قصي كان سايق بأقصى سرعه وبتكلم مع نفسو وبضرب الدركسون
يعني هي قايله نفسها شنو ترفضني انا ترفض ود خالها على شنو الافترا دا كلو علشان اديتها وش ما تستاهل اي معامله كويس التافهه الحقيره انا حاوريك انا حاعمل فيك شنو والعايزو كلو حاخدو منك وبدل ما كنت حاصونك وحاحافظ عليك طول العمر هسي حضيعك وحاخرب سمعتك وحتعرسيني مجبوره علشان تداري فضيحتك يا واطيه واصبري لو ما لحستك التراب البمشي عليه ما يبقى اسمي قصي لانك بالحسنه ما جيتي وجاء الوقت الاوريك فيه مقامك الحقيقي
وصل البحر بقى قاعد وبنفخ سيجاره ورا سيجاره وبفكر يعمل فيني شنو
في المستشفى الصمت كان سيد المكان حتى جوه عندي انا وماما كنا ساكتين
يا جماعه كلكم اسمعوني نحنا سمر عندنا ياها بتنا الماولدناها ولو ما دايره قصي نحنا ما بنجبرها وماف زول حيحسسها انو متضايق والموضوع دا يتنسي كإنو ما اتفتح من الاساس ولا ما كده يا حاج محمد
اكيد كده يا الهام سمر ياها بتي وسعادتها بتهمني وانا ابوها المسئول منها واصلو ما بخلي شي تنفرض عليها ولا تضايقها وانتو يا ربا وهمام ما تحسسوها بحاجه وبالله يا ربا يا بتي خليك قريبه منها وسانديها وخليها تنسى الحصل وتتعامل عادي
اكيد يا بابا ما تخاف حاكون جنبها لحدي ما تتخطى ضيقها دا
طيب خلونا ندخل نشوفها
باب الغرفه ضرب تلاته ضربات انا زحيت من امي وبقيت بعاين للباب دخلو كلهم وعيوني كانت معلقه في همام يا سبحان الله اول واحد سمعت صوتو
خوفتينا عليك يا مدلعه دا كلو علشان شنو ماف زول بجبرك على حاجه واهم شي عندنا سعادتك واعتبري الحصل دا كلوو ما حصل وماف زول بجيب ليك السيره دي تاني
وين قصي عايزه اعتذر منو
خليه قصي هسي المهم انتي تكوني بخير
تسلم يا خالو بس انا خجلانه منو ومنكم وحابه اعتذر ليكم كلكم
لالا يا بتي انتي بتنا وسعادتك بالدنيا ماف داعي للاعتذار وبركه الوريتينا هسي بدل بعدين تكوني تعيسه معاه والموضوع دا الحمد لله انتهى من اول حتى ما طلع برا وحننساهو على كده المهم تكوني لينا كويسه ومبسوطه
تسلمي يا خالتو الهام يا ماما التانيه وربنا يخليكم لي كلكم
اميين
مرو شهرين على الكلام دا وقصي صاني وكل ما زول يفتح ليه الموضوع بسكت الزول وبقول حصل خير ماف قسمه بينا وهو من جواهو ابدا ما ناوي لي على خير ابدآ
ربا في فتره الوحم احيانا بتطلب مني اعمل ليها حاجات ما عارفه بس بتحب اني اكون جنبها دايما كل شويه بتتصل علي وانا في الجامعه ولمن اجي بتخليني اجي اقعد معاها واحيانا ببيت معاهم بهناك وامي ما بتمانع لانو البيت شبه واحد في الفتره دي همام اتعود علي وبقى عادي بتونس معاي وكده والموضوع دا ما عاجبني لانو بخليني لما اكون براي اقعد اتذكر شكلو وطريقه كلامو وضحكتو وحبي ليه بكبر بس ما في يدي شي
