#انت_قدري
#البارت_الرابع
#الكاتبه /// Rehab ///
مساء الورد ...
حيدر :
صار وقت الزفه
واشوف بابا شلون لابس ملابس حلوه
ومحلق شعره ومرتب نفسه
وعمامي وياه وعازمين الجيران واصدقائهم
بداخلي مشاعر مااعرف افسرهن
مو كره تجاهه ابد
بس حزن عليه لان احس فقدته
مثل ماما مااعرف ليش هيج فكرت
مع ان خاله هواي حجت وياي
وفهمتني ان علياء الي هو زوجه بابا
كلش حبابه وفقيره
_ والله ياخاله علياء خوش بنيه مو لان بت خالتي وامدح بيها گدامك بس فعلا هي بنيه دره مال الله وتحطك ابطن عينها ثق حدوري هذا الكلام منها مو من عندي لاتكرهه وتضوج منها زين خاله
_ اي خاله فهمت
اتذكرت حجي خاله سعاد ودنگت
منصي عيوني ع الطبله الموجوده گدامي
دخل بابا والهوسه مال عمامي واصدقائهم وياه
بقيت بمكاني واگف
حسيت ع احد يربت ع كتفي بأيده
انداريت وبعيوني ملامح الحزن والقهر
جان عباس واگف وراي ويباوعلي ابتسم ولمني لحضنه
صح جنه صغار ومو كلشي نفهم
بس عباس اخوي الماجابته امي
هو الوحيد يعرف شنو بيه ويفهمني بسرعه
وكت الحاجه الگاه گدامي مزروع يدافع عني
لو صارت عركه وهو ياخذ اكثر شي كتل مني
احس ربي خله عباس اليه لان يعرف راح ابقى وحيد ومحد اليه صح بابا موجود بس ابقى وحيد رغم كلشي
اخذني لبيتهم وجان فارغ
لان خاله ورقيه بالعرس بيتنا
وماكو احد بالبيت
دخلنه هو يسحبني ويمشي گدامي
ابد ماحجه شي ولا گال
واني ساكت مانطقت كلمه
وگفني گدام الحمام اندار عليه
_ ادخل غسل وجهك ولاتبجي بعد احنه زلم مانبجي لاتخلي ابراهيم يتشمت بيك من يشوفك جنك طفل صغير تبجي
وفعلا نفذت كلامه بدون تردد
كلامه صحاني ع وضعي ان اني مو صغير وابجي ع اقل شي بالعكس اني جبير والمفروض ماابجي ولاتنزل دمعتي ابد
ولااخلي احد يستغل وضعي
ويكعد يضحك ويتشمت بيه
دخلت غسلت وطلعت
لگيته واكف گدام الثلاجه وفاتحها ويباوع
اتقربت منه وضحكت
_ شبيك صافن مضيع شي بالثلاجه جنك مطي من يصفن
ضحكنه ومديت راسي مثله ادور ع شي اكله لان بطني بدت تصدر اصوات تعلن بدأ العد التنازلي لحاله الجوع يعني راح ادخل بحاله انذار اذا مااكلت
صفن عباس عليه وضحك ضحكه طويله
_ هاا ولك منو المطي هسه اني لو انت شو صفنت مثلي قبل شويه جنت تطنز عليه وتضحك
_ تريد الصدك الجوع ذبحني وخلاني اصير مثلك مطي واصفن ادورلي ع حاجه اكلها
ضلينه نضحك بيناتنا
تالي طلعنا بتيته تگلاه بارده باقيه من البارحه واخذنه طماطه وخبز وگعدنا بالگاع ناكل ونضحك
خلصنه اكل وطلعنه بره نشوف شكو ماكو
أنت تقرأ
انت قدري
Romanceمابالُكَ أيها القلب مُضطَرِبٌ .. ما الذي فعلتهُ عيناهُا بك ؟ لم أربَكَتك هكذا ؟ أنها فقط نظرةٌ عسلية قلبتنا رأسًا على عقب ! تابعوني بأحداث قصتي الجديده
