صحيت المغرب صليت واكلت وقعدت مع امي شويه واتكلمت مع سهى في الواتس قريب العشاء كده قالت لي يداب رجعنا البيت وما جابت لي سيره انها بكره حتجيني ولا جابت لي سيره انو اخوها معجب بي بس اطمنت علي وحاولت تغير لي مودي قدر ما تقدر
في عربيه
شكلك وقعت وما سميت ياخ ما كانت قدامي العمر دا كلو انا ما شفتها حلاتها دي الا هسي ليه لكن ااااه من عيونها واااه من قوامها واستايلها ياخ خلت قلبي بدق من اول ما شفتها لحدي الان بدق يا رب يا رب الطف بحالي
*في بيت همام كانو قاعدين خالي ومرتو خالتو الهام*
عارف يا محمد انا كان نفسي من زمان همام دا يعرس سمر بت حلال طيبانه مؤدبه وبتريدنا ومستعده تخدمنا بعيونها وانا بريدها والله لكن كنت بخاف اقول ليه الموضوع دا يقول لي سمر صغيره لكن هسي شايف القسمه هدي جاب لينا بت قدرها لكن برضو شكلها بت خلال وفي النهايه القرار قرارو ما بنقدر نتخذو معاه وما علينا غير ندعي ليه بالتوفيق
والله يا إلهام انا زاتي سمر عاجباني لكن الاقسام بيد الله وغير كده ولدك ما عندو اي مشاعر اتجاه سمر وهي كمان ما اظن عندها مشاعر اتجاهو دي حتى بتحاول دايما تتجنبو لكن سمر ممكن نعرسها لي قصي شايفو منجذب ليها شديد هسي يوم تعارف همام ملاحظ ليه يشيل ويعاين للبت اكلها اكل بي عيونو اما همام فخلاص لقى بت الحلال البتريدو وبريدها
والله قصي دا شافع ساي وبتاع حركات مالي بدي سمر البت الرايقه علشان يتحكم فيها ويطين عيشتها وولدك دا ما النوع البكتفي بوحده يقعد يوجع قلب البنيه ساي
والله هو قصي طائش لكن طيش شباب ساي بكره وحده زي سمر بجمالها وبأدبها واحترامها تحببو فيها وتخليه تاني عمرو كلو ما يعاين لغيرها وبعدين هو منجذب ليها لو عرفت طورت الانجذاب دا لحب تاني في عيونو بشيلها وبتغير عشانها
والله هي من ناحيه سمر طيبه ورايقه وبت حلال فهي كده لكن لسه نحن ما عارغين نوايا قصي شنو كدي اصبر حبه وكان طلع صحي دايره ربنا يسوي ليهم الفيه الخير وان شاء الله زي ما قلت لو عندهم قسمه بإذن الله سمر بتعدل حالو
اي ان شاء الله والله قصي من اتخرج تم السنتين بعد دا لو كان جادي طوالي نطلبها ليه لكن اول شي نخلص عرس اخوه القرب دا هسي انا بخليها عليك تعرفي لي مويه ولدك دا شنو بفووق كده شوفي رايو في سمر شنو
اي يا حاج بشوف مع انو قصي دا ما مضمون والله سمر بتي اصلو ما دايره ليها تعيش عيشه ما تعجبها وكمان نكون السبب فيها نحنا عارف يا حاج انا سمر دا بريدها شديد والاه بحسها بتي الما ولدتها وما نفسي تمرق من بيتي غايتو الله يهديها على قصي ويهدي قصي عليها
ان شاء الله يا الهام ان شاء الله زاتي انا ما داير اختي تكون بعيده مني منها الاتنين يجو يعيشو معانا هنا
اي والله سهير اخت السرور اختي انا زاتي والله عشره سنين ما شفت منها غير كل خير كدي يا حاج النقوم اسوي شاي اللبن الاولاد ديل بجو هسي كلهم دايرين الشاي
كويس ومنها حاولي شوفي قصه قصي دا شنو
سمح يا حاج الله يهون
انا قعدت في الكرسي سرحانه وبتخيل حياه همام وربا وهو حيجي من الجامعه وهي حتفتح ليه الباب بالبجامه وحتحضنو يا رب حياخدها في حضنو وحيشيلها زي في المسلسلات حيجيبو كم طفل بنوته ولا اتنين حيكون عندهم ولد خالتو الهام حتحبها زي ما بتحبني حتسرق حبها مني حاقدر اتعامل معاها عادي يا ترى حتحبني ولا حتحس بحبي لراجلها يا رب انا حاقدر اتعامل معاها عادي ولا ما حاقدر يا رب الطف بحالي
رقدت في السرير وغمضت عيوني بالعافيه ما بين خيالاتي دي نمت حتى العشاء ما صليتو
بهناك خالتو الهام عملت الشاي وقصي جاء داخل
امي يا ستهم كيف امسيتي
تمام يا ولدي انت كيفك
تماااام يا حجه تماااااام الحمد لله
ان شاء الله دايما من امبارح شايفاك منور الحاصل شنو
الحاصل شنو يا حجه ماف اي حاصل مبسوط ساي
ان شاء الله دايما طيي امشي اغسل وتعال اشرب الشاي
حاااضر
مشى استحمى وغير لبس ليه برموده وتيشيرت وجاء لقى امو قاده في السرير قعد جنبها وختا راسو في رجولها ورفع رجولو في السرير وخالتو بقت تمرر ايدها على شعرو
يا قصي يا ولدي دايره اسألك سؤال لكن تجاوبني بصراحه
اسألي يمى طوالي
انت سمر بت عمتك دي رايك فيها شنو امبارح حسيتك مركز معاها شديد سمر دي زينه البنات يا ولدي
والله يا امي التقول حسيتي بي بالجد انا كنت مركز معاها وما عارف في شنو بس حاسي نفسي منجذب ليها شديد
يا قصي سمر دي زي بتي وما برضى ليها الشين البت دي انا دايره اديها للراجل اليستتها ويهنيها وانت اذا عندك مشاعر اتجاها توعدني انك تبطل حركاتك دي وتخلص ليها لانها تستاهل كل خير وانا متأكده حتملى عينك وحتحبها شديد
انا زاتي حاسي كده لا هي فعلا ملت عيني يا أمي انا دايرها
خلاص يا ولدي خلي عرس اخوك دا ينتهي وبعد داك نتعامل بجديه مع الموضوع
ما ممكن نعرس سوا يعني
يا ود هو العرس دا شختك بختك ساي العرس دا وراهو بلاوي اهدى يا ولد وخلي عرس اخوك ينتهي ونفضى ليك هسي انت حاول اتقرب منها بس علشان زاتو تعرف هي نظرتها فيك شنو
حاااضر ما بتوصي قصي يمى
اي عارفه ما بوصيك يا شيطان انت 😹😹
خلصو شايهم وهم بتونسو بسيرتي وقصي قام مشى غرفتو وخالتو الهام مشت لخالي وكلمتو بالحصل كلو وانبسط شديد وقال ان شاء الله بعد عرس همام ينتهي ونهدى من الجوطه شويه نفاتح البت وامها في الموضوع
