وصلناهم لحدي المطار وكانو مسافرين على طول وما حجزو في شقه ودعناهم وانا وصيت سهى انها تحاول تتعامل عادي وانو اي شي حتكون بخير وركبنا العربيه اتحركنا على البيت
عارف يا همام انا مبسوطه شديد لانو ربنا عوض سهى واتزوجت زول بحبها وحيقدرها ويحترمها ويحفظها الحمد لله ربنا دا كريم بالجد يا همام
عاين لي مسافه وكانت نظرتو لي دافيه شديد كٳنو جواهو في كلام كتير ما قادر يطلعو وكٳنو بعاين لي وبقولو بسرو النظره دي حسستني بالخجل بقيت بعاين تحت
في شنو ليه بتعاين لي كده
رد لي وهو بعاين في الشارع وسايق
ما عارف لكن حاسس بفرق كبير في كل شي من لما دخلتي حياتنا ما عارف انتي بتعملي معانا كل دا ليه والمقابل شنو امي وابوي ما حصل شفت الفرحه دي في عيونهم الا لمن انتي بقيتي مره ولدهم قصي اتحسن وبقى زول احسن بسببك من الموقف اللي عملو معاك وسامحتيه وكمان قربتي منو وصاحبتيه وكتير ساعدتيه حتى بسببك اتعرف على حبو الحقيقي وقدر انو يجتمع بيها حاليا حتى اولادي حاسس انو ماف شي ناقصاهم طالما انتي جنبهم وبترعيهم بدون لا تكلي او تملي وحتى انا شايله مسئولتي كٳنك امي واختي وصحبتي وحب اقصد انك مهتمه بي رغم انو ماف اي علاقه غير اننا اهل بتربطنا بالجد بتمنى انو ما اتحرم اقصد نتحرم منك كلنا في يوم
يا شيخ خجلتني عارف انو امك وابوك في مقام امي وابوي وبحبهم جدا وهم بحبوني وقصي اخوي ومن حقي اصاحبو وانصحو واكون واقفه معاه اما الاولاد فهم قطعه من روحي اتعلقت بيهم وصعب اني اقدر اقضي لحظات بعيد عنهم ووجودي معاك مخليني مبسوطه وماف شي ناقصاني على فكره وما حصل اشتكيت من شي علشان كده ما تحس اني عندي جميل عليكم سامع الكلام دا
سكت وبقى مركز في السواقه حتى ما رد علي كٳنو بعد كلامي دا سرح بعيد
همام في قلبو كان حاسس احساس غريبه حاسس انو في نشوه اتسللت لٲوصالو من لما ابتديت اتكلم وفي نظره الخجل في عيوني حاول يبعد نظرو عني بس كل شويه كان بعاين لي ولما خلصت حاول يشغل نفسو بالسواقه وابتدا يلوم نفسو على احساسو دا
وصلنا البيت والاولاد الليله نايمين مع حبوبتهم لانو نحنا اتٲخرنا وكده
همام قال لي انو جعان دخلت المطبخ بقيت اتلفت اعمل شنو يا ربي اعمل شنو فتحت التلاتجه لقيت هوت دوق قلت بس احمرو وفي مارتديلا وجبنه وزيتون حمرتو سريع سريع وختيت الاكل في الصينيه وشلتو مشيت ليه في غرفتو
ما شاء الله جيتي سريع عملتي شنو?
