صحيت الصباح بدري شديد اتسوكت واتوضيت حتى الاذان اذن صليت ومشيت عجنت عجين الزلابيه قلت يتخمر شويه خالو وخالتو صحو صبحو علي وخالي مرق مشى الجامع ونحنا جهزنا الشاي بالزلابيه وبقينا نتونس لحدي ما خالو جاء من الصلاه قعد اتونس معانا بعد داك همام صحى صلى وجاء قعد معانا صبح علينا وبقينا كلنا نتونس
اها يخوانا قصي دا خلو لمن اصحى براحتو انا بقوم اكب ليكم الشاي
لالا يا خالتو انا بكبو
يا بت انتي عملتي الحاجات دي كلها كان كبيتو انا فيها شنو اقعدي ساي تمي ونستك
لالا خليني اتم جميلي طيب مع انك من قبيل بتساعدي فيني
خلاص امشي يا سمر عارفاك لمن تصري على الشي ما بتتراجعي
مشيت جهزت الكبابي والحاجات وجبت الشاي بدينا نشرب كده وغي ونستنا ديك قصي صحى صبح علينا وقال لينا كبو لي الشاي مسافه اتسوك واصلي واجي ما اشتغلنا بيه لمن شفنا جايي كبيت ليه الشاي قعد اضحك
هرشتي بعد شفتيني ما كنت حاشاكلك لو ما كبيتيه
انت اهبل لو كبيتو من قبيل كان برد علشان كده قلت لمن اشوفك جايي حتى اكبو ليك
ايوااا اجل اجل فهمت
اتونسنا كتير لمن الشمس طلعت قمت دخلت الحاجات المطبخ ومصمصت العده وبعدها كلنا اتجهزنا ومرقنا علشان نمشي بيتنا
وصلنا البيت لقيت امي مستنيانا هناك ومعاها سهى
شنو يا سهى شايفاك بقيتي صايعه وضايعه ومتموضعه بي شديد
ما تخليها ياخ مالك انتي معاها
اجي يا قصي دي صحبتي انا حره معاها 😂
عارف انها صحبتك لكن خلاص انا زاتي بقت صحبتي ومن حقي ادافع ليها ولا كيف يا سهى ؟
اكيد اكيد يا قصي انتي اطلعي منها يا سمر انا زاتي ما جايه ليك انتي جايه علشان همام راجل اختي ولا شنو يا همام
اكيد اكيد الف مرحب ما تشتغلي بسمر دي في اي وقت حبابك
يلا يا سمر اها كل يومين حتلقيني ناطه في وشك هلشان تاني تقولي لي متموضعه بي اوريك الموضعه جد جد 😂💔
يا زوله انا طلعت منها بطريقتك مع همام ومع قصي انا برااا 😂💔
اي احسن انتي اطلعي منها
طلعت يا زوله
قضينا يوم حلو شديد والبيت بالجد لقيتو جاهز من كل ناحيه امي حتى الاكل والطبايخ ماليه لي التلاجه فطرنا واتغدينا وعملنا الشاي والقهوه وسهى ما قصرت كانت معاي في كل خطوه لمن اليوم خلص وقالت ماشه قصي اصرا انو هو يوصلها مع انها رفضت كتير وقالت بتتصل على ساجد علشان يجيها لكن قصي اصرا وفي النهايه بعد إلحاح مننا كلنا وافقت ودعناها وعزمتني نجيها قريب مع الاولاد وقلنا ليها ان شاء الله ربنا يهون
*في الشارع عند قصي وسهى*
فجاءه قصي وقف العربيه واتلفت على سهي
قصي في شنو ليه وقفت العربيه حصلت ليها حاجه
عارفه يا سهى انا عارف انك مريتي بتجربه صعبه قريب يمكن لسه ما تمت عشره شهور لكن حابب اطلب منك طلب بتمنى انك تديني فرصه ادخل حياتك بتمنى انك تحاولي تنسي الفات وتدي نفسك فرصه جديده معاي وانا اوعدك اني حأحاول جهدي اني اخليك تكوني مبسوطه وتتخطي الفات انا بالجد عندي مشاعر اتجاهك متمني انها تتوج بزواج ونعيش في بيت واحد انا عارف ومتأكد انك ما شايله اي مشاعر جواك اتجاهي ورغم كده بطلب منك تديني فرصه علشان اخد حيز من حياتك وان شاء الله اذا ربنا كاتب لينا خير مع بعض حنقدر نكمل سوا بتمنى انك ما تتسرعي وتردي علي هسي بناء على مشاعرك اتجاه احمد بتمنى انك تاخدي وقتك وتفكري طويس في كلامي دا وانا مستني ردك
خلص كلامو وقبل ما تقول اي شي دور العربيه واتحرك سهى كانت مصدومه من كلامو ما قادره تستوعب حاجه لكن كل العارفاه وفاهماه انا بتحب احمد وما عايزه زول جديد في حياتها من بعدو من جواها حاولت تطرد الكلام دا وتعتبر انها ما سمعتو اصلا بس قالت ما حترد هسي علشان ما يرجع يحاول معاها ويعتبر ردها نتيجه لعواطفها تجاه احمد فكرت انها تنتظر يومين او تلاته وبعدها ترد عليه وسكتت على كده بعد ما حسمت نفسها وقرارها
