انت قدري

الحلقه الثانيه عشر

#انت_قدري
#البارت_12
#الكاتبه /// Rehab ///

مساء العافيه 🎋💐

فرحتيّ
في حُبكَ عشتُ الفَرِح المُضْطَرب.. 🌿
حتىّ نَسيتُ معنى الجَذِل من القلب.. 🖤

………………………

الجو توه بده يبرد ..
ويعلن بداية فصل جديد ..
سماء ملبده بالغيوم ..
ممتلئه بقطرات المطر

ورائحه الشتاء تفوح ويه نسمه الهوه
گاعده يم حديقه بيتنا
رغم صغرها الي مايتعدى مسافه قليله
ومزروعه بـ شتلتين ورد جوري
وشجره ياس

بس فرحانه بيها وكل يوم اتعودت اخذ كرسي واگعد يمهن ازگيهن ماي وابقى بمكاني
قبل مده لحيت ع عباس يسوي حديقه بيتنا
وهو سوده عليه ماهان عليه يرفض طلبي
شال كم قطعه كاشي وزرع بمكانهن
وسيجها بسياج صغير ونازك
ع شكل فراشه

_ دخلي يمه رقيه ليش بره الدنيا بدت تبرد والسمه مغيمه اكيد راح تمطر فوتي لاتتمرضين

گمت وبيدي كوب الجاي
دخلت قفلت الباب ورحت گعدت يم امي
جانت مطلعه بجايم عباس تاخذ من طولهن
وترتبهن اله

_ يمه دوامي بعد اسبوع وماعندي ملابس سود للدوام

_ مابيه حيل اطلع وياج ولااگدر اخليج ترحين وحدج للسوگ اخوج يبليني بلوه اذا رحتي بس انت

_ زين يمه اروح اني ووهج وياي هم تريد تشتري نيشانها تحضر روحها

_ شنو هاي بت عمج مصخنه لو مضروبه ع راسها يانيشان هذا تروح تحضرله هسه بس لاتريد تزوج وبيبيتها مصارلها 3 اشهر من ماتت

_ لايمه مو هيج اعصابج

_ جاا شني بعد شنو نست الماتت ام ابوها وام عمتها ام رجلها عمة عيني عليج خاله فارگتينه وعفتينه وحدنه

_ يمه يمه گلبتيها مناحه عليه مو هيج هي البارحه من اجت گالت اريد احضر شويه شويه علمود ماانخبص من يگلي ع موعد العرس لان هو يريد ياخذها سكتاوي يگول امي وره وفاة بيبي كلش اتمرضت وماعاد بقى عدها الحيل الاولي واخواته ملتهيات بدراستهن وبعدهن صغار مايفهمن بشغل البيت زين

_ زين روحي بس مو تتأخرن بالفره وتنسين روحج ادري بيج بالسوگ تفقدين

_ هههههه لا حبيبه مو لهالدرجه ، اروح اخابرها ابلغها نطلع العصر وتمر عليه

ركضت طلعت موبايلي الحديث
اجاني هديه من عمي سعد
بيوم نجاحي من السادس
جنت مفكره بس انجح اقط امي بجهاز جديد
وتالي صدمني عمي بهديته

بوقتها فرحت كلش وشمرت جهازي القديم ع امي واني اليه الجديد بعد شسوي بذاك
اتذكر هاي الاحداث قبل وفاه بيبي

ومن يوم وفاتها والكأبه والحزن اتصدرت بيوتنا
وفارقنا الفرح والسعاده
اتصلت واجاني صوتها يرعد