SUMANDAK DUSUN TERAKHIR (Completed)

part 11

SDT11

penulis Fuukye js
Bahasa sabahan baku
Genre komedi

SEMINGGU SEBELUM PESTA KAAMATAN.

"Lisa, kau sudah isi langkap tu borang kaitu, mami mau pigi kasi pas sama Batris suda ni. Samua pasarta suda kasi, tinggal kau saja yang bulum." Yalina mananya Lisa time dia dibilik mau bersiap siap pigi tamu.

"Suda sa kasi Si Kula samalam, time durang pigi dewan buat reheasel sungandoi itu." Sahut Lisa di dapur, tangah mamasak makanan tangah hari.

"Ah, bagus laitu, nda paya mami pigi dewan laini. Sa turus pigi kadai Diana la, ambil itu baju." Jawab Yalina manyandang beg tangan di lengan dia. 

"Bah, pigi la. Kasi bili sa itu tarap, kalau ada. Siakan sa." Lisa mamasan maminya.

"Tarappp saja kau makan. Beulat nanti tu usus kau itu. Manis baitu, nanti batambah itu lunok di parut, ilang nodi sikpak kau nanti." Bebel si Yalina. Nda paham butul keminatan sumandak dia ni sama tarap. Macam noh tu amas, kalau Lisa nampak tu timadang.

"Mami ni gila ka apa?  Manada tarap kasi gumuk badan?  Kalau durian, sa picaya la!"

Karatang karatung lagi bunyi kuali Lisa katuk, time mogonsok sana dapur. Maradang butul dia sama maminya. Apa pun mau ciriwit. Itu nda bule, ini nda bule. Pigi jamur kain pun ada time dia,  'Pigi jamur kain, sabalum itu matahari terbit,  nanti kau jadi itam!' Debilang mami dia tuari.  Doiii!

Macam macam.

"Sa pigi suda ni, tunah pawong menunggu suda sa."

"Jangan lupa itu tarap!"

"Hondiahoi!"

                          °°°°°°

"Butul Non, David cari kau pasal itu." Debilang Josh time dorang dua di dewan kasi prepare itu sound sistem.

"Cari saja bah, apa sa takut. Mimang Lisa golpren sa." Jawab negi Nonon kasi iya saja cakap si Lisa sama David tuari.

"Ah, butul meh? Sajak bila kau besinta sama anak tu singa ooo?" Tanya Josh nda picaya cakap  Nonon.

"Sajak dulu lagi, time Lisa masih rangkagiu." Bilang Nonon selamba saja, sambil dia try test itu mic. Tapi, mimang lama suda dia suka Lisa baitu. Cuma teda kabaranian mau kasi tau, abis, gorongit gia si Yalina.

"Uisehmen! Jadi butul laini kamurang dua kapel?" Besunguh butul si Josh mananya.

"Iya..., " Debilang lagi Nonon. Mau mau dia si Josh kasi heboh pasal tu, supaya si David tau dan patah hati sama Lisa.

°°°

"Non oh Non!" Tiba tiba muncul David di dewan sama si Chil, pigi dakat durang Josh.

"Non, David tunah, sama Chil!" Josh membisik ditelinga Nonon.  Tapi Nonon buat budu saja. Nda dia manjawab, tapi sibuk dia bikin itu pendawaian.

PAK

David pigi tapap itu mija di dapan Nonon!

"Kalau butul kau anak jantan,  one by one bah di luar!" Kaka si David menunjuk nunjuk muka Nonon. Nga, Nonon buat nda tau saja. Dikasi biar David malalak sana dapan tu stage.  Semua yang ada di dewan berenti buat karaja durang, meningu sama David yang mogulou suda.

Bebisik bisik durang sesama sendiri.

"Kanapa itu?"

"Ntah, tiba tiba,"

"Pasal apaitu?"

"Nda tau si David, tiba tiba pigi marah Nonon."

Begitu la cakap urang yang di dewan bebisik bisik.

Pastu, nda berenti David mamaki hamun Nonon sana. Dia kasi malu butul itu tanak wagu. Nga, teda apa pun salah Nonon sama dia.

"Kes semburu kaitu?" tedingar lagi bisik bisik di balakang durang.

Nonon tahan hati saja, nda dia mau begaduh time dia sibuk kasi bagus tu sound sistem. Kalau dia mambalas, nanti hancur bakacai itu barang di dapan dia, jadi dia kasi biar dulu David bacakap sampai dia puas.

Chil kasi sabar sabar si David.

"Kau pigi tanya balik Lisa bah, butul kaitu dia bilang tuari. Kanapa sa tanya Kula, Kula bilang teda? Tombirang kali Lisa ni." Debilang Chil sama David.

"Ah, Kula mana mau kasi tau yang butul butul itu. Sama saja dia tu sama Lisa. Butul ka tu Non, apa yang Lisa kasi tau sa tuari!? Kau kapel ka sama dia."  David pula mananya sama Nonon yang suda siap dangan karaja dia.  Tu tanak wagu nda jawab tu pertanyaan, dia pigi nodi sana balakang dewan, Josh pun ikut sakali pigi. 

"Mari!" David bawa Chil sakali pigi balakang dewan.

Belakang dewan.

Sana si Nonon beduduk duduk minum air sama Josh. Durang nda paduli sama David yang datang menyungku dia. 

"Kanapa kau nda jawab sa? kau takut kaini?" Tanya David maradang suda sama Nonon.

°°°

PON PON PON

"Lisa oi!  Kana kasi tukar date reheasel neri!  Bukan bisuk, tapi neri!" Batariakan Gegel di dalam van yang berenti di simpang rumah Lisa.

Tedingar Lisa di dapur yang tangah makan, lakas lakas dia pigi meningu sana luar jalan raya.

"Apa!?" Ulang Lisa.

"Neri kita reheasel!  Bukan bisuk,  kana tukar date.  Capat kau besiap,  pakai baju pit putih sama saluar panjang itam!"

"Adeii!  Tunggu sa! Sa capat capat ini!"

°°°°

"Kanapa juga kau mau tau butul ni, David?  Lisa suka kau ka?" Akhirnya Nonon buka mulut.

"Mimang dia suka saya!"

"Oh,  ya ka? Jadi,  kanapa dia bilang,  sa ni boifren dia?"

"Itu yang sa herann butul ini, saya bah boifren dia itu! "

"Jadi kau mau tuduh si Lisa curang laini?"

"Nda juga bah! Tapi, "

"Patut kau tanya dia,  bukan sa bah. Apa juga salah sa?" Nonon memutung kata David.

"Kalau butul Lisa tu golpren kau, nda dia barani cakap yang sa ni, boifren dia bah. Mungkin kau saja yang parasan baini, kan?" Sambung Nonon lagi sambil memerli David.  Rilex saja tu tanak wagu beduduk minum air.

Sana si David nda tau mau membalas apa lagi, tediam turus dia.
tiba tiba satu suara lantang dari mic memanggil DJ. Jadi,  Nonon bediri pigi tingu sepa di stage yang mamanggil dia.