#ولد_عمي ( الجزء الثالث من سلسلة اقرباء ولكن )
الفصل الثامن
ناصر .. فرحان
الصافي .. شنو
ناصر .. اه فرحان وتقريبا ممكن زين اول مرة ايدير حاجة سمحة بشكل هضا
الصافي .. انت شنو تقول
ناصر .. اه شنو تبيني نقولك
اه فرحان ان صاحبي ورفيقي انه اخيرا ازوج حب عمره اللي كان شئ مستحيل بالنسبة ليه انه يرتبط بيه حتى لو سيبها خوه لو ماتفاهموش بعد الزواج قولي يا الصافي انا وانت عارفين لو الزين ماهربش كنت مستحيل ولاي سبب من الاسباب كنت حتتزوج رحيق فانا اه فرحان حتى لو طريقك صعب لكن في ايدك انك تخلي قلب وروح رحيق يحبوك بسهولة لان مافيش حد يشوفك ويعرفك من قريب يا رفيقي مايحبكش لابال هيا بتكون مرتك اللمسة حلال والنظرة حلال والضمة حلال والضحكة حلال وكل شئ بينك وبينها بيكون حلال حتى لو رفضت في البداية لكن سيورها حتجيك صدقني
*الصافي ساكت يفكر في كلام صاحبه وبدون اي كلام مد مفتاح شقته لصاحبه اللي خذا المفتاح وطلع سيب صاحبه يفكر في كلامه *
رحيق
قاعدة نبكي ونا حياتي تلخبطت 180 درجة كنت بنكون مرت زين وتو مرت الصافي واذكرت كلام زين امبارح وشكله كان هضا مخططه بس ليش ليش دار هكي ليش ماسيبنيش من البداية ليش حطنا في المعمعة هذي اذا في الاخير بيسيبني
جيهان .. بطلي بكا يا رورو
رحيق .. مش مصدقة ونش فاهمة ليش زين دار هكي
جيهان .. الله واعلم باسبابه ومعاش تشغلي دماغك سيوره يروح مستحيل زين يبعد عليكم ووقتها افهمو منه ليش دار هكي لكن تو خليكي فلي انتي فيه
رحيق .. والله ماني عارفة شنو اندير ومستغربة كيف بابا وافق
جيهان بتنهيدة .. يا بنتي فوتي الدوة هذي تو وفكري في حياتك الجديدة
رحيق .. اي حياة
جيهان .. توا انتي مرت الصافي حاولي تفكري فيه وكيف تخلو حياتكم حلوة وكيف بتسيرو مركبكم والله بعد فترة تبي تطلقي منه
رحيق بصدمة .. نطلق
جيهان .. ها امنا شنو تبي
رحيق بحيرة .. والله ماني عارفة شنو نبي
جيهان .. خوذي نصيحة رفيقتك خلي الايام هيا اللي تعرفك ولما تكوني في حوش واحد مع الصافي كل شئ يبان
رحيق .. عندك حق اصلا بعد اللي صار المفروض معاش بنشغل دماغي بشئ لان شنو اللي بيصير اكثر من هكي
على خشت ريفال .. هيا يا جيهان واتيين نحن
رحيق باستغراب .. هيا على وين والمغرب قريب يذن
جيهان .. قاعدة بايتة هنا ماتخافيش لكن بنعدي نا ووتين وريفال ومريم لشقة الصافي ناصر ركب دار نوم وجاب شوي فرش نبو انزلو دبشك من شقة زين ونرتبوه في شقة الصافي
رحيق بخوف وكانها فطنت فعلا انها تزوجت الصافي .. دبش شنو وشقة شنو ودار شنو
جيهان بضحكة .. كنك وجهك انصفر هك
رحيق .. امنا شنو تبيني اندير
جيهان بهدوء وعرفت صاحبتها واصلة حدها .. رورو هضا شئ طبيعي انتي بتعيشي مع الصافي في شقته والله تبي تعيشي في شقة زين
رحيق بسرعة .. اكيد لا
جيهان .. امنا خلاص
رحيق .. جيبي دبشي بس من شقة زين اي حاجة اخرى مانبيهاش
جيهان .. اكيد حتى عماتي امل وخلود هكي قالولي
رحيق ..خلاص امنا
جيهان .. شنو بديري تو
رحيق بقلة حيلة .. بنرقد نحس في روحي مريت بضغط مش طبيعي اليوم وكاني ليا شهر ما رقدتش
جيهان .. احسن راي اديريه بس صبي اغسلي وجهك قبل بيش عيونك مايتنفخوش وتقعدو مضحكة العروس عيونها منفخات والعريس وجهه منفخ
رحيق .. كنه الصافي
جيهان .. ضربه عبدو
رحيق بشهقة .. شنووو وعليش
جيهان .. انتي وين كنتي قاعدة والهرجة اللي صارت
رحيق .. كنت في همي غاطسة (وصبت لفت وشاحها على راسها ) الصافي وين
جيهان بضحكة مكر ماركزتش عليها رحيق .. في الجنان من لوراء
رحيق .. تمام هي صبي لمي دبشي
أنت تقرأ
( سلسلة اقرباء ولكن) الجزء الثالث بعنوان ولد عمي
Contoسلسلة اقرباء ولكن سلسلة متصلة ببعض وعشان تفهم الجزء الثالث لازم تكون قاري الاول والثاني التنزيل يومي باذن الله كالعادة
