انت قدري

الحلقه السابعه

#انت_قدري
#البارت_السابع
#الكاتبه /// Rehab ///

مساء المسك ...

طلعت نتيجتي وانصدم بمعدلي !!
93

حرام والله اصلا معدل كلش مو نفس توقعي ولاجنت اتخيل ينزل هالگد

بكل امتحان اطلع اني ضابط الاجوبه صحيح
بدون غلط عدا اخر مادتين
كم سؤال غلط واتوقعت تنزل بس قليل
مو هالگد

بلغت اهلي بالنتيجه
وخاله هلهلت وطشت جكليت ع راسي
وشفت فرحه ابوي وخاله بعيونهم
شويه قللت من ضوجتي

ماحبيت اكدر عليهم وانتزع فرحتهم
وسعادتهم لذلك كبتتها بگلبي وسكتت
جنت باني امال هواي ع المعدل اتوقعت اطلع بالمجموعه الطبيه

بس هسه يادوب اذا طلعتلي صيدله
بقى ع بالي عباس شنو معدله
خابرت خاله من جهاز البيت واكيد هي جان عدها علم بنتيجتي لان خاله علياء خابرتها وبشرتها
واتفقن هي وياها يسون عزيمه وتوفي نذرها
ويعزمون الاقارب

سألتها ع عباس گالت راح يشوفها
وبعدنه منتظرين لان الافندي جان نايم
ومامهتم ولا ع عباله

خابرته اخذ التلفون ويضحك فرحان
_ هاا ولك بشر حمامه غراب

_ ههههههه افاااا عليك اني عبيس اكيد حمامه شنو غراب يمعود

_ اي ياالله ، مبروووك شگد معدلك

_ خوش اگلك بس هاا لاتحط عينك عليه

_ لا ياناقص احجي ولك شگد

_ 65 بشرفك مو درجه مال اذكياء وتحسها حلوه ترفع الراس

_ ههههههههه اي ، بربك هسه هاي درجتك شدخلك ياكليه ياخوفي لايطلع معهد 

_ والله يرحموني ويطلعون خوش ناس ومعدلين اذا طلع معهد ع الاقل سنتين واشطح افلت بعد يادراسه ياتعب

_ مو صاحي ومحمد

_ ههههه هسه ماعلينه يوول باجر معزومين يمكم بشرفك گول لخاله تكثر بالاكل وگلها يااكله يحبها عباس سويها وگلها جثري بالمواجيل جثري

_ هههههه تدلل سهله

غلقته من عنده وبلغت خاله بطلبات عباس
وهي خطيه ماگالت لا وبدت تحضر من هسه لشنو تسوي لباجر وحسب رغبه عباس

يعني بالمختصر العزيمه بس بالاسم اليه
والاكل يكون حسب اختيار عباس
شنو يحب وشنو يكره
ومحد يگدر يعترض او يگول لا مااريد هذا الشي

ثاني يوم اجتنا خاله سعاد من الصبح
لان المقرر العزيمه ع الغده
لذلك اجت تساعد خاله بالطبخ

وياها رقيه الي اجت بكامل اناقتها البسيطه
جبه رصاصي وشال وردي فاتح
لايگ ع بياض بشرتها المشرقه والترفه