( سلسلة اقرباء ولكن) الجزء الثالث بعنوان ولد عمي

الفصل الثالث

#ولد_عمي (الحزء الثالث من سلسلة اقرباء ولكن )

الفصل الثالث

رحيق بفرحة .. شكرا شكرا يا الصافي عالهدية اللي تهبل
الصافي بهدوء .. العفو عجباتك
رحيق .. عارف انت شنو جايب ليا تابلت سامسونج مازال مانزل في ليبيا وتقولي عجبك
الصافي .. قبل بنجيبلك ايباد لكن عارفك تحبي السامسونج فخذيت لك تابلت
رحيق .. بس كيف حصلته
الصافي .. وصيت ناصر عليه لما مشى لايطاليا يجيب في دبش لمحله الجديد
رحيق .. تعرف انت على قد فرحتي بالتابلت على قد فرحتي بمناسبة الهدية وحيقعد ذكرى عمري ماحننسها ابدا هدية اول يوم لي في الاذاعة
الصافي .. تتهني بيه وتو هيا خليني نمدد شوي قبل ماتغزو عليا امي تنوضني للعشاء
رحيق .. به
الصافي .. رحيق
رحيق .. نعم
الصافي .. معاش تخشي داري نين نقولك خشي 
رحيق باحراج .. آسفة والله من فرحتي بس
الصافي .. عادي حصل خير بس نا كنت بنغير دبشي فتخيلي انتي لما فتحتي الباب
رحيق وخدودها انحمرو لو فعلا كان هكي يدير .. آسفة معاش نعاودها

*وطلعت من عنده تجري زي ماجت تجري*

الصافي
طلعت من عندي وهيا فرحانة ونا غيرت دبشي وتمددت نفكر في روحي والصدمة اللي بتجيها يوم خطوبتها مني

*ركبت رحيق لحوشهم  فوق*

امي امل .. شنو اللي مفرحك وخلاك تطلعي تجري
رحيق بفرحة .. الصافي جابلي هدية تهبل غير اللبسة بسبب اول حلقة برنامجي سمعتوه صح
خلود  .. ونحن نقدرو ننسوه والصـ...
امل .. عمك صلاح كل شوي يتصل يوقض
رحيق وما ركزتش على امها .. ها شنو رايكن
امل .. حلوة اكيد زيك غير في البداية توتري شوي لكن بعدها مشيتي في الجو
خلود .. وحلوة الحلقة على الاخوة اللي بين الولد والبنت وفيها تميز لان عادتا البرامج اللي تحكي على الاخوة تكون علاقة مثلا الخوات ببعض او الخوت ببعض
امل .. بس ماقلتيش شنو جابلك الصافي هالمرة
خلود .. ماهو نحن معاش نخلصو من الصافي ودلاله لك
رحيق بشهقة .. دلال والصافي
امل .. كنك شهقتي
رحيق .. ماهو الصافي ودلال ماتجيش في جملة وحدة مع بعض بكل
خلود .. امنا اللي يدير فيه لك شنو
رحيق  بنفترة  .. امنا من لبسني حجاب ونا عمري 11 سنة
خلود .. مش ذنبه انك بلغتي بدري وبانت انوتثك
رحيق .. وصحباتي اللي ممنوع نمشي ليهن ولولا جيهان ما طلعت اخت ناصر رفيقه ماخلاني نعفسلها حوش
خلود .. خايف عليك وتو من صحبة البنات ياما نسمعو
رحيق .. والرحلات المدرسية اللي مافي واحد فيكم يقدر يناقشه لما يرفض
خلود .. ومش يرفع فيك لمكان الرحلة زيك زيهم
رحيق .. اه بامارة محبوسة حذاكم مانقدر نمشي شورهم
امل بتغير الموضوع .. المهم ماقلتيش شنو جابلك
رحيق بفرحة ونست تحكم الصافي ليها وشنو كانت تقول لامها.. تابلت سامسونج مافيش منه بكل هنا مازال ما نزل
امل .. تو زين يدير حالة
خلود بحب كبير لزين .. عادي تعطي رحيق بتاعها لزين وهكي الصافي يطر يجيب ليها
رحيق بحمق وحضنت التابلت .. مانيش واعطيته لحد هو جابه ليا والله ماهو واخذه واحد مني واذا زين يبي يكلم الصافي يجيبله
على خشة زين .. يجيبلي شنو
امل .. قول السلام قبل
زين .. السلام عليكم
كلهن .. وعليكم السلام
زين .. ماقلتوش شنو اللي نقول للصافي يجيبلي كيفه
رحيق بصوت واطي وبان القهر فيه .. الصافي جابلي تابلت مازال مانزل في السوق وماما تبيني نعطيه لك
زين بهدوء .. والمناسبة شنو الصافي مايجيبلك في هدية الا في مناسبة
رحيق ودموع تحاول ماينزلنش .. عشان برنامجي

