SUMANDAK DUSUN TERAKHIR (Completed)

part 2

SDT2

Penulis : Fuukye js
Bahasa : Sabahan
Genre : Komedi
Tags : berdikari / bersaing

"Nekuro dii rabas kau miagal dii sapi aloi, Lis?" Ijin managur si Lisa yang datang di garai dia, dengan muka mencuka.

"Sabalum sa marah, kasi sa kau punya kui pau 2 biji!  Utang!" Jawab si Lisa macam noh taukeh soh arah arah si Ijin. Becekak pinggang kunun tu sumandak nda meningu Ijin.

"Jadi!?  Yang dulu kau utang tu, bila mau bayar? Ini yang ka sambilan kali ini kau utang. 8 ringit sudah tamasuk yang ninah ko ambil ni." Tanya si Ijin, tapi dia pun budu juga kasi juga masuk tu kui pau sana palasitik.

"Tungu la bah sa manang Unduk,  sa bayar juga tu nanti!" Jawab Lisa, kasar butul dia tarik tu palasitik isi kui tadi.  Belinggang dia balik kasi tinggal Ijin yang tekulat kulat meningu dia.

"Hondiahoi! Ndada la kau manang tu kalau begitu gaya kau!  Minta puji butul!" Si Ijin mambalas  balik.

Malambai saja kunun si Lisa bagai gaya miss wold tu bah.  Yang tangan malambai gemalai kiri kanan tu.  Begitu.  Teda bidio sini, susah sa mau kasi expalain.  Yang gini gini tu bah!  Hoiiiyohh! 

Di tangah tangah jalan, tarsarampak dia sama Lele. Anak si Lamis, yang dapat numbur 2 Unduk, taun lalu.  Bah, tapuji la si Lisa, di kasi kunun linggang busul nipis dia kiri kanan, macam mau patah tu pinggang saja tu gaya.

Belimpas kunun ni duarang sumandak. Lele sanyum la sama Lisa. 

"Hai Lis, kau dari mana?" Sopan saja Lele menanya. 

"Teda,  dari halau sapi si aloi. Kau nda nampak kaini kui sa makan makan?!" Lisa kasi miring muncung dia. "Sudah tau mau lagi tanya, ini, oi,  kau nda ikut kan taun ni? Bukan ko pigi ostorolia kaitu?" Tanya Lisa heran, tapi nda butul sopan santun tu gaya. 

Lele kasi kerut kening, "Teda jadi sa pigi, kana kansel tu lawatan.  Haishh!  Ikut bah, mana bule talapas ikut tu. Sa mau ikut, sampai sa jadi ratu.  Nikali sa pakai baju KB.  Kau ada?" Bilang Lele memperli si Lisa. 

"Eksen butul kau ah! Korang tingu la sa nanti,  3 bulan lagi bah! Sa beruba ini!  Kau tingu la!" turus si  Lisa kasi tinggal Lele di simpang jalan. Marah dia membuak sudah.  Macam dia mau kasi tapap saja tu pau sana muka si Lele tadi, nasib baik dia lapar.

Sampai di rumah, Lisa mangamuk panggil mami dia.

"Mami! Mana kau ni! Sini capat!"

Yalina yang sedang mamasak didapur tedingar dingar nama dia macam kana panggil panggil saja.  'siapakah gerangannya yang memanggil manggil nama ku?' Kunun besandiwara si mami Lisa.  Pastu dia tutup api gas, pigi la msncari tu suara pemanggil tadi. 

"Kau pula tu Lisa!  Kau dari mana ini? Pagi pagi lagi kau sudah jalan, itu kain tadi kau sudah jamur kaitu!?" Tanya Yalina sama tu sumandak dia.

"Bulum!  Ini bah mi,  si Lele, nda jadi pigi ostorolia bah!  Dia ikut juga tu Unduk nanti, eiii!  Banci butul sa! Kasi ikut sa juga nikali, Kalau nda sa mangamuk ini!" Bilang si Lisa mengugut maminya.

Takajut Yalina sumandak dia pandai sudah mengugut nikali, salalu dia mangalah saja, tapi nikali nda dia mau dingar sakap si Lisa.

"Kau budu kaini? 5 kali beturut turut kau ikut, teda juga dapat,  itu pangadil pun busan tingu kauuu saja naik pintas!  Sudah, pigi masuk!  Apa kau bawa tu,  kasi sa sikit." Bilang Yalina membebel sama Lisa.

"Sa utang ini sama Ijin, sa bilang nanti sa bayar kalau jadi ratu ni taun, jadi mami kana kasi masuk nama sa nanti!" Jawab Lisa, tapi nda dibagi maminya tu kui pau. Dia limpas saja mami dia pigi masuk bilik. 

Yalina meningu sumandak dia hantak kaki masuk bilik. Tetingu dia pantat si Lisa.

"Adeiii ni anak! Kasi gumuk dulu pantat kau yang nipis tu bah, baru ngam sama itu baju! Pakai tangkong pun merurut jatuh, macam taun lalu, bikin malu butul!" Tariak Yalina. Risau butul dia sama tu busul Lisa. Teda isi. Dia tingu pantat dia, berisi ih banyak dari sumandak dia. 

"Mana bah pigi isi pantat kau itu, Lisa? Heran butul mami. Keturunan mami teda yang nipis nipis pantat. Kau saturang saja begini oi!" lagi Yalina membebel masuk dapur belimpas bilik si Lisa. 

"Mami tanya lah bah sama Dadi sana kuburan apa pasal pantat sa nipis!  Apa butul yang makan isi pantat sa ni! Gila butul punya soalan! " Lisa beteriak didalam bilik manjawab maminya.

Bagaduh ni anak baranak pasal isi pantat saja tu topik. Belarutan sampai 1@2 jam duarang  bertekak sakan, sampai lah Yalina siap masak.