صحيت الصباح وانا ما فاهمه اي شي سرحت مسافه اتذكرت فيها كل الحصل بالليل تاني دموعي جرت حسيت بالعبره خانقاني فكرت هي حلوه هو شاف فيها شنو ما شافو فيني يمكن انا اصلا ما اديتو فرصه يشوفني على طول بخجل منو وما بتعامل معاه على طول بعبايتي وطرحتي المكوزه ما حصل شافني زي الناس ما حصل عيونو لاقت عيوني ااااه يمكن انا السبب في كل دا انا الما سعيت علشان حبي لحدي ما ضاع من بين ايديني
يارب هي حتسعدو هي معقوله بتحبو زي حبي دا حب سبعه سنين هي حبتو ليه في سنه
سرحت مسافه حسيت انو نفسي اشوفها حبيت اني امشي رغم اني حاتوجع عاينت للساعه علشان اشوف انا اتأخرت في النوم ولا ممكن الحق اطلع مع امي وامشي معاهم لقيت الساعه 10 قلت اكيد امي حتمشي ليهم بعد الفطور او قريب العصر قمت جريت طلعت برا لقيت امي قاعده في الصاله بتتفرج على التلفزيون
يا امي اسمعيني انتي ماشه ناس خالي متين علشان انا ماشه معاك
يا بت كدي قولي بسم الله متين صحيتي انتي ان شاء الله قولي صباح الخير ساي
جيت قعدت جنبها وقلت ليها معليش يا ماما صباح الخير
صباح النور يا بتي بمشي ليهم قرييب العصير كدي بكونو جهزو وبنطلع طوالي
تمام يا ماما يعني عندي زمن اجهز نفسي وامشي معاك
اي لكن امس مش سألتك قلتي ما ماشه الغير رايك من الصباح شنو
ساي بس قلت ما عندي جامعه وحاقعد براي زهجانه احسن افرق واشوف حبيبه همام زاتو
لمن قلت الجمله دي حسيتها حاره وعلى قلبي دم دم لكن ما باليد حيله ما هي فعلا حبيبتو
صحي يا امي هي اسمها منو ما ورتك خالتو الهام
اسمها ربا قالو
في سري قلت ربا ياخ من اسمها ماف داعي اقارن نفسي بيها اكيد حتكون ملكه جمال بالنسبه لي
حلو اسمها ربنا يهون عليهم ويتم ليهم على خير
امييين ي رب يلا قومي ظبطي امورك مسافه اجهز الفطور نفطر وبعد داك شوفي موضوع لبسك وعليك الله الليله شويه اهتمي بنفسك البسي سمح واتمكيجي يا بتي كان نلقى ليك عريس 😂😂💔
اصلا انتي عايزه تتخلصي مني يا سهير لكن ماف ليك قاعده معاك كده لابد الابدييين😹
بري ما دايره اتخلص منك عندي غيرك منو لكن دايره اشوفك مبسوطه وسعيده ومستته في بيت راجلك في بيت ود الحلال اليهنيك ويسعدك
لمن قالت كده قربت اقول ليها ما هو خلاص الليله حيبقى لغيري لكن اكتفيت بأمين وسكت
مشيت اتسوكت وصليت وجيت قعدت شويه امي جابت الفطور فطرت بعد تعب ببلع في الاكل بالعافيه علشان امي ما تحس بي قمت قلت اشوف لي اي لبسه لبعدين تاني قلت ليه يا سمر ما تبقي زي البنات لمتين انتي حتهملي روحك كده من لما ابوك مات شغفك لكل شي في الدنيا دي مات ما يمكن دا السبب الفقرها عليك الليله لازم اطلع قمره قررت اني اظبط نفسي الليله
