حبيبتي المسترجلة

part 6

نازلي. مابقة شي ونعطل تقريبا شهر بدينة نتهيأ وبدت نصائح المدرسات وبدو يسوون بطايقنة واخذنة كافة المعلومات عن امتحاناتنة كالعادة دنمشي بالرجعة وهم شفتة كلش عصبت بس اذكرت اخر مرة من كال اني ممتقربلج والشارع مو الج من صدك خفت وتراجعت 😂 كلت هو مو يمي شعلية بي خلي ف عديت اليوم عادي ثاني يوم هم نفس الحالة ثالث يوم هم نفس الشي ضلينة ع هاي الحالة اسبوع بس اشوفة بلا ميحجي
سمر. اكلج نونة الصاك يومية يوكفلج هنا شلعتي كلبة
نازلي. صرت نار من من حجيهة ماعرف ليش يجوز لان كالت صاك قابل شعلية اني اغار علية اشو لا اعرفة ولا يعرفني
انجبي شعلية اني وثانيا هو ميلة صاك باعيلة جنة الوحش الاخضر عضلاتة اوفر ويخوفن وكفشتة جنهة كفشة واحد منتول وازرك وعيونة عيون سعلوة شكبرهن يخوفن ابتسامتة مال واحد خبيث بعد شنو الحلو بي
مريم. احم احم اشم ريحة حرك حبيبي انتي الهالدرجة مركزة بي ودتوصفي
سمر. باوعت المريم وغمزتلهة اي والله مريم ماركزت هيج تركيز بي بس اني لاااا ورجعت غمزت المريم ركزت بي كلش زين فدوة الطولة خلي احجيلج مواصفاتة اللي حاولتي تطلعين بيهن عيوب اسمر وسمارة يخبل معضل وجسمة مال حضن مليان حنان مليان تحسين روحج طفلتة من تحضنين هيج كائنات عدهة هيج جسم وعيونة كبار يسحرن رموشة طوال وثخان خشمة هالكدوتة جنة قلم كفشتة تخبل يعجبج بس تلعبين بيهة من جمالهة وابتسامتة اخخخ ابتسامتة جذابة وبيهة سحر يدوخ و..... اخخخخخخ لج هاي شسويتي
نازلي. صرت ناااار هاي شنو تفصلة هيج كدامي رأسا كرصتهة خليتهة تصرخ بنص الشارع لج عيب استحي شوية فصلتي الرجال تفصال وو أ يعني بعدين شكو كتلتي نفسج علية هو محلو
مريم. يمة يمة يغار اموري
نازلي. اهوووو لتصيحولي اموري ولو بعد ما ارجع وياكم 
رجعنة للبيت بسكتة والطريق كلة يحششن علية طبيت للبيت فايرة من الغضب بدلت ملابسي ولبست تراك رياضي وشديت شعري ذيل حصان واخذت الطوبة وبديت العب بالصالة كل ما تجي الطوبة بايدي واتذكر اللي صار اليوم اضربهة اقوة كالعادة انكسر الكلوب اللي بالصالة امي تعرفني هيج وقت العب طوبة ف شايلة الطبلات والمزهريات وكلشي كزاز بالغرفة ف ضليت العب كسرت الكلوب الثاني
احمد. يمةةةةةة شلون مننخمد خلي بتج تعوف الطوبة باعي كسرت الكلوبات
وجدان. من المطبخ عوفهة هاي مخبلة واحنة وعدناهة منعارضهة من تريد تلعب طوبة وبأي وقت
احمد بخبث انتو واعدتوهة بس اني مواعدتهة ضربت الطوبة راحت الباب الصالة قبل لتروح تجيبهة ركضت اخذتهة وطلعت شمرتهة بالشارع طلعت تركض وراهة عفتهة وطبيت يربي هاي شوكت تكبر وتصير عدهة انوثة
نازلي. رحت اركض ورة الطوبة راحت شوي بعيد عن بيتنة لان شمرهة قوي جبتهة دا امشي اريد ارجع وكفت بمكاني مصدومة
هذا شيسوي هنا وشلون اندل بيتنة
علي. نازلي اسبوع عالتوالي اوكفلهة يم المدرسة جنت متأكد مراح تقترب مني بعد عاللي سويتة بهاي الفترة من تطلع اتابعهة عرفت اسمهة وعرفت عدهة ٤ اخوان وحاليا دا احاول اعرف اخوهة الجبير بيا جامعة كلت بلكت اصادقة واتقربلهة عن طريقة نيتي شريفة بس اريد اتعرف عليهة واخليهة تحبني وتقتنع بية نوب اخطبهة المهم لحكتهة للبيت ماعرف ليش جنت حتة يم البيت اضل اراقبهة كل يوم عسى ولعل تطلع واشوفهة اليوم طلعت وشافتني بس كالعادة متكدر تحجي
نازلي. عبالة ماكدر احجي ويا لان محجة شي وياي ورح يكولي مامتقربلج اني ومالة داعي تهجمج لك اني اعلمك باجر حسابنة يم المدرسة مو هنا
سويت نفسي دا العب بالطوبة ضربتهة وقسما بالله محترفة كدامكم جبتهة بخشمة خليتة يكمز عفتهة وطبيت للبيت اضحك