وصلها البيت نزلت وودعتو بإيديها مع كلمه شكرا على التوصيله مع ابتسامه باهته
ولو العفو
اتحركت على مدخل البيت وهو حرك عربيتو راجع على البيت ما كان نفسو يجينا راجع في بيتنا علشان كده اتصل على همام وقال ليه انا راجع البيت لمن ناس اميي يكونو راجعين اتصل علي اجي ارجعهم
قصي حسى انو عايز يختلي بنفسو ويفكر في طلبو ويحاول يهيئ نفسو لقرار سهى حتى لو كان رفض ويفكر في طرق علشان يقنعها بحبو لانو احساسو اتجاها كان غريب عن كل احساس حساه اتجاه بت غيرها كل البنات حتى انا كان بعاين ليهم بطريقه غذره كانهم مجرد جسد جميل جذبو وعايز يقضي معاه ليله يشبع فيها غرائزو البشريه ما اكتر من كده حتى لما كان بفكر انو عايز يكمل حياتو مع بت برضو كان بكون علشان مفاتن جسديه بس مع سهى الموضوع اختلف خالص ما فكر فيها بالطريقه دي كان غصب عنو بحس بإنجذاب قوي اتجاه سهى بحس انها البت الممكن تكون بالجد شريكه حياتو وسندو في كل خطوه البت الممكن تفهمو وتساعدو وتتقبلو دا غير انو قصتها مع احمد وصبرها وتحملها للموضوع دا وتخطيها ليه بسرعه خلاه ينجذب ليها اكتر ويحس بقوتها وبقوه ايمانها سهى كانت بالنسبه لقصي بت مختلفه عن بقيه البنات شاف فيها كل الصفات اللي ممكن يتمناها انها تكون في شريكه حياتو
وصل البيت قعد مع نفسو مع انو فكر كتير انها ممكن ترفض بس بينو وبين نفسو كان مصر انها حتى لو رفضت هو حيفضل يحاول لحدي ما يقنعها بحبو ليها وبإنو عايز انها تكمل مشوار حياتها معاه
عندنا كملنا ونسه وبعد العشاء كده كلهم قالو حيرجعو بيتوهم طبعا بعد ما امي وخالتو الهام مسكوني ادوني محاضره كيف اقدر احافظ على زوجي واخلي ما يفكر في غيري وبتاع انا عارفه انو كلامهم دا انا ما حأقدر انفذو وانا عارفه اني ما مجبوره اعمل شي علشان احافظ على همام لانو اصلا هو لسه مع حب ربا وما محتاج اني احافظ عليه من الناس التانين بالنسبه لي كفايه انو جنبي وبعاملني احسن معامله ممكن الناس تستغرب انو حتى لو بحبو كيف اقبل على نفسي اعيش معاه علشان اربي اولادو وبس وهو يكون مجرد صاحب لي بس بالنسبه لي حتى دا انا ما كنت متوقعه اني في يوم من الايام القاه من حب حياتي الكنت شايفاه مستحيل وكونو اكون معاه في بيت واحد وهو بحترمني ومعتبرني من المقربين لقلبو فدا تقدم ملحوظ ما كنت بحلم اني القاه اما بالنسبه للاولاد فأنا اتعلقت بيهم لشخصي وحبيتهم ويمكن علشان همام ابوهم وهم قطعه وحته منو وغير كده انا عشمي في ربنا كبير وحاسه انو علاقتنا حتمشي للاحسن واكيد في يوم من الايام حبي حيلمس قلبو وحيبادلني الحب وحيكون لي وانا متٲكده انو ربا ما حتمانع اني احظى بحب حياتي وما حتعتبرها خيانه وحتكون مبسوطه لاني ان شا۽ الله حٲسعدو
مشيت قعدت مع اولادي اي ما تستغربو هم خلاص بقو اولادي واصلا من لما اتولدو هم اولادي وحيفضلو كمان
همام جاء لقاني ضامه وجن وبحاول انومها ويزن في سابع نومه قعد في الكرسي وبقى يعاين لي وهو ساكت ما نطق ولا حرف في سرو كان مستغرب من هدوء وجن بين ايديني ما تمت عشره دقايق ونامت ختيتها في السرير وبستها بعدها اشرت لهمام انو يطلع برا طفيت النور ومرقنا قعدنا في الصاله
همام عايزه اقول ليك حاجه
احكي
انا حانوم مع الاولاد في غرفتهم لانو ممكن يصحو بالليل يكونو عطشانين او جعانين او اي شي وعلشان نحنا ما متعودين نكون في نفس الغرفه والاتنين حنكون مرتاحين اكتر لو كل زول نام براهو صاح
صاح وبعدين اي شي بتريحك انا موافق عليها
تسلم
ولو العفو
طيب تصبح على خير انا حادخل انوم لو احتجت حاجه اتصل علي انا حاخلي الجوال جنبي
لا ارتاحي انتي لو عايز شي بعملها براي انتي لو احتجتي شي كلميني
عاين دا واجبي اتجاهك وواجبك اتجاهي ياخ ما كمتزوجين كاختك لو احتجت شي اتصل علي
طيب يا ستي حاضر
ماشي
دخلت دخلت مع الاولاد وهو مشى قعد في الغرفه حقتنا
