في ذاتي سجن الحبيب و غياب الأم( بالهجة الجزائرية)

الحلقات 51\52\53\54\

الحلقة  51
*غدوا من داك نضت صباح وصلني سيلفيستر لليسي .
سيلفيستر:كي تخرجي من ليسي عيطلي نفطرو كيفكيف.
سرين:أوكي نعيطلك.
*غلقت باب سيارة و نشوف نهاد خارج من سيارة تع باباها و دخل ديراكت لليسي دون متهدر معيا؛دخلت لليسي و عيطتلها.
سرين:نهاد صباح الخير.
نهاد:صباح النور سرين.
سرين:وشبيك مكيش حابة تهدري معيا ؟؟
نهاد:لا و الله والوا سمحلي مقدرتش نجي ليك مقبيل.
سرين:ماشي مشكل بصح و شبيهم عينيك ؟؟
كنتي تبكي!!
نهاد:و الله مقدرت سرين كرهت.
سرين:متبكيش علبالك دوك يشوفوك خلي نفطرو كيفكيف و حكيلي.
نهاد:أوكي هيا ندخلوا نقراو.
*خرجت نفطر أنا و نهاد و نسيت كامل موعد تاعي مع سيلفستر و و الله مفقت تيليفون خلصتلو الباتري ، ايه المهم خرجت نفطر مع نهاد و نعرف واشبيها.
سرين:احكيلي نهاد واش كاين ؟
نهاد:البارح كي روحنا نشربو jus كيفكيف كي طولت شويا بابا عيط عليا و ضربني كان في الخدمة تاعو بصح هكاك و عرف و صرا مشكل بينو و بين ماما كي مقاتلوش بلي مدخلتش بكري لدار.
سرين:وهو كيف عرف بلي طولتي ؟
نهاد:منعرف بصح باينة حيطلي واحد يعس فيا كرهت حياتي سرين.
سرين:خلاص متقوليش هك بزاف عليه لازم ماماك تهدر معه.
نهاد:ايه هدرت معاه و دابز معاها علجالي و خرج من دار يبات في لوتال.
سرين:نتي متقلقيش روحك فهمتي ودوك لوكان يعرفك جتي فطرتي معيا ياك ميديرلك والوا؟؟
نهاد:مدخلنيش فيه كرهت خليه يدير لي حب منبقاش تحت سيطرتو.
سرين:خلاص نهاد بلعقل أوكي كولي و إنشاء الله ميصرا والو دوك نتمنى يكون فهم هدرة ماماك.
نهاد:نتمنى حتا أنا بسك يزيد شويا نهرب من دار.
سرين:لا متخليش ماماك قالقة عليك راهي تحبك.
نهاد:و عليها لي راني بقيت بسك هدي مدة 8أشهر و أنا نعاني.
سرين:راني معك أوكي كلش يتحل متقلقيش.
*كملنا فطورنا و رجعنا لليسي ،في لعشية خرجت و روحت لدار شرجيت تيليفون و لقيت سيلفيستر عيطلي 12 مرة أوه هنا تفكرت لموعد لي كان بينتنا ،حكمت تيليفون و عيطتلو.
سرين:سيلفيستر سمحلي تيليفون طفا و نسيت الموعد لي كان بينتنا.
سيلفيستر:هكا تسما نسيتني
سرين:نن و الله والوا بصح واحدة صديقتي كان عندها مشكل و خرجت معها نخفف عليها.
سيلفيستر:وأنا منسواش عندك عليها نسيتني و مدرتيليش أهمية.
سرين:نن وشبيك و الله صديقتي كان عندها مشكل و حبيت نعاونها نوعدك غدوا نعوضوها.
سيلفيستر:معليش دوك راكي مليحة نتي ؟
سرين:حمد لله بيان ياك مراكش زعفان ؟
سيلفيستر:شويا.
سرين:نن خلاص ياك فهمتك.
سيلفيستر:أوكي لعشية نجي بكري بب نسحق نتي طيبي لعشاء بش نسمحك.
سرين:أوكي (eek)(wink).
سيلفيستر:أيا بب باي.
سرين:باي.