علي. صح ما اجت بس انتقمت بطريقتهة ضربتني بالطوبة يمكن احس خشمي انعوج من قوة الضربة مدري اضحك ع تصرفاتهة المسترجلة مدري ابجي من قوة الضربة 😂 عديت اليوم ورجعت للبيت تلكتني امي كالعادة
ام علي. يمة انت لشوكت تضل هيج مو بت خالتك صار عمرهة ٢٠ يمة ليش واكف بقسمتهة اذا متريدهة
علي. بصدمة يمة ياقسمة منو واكف بقسمتهة اشو انتي مجلبة بيهة وتريدين تلطشيهة بية كوة اني ما مواعدهة بشي ولا حاجي وياهة اصلا انتو تسفطون حجي بكيفكم
ام علي. يمة صار عمرك ٢٤ وكلية وحتخلص بعد شنو عذرك يايمة انتة حتة ما محتاج حتة تكول اكون نفسي
علي. يمة ماريد ازوج شنو مرة اني وتغصبيني ومتاخذين بكلامي يمة ترة والله تعبت من الجية للبيت صرت اكره روحي من اطب للبيت ترا والله العضيم بعد متشوفين جهرتي اذا ضليتي تحجين بالموضوع
ام علي. لا يمة عليمن اني اخذ غريضاتي واطلع هو انتة متريدني حتة ترتاح مني ومن النك اني طالعة هو اني المن داسوي كل هذا غير الك
علي. استغفر الله ربي صبرني يوم والله مو قصدي بس اني هاي آية ماريدهة اتزوج غيرهة والله عن قريب انتي بس اصبري وادعيلي
ام علي. ها يعني عندك وحدة ببالك اي دكلي من البداية وين بيتهم هسة اروح اخطبلكياهة
علي. لا يمة مو هسة خلي اضبط اموري انتي بس اصبري ومحتاج دعواتج فدوة
ام علي. روح يمة الله يوفقك ان شاء الله
علي. بست راسهة وصعدت نمت كعدت سبحت وبدلت وتعطرت ورحت كالعادة يم المدرسة بطريق الرجعة هم شفتهن تجرأت وغمزتلهة ومشيت رأسا بلا ما اشوف رد فعلهة لان متأكد حتفضحني ماعدهة مانع 🤦‍♀️😂
نازلي. ثاني يوم الصبح اجة والضهر اجة جان يجي بس بالطلعة هسة حتة بالجية دنمشي شو هذا غمزلي هنا اني لكيتهة خوش حجة حتة اطلع قهر الاسبوع اللي مراقبني بي كلة شو دا امشي باتجاهة حتة ارزلة جان يروح يمشي سريع مكدرت اركض ورا مع انو اني ما استحي بس استحيت ومكدرت مدري ليش عدة اليوم ع خير رجعنة للبيت هم دا العب طوبة جان تندك الباب رحت فتحتهة وجان يطلع هو بوجهي 🤤🤤 عزاااااا انت لك انتة شتسوي هنا وشتريد داك بابنة
علي. عمو عيب انتي تفتحين الباب شنو ماكو رجال بالبيت صيحيلي واحد جبير
احمد. نازلي منو عالباب
نازلي. بتلبك احمد هذا واحد ماعرفة يكول صيحيلي واحد جبير اجة احمد وكالي انتي فوتي جوة
فتت بس ميتة خوف اني كلشي ممسوية هو يلحكني شكو خايفة
احمد. نعم تفضل
علي. العفو اسف ع الازعاج بس دا اسئل ع بيت ابو سجاد هذا
احمد. لا حبيبي غلطان هذا الفرع كلة مابي ابو سجاد خاف بالفرع اللي ورانة
علي. ها شكرا حبيبي بلكت بطل مي تعبت واني ادور عليهم وين رح الكاهم مادري
احمد. تدلل هسة اجيبلك رحت جبت مي واجيت تفضل
علي. شكرا مرة ثانية والله هو صديقي من الطفولة  بس شالو صارلهم ١٠ سنين بالصدفة شفت واحد من كرايبة يم جامعتي وسئلتة علية دلاني بهاي المنطقة بس يمكن غلطان
احمد. هههههه ولك وين تلكا بعد ١٠ سنين حتة شكلة ممكن متعرفة
علي. اي والله واضاهر ملكيت صديق الطفولة بس ممكن حتتكون صداقة جديدة تشرفت بمعرفتك ...
احمد. احمد اسمي احمد الي الشرف حبيبي
علي. احمد واني اسمي علي كلية طب اسنان وانت
احمد. حلوة هاي الصدفة اني هم طب اسنان بس مشايفك ابد هناك انتة يامرحلة
علي. مرحلة رابعة وانت
احمد. اي واكول ليش مشايفك ههه اني ثانية
اهلا وسهلا بيك حبي تشرفت بمعرفتك
علي. الي الشرف عيوني
تبادلنة الارقام وتسالمنة ورحت كلش فرحان كدرت اكون صداقة ويا خلال ربع ساعة ........... يتبع
لاتنسون تصويت ومتابعة وتعليق يحفزني اكمل القصة بيهة حقوق مو مسموح تنوخذ بدون اذن 😄