وصلت لدار كنصوط أوف خرجها مني ولد الحرام على تيليفون صغيور داير ليا حالا الله يستر ... على هاد الحالة والله فيدو لا طاح ولكن زقرام لاخور باش عرف درب لي ساكنة فيه مهم لبست جلابة مي ودرت درة فوق راسي وخبيت وجهي باش ميشوفنيش هادك لي معرفت أش سميتو ومشيت كنتسلت بحال شي شفارة عند سعيدة جارتنا نسلف سارجول انا - سعيدة قولي ليا مبروووك شريت تليفون جديد بحال ديالك سعيدة - من البال؟؟؟؟ انا - أويلي على من البال جديد قرطة شوفي باقي كيلمع سعيدة - آهه ولكن منين جاوك الفلوس ونتي زلط داير عليك من كل قنت انا - خمسة وخمامس والحرمل فالكمامس إيوا حمد الله ربي لي كيرزق عبادو صالحين تي عطيني سارجول وبراكة من الهضرة الخاوية سعيدة - ياك شريتيه جديد زعمة ومعطاوكش ساجول انا - عطاوه لي ولكن مجاش قدو سيري الله يسهل عليك طلقينا لفراجة (الله يتبعك البلا) عطاتو ليا تا شحفاتني الله يلكّيها ليها المنحوسة لوخرا يلاه حطيت تيليفون يتسارجا وبدا كيصوني هو - فينك أشفارة والله لا بقات فيك انا - يكما أولد الهم كتهضر من تيليفوني والله نلقى درهم وحدة ناقصة تا نشتف على بوك هو - تاهداك الخرخاش كيتسمى تليفون جوج دريال مافيهش انا - إيوا حتارم راسك هو بعدا حسن من هاد شقف ديالك ريزو مافيهش هو - ردي ليا غي كارطي وتيليفون نتفاهمو عليه من بعد انا - أه حكّا فكرتيني الله يفكرك فشهادة صونات عليك شي وحدة سميتها ما مو مي ممم هو - ماريا انا - أيييييه هاديك صحيبتك ألعفريت صونات شي عشرة ديال المرات وانا كنقطع عليها ما بغيتش نشدها باش ماتقولش كتخونها شفتيييي طلعت بنت ناس هو - معرمني شفت شي بنت الحرام بحالك انا - إيوا جمع فمك ولا نهرسو ليك عندك صح أنا بنت الحرام لي كنهضر مع واحد مكنعرهوش بسلامة قطعت عليه يخ تقول سارقا ليه مليار ديال درهم كّنس ناقص
