SUMANDAK DUSUN TERAKHIR (Completed)

part 6

SDT 6

penulis Fuukye js
Bahasa sabahan baku
Genre komedi

"Ma oh ma!" Beteriak Yalina memanggil Madonna, ninik si Lisa. 

Madonna yang sadang manjait gonob tedingar itu giakan sana bawah kulung rumah dia. Jadi,  dia bediri pigi meningu.

"Kanapa itu, Lina. Maradang butul muka kau sa tingu." Tanya Madonna sama anak numbur satu  dia ini.

"si Lisa ada datang disini kaitu?" Slow slow sudah sikit nada si Yalina time bacakap sama mamanya. Beduduk Yalina di tangga walon.

"Mana ada urang datang sini neri. Nokuro kaka?  Kalau kau mau pinjam duit bikin kasi siwa otpit si Lisa,  teda!  Mama teda duit!" Bepikir pikir Madonna mana mau kasi tapuk duit dia. Dulu dia kasi tapuk di dalam esbok, tapi takaras itu duit. Kalau kana jamur basah dii,  jadi dia tepikir neri mau kasi tapuk sana dalam kasut tinggi dia.

"Haishh mama ni,  bukan bah!  Sa mau cari Lisa sabab mau kasi makan dia itu prodak kasi isi pantat!" Yaling pun maradang juga sama mama dia, Yalah, sabab kana cop muka peminjam duit.

"Ooooo!  Sa ingat kau mau pinjam duit lagi. Sabab satiap kali kau datang, meminjammm saja gia sa duit karaja kau. Kamurang ingat sa cop duit kaini.  Itu adik kau lagi, si Kayla  sama si Chil,  samaaa juga maminjam sa duit.  Tedaaa juga ih kana bayar. Masam masam cakap time maminjam, sakali ditagih, taih tasu saja alasan dikasi."

Chill yang ada didalam bilik tadingar itu pagaduhan kici. Sampai nama dia pun kana sabut sabut. Jadi, dia kuluar lah dari bilik.

"Apabaini bising bising butul ni?" debilang pigi duduk dakat Madonna.

"Kau pun satu juga lah!  umur mau masuk 30, bulummm lagi kawin kawin! Karaja bukan main loded,  manager, tapi Tedaaa sumandak! Pigi kau cari manantu kasi saya, makan tidur minum mabuk, itu saja karaja kau! Maminjam lagi mama duit, nga manager ihh!" Chil pula jadi sasaran tu boliou. Tegaru garu dia kapala di sisi mama dia. Pastu dia pigi marah kakak dia pula.

"Kau punya pasal laini Lina, kalau kau tida datang sini bising bising,  teda juga sa kana suruh cari bini!"

"Mulau la kau sana,  itu si Lele mau kau,  kau pula macam taih jual mahal! Saya pula dia kasi salah!"

Begaduh gaduh lagi dorang, tedingar sampai  sana rumah Kayla.
Kayla yang sedang menunggu Kula balik dari membeli,  tagarak hati mau pigi sana rumah walon.

'Apa butul bah durang  bising bising ni? Mana sudah si Kula ni?  Sa Suruh pigi bili modos tadi, bulum lagi balik bailk. ' Pastu Kayla pun turun dari rumah, pigi sana rumah walon.

~Walon adalah rumah pusaka nenek moyang durang,  jadi sabab Itulah ia diberi nama Walon~

Sesampai saja sana,  nda pasal pasal dia lagi kana...

"Nah! Si kayala suda sampai!  Mau utang lagi laitu duit mama!" Tariak Yalina menunjuk muka Kayla.  Pompuan tu tekulat kulat meningu. Heran becampur pelik.

"Apaini? Sa baru sampai kana tuduh mongutang tusin?! Oi, suara kamurang macam anak ayam bising butul sampai sanaaa rumah sa,  sabab itu lah sa datang!  Kanapa juga tu!?" Tanya Kayla, kasi lilit kamas itu gonob di tawak. 

"Sa mau cari Lisa, tapi ini mama kau salah dingar kali, bosukon pun nda juga bah, bule tu karoke hari hari sama Jawis!" Yalina bilang memerli Madonna. 

"Ah,  apa mama bilang tadi butul baitu, alasan saja mau cari Lisa.  Sanaa baitu sulap sa nampak sama si Kula tadi." Chil memutung kata kakak kakak dia, lalu mengiakan kata kata mamanya. 

Semua meningu si chil dengan muka menyinga. 

"Apa!? Macam mana kau tau durang disana! Patutlah sa tunggu tunggu dari tadi, rupa rupanya melipak di sulap!" Marah SiKayla sama  anaknya. Dikapit kapit lagi tu paha supaya itu kain yang bikin antob tete dia sabab period, nda jatuh dari santut. Teda gam gia.  Mana diii! 

"Saya kan ada telesekop, sampai bulan pun sa dapat cubuk,  tau!" Bilang si chil mendabik dada.

"Ahhh!  Sabab itu kaling yang cakap time manjual itu barang sama kau! Jangan lupa bayar utang kau sama mama! Pinjam Pinjam Pinjam! Antah mana taruh duit gaji dia, kau malangan palasur kaini, Chil?!" Tanya Madonna, memang ni urang tua maradang sudah sama anak lalaki bungsu dia ni.

"Choi!  Taih tasu la malangan palasur!  Puih! Teda panyakit  mau cari panyakit! Sudahlah malas sa layan korang!" Chil turus kasi tinggal saja dorang sana. Takut kana soal siasat lagi oleh kakak kakaknya.

"Sana sulap rupanya!  Mari Kayla pigi cari durang!" Yalina manarik tangan adik dia, Kayla. Pa lagi, tekapit kapit kaki Kayla mengikut Yalina pigi sana sibor.

Meningu saja Madonna sama dua urang anak pompuan dia. Nda sampat dia tagih utang sama si Kayla tadi.

'Sa talipon juga korang ni nanti minta bayar utang!' Bilang Madonna dalam hati.  Masuk balik dia di dalam rumah kasi sambung menjahit itu gonob dia tadi.

Laju laju lagi hayunan langkah dua mama mancari anak durang di sibor, padahal, tu dua ikur munyit sedang menuju pigi rumah ninik durang.

Jeng... Jeng... Jeng...