#ولد_عمي ( الجزء الثالث من سلسلة اقرباء ولكن )
الفصل السابع
زين .. نبي نقولك كلمات قبل ماتصيري بكرة مرتي
رحيق بخوف .. تفضل
زين .. رورو الواحد في هالدنيا مش عارف ربي شنو كاتب له وان الانسان ينوي شئ ويلقى شئ ثاني ويعاند ويسحاب ان اللي فقده هو الاصح ليه لكن ننسو ربي ان مايبعدش عنك شئ كان الاصح ليك بمعنى مابعداش عليك الا لانه ضرر ليك
رحيق ودمعة رقرقة في العين ومش عارفة السبب .. ليش تقول هكي يا زين
زين بهدوء .. مش عارف حسيت روحي نبي نحكي معاك الكلام هضا
رحيق ودمعة نزلت .. بس خوفتني هكي
زين مسح دمعتها .. نبيك تسامحيني رورو مرات بالزواج هضا نكون ظلمتك معاي
رحيق قطعت عليه .. كيف بتكون ظلمتني
زين .. الايام هيا اللي بتبين وانا متنمي من ربي اني مانظلمكش في يوم من الايام
رحيق .. تعرف زين اليوم وفي اللحظة هذي نحس فيك زين غير اللي نعرفه
زين .. كيف
رحيق .. تو نحس فيك راجل عاقل وكبير في العمر مش الجهامة بس
زين بضحكة .. وقبل كنت عيل
رحيق بابتسامة واحراج .. لا بس كنت وكلنا عارفين زين المدلع اللي يطلبه يستجاب بدون مرعاة غيره وحتى لما اشتغلت ماصار شئ صح عقلت وتميت تتحمل المسوؤلية لكن قاعد المدلل لكن تو ونا نسمع في كلامك نحس فيك زين اللي ديمة متمنيته يكون يحكي بعقل ويفكر بمنطق ويحط غيره ومصلحتهم قدامه زي ماهما يحطو في مصلحته قبل مصلحتهم
زين .. قصدك الصافي
رحيق بهزة راس .. اه
زين .. تعرفي بكرة بندير حاجة ولو فعلا نا كبر عقلي وعرفت نشوف لقدام حنعوض الصافي بهدية تمناها عمره كله لكن ماقدرش يطلبها لانه كان يشوف فيها انها مش من حقه
رحيق بفضول .. شنو
زين .. بكرة تعرفي وتو خاطري بندير حاجة وحدة بس من يوم ماحجبك الصافي وحتى تو وانتي بكرة بتصيري مرتي مصبية قدامي بحجابك
رحيق بتوتر .. رد بالك تحول حجابي وبكرة شوفه براحتك
زين .. مش شعرك اللي بنشوفه
رحيق .. شنو
*وبدون ماتركز وفي غفلة خذاها زين لحضنه اللي بانت فيه طشة بسبب جهامة زين وضعف بنية رحيق وبعد مافاقت من الصدمة قعدت ادف فيه *
زين وزاد حضنها .. اشششش رورو شوي بس ( وبهمس سماعته رحيق ) بكرة ماحد يعلم شنو يصير
رحيق وسكنت جوا حضنه .. شنو اللي بيصير
زين بغموض .. ماحد يعلم (وبعدها عن حضنه وباس جبينها ) تأكدي بس يا رورو ان مكانتك غالية عندي واني شايف وحاسس بحاجات فيك انتي بروحك مش عارفتيها وانا من كثر ماعارفك فاهمها كويس
رحيق بتوتر ورعشة بانت تحت ايدين زين اللي ماسك اكتوفها .. انت توتر وتخوف فيا يا زين
زين بضحكة .. ما اديري شئ في بالك ممكن نا خايف ومتوتر اكثر منك ونحكي بيش نهدي روحي هيا عدي يا بنت عمي حني ونبيها حنة سمحة
رحيق .. بسـ
زين قطع عليها وحط صبعه على فمه .. عارف ان في كلام واجد تبي تفهميه ونا نرد ونقولك خليها لبكرة تو تفهمي
رحيق .. به
*ورجع زين باس جبينها ورجعت رحيق للخيمة ورغم ان المعازيم مش واجد يعتبر فرح عائلي لان زين قال ان الفرح الكبير احق بيه الصافي وانه يبي فرح عائلي ورحيق ما اعترضتش وقمعزت في مكانها والحيرة بتقتلها والخوف مسيطر عليها وجت الحناية وحنتها وهيا في عالم ثاني ودارن البنات جو حلو لكن هيا محست بشئ وان بكرة بتصير حاجة هيا اللي سيطرت عليها وكملت الحنة وحولو حنتها بعد ثلاث ساعات ودهنوها لها وقالولها ترقد بيش ترتاح وتقلبت واجد ماقدرتش ترقد *
أنت تقرأ
( سلسلة اقرباء ولكن) الجزء الثالث بعنوان ولد عمي
Contoسلسلة اقرباء ولكن سلسلة متصلة ببعض وعشان تفهم الجزء الثالث لازم تكون قاري الاول والثاني التنزيل يومي باذن الله كالعادة