الساعه 12 ونص همام دق لينا الباب فتحت ليه امي قال ليها ربا متوحمه لي على ايسكريم اوريو بالشكولاته وتاني كم نكهه قلت ليها انا ما بعرفهم ولا بعرف القاهم ليك وين قالت لي سوق سمر هي قبل كم يوم جابت لي ايسكريم معاها وحبيتو شديد وانا عايزه زيو بس
فعلا انا جبت ليها ايسكريم تلاته نكهات بالتوت والاوريو بالشكولاته ونكهه لبان
امي نادتني وورتني انو ربا متوحمه على الايسكريم الجبتو ليها قبل كم يوم
بس يا امي ما اظن نلقاهو فاتح هسي
يا بتي اتوكلو وامشو ويمكن تلقوه
ان شاء الله يمى ان شاء الله
لبست عبايتي بسرعه وطلعت مع همام طول الطريق ماف واحد فينا اتكلم بس كان باين عليه تعبان ومضغوط ونعسان كمان وصلنا لقينا بتاع المحل بقفل وقفناهو وحنسناهو انو يفتح كم دقيقه يدينا طلبنا ويقفل لمن دخل لقينا الاوريو واللبان لكن التوت ماف اتصلنا على ربا قالت هي نفسها في التوت اكتر حاجه بتاع المحل قال عندنا فرع تاني حاوصف ليكم محلو دا بشتغل لفتره متأخره حتلقوه فاتح وانا هسي بسأل من النكهات الدايرنها دي لو لقيتها ليكم امشو وفعلا لقيناها ومشينا بسرعه جبناها وركبنا العربيه
تعبتني الليله لين بالجد هسي الساعه ماشه لي تلاته ونص وانا بكره شغال بدري عندي لكشر الساعه 8
معليش لما تولد بالسلامه حتنسى كل التعب دا
اي ان شاء الله انا اصلا ما زعلان بس حاسس نفسي مرهق شديد والله
سلامتك لما تصل اخد مسكن ونوم ليك ساعتين او تلاته وحتصحى كويس
ان شاء الله كويس سمر انا وانتي ما حصل اتونسنا مع بعض صاح
بصراحه اتمنيت اني اكون قريبه منك في فتره من الفترات
امممم يعني اعتبر انك كنتي معجبه بي ؟
ممكن تقول كده
طيب وهسي احساسك شنو اتجاهي
هسي انت زول متزوج ومبسوط بحياتك وانت ومرتك بتحبو بعض ربنا يسعدكم
ايوه بحبها شديد بالجد امييين ويسعدك طيب كفضول يعني انتي حاليا ما عندك اي مشاعر اتجاهي
ما عارفه ممكن نقفل السيره يا سياده المعيد
😂😂بس انا هسي ود خالك ياخ ما معيدك
بيني وبين نفسي قلت ليه يداب حسيت اني بت خالتك من زمان وين كنت
لالا بالنسبه لي من زمان نسيت انك ود خالتي وبتعامل معاك زي ما بتعاملني بالظبط
سكت مسافه حسا انو مقصر مني وانو بالجد ما حصل سأل مني ولا عرف شي عن حالي ولا حصل عاملني كبت عمتو الوحيده الماعندها اخوان ولا حصل قرب مني ولا شاف انا محتاجه منو
طيب يا سمر ممكن من الليله تعبتريني اخوك الكبير وصحبك اللي وقت ما تحتاجي ليه حيكون سند ليك انسي اني معيدك واتزكري اني ود خالك واخوك وصحبك انا عارف اني زمان قصرت معاك وانا اسف والله ياااخ لكن من الليله اوعدك اني تاني ما اقصر معاك ودي كلمه رجال من يوم الليله انتي اختي الصغيره وصحبتي موافقه
كان نفسي اقول ليه بس انا بحبك للحظه كنت حاعترف بكل شي بس اتشكرت انو دي اول مره يكون قريب مني ولو قلت ليه حاخسرو من كل النواحي على الاقل احسن اكون اختو وصحبتو ويكون لي السند الفقدتو سنين
