غرام علي قضية

البارت العاشر

اسفه جدا على التأخير ما جان الي واهس بالكتابه اعذروني وجنت كاتبه البارت وانمسح لهيج سويتلكم البارت هذا طويل استمتعوا💖

#الكاتبة:مريم محمد

******************************************************

ايات:رحنا سوينه الغده انا ومريم وماما ام علي سوينه دولمه وتطبيك دجاج وتمن ومركة باميه ولبن وزلاطه كملنا جانت الساعه ب 1 وعلي جان بره هم جايين ولد عمامه وخواله واقاربه يباركونله صبينه الغده الزلم وحد والنسوان وحد تغدينا وخلصنا ماما ومريم غسلن الاماعين ما خلني اغسل رحت توضيت وصليت لانو التهينا نشتغل وما صليت
________________________________________________________________
الكاتبه:اعتقد ايات هواي كركت وحجتلكم كلشي خلونا نسمع علي شلون حاله قبل العرس وبعد العرس شكلكم نسيتوه😒

علي:اي والله نسوني اصلا محد سأل علي

الكاتبه:ههههه البارت اليوم كله الك ولا يهمك
_______________________________________________________________
علي:مثل ما كالتلكم ايات ظلوا كل يوم يشترون شي ويجهزون مر الوقت صار يوم الحنه سوين حفله بالبيت انا واصدقائي وحنيت اصبع واحد لان مو حلوة ولد واحط حنه حتى لو يوم حنتي اجو كل اصدقائي وظلينا نسولف ويحششون علي دخلت عش الزوجية عبالك اول مره اتزوج😂

احمد (صديق علي):ها ولك واخيرا خذتها كتلت روحك عليها

علي:يمعود صلي عالنبي لا تتفركش وين اخذتها بعدنا منا لباجر الله كريم

احمد:ههههه لا اشو اريد احسدك خل تتفركش بعد خمس سنوات ثانيه ياله ينطونكياها

علي:خل تصير غير ذبحك يصير على ايدي

محمد(صديق علي):ههههه عليوي بعد دخل عش الزوجية ياهو يحاجيه بعد

علي:هو غير ثاني زواج داخل عش الزوجيه من 6 سنوات هسه ياله تبطرت

محمد:غير هسه ياله حسينا بيك معرس فرحان وتضحك وتداهر مو بأول زواج وجهك ما يكصه السيف عبالك بنيه مغصوبه تتزوج

علي:طيح الله حظك انا بنيه مغصوبه اشو تعالوا انتم اليوم ظهوركم يحكنكم تردولكم كتله

ظليت اركض وراهم شردوا بعد كعدت عيب منا العالم

مر الوقت صار الليل وبدت الناس تطش رحت للبيت سبحت وبدلت ملابس طلعه ونزلت حتى اروح لبيت ابو ايات اليوم هم حنتها نزلت البيت سنطه الكل رايح للحنه ومقدام وبابا طلعوا وره ما خلصت حنتي وزهراء ذبيتها عد اهلها خفتا وراحه رحت ركبت سيارتي ومشيت لبيت ايات وصلت دكيت الباب طلعلي اخوها والحنه مخلصه تقريبا شفت مريم اجت علي كلتلها

علي:ها شنو خلصت الحنه

مريم:اي خلصت متانينك حتى نروح

علي:هو شنروح امشي سويلي طريق اريد اشوف ايات