتصرفك بكرة بالذات لما يخش الصافي تسكري كل فم
رحيق ومازالت في حضن امل .. كيف يا امي نا خايفة واجد وكيف نرتاح في تصرفاتي معاه وهو الصافي بكبره
امل بضحكة .. يابنتي هو راجلك تو
رحيق .. تعرفي يا امي مش متخيلة كيف بنقعد بلا محرمة قدامه لابال الڤيلو اللي بنلبسه بكرة تو الصافي يقطعني عليه
امل وزاد ضحكها ومعاش عرفت تسكت
رحيق بعدت من حضن امل .. امي بطلي معاش تضحكي
امل ومازالت تضحك .. يابنتي الصافي تو راجلك
على خشة خلود .. ضحكيني معاك
امل بضحكة .. تعالي اسمعي بنتك شنو تقول
رحيق بحمق .. اااامي
خلود بفضول .. ماتعدليش عليها قوليلي
امل وهدا ضحكها .. رورو قالت كيف بنقعد منغير محرمة قدام الصافي ومعاها قالت تو يقطعني على الڤيلو
خلود قعدت تضحك حتى هيا
رحيق بحمق .. ماما حتى انتي
خلود .. ماهو اللي تقولي فيه يضحك حتى اللي دافن باته كيف يا بنتي تخافي منه وهو تو راجلك يشوف شعرك ويشوف حاجات واجد
رحيق بحشم .. ماما خلاص فهمت
امل وبحتت في خلود بنظرة فهمتها .. انا بنطلع تو وتوا وقت كلام امك لازم تسمعيه بنيتي كويس
رحيق بهزة راس .....

*وطلعت امل وقعدت رحيق وامها خلود وهيا محتارة كيف بتفتح الموضوع مع بنتها *

خلود بتردد..رورو انتي عارفة غلاوة زين عندي نا وباتك نتمنى بنتي ماتزعليش منه (وبنبرة وضح فيها حزنها) رغم اني ماتخيلتش زين يدير فينا هكي لكن مانقدرش نزعل منه لاني نحبه واجد
رحيق .. ماتخافيش يا ماما نا مسامحاته حتى بدون مانعرف شنو اسبابه حتى وهو عطى للناس سبب تحكي عليا لكن مسامحاته
خلود.. ربي يكملك بعقلك ويرجع طيب ونعرفو ليش دار هكي
رحيق .. ان شاءالله يرجع طيب
خلود بجدية بعد ما اطمنت ان بنتها قلبها ماتعباش بحقد على زين .. تو يا بنتي تميتي مرت الصافي ولازم يا بنتي تكوني الزوجة الصالحة ليه حتى لو كنتي تبي بعد فترة تنفصلي عليه لكن على الاقل في الشهور او الاسابيع او حتى السنين ماحد يندري بكرة شنو داس ليه انك تكوني الزوجة الصالحة ليه اللي ادير بالها عليه وتهتم براحته ورغم ان ربي امرنا بالطاعة بس لكن الاهتمام بالزوج ورضاه من رضى ربك عليك وما اديري شئ الا باذنه لان في ملائكة بتلعنك بنتي وانتي انسانة مصلية ومايفوتش فيك وقت خافي ربي في راجلك هو يخاف ربي فيك
رحيق .. ليش تحكي هكي يا ماما تقول نا نقدر نعصى امر للصافي ما درتها قبل عشان نديرها تو
خلود.. لان طريقة زواجه بيك تخليك تحقدي عليه وتهينيه او تكرهيه
رحيق .. نا كيف خطر في بالك هكي نا ماحقدت على زين اللي سبب البلبلة هذي كلها بنحقد او نكره الصافي اللي حمى عرضي ورضى لروحه بانه يتزوج بقايا خوه كيف تقولي هكي
خلود بتنهيدة .. لاني خايفة على الصافي
رحيق .. شنووو
خلود بهزة راس .. اه خايفة على الصافي الصافي تعذب واجد لا تمتع بسن مراهقة ولا حتى بشبابه رغم صغر سنه وهو من خلانا هكي بدماغه النظيف بعد ما كنا نا وباتك نسكنو في جزء من حوشهم وبسبب ذكاءه ورجاحة عقله شوفي لوين صرنا ورغم انه انحرم من حاجات واجد لكن كان كريم على خوته زين ومعتصم ورامز وحتى انتي ماحرمكمش من شئ ووفر ليكم كل شئ هو انحرم منه ونا نبيك تكوني انتي راحته انتي عوضه على المرار اللي شافه وانسي زين وابدي مع الصافي
رحيق .. يا ماما عمري نا ماحبيت زين لعلمك وكنت خايفة نصرح بحاجة زي هكي يصير مشكلة بينكم وبين حوش عمي او تتفارقو بسبي وقلت اكيد بعد الزواج تو نحبه لكن ( وسكتت معاش عرفت تكمل وان اي كلمة بتقولها حتوجع امها لانها عارفة قديش هيا تحب زين )
خلود .. هضا هو وتو بدل ماتحبي زين بعد الزواج حبي الصافي وانتي ادرى وحدة بيه انه رغم وعارة الصافي الا مافيش احن منه عليك ولا يرضى فيك حاجة سو
رحيق .. عارفة يا ماما واصلا هضا اللي كان شاغل تفكيري كيف بنعيش مع الصافي
خلود.. ماتشغليش عقلك بشئ وخلي الايام هي اللي ادلك وتوريك الطريق واستخيري ربي في كل خطوة بديريها
رحيق .. ان شاءالله يا ماما
خلود .. هيا نخليك ترتاحي تو
رحيق وتمددت على السرير .. ماما اذا الصافي جاء كلميني نبيه
خلود .. به