موافقه يا سيدي وان شاء الله تكون قدر كلمتك بالجد
يا زوله ابشري بالخير وعلشان اثبت ليك شايفه المحل داك حندخل هسي وحتختاري احلى حاجه تعجبك هديه من اخوك زي ما الاخوان بهدو لاخواتهم وبطلعوهم وزي ما الاصحاب بسمعوهم وبقيفو معاهم ويسندوهم انا بوعدك اني اعمل ليك كل ديل وبالجد انا ما ناسي وقفتك الايام دي مع ربا ولا وقفتك مع امي وابوي اللي كل ما يحتاجو لبت بلقوك جنبهم انتي بالجد كنتي لينا الاخت ونحنا ما قدرنا ومن يوم الليله انا حاكون ليك الاخو وحاعوضك كل السنين الفاتت
دموعي نزلو حسيت اني نسيت الحب ونسيت اي شي وما دايره اكتر من كده والله احساس فجاءه يكون عندك اخ وسند وصاحب كلو في واحد انا الكان ما عندي زول بقى عندي بعد 20 سنه من الوحده
وصلنا المحل وانا دموعي عشره عشره همام وقف العربيه ومسك يدي وقال لي اختي السمحه خلينا ننزل ووقفي بكاء خلاص مسحت دموعي ونزلت لمن جينا ندخل الدكان مسكني من يدي لقى بت حلاتها قاعده هي بتبايع قال ليها
السلام عليكم
وعليكم السلام يا استاذ اتفضل كيف اقدر اساعدك
كل المساعده المحتاجه انو انتي تسوقي اختي وتفرجيها على المحل وتخليها تختار اللي عايزاه عايزها ترجع لي مبسوطه وبتضحك
بالرغم من اني بحبو واني ما اختو بس انبسطت شديد باحساس انو اخيرا بقى يعتبرني شي في حياتو حتى لو اختو المهم اني بقيت مهمه عندو ابتسمت ابتسامه عريضه ومشيت مع البت المحل كان محل اكسسوري بتاع فضه وسبحان الله انا بحب الفضه اكتر من عيوني بحبها شديد
بالجد لما لفيت في المحل نسيت اي وجع حسيتو في حياتي كنت مبسوطه كاني في يوم ما كنت موجوعه او كنت ببكي اخترت سلسل حلوووه وراااقي شديد البت قالت لي انو اختياري موفق جدا وانا كنت مبسوطه شديد
علشان تعرفو يا جماعه قدر شنو البت قلبها رقيق وممكن حاجه بسيطه تبسطها وتنسيها اي شي البت محتاجه للاحتواء والامان بغض النظر المصدر دا جايي من وين اخ او صاحب او حبيب او حتى والد البت بتحب زول يحسسها انو مشاعرها وفرحتها مهمين وانها نعمه واحلى حاجه في الدنيا بتحب تحس انها شافعه وانو في زول بهتم بيها ممكن شكولاته تفرحها حاجه من فضه حتطير عقلها البت بتجي بالحنيه دايما فيا شباب بليز اهتمو باخواتكم وصحباتكم لانو بكونو محتاجين ليكم شديد وعاملو حبيباتكم على انهم بناتكم وعلى انكم مسئولين مسئوليه تامه عن سعادتهم اتذكرو كلام نبينا محمد رفقا بالقوارير
انا انبسطت بإهتمام همام وحبيتو فوق الحب البحبو ليه اربعين حب زياده حتقولو ليه ما قلت مليون لانو حبي ليه كبير مستحيل يتدبل لدرجه ميلون اكبر حد من الحب ممكن يكون اربعين من حبي ودا الانا حبيتو ليه في اللحظه دي