الحلقة 52
*وجدت لعشا و خليت عمتو تريح اليوم و زينت طابلة ديكور روعةة تعلمت هد شيء من بابا لخطرش هو مبدع في ديكور ،حطيت كل شيء فوق طابلة و حتا يدق الباب راحت عمتي تحلها.
فراح:أهلا واش اليوم جيت بكري.
سيلفيستر:وي قلت اليوم منطولش عليكم و نتعشاو على البكري مع بعض ،بصح راني نشم رائحة فورررر (inlove)(inlove).
فراح:سرين وجدت العشاء مخلتني نمس والوا.
سيلفيستر:ايه اليوم نذقو مأكلتها باينة من رائحة بنينة.
فراح:روح اقعد كلش راهو واجد.
سرين:مرحبا جيت.
سيلفيستر:وي ياك واش تفهمنا (wink).
سرين:متخممش كلش راهو واجد أنا درت كلش عمتو خليتها تريح.
سيلفيستر:ايه ديجا ذوق شربة تهبل خلينا نكملو الباقي هههه(wink).
فراح:بصحتك نفرح كي تدخل بكري هكا طول نهار منشوفكش.
سيلفيستر:إنشاء الله نعود ندخل بكري كل يوم ماما.
*تعيشنا و كملنا ،نزيدلكم و جدتلهم قاطو لي تعلمت من عند بابا و زدتلهم أتياي بلا زوخ عمتو فراح و سيلفيستر مقدروش يرقدو من بنة المأكلة ههههههه.
فراح:الله يعطيك الصحة كلش بنين حتى القاطو.
سرين:مرسي و الله كنت حابة نديرلكم حاجة سبسيال اليوم عاونتيني بزاف عمتو حتى أنا لازم نفرحك.
فراح:متزيديش تعودي الهدرة هادي نتي راكي فوق الرأس و في العين راكي بنت خويا.
سيلفيستر:شاطرة سرين و الله كلش كلاس مرسي عليك فكرتني في القاطو تع خالو مهدي.
فراح:الصنعة تع باباها و لازم هههه.
سرين:صح بابا علمني ندير أنواع و أنواع.
فراح:أيا أنا لازم نروح نرقد عييت و الله مأكلتك فور ربي يحفظك بنتي.
سرين:مرسي عمتو بونوي.
فراح:بونوي عليكم.
*و أنا غسلت سناني و دوشت و روحت ديراكت لشمبرة نرقد عييت تقول عليا درت حرب ههههه(yummi)،حتى يدخل عليا سيلفيستر.
سيلفيستر:معليش ندخل.
سرين:راك دخلت ههههه اتفضل.
سيلفيستر:مرسي على العشاء بزاف بنين و خلاص راحلي زعاف هنا عرفتك بلي عندي قيمة عندك.
سرين:خلاص فهمت دوك بلي مدرتهاش بلعاني.
سيلفيستر:وي بب مرسي و نحبك.
*مزال موالفتش نهدر هكا مع سيلفستر هبطت عينيا و حمارو خدودي.
سرين:مرسي.
*حكم وجهي بيديه و مسح على خدودي.
سيلفيستر:قوليلي كلمة نحبك راني حب نسمعها من عندك.
سرين:نحبك.
سيلفيستر:يا عمري نموت عليك.
*و ضمني لعندو.
سرين:أنا نروح نرقد بونوي.
سيلفيستر:بونوي بب.

الحلقة 53
*قرب وقت العطلة و لازم نروح نشوف بابا و مروة وهدا أخير يوم تاعي في ليسي .
نهاد:منزيدش نشوفك حتى مور العطلة سرين ؟؟؟
سرين:لازم نروح نشوف بابا و ختي توحشتهم بصح راني نعيطلك نبقاو على اتصال.
نهاد:تعيشي متخلينيش نحس روحي وحدي عيطلي راكي عارف راح يغلقو عليا في دار.
سرين:متخميش و الله نعيطلك حبيبتي.
نهاد:خلينا اليوم نفطرو كيفكيف علبالي راح نتوحشك.
سرين:أوكي حبيبة نفطرو كيفكيف (wink) .
