انت قدري

الحلقه الثامنه

#انت_قدري
#البارت_الثامن
#الكاتبه /// Rehab ///

مساء الهيل ..

فزيت ع دگه الباب ..
وصوت عمو سعد بره ..
بنبرته الهادئه والحنينه ..

_ بويه رقيه شبيج خوفتيني عليج افتحي الباب اشوفج ماخليت امج تجي گتلها اني اشوفها هاي بنتي ، يلا بويه تخليني واگف بالباب

مسحت دموعي وگمت وكلمه بويه من لسانه
خلتني مثل الطفل
فتحته ونصيت ودموعي تلالي بعيني ..
دخل ووگف گدامي

بهيبته وطوله وحنيته الماكو مثلها
لزمني من حنكي ورفع راسي ..
يعاين بنظره الابوه ..

عمي اكثر واحد حنين علينه
وخاصه اني يحبني مثل ريحانه
ويخاف عليه من اقل شي
دائما اشوفه مايفرق بيني وبين بنته
وهالشي التمسته من كلامه وعيونه وتصرفاته ..

_ ليش هالعيون الحلوات يبجن تدرين بيه مااحب اشوفج تبجين ولادموعج تنزل

ابتسمت بأريحيه !
وابتسامه بانت ع ثغري ..
باسني براسي ولمني بحضنه الدافي

_ اي بعد ابوج اروح فدوه لهالضحكه

ابتعدت عنه خجلانه
صار هواي محاضني اتذكر من صرت ب الثاني متوسط وامي نبهتني ع هالشي
وگالت عيب كبرتي لاتلزكين بعمج وتحضني
وهسه من حضني حسيت بأمان عبالك بحضن ابوي
الفقد مؤلم ومراره الالم توجع

جرني وگعدني ع السرير وگعد يمي
_ هااا بنيتي شنو الغاثج وخلاج تبجين وتعوفين غداج وتگومين اكو احد غاثج صاير شي وياج

_ لا عمو ماكو شي

_ جااا شبيج بعد عمج

منصيه وافرك بيدي متوتره
وبيني وبين نفسي شگول وشحجي
تريدني اگلك اني احب حيدر وهو يعتبرني اخته ولايشوف لهفتي ومحبتي اله
لو تريدني اگول بيبي كشفتني وگالتله اتزوج بت عمك وهو رفض رفض تام
وزعل من بيبي وطلع عصبي ..

طال سكوتي وطال انتظار عمو منتظر جوابي
بقيت ساكته وصافنه بغير مكان
سمعت عمو يستغفر ويتحسر

همست
_ لاتقلق عمو ماكو شي بس شويه تعبانه

_ براحتج بويه مااضغط عليج بشي ، يلا گومي گدامي نكمل غدانا

استحيت ارفض وهو بنفسه اجه يريد يشوفني
گمت وياه ورجعنا گعدنا
رفعت راسي واشوف الوجوه كلها تباوعلي
والف سؤال براسهم

نصيت وگعدت بصف وهج ومارفعت راسي مااريد انحرج بعد اكثر
رجعنا نسولف ونضحك وعمو ماقبل احد
يسألني شي او يستفسر مني

للعصر واغلبها رجعت لبيوتها
وبقينا بس احنه وعمتي الجبيره هي وابنها مصطفى
وعمو وعباس وحيدر گاعدين يمنا

حجت عمتي وگالت
_ اريد اشوف رأيكم بسالفه وانتم شوروا عليه

_ خير خويه گولي