BTS Universe~♡

Info 5 (whalien 52)

Credit to our beautiful ARMY girl sondos💜
_

_____________________________________

بدايةً، اسم الأغنية عبارة عن دمج لحاجتين، اللي هم:
"52 Hertz Whale" + "Alien"

وهنا "Alien" معناها الشخص الغريب المختلف أو المعزول عن اللي حواليه، ببساطة كأنه "فضائي"

أما بالنسبة لحوت الـ٥٢ هرتز، فلو دي أول مرة تسمعوا عنه أنا هتكلم عنه شوية..

سنة ١٩٨٩ فريق من العلماء رصدوا إشارة فريدة وغير متوقعة في شمال المحيط الهادي، بس الأكيد أن الإشارة دي كانت لحوت.. بيقال أنه ذكر عشان الطريقة اللي بينادي او بيصيح بيها خلال موسم التزاوج محدش بيصيح بيها غير ذكور الحيتان.. ورغم دا معرفوش يحددوا تصنيفه..

طريقة تحرّكه مشابهة لطريقة أكبر حوت اللي هو الحوت الازرق اللي تردد ذبذباته بيتراوح بين ١٠ لـ٣٩ هرتز تقريباً، سرعته والاقليم اللي بيتحرك فيه مشابه لتاني أكبر حوت اللي هو الحوت الزعنفي اللي تردد ذبذباته بيبقى ٢٠ هرتز تقريباً.. بس الحوت دا كان بيصيح بتردد مختلف تماماً واللي كان ٥٢ هرتز. الترددات دي ستيل منخفضة بالنسبالنا كبشر، لكنها عالية جداً بالنسبة للحيتان ومترصدتش قبل كدا..

احنا ممكن نكون بنعتقد أن العالم اللي تحت الماء ساكن وهادي نسبياً، بس الحقيقة أن اللي بيسيطر عليه هو "الصوت" وهي دي الطريقة اللي بيتواصلوا بيها.. والأشهر بين الأصوات دي هي الأصوات اللي بتطلقها الحيتان المحدبة لدرجة أن الناس بيطلقوا عليها "أغاني"، والعادي أن الأصوات دي بتبقى بتردد أكثر انخفاضاً من اللي نقدر نسمعه احنا البشر فغالباً بتتسرع عشان نقدر نسمعها..
- مقارنة بين "غناء" حوت الـ٥٢ هرتز و "غناء" الحوت الأزرق -
*حطوا سماعات عشان تسمعوا أحسن✨

52 hertz whale :

(اسمعوا من اول الثانيه 15 الى الثانيه 27 "ولو حبيتوا تسمعوا كل الفديو مافيش مشاكل 😂😉" )

Blue whale:

الإشارة دي اترصدت بعد كدا سنة ١٩٩٠ و١٩٩١ وكل سنة بعدها بانتظام، كانت بتترصد في المدة من شهر أغسطس لديسمبر، وبيخرج من النطاق اللي ممكن العلماء يرصدوه فيه في الفترة من يناير لفبراير.. الحوت دا بيسافر من أقصى الشمال لأقصى الجنوب كل سنة وبيقطع من ٣٠ لـ٧٠ كيلو كل يوم، لوحده!

بعض الناس قالوا إنه ممكن يبقى هجين، ودي حاجة نادرة بس مش معدومة.. وبعض الناس قالوا إنه ممكن يبقى أصم.. ورغم كل التوقعات والأفكار فمحدش يقدر يجزم بحاجة لأن محدش قدر يشوفه قبل كدا، كل اللي نعرفه عنه هو غناءه الفريد اللي بيترصد كل سنة من نفس المصدر الوحيد.