رحيق
سيبتهم وخشيت لداري وسكرتها بيش مايجيش وراي
وفعلا حاسة باستغراب من مشاعري ونا مع زين مش زي مع الصافي لدرجة الصافي مانحبش انه ينزلي ويخشلي الجامعة مش عشان عياطه عليا اني عطلت بس لا لاني تعودت عليه لكن من كلام البنات عليه وهنا حتى حشم مايتحشمن يجن يطلبن في رقم فونه مني تخيلو ومش عارفة نحس بالغيرة عليه ومع ان زين رغم انه صغير لكن حتى هو طويل وعضلات ومهتم بجسمه وحلو لكن الصافي مازال احلى على دقة الباب
صبيت وفتحت الباب لقيت زين مصبي قدامه

زين .. كنك هربتي من قدامي ماتخافيش مانيش واخذه منك
رحيق .. على اساس بنعطيه لك
زين .. المهم امتى بتطلعي تجيبي قفطان خطوبتك
رحيق ببرود .. حكيت مع الصافي
زين .. كنك تحكي هك
رحيق .. زين نبي نحكي معاك جد
زين .. به تعالي للصالة بدل تصبياتنا هنا

*ومشو للصالة اللي مافيها حد *

زين .. ها شنو في
رحيق .. سؤال واحد بس
زين .. اسئلي
رحيق .. انت كنت عادي معاي تتعامل فجأة انقلب كل شئ
زين .. كيف
رحيق .. يعني كنت تستنى فيا واننا نكبرو بيش نفتحو حوش وننضجو اكثر وفجأة قلت تبي خطوبة واشهار وبعدها قلت تبي فرح تو رغم ان اللي في عمرك يا دوب يسنكح في راس الشارع صح تخدم على راسك وبراتبك لكن 17 سنة شوي صغير على فتح حوش
زين .. به عندك اعتراض
رحيق .. حتى لو عندي مانقدرش نتكلم
زين .. ليش
رحيق..  انت عارف ماما وبابا وبالذات ماما كيف يحبوك بشكل غريب يعني حتى وانا نكبرك بتسع شهور ما اختارونيش للصافي لكن اختاروني ليك انت بالذات لما كنت تهتم بيا واجد وانت صغير
زين .. كنت
رحيق .. اه كنت يا زين ليش انلفو واندورو انت تو تتعامل معاي ولا معاملة الغريبة عليك معاملة جافة وباردة حتى برنامجي الصافي بجلالة قدره سمع بدايته وعطى رايه وانت شنو قلت ماشي حاله ومعاها اللي يشوف اصرارك على الزواج يقول تعشقني وتموت فيا
زين .. شنو تبيني نكذب عليك وانتي عارفة اني مكنتش راضي لولا موافقة الصافي وبالنسبة لاصراري على الزواج ليا اسبابي وتو تعرفين في وقتهن
رحيق .. به ليش ماقلتش لا حتى بعد ما الصافي وافق مش انت تعتبر في حكم راجلي ومسوؤلة منك
زين .. لان عندي ثقة في حكم الصافي
رحيق.. تمام طالما واثق في حكمه ليش ما اهتميتش انت يا زين كنت تهتم بابسط شئ يخصني تو لا
زين .. ليش تقولي هكي ترا ذكريني بحاجة مانعرفهاش عليك
رحيق .. امتى امتحاناتي يا زين
زين .. مع امتحاناتنا
رحيق .. انتم شهادة ثانوية وانا اولى جامعة كيف بنكونو مع بعض
زين .. لان امي قالت الخطوبة قبل الامتحانات
رحيق .. عندك علم ان ليا اسبوعين نمتحن وتو ممتحنة في اربع مواد
زين .. وكيف بنعرف
رحيق.. اه جيت لكلامي يا زين انك مش زي قبل زين اللي كان لو غيرت كندرة (حشاكم) كنت متعودة نلبسها تفطن بيها حتى سلسلتي اللي ديمة نلبس فيها قبل لما تنقطع وماتشوفهاش تسئل فيا عليها وتو ليا اربعة ايام بلاها وانت ماسئلتش وينها عكس الصافي اللي سئل ولما عرف انها مقطوعة قالي جيبيها بيش يصلحها ليا
زين ببرود استغرباته رحيق .. انتي عارفة اني شهادة ونخمم فيها وخايف منها ممكن هضا اللي مخلانيش نركز معاك
رحيق بعدم تصديق .. المهم ماجاوبتش على سؤالي
زين ...........
#حياة
تعديل اخطاء املائية وحوارية #الصابرة