SUMANDAK DUSUN TERAKHIR (Completed)

part 12

SDT12

Penulis Fuukye js
Bahasa sabahan baku
Genre komedi

🎤"DJ Nonon, sila tampil ke depan. Buat sesi selingan niari, peserta Unduk sudah sampai disini. Reheasel, diganti pada hari ini. Mana suda tu ensomboi tu? Helo helo?" Batris, ahli jawatan kuasa panganjur mamanggil manggil lagi si Nonon pigi di stage. Semua urang yang bakaraja sana menunjuk nunjuk di balakang stage.

Batris memusing kapala dia meningu sana balakang dia, slow motion saja Nonon pigi di mija sound sistem sambil bagi tanda peace sama durang di dalam dewan. Beikutan Josh di balakang Nonon.

Si David masih bediri sana balakang dewan, kobobou, sabab sakit hati butul sama Nonon. Mula la dia badandam sama Lisa. Chil balik balik kasi kool down dia. Ya la, mana la tau, tiba tiba tu tanak wagu mogulou time reheasel.

"Sudah laitu David, kita balik dulu, jan kacau durang sini, nda pasal pasal nanti, polis datang." Chil membawa David balik.

"Kau pujuk anak buah kau nanti, Chil. Sa nda puas hati butul ni. Lama sudah sa mau dia tu!" Bilang David mangatap gigi.

"Itu sa nda bule cakap la, sabab kakak sa punya anak gia. Kalau butul kau mau Lisa, kau sendiri pigi kasi tau Yalina la." Chil kasi nasihat si David.

"Bule bah, bila bila saja! Sa nda takut!"

"Bah, bah,  kita balik dulu. Jalan sini balakang dewan. Jangan kana nampak oleh durang sana."

°°°°°°

"Aha!" Suka hati Batris tenampak batang idung Nonon, turus dia turun pigi tampat tu tanak wagu. Dia arah Nonon kontrol 🎶  time tu sumandak semua buat latihan. Nonon angguk saja. Sengketa dia sama David, dia kasi lupa begitu saja, sabab si rangkagiu ada dapan mata dia.

'Fuh, santik santik si puok mangis, santik lagi rangkagiu sa,' Nonon berjenaka dalam hati. Tatambat butul dia sama si Lisa neri. Apa tida, tu badan bah, macam gitar viola dia tingu. Mangancam butul. Libih libih tu dagu babalah!  Odoiii dogooo!

'I'm pall in in lobe!' Debilang tu lagu QUEEN.

"Bah, korang samua siap siap di balakang bilik dewan, buat yang macam first kita latihan tuari. Dj non,  ready?"

"👍"

"Alright!  1,2,3!"

🎶 🎶 🎶

............................

Sudah siap latihan reheasel, samua urang siap siap suda mau balik. Si Batris sudah kasi tau peserta begini begitu, sabab 2 hari sabalum pesta kaamatan, durang ada satu kali lagi sesi latihan. Yang last suda dii. Jadi samua peserta paham apa yang di kasi tau.

Diluar dewan, Lisa menunggu si Kula ambil dia balik pakai moto. Tapi lama butul sampai. Pigi nodi Lisa sana sabarang jalan raya. Mau sikit sikit suda urang di dewan, itu pun ankol ankol yang menyusun bangku sama mija.

Jam pun suda mau pukul 10 malam.

"Mana juga si Kula ni?  Kamalaman la sa disini ni satu urang." bacakap Lisa saturang sana jalan raya. Bagaru garu lagi dia tu talinga.

"Oi Lisa, kau tunggu sepa ni?" menyingah Nonon di dapan Lisa pakai skuter Yamaha dia. Tapi Lisa buat deh saja. Padahal, dia takut pasal yang ari tu dia tapap muka Nonon pakai salipar.

"Oi, sa tanya ni." Debilang Nonon lagi. Sama juga, nda kana layan si Nonon.  Jadi, Nonon rasa tacabar dii, "Sa boifren kau kan, kau bilang tu?  Jadi, mari sa antar kau balik."

