وقـــــت

{( الكدب )}

***************************************************************************

في كل يوم بيعدي من الشهر ، هما الاتنين بيفكروا في بعض ، منة بتفكر انه ممكن مش يرجعلها تاني و يروح الجنة زي باباها ، و احمد بيفكر ازاي يطمن عليها بأي طريقة

و هنا بقى هيظهر اول سبب من اسباب بوظان العلاقة

( الكدب )

اتصل احمد بمنة وهو عنده أمل انها ترد ، بس أزاي ترد وهو بيتصل بيها الساعة 4 الفجر

بس هو وراه عملية بعد ساعتين بالظبط ، عايز يطمنها عليه عايزها مش تخاف من حاجة ودايما تفتكر ان ربنا معاه بيحميه

" احمد انت واحشني أوي "

" و انتي كمان وحشاني جدا جدا ، عاملة ايه في الجامعة "

" كويس جدا ، هيعلمونا النهارده ازاي نشرح انسان عشان نعرف سبب وفاته "

فكر احمد مع نفسه وقال انه ممكن يكون الجثة اللي هتشرحها في الجامعة

" طيب كويس "

" مالك يا احمد فيه ايه ؟؟"

" مافيش انا كويس يا منة "

" لا في حاجة ، احمد انت عندك عملية صح "

" لا يا منة معنديش عملية النهارده "

" انت عمرك ما قدرت تكذب عليا فا مش تجرب تكذب عليا دلوقتي "

" اه يا منة عندي عملية كمان ساعتين "

" انت بتكذب عليا يا احمد ، انت قلت انك مش هتنزل في عمليات تاني "

" مش بأيدي يا منة ، ما انا منفعش اسيب زمايلي ينزلوا لوحدهم "

" هى رحلة يا احمد عشان تخاف تسيبهم ينزلوا لوحدهم ، انتم رايحين لمصيركم بأيدكم "

" خلاص يا منة انا لازم انزل "

" انت ليه عمال تكذب عليا اليومين دول ، انا بس بخاف عليك يا احمد مش عايزاك تموت "

" انا بكذب عليكي بس عشان مش عايزاكي تقلقي على الفاضي "

" اقلق علي الفاضي ، انتي في سينا يا احمد عارف يعني ايه في سينا "

" عارف يعني ايه سينا ، يعني شهداء ماتوا كتير عشان يحرروها ، واحنا اللي لازم نكمل حمايتها "

" خلاص يا احمد انا مش عايزة اتخانق معاك ، تروح و ترجع بالسلامة "

" انشاء الله ، لا الله الا الله " 

" سيدنا محمد رسول الله " 

**************************************************

حبيبة : على قد ما انا فرحانة عشان الحكاية بدأت ، على قد ما انا زعلانة انها هتنتهي بحزن

ميرنا : قشطة ، تسيبوني بقى احكيلكم عن أول سبب قلناه ليه بيبوظ العلاقة

امنية : اتفضلي

ميرنا : الكدب بيبوظ اي علاقة لآنه بيحل محل حاجة تانية ، محل الصراحة وكل الناس عايزة علاقة الحب بتاعتها تتبني على الصراحة ، مع انهم اصلا بيأسسوها على كدب

لينا : ازاي بيأسسوها على كدب

ميرنا : سؤال ذكي ، علاقات الحب بتاعت اليومين دول بتكون مابين 10 لــ18 سنة ، وده سن اصلا ميتبنيش فيه علاقة حب لآنها مش هتعتبر كده اصلا ، يعني مثلا اما بنت بتحب ولد بتيجي تصاحبه بتكذب على كل اهلها و الولد نفس الموضوع ، يعني هما ازاي عايزين علاقتهم تكون ناجحة و صادقة و هى اصلا مبنية على كدب ، في احصائية انا عملتها كده هتبين ليكم كلامي صح ولا غلط

مابين كل 6 بنات في كل شلة 4 منهم مصاحبين

نادية : دي احصائية صحيحة فعلا ، بس مش كل حد بيصاحب يبقى بيكذب

ميرنا : على فكرة المصاحبة دي مش معناها خطوبة أو جواز ، دول اتنين بيحاولوا يبنوا الفراغ اللي فيهم بأنهم يبنوا علاقة حب ، و العلاقة دي بتكون تسلية و عمرها و حطوا !100 خط تحت عمرها ، عمرها ما بتتقدم لخطوبة أو جواز الا في حالات نادرة جدا جدا

حبيبة : طيب علاقتنا دي زي المصاحبة

ميرنا : لا طبعا هنا في حكم المخطوبين ، و يعرفوا بعض من الازل و كل عارف ان منة ملك احمد و احمد ملك منة ، يعني محدش يقدر يكلم اصلا

امنية : انتي كده قولتي أول سبب ، كده معناه ان الحكاية في بدايتها للحضيض

ميرنا : لا ده معناه ان الحكاية بتفشل ببطء ، بس عمرها ما هتوصل للحضيض ، و انا هزود سبب من عندي اللي هو الشك

الشك عامل مؤثر جدا على كل علاقة حب ، وده اصلا لازم يعتبر من الاسباب الرئيسية

نادية : انا بقيت عايزة اشوف فشلها ، ودي حاجة وحشة

ميرنا : مش حاجة وحشة ، ده مجرد فضول مش اكتر