●لحق اليوم لي نولي ليه البلاصة لي خليتها علجال الجرح لي كبر فيا بصح راح نولي علجال أغلى ناس خليتهم<بابا ،مروة،منال،رشا>،لحقني سيلفستر و عمتي للمطار حتى نرجع للجزاير ●
فراح:إنشاء الله تولي بخير يا بنتي سلمي على باباك و مروة.
سرين:بيان سور عمتي نتي مرسي بزاف لي قومتي بيا.
فراح:بلا مزية حنونتي نورتي دار علينا.
سيلفستر:أنا نودعك سرين تهلاي في روحك و ولي مطوليش علينا.
سرين:ههههه أوكي منطولش.
سيلفستر(همسلي في وذني):مطوليش عليا بب راح نتوحشك.
*هبطت راسي من الحشمة و قوتلو.....
سرين:أوك باي(و سلمت عليه )

🌹الحلقة 54
*لحقت الجزاير إحساس إشتياق و شوق بعد غياب دام عام كامل ،لحقت و لقيت بابا و مروة يسناو فيا ،شحال توحشتهم جريت نجري نعنق بابا و مروة.
سرين:شحال توحشتكم بزاف وشراكم ؟؟؟
مهدي:و الله يا بنتي حنا كل يوم هدرة عليك و الله مروحتي من البال.
مروة:الله يبارك راكي تباني أوروبية شحال تنورتي بصح متحشميش هكا طولي علينا.
سرين:راكي تعرفي مع الكونطرول تع طبيب و القراية الله غالب بصح و الله توحشتكم يا مروتي.
مهدي:المهم مرحبا بك.
سرين:مرسي بابا.
مروة:و الله المهم مرحبا بك .
سرين:هيا دوك توحشت دار.
*لحقت لدار واووو بابا بدل ديكور تع دار و شمبرة تاعنا ولت شابة بزاف تقول راكي في عالم الجمال .
سرين:واووو شمبرة ولت روعة علبالي بابا نتا بدلت ديكور.
مهدي:وي حبيت نحي شويا الغمة على دار.
سرين:حاجة شابة بزاف (inlove)(inlove).
مروة:عجبتك!!!
سرين:وي و بزاف.
مهدي:شوفو البنات أنا نروح عندي وحد شغل بصح 15 دقيقة نرجع و نجيبلكم عشاء toppp.
سرين:أوكي بابا بسلامة.
*خرج بابا و شفت علامات الحزن على وجه مروة شد يديها و طرطق فيهم.
سرين:وشبيك طرطقي هكا صبعتيك؟
مروة:سرين نحكيلك حاجة بصح لازم تفهميني.
سرين:قولي واش كاين ؟؟؟
مروة:متقلقيش بصح فهمتي.
سرين:هيا قولي.
مروة:لازم نقولك أنا الأولى قبل ما يقولك بابا.
سرين:واش (not_sure)؟
مروة:بابا حاب يتزوج .
سرين:كيفاه؟
مروة:وي المرأة هدي أنا خيرتهالو عليها بدلنا ديكور ،افهمني سرين درت هد شيء في صالح بابا.
سرين:علاه كشما خصوا ؟
مروة:يا ختي بابا كبرنا و ولينا نسا لازم واحدة تقوم بيه و هدي كانت حاب بابا من زمان و الله علبالي راح تهنيه ،مات رجلها و خللها طفلة تشوفيها كي القمر عمرها 5سنين.
سرين:علاه مروة علاه شفتي كيفاه عانى رسيم مع مرأة باباه علاه دوك لازم نخاف عليك كي نخليك و نروح عند عمتي (depressed).
مروة:والله ميصرا والوا بعد موت نوال شفت بابا تبدل بزاف و لا بعيد بزاف على دار و ديما قلقان عليها قررت هد شيء.
سرين:أوووف مروة راح يزيدو يجو المشاكل يا ربي.
مروة:مرأة مليحة نعرفها راهي خالت صحبتي و من زمان حاب بابا بصح عرفتو هو ميحبش.
سرين:دبري راسك نتي صاحبة الفكرة متلومي غير روحك.