#ولد_عمي ( الجزء الثالث من سلسلة اقرباء ولكن )
الفصل الثاني
رحيق من بين شهقاتها .. زين
الصافي ومازال على اعصابه .. كنه
رحيق .. مافهمتش كنه معاي هاليومين هذين (وبضحكة من بين دموعها ) قالك يومين هو معاي هكي من لما كبرنا
الصافي بعدم فهم .. كيف
رحيق والتفتت للصافي .. ممكن نحكي بس نبي وعد منك
الصافي .. شنو
رحيق .. انك ما اديرش مشكلة
الصافي .. على حسب
رحيق ونسيت انها تحكي مع الصافي .. معناها مانيش حاكية
الصافي بصوت واضح فيه العصبية .. رحيق احكي بالحسنى احسن ما انلمك انتي وزين في دار وعارفين شنو الباقي
رحيق بخوف .. به
الصافي .. استني نمشي للمعرض نحكو فيه مش حلوة وقفتنا هنا
*وفعلا شغل الصافي السيارة وطلعو للمعرض اللي يعتبر مافيشي حركة واجدة الا مرة مرة يخش زبون يبرم فيه ويطلع والله الشباب الاثنين اللي يشتغلو عنده وخششها للمكتب ودار ليها وليه قهوة لان يحب ايدير قهوته بروحه وحط قدامها الفنجان *
الصافي .. احكي كنه زين معاك
رحيق .. من لما كبرنا في البداية كان واضح انه يحبني لكن تو عادي عنده ورغم انه عارف خطوبتنا بعد عشرة ايام وبعد امتحاناتي وامتحاناته بيكون فرحنا ومافيش اي اهتمام
الصافي .. بالك لانكم مازالتو صغار
رحيق .. به ليش مصر على الفرح تو طالما نحن صغار ولما تشوف اصراره تقول هضا يعشقني عشق عبدو رغم انه سيب وتين لكن واضح في عيونه حتى في نفسه اللي يتنفسه انه يحبها وهي زيه لكن زين ولا اي حاجة ادل على انه يحبني
الصافي بنبرة مافهمتهاش رحيق .. ياريت تركيزك مع عبدو ووتين مركزة مع ناس اخرى
رحيق باستغراب .. من قصدك
الصافي وفطن لروحه .. ماقصدي حد المهم شنو المطلوب او بمعنى اصح شنو اللي داره وخلاك هكي
رحيق ونسيت روحها .. انت الصافي بجلالة قدرك وعطيت رايك وممكن مش اهتمام بيا وانك مرات سمعت الحلقة صدفة حتى لو كانت بدايتها بينما زين سمعها كلها وماقالي شئ غير انها باهية وماشي حالي (ورجعت تبكي ) حسيته قهرني وقالي كيف الصافي خلاك تقدمي برنامج اذاعي
الصافي .. بالك مافهمش مغزى برنامجك وانتي عارفة ان زين ديمة افكاره وميولة تافهة بسبب الدلال اللي ادلله من اهلي واهلك ومن حياة جدي الصافي
رحيق ووقفت بكا .. وانت ليش وافقت رغم معارضة الكل
الصافي .. اولا لانك رحيق وعارف شنو نحن مربين وانك قد الف راجل وثانيا لو تلفزيون ممكن قلت لا لكن اذاعة صوت بس ومش مستحقة تلبسي كذا او تمكيجي كذا او تضحكي كذا لكن انتي في صوتك نبرة حلوة تناسب الاذاعة وطالما فرصة وجاتك الواحد يستغلها وفي نفس الوقت تشتغلي في مجال قرايتك برغم ان في واجد تخرجو ومازال ماحصلو شغلة في مجال قرايتهم لابال انتي هذي تعتبر فرصة جاتك حتى تتدربي على حاجة في قرايتك انا فكرت هكي وهضا ليش وافقت
رحيق وحاوالت ماتبينش صدمتها من كلامه .. ياريت كلهم شافوها من وجهة نظرك
الصافي بجدية .. وتو شنو تبي رحيق
رحيق .. مش عارفة نبي نفهم بس زين يحبني او لا
الصافي .. وانتي
رحيق بتنهيدة .. والله حتى نا مش عارفة ممكن تعود وممكن ألفة وممكن بسبب كلام الكل اني لزين وزين ليا ماخلانيش شغلت عقلي بحاجة اخرى
الصافي .. تبي تأجلي الفرح
رحيق .. لو قدرت تقنعه ياريت مع انك انت اكثر واحد وافقت على الفرح تو
الصافي .. ليا اسبابي لكن تو نشوفه
وهيا صبي عطلنا واجد على مشوارنا
رحيق .. مشوار شنو
الصافي .. امنا ليش جاي مروح بيك نا رغم شغلي
رحيق .. وين
الصافي .. هيا صبي تو تعرفي
أنت تقرأ
( سلسلة اقرباء ولكن) الجزء الثالث بعنوان ولد عمي
Nouvellesسلسلة اقرباء ولكن سلسلة متصلة ببعض وعشان تفهم الجزء الثالث لازم تكون قاري الاول والثاني التنزيل يومي باذن الله كالعادة
