همام مشى شارع النيل وبقى يفكر في كل الحاصل كان حاسي انو هم الدنيا كلو في راسو كونو هو محاصر من مليون جهه خصوصا انو حاسس بكميه المشاعر الانا شايلاها ليه وخايف يوجعني بسبب مشاعري الماحيقدر يبادلني ليها في النهايه قرر انو يستخير ويخليها على ربنا
رجع البيت ولقى ناس البيت نايمين الا قصي وقصي تاني كرر عليه انو يستخير ويخليها على الله وفعلا همام مشى صلى وصلى ركعتين الاستخاره ودعا ربنا يهدي للطريق الصاح دعا اذا في خير لينا مع بعض وفي خير لاولادو معاي ربنا يهدي سرو ويخليه يقبل بي دعا ربنا يبين ليه الصاح من الغلط ويكتب ليه الخير محل ما يكون
رقد نام وفي النوم شافنا انا وهو ويزن ووجن هو كان لابس جلابيه سمنيه وطاقيه وشايل يزن اللي لابس نفس اللبسه وانا لابسه توب ومتحننه وراسمه وشايله وجن وهي كمان لابسه فستان طقم مع توبي وكنا مبسوطين وبنضحك صحا من النوم مخلوع سرح مسافه وهو مستغرب من الحلم نسى موضوع الاستخاره بعد مسافه حتى استوعب انو قبل ما ينوم استخار فكر انو معناها الخير انو نكون مع بعض وقرر انو نتزوج قام صلى ركعتين ودعا ربنا يعينو ويقويه على تنفيذ القرار دا
مفروض اني اوريهم اني موافق هسي ولا مفروض اصبر شويه لا هسي حاوريهم طالما دي مشيئه ربنا انا ما حاعترض عليها
يا امي يا حجه
اي يا همام انا في المطبخ
صباح الخير يمى
يسعد صباحك وكل ايامك ان شاء الله يا ولدي كيف اصبحت
الحمد لله يمى كويس انا انتي كيف
طالما انت كويس انا الحمد لله ما عندي عوجه تب
الحمد لله طيب يمى انا موافق على زواجي من سمر
قول والله يا همام يوم الهنى ويوم المنى اخيرا الحمد لله يا رب الف الحمد لله لو علي ازغرد املى البلد زغاريد لكن الله غالب يا ولدي
يا امي انا موافقه لكن الموضوع دا ما هسي اقلا شي ربا تكمل السنه
يا ود جنيت واولادك طيب يعني يكبرو ويمشو ويتكلمو حتى انت تعرس ولا شنو
امي الكلام دا ما بجي حرام ربا لسه ما كملت التلاته شهور كفايه اني موافق على القرار دا بعد تعب
يا ولدي ما قلت ليك بكره بنعقد اقلا شي تلاته شهور او اربعه حتى العرس ما تنسى سمر دا اول عرس ليها اكيد ما حنعمل عقد وخلاص بتنا خنعرس ليها احلى عرس وحتتحبس وحنعمل معاها كل الاصول وانت مرتك حتكون فاتت السته شهور للزمن داك
ااااه يا امي انو انتو ما حاسين بالنار الجواي انتو كيف دايرين اني امارس حياه طبيعيه وجديده بعد ربا
حاسيين يا ولدي لكن الحي ابقى من الميت وانا متأكده ربا راضيه بكل الحاصل دا واولادك ما عندهم ذنب يتحرمو من حنان الام ولا سمر عندها ذنب تتحرم من عرسها العرس البتحلم بيه كل بت يا ولدي معليش انت استهدى بالله بس وروق اعصابك
ان شاء الله يمى ان شاء الله
مشى همام وهو متضايق وبفكر انو كيف حيقدر يتحمل كل الحاصل دا هو متأكد وعارف انو ما لي ذنب اتحرم من الطقوس اللي كل بت في الدنيا نفسها تعيش كل لحظه فيها بس برضو صعبه عليه جدا انو يعيش التفاصيل دي مره تانيه ومع وحده غير ربا كمان
خالتو الهام اتصلت علي وورتني انو همام موافق بالجد كميه من السعاده والفرحه دخلت لقلبي ما كنت قادره اعبر عن مدى فرحتي كان نفسي اقعد ادور وارقص في نص الحوش بقيت بتبسم براي زي الشافعه حاولت امسك نفسي لحدي ما المكالمه تنتهي بس بعد قفلت بقيت بتبسم شديد ياخ انا بالجد ما مصدقه الف الحمد لله يا رب
يا بت مالك بتتبسمي براك زي نار القصب
ماف شي ياخ مالك انتي
علي انا ماف شي دي سرييع وريني خالتو الهام قالت ليك شنو
ياخ انتي مالك شمشاره كده يا سهى ما تخلي الزول يفرح ثانيتين مع نفسو
ابيت ما بخليك مع نفسك وريني قالت شنو سريع
قالت همام موافق على العرس
كذااابه كذاااابه ياخ الف الحمد لله اخيرا اخيرا ياخ اخيرا حتفرحي اخيرا حب حياتك حيكون معاك انا مبسوطه ياااخ انا مع احمد وانتي مع همام ياااما انت كريم يا رب
خلاص اهدي اديك مكرفون الجامع
عفنه خلاص اصلو الزول ما يفرح معاك
😂😂😂معليش خلاص افرحي
يا بنات مالكم في شنو
يا خالتو همام وافق اخيرا على الزواج
الله ياخ بالجد خبر يفرح الحمد لله يا سمر الحمد لله اخيرا قلبك دا حيهدى يا بتي
امي جات ضمتني وسهى كمان كان حضن مليان مشاعر كنت بالجد مبسوطه وعيوني ملانه دموع لاني ما مصدقه الحاصل دا يعني خلاص انا بالجد حاتزوج همام بعد ما كنت شايفه انو دي حاجه مستحيله خلاص واني مفروض اشيلو من راسي ربنا بتدبيرو اراد لي اني اكون معاه الحمد لله يا رب الحمد لله
مشيت صليت ركعتين وسجدت سجود شكر ودعيت كتير ربنا يكمل لينا على خير ويقدرني اسعدو وانسيه وجعو ويقدرني ارعى اولادنا كويس وما احسسهم بأي نقص في يوم من الايام
المساء رسلت لهمام رساله انو خالتو الهام قالت لي قرارو وانو انا ما حاخذلو وان شاء الله حاكون عند حسن ظن ربا فيني ما رد علي وانا ما اهتميت انو يرد لي بالجد مبسوطه اخر انبساط ومن دست زر الارسال ما انتظرت تترسل حتى قمت وبقيت داخله ومارقه وانا اتبسم واليوم دا ما خليت اغنيه رومانسيه ما سمعتها وسهى وامي ديل شغلوها لي تشغيله السواد والرماد