جيتو وانا مبتسمه وشايله علبه السلسل في ايدي وبقول ليه شكرا مشى حاسب على السلسل الاختارو هو لي ربا وللسلسل تبعي مشينا وانا مبتسمه وصلنا البيت
هو دخل البيت بعد ما شال رقمي ورنا علي وقال لي اذا احتجتي اي حاجه اتذكري اخوك
قلت ليه حاضر ودخل
ربا انبسطت شديد وكانت بتاكل في الايسكريم بفجع زي الشفع وهو كان بعاين ليها ومبسوط وبعد خلصت قالت ليه عايزه تاني حسا انو حيقع معقوله حيرجع تاني قعدت تضحك فيه وضمتو قالت ليه بهظر بهظر والله ما دايره تاني حبيبي شبعت
والله حسيت نفسي حاموت هسي معقوله ارجع تاني ياخ لحدي هناك
😂😂😂بحبك يا ابو ولدي او باي معليش بس هم متعبين ياخ
وانا بحبك وبحبهم كمان
طلع السلسل من جيبو ولبسو ليه انبسطت شديد وقالت ليه شكرا حبيبي ما اعدمك يا رب
عدت الليله دي بفرح علينا كلنا كنت مبسوطه بسلسلي شديد وكنت مبسوطه بصداقه همام وخوتو لي
مرت الايام وانا وهمام بقينا قريبين من بعض بنتونس وبنضحك وحتى بساعدني في القرايه وفي الجامعه بسألني اذا ناقصني حاجه سهى كانت مبسوطه برضو وحست انو انا كده مرتاحه ومبسوطه بالقدر دا ومتقاضيه عن كلمه حب وبتعامل معاه كصاحب واخ
حتى ايام الامتحانات همام كان بساعدني كتير جدا خلصت الامتحانات واجزنا شهر ونزلنا السمستر التاني في رابعه
خلاص ربا بقت تقيله في الفتره دي كنت بهتم بيها شديد ما علشان زوجه همام علشان بقت لي اخت بالجد ربا وهمام قربو مني شديد وبقيت ما بحس بوجع وانا شيفاهم سوا بفرح ليهم وبدعي ربنا يديم عليهم الحب ويخليهم لبعض بس رغم كل دا انا بحب همام لسه ومتأكده من الحاجه دي بس حبي ليه بقيت مكتفيه بيه كده وحاسه بيه جميل كده زي ما هو من طرف واحد
الليله عيد ميلادي كالعاده ما بحب احتفل بيه بس طبيعي سهى من ما عرفتها بتجبرني احتفل بيه معاها بنمشي نشتري اتنين كب كيك ونولع شمعه ونطفيها وتجيب لي هديه وبالجد بكون مبسوطه وبنتصور ونمشي البحر ولمن ارجع البيت بلقى ماما مجهزه لي هديه دايما اختيار ماما ما بكون واو بس برضو بنبسط بيه شديد هم الاتنين الوحيدين في حياتي البهتمو بالتفاصيل البتخصني ربنا يخليهم لي
اتأنقت وطلعت وفعلا حصل الروتين حق احتفالنا انا وسهى واتصورنا رجعت البيت لقيت امي ماف كوركت لربا بالحيطه جاتني وقالت لي ما معانا والغريبه ما قالت لي تعالي اقعدي معاي بهناك في العاده لمن امي تمرق بتناديني اقعد معاهم بهناك هسي قالت لي خشي ارتاحي شويه وبتجي قلت ليها تمام ومشيت ما عارفه لكن اتضايقت تاني قلت يمكن مشغوله بحاجه او هي وهمام ما دايرين زول يزعجهم رقدت وقلت اكيد امي طلعت تجيب لي هديتي مسافه امي ما جات اتصلت عليها ما ردت ابتديت اقلق بعد شويه ربا كوركت لي قالت لي الكهرباء قطعت عندنا وانا خايفه وهمام ماف وماف زول تعالي لي سريع قلت ليها تعالي انتي قالت لي انا خايفه ما دايره اقوم من محلي اطقش شي ولا اقع نسيتي البيبي يمكن تحصل لي شي تعالي انتي يا سمر شلت تلفوني ومشيت ليها فتحت الباب وبقيت بضوي بالفلاش في الحوش رغم انو صوت ربا كان من الحوش بس هسي هي ماف بقيت بكورك ليها يا ربا وين انتي انتي كويسه ربا ردي علي بسم الله يا رب بسم الله ان شاء الله ما تكون حصلت ليك حاجه يا رباااا يا بت مش قلتي ما عايزه تقومي قمتي ليه جاني صوتها من الهول جووه