شوف وانت تعرف اصلا كلها حاجات خفيفه ما اخدت معاي زمن بس ختيتها في الصحون وحمرت الهوت دوق
كويس والله انجاز برضو يا زوله
اكلنا بمزاج وهمام كان فاتح الشاشه وشغال فيلم رعب اسمو انابيلا في قناه اسمها رعب لو بتعرفوها لمن خلص الفيلم الساعه كانت تلاته وانا كنت خلاص نمت همام عاين لي عايز يصحيني وما عايز انا كنت قاعده في الكنبه ونمت ناداني بصوت خافت سمر سمر قومي ارقدي في السرير ما قمت شالني وختاني في السرير وكان عايز يقوم يرقد في الكنبه بدون ما اشعر مسكتو وقلت ليه خليك جنبي انا خايفه ما قدر يقول لي شي حاول يرقد بالجهه التانيه ثبت بيه ودسيت راسي في صدرو ونمت انا حرفيا ما كنت حاسه بالانا عملتو بس كنت خايفه من الفيلم الحضرناهو خصوصا اني ما تميتو علشان كده في احداث معلقه في راسي عن عبده الشيطان وكلام خرافي كده وكنت بالجد خايفه شديد همام ما قدر انو يبعدني عنو وخصوصا انو كان حاسي بحاجه بتضرب بقوه جوه قلبو بعد مسافه حتى قدر ينوم
*عند سهى وقصي*
وصلو الاوتيل الحجزنا ليهم فيه هناك وكانو تعبانين شديد صلو وبعد الصلاه قصي مسك ايدين سهى عارفه انا مبسوط قدر شنو انك معاي وحلالي حاليا بالجد بحمد ربنا على النعمه دي انو حبب قلبي في وحده تستاهل كل خير وبتمنى اقدر اسعدك واقدم ليك كل السعاده الانتي بتستحقيها
دموعها نزلت وردت عليه انا المحظوظه بيك والله رغم كل الحصل في حياتي لقيتك انت واقف جنبي وبتحاول تعوضني عن كل الفات
خت ايدو على خشمها وقال ليها ما تجيبي سيره عن حاجه انتهت نحنا حاليا مع بعض ومبسوطين والفات مات وباسها على جبينها وبعدها فك ايدها وبقى ماسك ايد وحده قام وبعدها شالها بين ايديه ودخلها الغرفه
قصي يا مجنون نزلني ياخ
ما بنزلك مش مرتي حر اشيلك ابوسك اعمل اي شي
ماف زول غالطك لكن انت تعبان ياخ والسفر وقعده الطياره وكده لازم ترتاح
انا مرتاح كده
ختاها في السرير وباسها تاني على جبينها ونزل باسها على خدها ولما عايز يبوس شفايفها حساها اتوترت قرب اكتر وباس شفايفها بوسه خفيفه
انا ما حابب ازعجك هسي ولا عايز منك اي شي مالم تكوني مستعده ويكون الموضوع كلو برضاك ورغبتك علشان كده ما تخافي وهسي نحنا تعبانين خلينا ننوم بعد نصحى اكيد راجيانا مشاوير ضمتو وختت راسها على صدرو نامو على طول
*عندنا*
لحدي الصباح انا ما فكيت ايديني من قميص همام فضلت متعلقه بيه وراسي في صدرو صحيت انا قبلو لقيت نفسي كده وكنت مصدعه حاولت اتذكر الحصل شنو ما قدرت فكيت ايديني من قميصو ولمن جيت اقوم همام قال لي صباح الخير طبعا ما قدرت اتلفت عليه كنت خجلانه شديد قلت ليه صباح النور بعد تعب كنت خاته في راسي صور لي حاجات كتيره والمشكله اني ما متذكره شي
كيف اصبحتي يا خوافه الليل كلو متشعبطه فيني من خوفك حميتيني النوم زاتو
هنا قلبي ارتاح وابتسمت بدون ما احس يعني ما حصل شي وبس مجرد اني كنت خايفه بالجد الحمد لله لانو ابدا ما نفسي مشاعري تتكشف قدامو نفسي انو هو من تلقاء نفسو يحس بمشاعر اتجاهي
معليش عذبتك بس ما كنت حاسه بنفسي وما متذكره اصلا حصل شنو
حصل يا ستي انك قلتي لي نوم جنبي انا خايفه بس دا كل الموضوع وعادي الموضوع ما خطير
اسفه اذا ازعجتك طيب
لالا ياخ العفو ما مشكله
طيب حاقوم اظبط اموري واصلي واعمل الشاي اوكي؟
طيب تمام يا ستي
شربنا الشاي وفي بينا شويه حرج وما كنا قادرين نتونس كويس
بعد شويه نمشي نفطر مع ناس امي ونجيب الاولاد ولا رأيك شنو
اي تمام اشتقت ليهم زاتو
وانا كمان والله