دخلت اخترت لي بنطلوون جينز فااااااتح ومعاه تيشيرت ابيض وجاكيت رماادي غامض طويل وفاتح ومعاه طرحه جوافيه مع سمرتي الفاتحه دي بتجي لبسه خنفشاريه دخلت الحمام غسلت شعري وهو ما شاء الله طويل شديد مسكت مكوتي قعدت عليه ظبطتو تمام وجبت كريم البيبسي دا وعملتو كيرلي مع طولو جاء عجيب واصلا الطرحه قررت البسها شكل اسكارف على رقبتي بس طلعت لي حلقات رنقات كباار كده ومكرت ايديني بلون لحمي ابرز لي لون سمرتي اكتر ومشيت عملت ماسك لوشي لمن بقى ناير كده وظبطت حواجبي وجيت قعدت في التسريحه ظبطت ميك اب هادي وحلو ابرز تفاصيل وشي كلها عيوني البنيه الواسعه مع الايلاينر والماسكارا والروج الغاتم والبدره الهاديه لبست بنطلوني والتيشيرت شكيتو ولبست معاه الجاكيت وعملت الطرحه اسكارف ولبست حلقاتي وصندل كعب عالي بالجد لمن وقفت في المرايا حسيت بالفرق قلت لو كنت بعمل كده من زمان يمكن كان انتبه لي صاح انو نص ملابسي بناطلين بس بلبسهم تحت العبايه صاح انو عندي جاكيتات ماركات وتيشيرتات اشكال وانواع بس دايما بالبسهم مع الاسكيرتيات طلعت لامي برا وقلت ليها ماما انا جاهزه
بسم الله ما شاء الله دي شنو السماحه دي كلها والله بسحروك عاد الليله يا سهير بتك سماحه الجن في الخليجيات ماف تعالي خليني اقرأ ليك واحصنك من العين
جيت قعدت جنب امي مبتسمه حصنتني وطلعنا ركبنا ركشه رغم انو البيت ما بعييد يعني بس امي قالت لي بري بشاغلوك لي ولا يسحروك ما بنمشي برجلينا
وصلنا البيت اول ما دخلنا انا وامي الناس دي كلها اشتغلت تعاليق اول مره من وفاه ابوي يشوفوني لابسه بنطلون ولا مظبطه نفسي وطبعا انا حاولت قدر ما اقدر اجاملهم واطنش كلامهم حاولت اتماسك وبس شغاله اتبسم ليهم واثناء ما خالتو الهام ام همام مقعداني جنبها في السرير طبعا بتريدني شديد وانا بريدها بنتونس كده ريحه همام سبقتو وخلتني كلي ارتبكت شديد وبقيت بتلفت عايزه اشوفو وين واول ما شفتو دنقرت وشعري غطا نص وشي
يا امي بعد دا اطلعو اتأخرنا على الناس ديل
طيب يا ولدي طالعين
عمتي سهير كيفك ان شاء الله كويسه معليش ما شفتك من قبيل عاين لي قال لي السلام عليكم قلت ليه بهدوء وانا مدنقره وشعري نازل بالجمبه شبه مغطي ملامحي منو وعليكم السلام براحه كده
رجع عاين لامي وقال ليها سمر وين ما جات معاك
يا ولدي والقاعده دي منو عميت ولا علشان شويه متأنقه ما عرفتها
رفعت عيوني عاينت ليه ودي اول مره عيونا تتلاقى عاين لي مسافه وقال لي كيفك يا سمر كبرتي والله
اهلين ومبروك يا عريس وتسلم من ذوقك من زمان كبرانين بس انت ما ملاحظ
قلتها نظام ضحكه مع اني من جوه قلتها جاده بكل وجع الدنيا
عاين لي مسافه ومشى بعدها طلعنا اناوامي وخالتو الهام وهمام وخالي في عربيه والعربيه التانيه فيها احمد اخو همام الكبير ومرتو وبتو وقصي اخو همام الصغير واخت خالتو الهام اللي هي خالتو اسمها هدى والعربيه التالته خال همام اسمو حسام ومعاه مرتو وبتو الصغيره وولدو عائلتنا من طرف امي كانت بسيطه ودا كان مجرد تعارف علشان كده كنا ناس بالعدد وطبعا انا البت الوحيده لانو امي ما عندها غيري وخالو ما عندو بنات بس تلاته اولاد واصلا جدو ما عندو غير ماما وخالو محمد.