واااي يا سمر الحقيني انا بموت وقعت وقعت جناي مات خلاص النزيف واااااي
جريت بسرعه دفرت الباب وعينك ما تشوف الا النور اول ما دخلت النور ولع ما اشوف ليك الا الهول كلو زينه وبوالين وامي وخالو وخالتو واخو همام ومرتو واولادو كلهم واقفين وبقولو لي كل سنه وانتي طيبه وربا تضحك وانا دموعي جاريه طبعا اتخلعت شديد ما عارفه بس لقيت نفسي بمشي وبضم ربا وبقول ليها خوفتيني اخص عليك وخفت على البيبي ليه عملتو كده ياخ حرام عليكم وقعتو قلبي ضمتني شديد وقالت لي حقك علينا خلاص هسي دايرين نفرح بعيدك وكل سنه وانتي طيبه يا قلبي يا اطيب بت لاقتني مسحت لي دموعي وبعد داك كلهم عيدو علي وابسطنا وكانو جايبين لي تورته فيها صورتي وكلهم جابو لي هدايا والمره دي ماما ربا اختارت معاها الهديه وحبيتها شديد دا احلى عيد ميلاد لي من لما مات بابا اخير رجعت احس باحساس العيله منو تاني حسيت بابا في نصنا بكيت من الفرحه انبسطت بالجد اليوم دا من احلا يام حياتي قعدنا نتونس كلنا لحدي قريب وحده وبعدها اتفارقنا وكل زول مشى على بيتو
مرت الايام والليله يوم جميييل الليله ولاده ربا كلنا كنا مبسوطين ومشينا المستشفى من الصباح حارسين عمليه ربا طبعا حتولد بفتح بطن طبعا الدكتور قال لينا انو عندها توم
ربا دخلت وكانت خايفه شديد وبتبكي ونحنا كلنا بنصبر فيها وانو حتكون بخير وحتفرح وقبل ما تدخل مسكت ايد همام وهي بتبكي وتشهق وقالت ليه اولادي امانه في رقبه سمر ماف وحده غيرها حتحبهم لو جاتني شي ما دايره غيرها وحده تربي اولادي كلامي دا اسمعو كويس يا همام ما عافيه ليك لو زول غير سمر ربى اولادي يا سمر اولادي امانه في رقبتك متأكده حتحبيهم لانهم اولاد همام واولادي زي ما بتحبي همام وبتحبيني حتحبيهم متأكده انا جيت مسكت ايدها التانيه ما تقولي كده بعد الشر عليك حتطلعي بالسلامه وحتربيهم احسن تربيه حتربيهم زي تربتك انتي يا ربا يا احلى ربا في الدنيا ما تخافي وخلي ايمانك قوي ما حيصيبك شر وكلنا حندعي ليك
همام كان ما قادر يستوعب ولا كلمه من القالتو بس انا كنت مستوعبه كل حرف هي بتقولو وهي مأمنه على اولادها معاي لانها عارفه قدر شنو انا بحب همام وبحبها زاكيد حاحب الاطفال الجايين من صلب همام وحارعاهم لانهم حيكونو حته من قلبي بس انا ما بتمنى ربا يحصل ليها حاجه بتمنى تكون بخير هي لسه صغيره لسه العمر قدامها هي يداب قدري يا رب ما يحصل ليها شي بالجد ما بتمنى كده يا رب الطف