Takajut Lisa bila kana tanya begitu.
Turus dia tingu muka tu tanak wagu, tapi muka Nonon teda reaksi pun. Sanyum pun nda, marah pun nda. Macam teda parasaan butul. Bebisik Lisa sendirian,' Butul butul ka si David pigi tanya si ikan jalak ni? Adui, matilah! Bikin malu butul ni... Macam mana ni??' Akarau lagi ginawo Lisa time tu. Panas suda ih muka dia tahan kamaluan.

"Bah,  capat la sayang, nanti David pula yang datang pigi kasi tumpang kau. Kau tunggu dia baini kan?" Debilang negi Nonon kasi main main Lisa.

Bulum sampat Lisa mau balas

🎶 📲 talipon dia bebunyi...

📲 Kajen,  alaaamaa,  tayar moto bapa sa pancit ni, nda dapat sa pigi ambil kau. Kau tumpang la sepa sepa di sana!" Kula manilipun Lisa.

📲 Aduiii!  Kanapa juga niari moto kau buat hal ni!? Ish kau ni, sepa lagi sa mau tumpang ni?  Teda suda urang sini dewan."

📲 Aya.. Siou bah,  kalau gitu,  kau jalan kaki balik la."

📲 Galap baini, jauh lagi!  Namao la!"

"Bah, capat la, ada antu ni sini, sa dingar dingar tu ari durang bilang." Nonon kasi takut takut lagi Lisa di sana yang tangah bacakap sama Kula di talipon.

📲 Bah, ya la.  Sa jalan kaki saja la!"

KLIK

Lisa nda hirau apa yang Nonon cakap tadi. Lapas dia end kol saja,  Lisa turus jalan kaki kasi tinggal si Nonon sana siring jalan.

"Adeh,  jual mahal butul ini sumandak." Nonon merunggut, tapi dia bawa moto slow slow di balakang Lisa.

"Kau mau tumpang ka nda ni, Lisa? Jauh itu rumah kau, 10 kilo miter lagi. Limpas kuburan lagi sana nanti.  Kau nda takut ka?" Debilang Nonon sana balakang Lisa.

Lisa kasi juga capat langkah kaki dia.
Nda dia mau dingar cakap si Nonon.
Tapi, kacut juga hati dia bila teringat tu kuburan sana dapan. Galap lagi jalan raya teda kana pasang lampu neon. 

Si Nonon balik balik kasi highlight balakang Lisa supaya berenti. Nga, karas butul hati tu sumandak.  Sakali...

KADABOMMMMMM

Guntur sama petir babunyi kuat, yang bikin takajut jantung. Pa lagi, teduduk Lisa sana atas jalan raya beteriak katakutan.

"Nah!  Sa suda cakap tadi kan,  capat la naik!" Debilang Nonon sesudah sampai di dapan Lisa yang masih teduduk memigang kapala dia. Takut takana gonit kali.

Rintik rintik ujan mula jatuh menimpa durang sana jalan raya. "Naik la... Ujan suda ni,  kalau nda sa kasi tingal kau saturang sini.  Tunnnnah tu kuburan dakat suda. Ada tu urang tua cakap kan, "

"Jangan cakap lagi!" Turus si Lisa bediri pigi duduk sana moto si Nonon. Dia paluk pinggang tu tanak wagu sabab ketakutan yang malampau  suda. 

"Jalan laaaa!" Tariak si Lisa lagi.

"Hahaha!  Guntalow juga kau ni kan?" Nonon bawa dii moto dia, tapi slow butul dia bawa. Sabab... Ehem... 

"Bawa laju laju bahh!" Maradang Lisa sabab dia rasa slow butul itu moto kana bawa.

"Nda bule, begini begini saja ni skuter ni. Nda bule bawa laju." Nonon kasi buhung  tu sumandak. Padahal, dia mau rasa kehangatan badan Lisa di balakang dia bah. Makin lama makin sayang pula Nonon sama ni rangkagiu.

'Lisa butul butul ada parasaan sama sa ka?  tuari time dia cakap sama David, dia maksudkan ka tu ah?' Bepikir suda si ikan jalak pasal ni sumandak.

Berlainan pula dalam pikiran Lisa

'Kimai, kalau bukan pasal tu kuburan sana, mana sa mau ikut kau ni!'  Maradang lagi Lisa dalam hati.

Bersambung...  Hahaah