SUMANDAK DUSUN TERAKHIR (Completed)

part 8

SDT 8

penulis Fuukye js
Bahasa sabahan baku
Genre komedi

Si Nonon yang sibuk mengetiun gitar bass dia, bediri pigi buka jindela bilik dia, bulum sampat dia kasi kuluar kapala, satu salipar jipun malayang masuk didalam bilik.

"Hoi!" Bukan main marah lagi Nonon kana umban salipar jipun, turus dia meningu di luar jindela kayu bilik dia, satu kali lagi dia kana umban,  tapi nasib baik dia sampat mangilak!

BAMM 

Lakas lakas dia tutup tu jindela, lapas tu dia turun bawah mau pigi buka itu pintu rumah.

"Lisa!  Kanapa juga kau pigi umban dia salipar!?" Soal Kula terpinga pinga pasal perbuatan si Lisa tadi.

"Itu tirik! Kau budu ka kasi tau dia time kita diluar sini, pintu pun bulum kana buka. Kalau Kita kasi tau hal butul butul tadi, kau ingat dia mau tulung kaitu?" Debilang negi si Lisa.

"Ah,  butul juga apa kau cakap tu. Pandai juga kapala utak kau umpan dia aaa!" Debilang Kula katawa katawa lagi disana.

KREKKK

BULUM pun sampat Nonon mau tariak durang, badan dia turus kana tulak masuk dalam rumah dia balik!

BAM!

Lisa pigi tutup capat capat itu pintu.

"Woi!  Kanapa juga bah kamurang ni!? Sa bule dakwa korang menseroboh rumah sa tanpa minta keijinan! Kamu paksa sa masuk, dalam rumah sa balik!  Eh?" Blur blur Nonon yang tajatuh di atas lantai rumah dia. 

"Diam mulut kau, kasi kami tinggal disini sampai bisuk pagi!" Lisa tarik tangan si Kula duduk dakat dia di siring dinding.

"Apa?!" Turus Nonon bangun pigi dakat si Lisa. Pa lagi, bagagar la Lisa sama Kula.

"Ini rumah sa, tau? Kamurang suka suka suruh sa diam?" Pastu Nonon tingu keadaan tu dua sumandak.

"Dari mana juga bah kamu ni?  Muka gorongot, rambut panuh tanah liat. Kamu pigi mancuri padi urang kaini? Sabab tu kana bubut??!" Nonon tutup kunun mulut dia buat buat takajut.  Tapi, mau sudah ih katawa dapan tu dua sumandak. Libih libih lagi si Lisa, sampai di lubang idung baitu tanah liat nokosisip. Takaras sudah sana dalam. 

Dia tingu si Kula, balik balik lagi jari dia tunjuk tunjuk kapala si Lisa. Mau kasi salah si Lisa laitu. 

Jadi, terpaksa Lisa kasi cerita kanapa durang jadi gorongot dari A to Ž,  sama tu tanak wagu.

         °°°°°
"Ooooooo... Adei, sa nda mau masuk campur hal kamurang anak baranak ni. Nanti nda pasal pasal sa kana sogit!"

Maradang sudah Nonon sebab nda pernah pernah sumandak masuk dirumah dia, libih libih lagi si Lisa ni, anak si Yalina yang gorongit butul di kampung durang. Silap silap haribulan, kana dia silat gayung si Yalina!

Pestime butul ini kejadian menimpa dia. 

"Begini la, kalau kamu batapauk tapuk,  bakajar kajaran begini, sampai bila bila pun nda abis,  sa bule tulung, tulung kasi salasai ni problemo korang. Jap sa pigi ambil HP sa." Bilang Nonon dii, bila Lisa abis saja kasi cerita sama dia kanapa dan mangapa ini hal tarjadi. 

~~~~

" Sudah sudah laitu anty, kasi maap saja boh, hal kici, kamu kasi basar basar. Sampai bila pun nda abis ni marathon kamurang ini." Bilang si Nonon kasi nasihat. Mau daa dia katawa tingu patern ni anak baranak, tapi dia tahan tahan dulu.
Salipar si Lisa dia ampai sana dapan pintu, pastu dia bebisik sama Lisa,  'Len kali, katuk pintu,  bukan main umban salipar. Ganas juga.' Debilang Nonon turus dia jalan pigi manyandar di dinding pintu rumah dia.

Mirah padan muka Lisa. Padas padas tu talinga dia kana bisikan suara si Nonon.  Bediri bulu roma dia.

Jadi Lisa sama Kula pigi minta maap sama mami durang.
Sebelum durang balik, sampat Lisa pigi dapan si Nonon, "Kalau sa nda umban tadi, taih tasu la kalau kau mau tulung kami tadi tu, bluek!" Lisa tondila si Nonon pastu, tu sumandak balarian pigi di tangah jalan sama sama durang mami dia. Seperti biasa,  tu jari jemari Lisa melambai si Nonon macam tu miss wold.

"Adeh,  ni rangkagiu!" Nonon mengusuk gusuk idung dia sabab gerigitan sama gaya gaya si Lisa.

Sebulan kemudian...