دخلت واحنا كلنا بقينا قاعدين على اعصابنا ساعتين ونص ونحنا برا ما عارفين الحاصل جوه شنو همام كان عايز يدخل بس ربا قالت ليه ما تدخل وقبل ما تدخل باستو على جبينو وقالت ليه بحبك ودخلوها همام قعد في الارض وبقى يبكي زي الشفع وواحد قاعد في الارض ويبكي وانا زاتي وامها وخالتو الهام وامي وزوجه احمد اخو همام كلنا كنا بنبكي وماف زول قادر يصبر زول كلام ربا دخل في قلوبنا كلنا وأثر فينا
طلعت الممرضه وقالت
لينا البقاء لله يا جماعه الجمله دي خلت اضنينا تصن عديل همام حاول يقوم ما قدر يقوم بقى يقول ليها منو ربا لا عليك الله ما تقولي ربا الله يرضى عليك
قالت انقذنا الطفلين بس الوالده في اللحظات الاخيره ادت الروح وكلنا لها ربنا يصبركم ويحسن عزائكم ماف زول فينا كان مستوعب كم ثانيه واحتا صانين وما مصدقين وهمام بقول لا قولو كلام غير دا ربا ما بتمشي تخليني سامعين
بعد شويه المستشفى اتملت بصوت بكانا حتى همام بكى باعلى صوت حالتو كانت بتقطع القلب
بعد مسافه طلعو الجثه وكلنا ما متصبرين الا خالو واحمد هم الوحيدين المتصبرين شويه حتى قصي كان منهار وببكي مع همام باعلى صوت رجعنا البيت انا كنت ماسكه الشفع جابت بنوته وولد جهزو البيت وجابو الجثمان وكفنوها ومشو دفنوها انا كنت مع الشفع ما سبتهم ثانيه ماف زول اهتم بيهم غيري حتى ام ربا ما جات شافتهم بس ليها حق الوجعه بتاعت بتها حاره انا ما بطلت بكاء ثانيه ولحدي صباح اليوم التاني الناس دي بتبكي بنفس الوجعه واهل ربا برضو ما كانو متصبرين امها جات لقتني مع الشفع الصباح قالت لي ربا ما قالت كلامها من فراغ انتي الوحيده الاهتميتي بأولادها يا بتي اولادها امانه في رقبتك
اااه يا خالتو اوعدك اني اشيلهم جووه عيوني رغم اني لو مهما حاولت ما حاعوض مكان امهم بس حاحاوا اكون ليهم الام والاخت والصحبه وكل شي وما حاحسسهم انهم فقدو امهم
ان شاء الله يا بتي ان شاء الله
مرا على العزا اسبوعين وانا قاعده ما بتحرك من جنب الاولاد واصلا كنت مؤجزه خلصت امتحانات وخلاص على المناقشه والتخريج بس
همام الاسبوعين ديل ما جاء غير كم مره بالحساب شاف الاولاد وما حصل شالهم بين ايديه كان كئيب شديد لحيتو زادت وما مرتبه وعيونو واقعه والدنيا كلها مسوده في وشو كنت بحاول اخفف عنو واهتم بيه بأكلو وشربو ما كان بياكل كويس ولا بشرب كويس وعلى طول براهو وسرحان ودموعو ما جفت ثانيه موجوعه عليه شديد واهلو كمان موجوعين عليه ومن يوم وفاه ربا ما حصل مشى البيت حقهم كان قاعد هنا عند ناس خالي وانا كمان بقيت قاعده هنا مع الشفع وامي دايما معانا وقصي ابدا ما بتعرض لي ولا بتكلم معاي ابدا كان نفسي اعتذر ليه من يوم رفضتو بس ولا مره اداني فرصه اتكلم معاه
*🌸يتبع🌸*