المهم كنت قاعده جنب الشباك وساكته طول الطريق وهم بتونسو وبشركوني في الكلام احيانا وبتكفي بإبتسامه بسيطه او رد مختصر جدا همام كان باين عليها السعاده شديد وفي نفس الوقت متوتر في اليوم دا كان جميل شديد كان لابس تيشيرت اسود ومعاه جاكيت بني وحالق شعر دقنو بطريقه جميله ومرتبه جدا
كنت بتمنى لو كان الترتيب والجمال دا يخصني انا بس انا واريد وانت تريد والله يفعل ما يريد
دا البيت يا جماعه خلاص خلونا ننزل يمى
طيب يا همام يا ولدي انزلاكم يا جماعه
كلهم نزلو وانا عاينت لنفسي في مرايه العربيه عدلت الاسكارف ونزلت بكل ثقه رغم اني كنت من جوه مهزوزه لقيت همام منتظرني انزل علشان يبركن عربيتو عاينت ليه وهو عاين لي وانا نازله ومشيت لحقت امي وخالتو الهام دخلت معاهم البيت رغم انو ما عمااره وكده لكن سمح شديد حلووو بطريقه خرافيه
دخلنا سلمنا على امها وبنات خالاتها اتنين بنات سمر حلووااات سمرتهم فاتحه كده ومعاهم اخوها وابوها وخالتها وعمها وعمتها وبتها حلبيه كده حلاته طبعا كلهم حلوييين لكن انا احلا حبتين يعني المهم حسيت بشويه ثقه سلمت عليهم وكلهم بعاينو لي دخلنا قعدنا في صاله كلنا في جلسه ظريفه كده
مرا الزمن وانا بس مستنيه اشوف ربا وهم ولا على بالهم يتونسو يضحكو كانهم بعرفو عايله ربا من سنين في النهايه خالو نطق يشرفنا نطلب ايد بنتكم المصون ربا لولدنا همام وبعد عرفناكم وعرفنا اصلكم وعرفتونا وعرفتو كل شي عننا بتمنى نتشرف بقبول طلبنا كنت بسمع في الكلام دا ومدنقره ومن جواي نفسي يرفضو بس للاسف وافق ابو ربا وفي اللحظه دي عاينت لهمام وشفت كميه الفرح والسعاده الباينه في عيونو بعد نص ساعه كان كل شي اتحدد وقررو انو بعد 15 يوم حيجيبو الشيله والمال والكلام دا والعرس بعد شهر من سد المال علشان يصدف مع اجازه نهايه السنه بتاعت التلاته شهور طبعا ربا طلعت قدري في تالته ماشه رابعه بتقرأ اقتصاد في النيلين المهم الكلام دا كان بالجد جمر على قلبي واثناء ما هم بتكلمو جات هي نازله بطلتها الملائكيه لابسه فستان عنابي غامض كده وهي حلبيه ما شاء الله ومكوزه الطرحه بطريقه خليجيه جميله جدا وعامله ميك اب بسيط بالجد حلوه شديد كانها حوريه جايه من الجنه خجلت من نفسي كيف انا لابسه بنطلون مع تيشيرت وجاكيت فاتح وشعري برا وهي محجبه الطرحه اتضايقت من نفسي شديد ليه انا ما اتمسكت بمبادئ ليه افتكرت انو همام ممكن يجذبو اللبس والشكل الخارجي ليه افتكرت انو لو لبست كده واتعريت واظهرت مفاتني ممكن اعجبو ليه يا سمر ليه ما فضلتي زي ما انتي لو كنتي مكتوبه ليه كان اكيد حباك كيف ما تكوني لو انتي من نصيبو وهو من نصيبك اكيد حتكونو لبعض استغفر الله يا رب واثناء شرودي دا وعيت على ايد ربا وهي بتمد لي صينيه العصير ابتسمت ليها وشلت العصير وقلت ليها شكرا في اللحظه دي دموعي خانتني ونزلت مسحتها بسرعه واتمنيت انها ما تكون لاحظت بس للاسف لاحظت وركزت شديد حسيتها بتقول لي بنظراتها في شنو بس ماف فايده لاني اكيد ما حاقول ليها في شنو معقوله اقول ليها انتي سبب تعاستي انتي سرقتي حب عمري مني اصلا هي ذنبها شنو الحمد لله يا رب على كل حال
تمينا القعده ونظرات همام وربا كلها حب وانا بموت مع كل نظره بيناتهم رغم اني حاولت ما اركز بس غصبا عني كنت بركز معاهم رجعت البيت وانا تعبانه شديد استئذنت من امي ودخلت غرفتي غيرت ملابسي واخدت بكيتي وزعلت من نفسي اني غيرت فيها علشان الفت نظر همام لي حسيت نفسي غبيه شديد ليه احاول اغير من نفسي هو لو لي اكيد كان حيلاحظني وحيحبني انا بدل ربا انا خلاص مفروض اشيلو من بالي واقتنع انو ما لي قشيت دموعي وقمت اتوضيت وصليت ورقدت وحاولت انوم بس النوم كان مجافي عيوني ولحدي الصبح اذن انا بتقلب في السرير ودموعي على خدي قمت صليت وقريت قرأن لحدي 6 ونص حتى قمت ابتديت اجهز نفسي لانو محاضرتي 8 مع انو ما نفسي امشي بس حاسه نفسي محتاجه لسهى شديد
*🌸يتبع🌸*
#تفاعلكم✋