فعلا طلعنا طوالي وحتى امي جاتنا هناك فطرنا كلنا سوا وديك يا الونسه والضحك لحدي بعد صلاه الظهر بكتير حتى كل زول مشى بيتو وصلنا امي وبعدها دخلنا بيتنا الاولاد بقو عمرهم سنه وشويه يعني بتحركو وبقولو كم كلمه كده يزن مشى عديل لكن وجن بتمشي بالسرير ختيتم في الارض وختيت ليهم كميه من العابهم وشغلت طيور الجنه وخليتهم مشيت طبخت الاكل وجيت لقيت همام بيلعب ليدو مع الكمبيوتر قلت ليه انا بلعب معاك بقينا نلعب ونقتل بعض ونضحك وكده وقدرنا نكسر حرج الصباح ولمن انتهى اليوم تاني ما جبنا سيره الحصل امبارح
همام في قلبو المنظر ما غاب عنو ثانيه وحتى انا نفس الشي
عند سهى وقصي صحو من النوم العصر قامو استحمو وغيرو صلو واكلو وبقو يتونسو مع بعض لحدي بعد صلاه العشاء صلو وطلعو لفو على الكرنيش وركبو مراكب واكلو حمص يعني قضو وقت حلو ورجعو الساعه 12 وما كانو نعسانين حضرو فيلم وقصي كان راقد على رجول سهى وبحضر لحدي ما شالتو نومه وطبعا ما حبت تصحيه زي الساعه تلاته عايز يتقلب حسى انو رقدتو ما مريحه لمن فتح لقى نفسو لسه راقد في رجولها وهي متكله في الكنبه ونايمه اتضايق شديد من نفسو كيف ينوم فيها الزمن دا كلو اكيد هي ما حتقدر تصحيه قام براحه منها حست بيه
حبيبي ليه قمت كمل نوم
ضماها لصدرو
انا اسف تعبتك معاي ليه ما صحيتيني علشان اقوم منك
بس انا مرتاحه كده
شالها ووداها السرير وباسها على جبينها ورقد جنبها ختا راسها على صدرو
اعفي لي تعبتك بالجد اصلا ما كان في داعي اخت راسي فيك
بطل هبل عادي ما حصل شي وانا كنت مبسوطه على فكره
بحبك شديد
وانا كمان بحبك
ممكن ابوسك?
ابتسمت ليه بخجل انا ملكك
باسها على شفايفها وكانت بإعتبارها بوستهم الاوله كانت عميقه ودافيه وكلها حب بعد عنها وهمس ليها بحبك يا مرتي ورجع يبوس فيها بكل حنيه بادلتو البوسه رغم خجلها وانو كان حاسي انها خجلانه بس حب انو يكسر الخجل دا باسها على رقبتها بحنيه ابتدا جسمهت يرتعش حسى انها خايفه بس حبا انو يطمنها وبقى يقول ليها بحبك ما تخافي ما حأذيك كل شي حيكون تمام وهو ببوس في رقبتها نزل وابتدأ يبوسها على صدرها وكشف الجزء الطويل من الروب وفضلت بالصغير التحت رجع يبوس صدرها نادت عليها قصي وهي بترجف
روح قصي وهو ببوس فيها لسه
انا انا
قبل ما تكمل هجم على شفايفها في بوسه طويله وهاديه لحدي ما حسى انها ارتاحت وابتدت تبادلو البوسه
خليني اكون معاك من زمان مستني اللحظه دي
ابتسمت ليه بخجل وما ردت عرف انها موافقه رجع يبوسها ويبوس رقبتها وصدرها ونزل لبطنها واردافها وكل مكان في جسمها ما سلم من شفايفو لحدي ما استسلمت ليه وبعدها حصل بينهم اللي مفروض انو يحصل بين كل زوجين برضى وتفاعل من الطرفين
قضو اسبوعينهم بسعاده ورجعو استقبلناهم وكان يوم حلو شديد ومعانا ساجد ولين وبنوتتهم وام سهى
طبعا قصي ساكن مع ناس ابوه في البيت لانو همام واخوه الكبير الاتنين ساكنين كل زول في بيت براهو رغم انو قصي كان حابب يسكنو براهم لكن سهى اصرت انو امو وابوه ما معاهم زول وانها حابه تسكن معاهم وطبعا استكبروها شديد بالموضوع دا
بعد تلاته شهور من الموضوع دا اتصلو علي ناس الدفعه وقالو انو في احتفال في الجامعه لتخريج دفعه ونحنا الدفع القبلهم كلنا مدعوين عليه ومفروض نلبس فساتين كلنا وكده
اتفقنا انا وسهى انو نتظبط اخر حاجه ونرجع لزمن الفساتين والكوافير والحاجات دي لانو العزومه كانت ليليه وفي صاله كبيره لبست فستان كحلي غامض ايديه نص كم فوق في اكتافي وضيق لحدي بعد ركبتي بعد داك واسع شويه حلو شديد وبرضو سهى لبست كحلي معاي برضو فستان بس ايديه تلاته ارباع وكلو ضيق وفيه خطوه من ورا كبيره بس ما شدييد المهم برضو مع لونها ولوني الفساتين طلعت خنفشاريه رهيبه شديد كنت فاكه شعري وراسمه ولابسه سلسل رقيق واسواره بالفضي وحلق رينق كبير من الكوافير طوالي مشينا النادي وقصي وهمام كانو مستنينا هناك رغم انهم قالو لينا حنجيكم في الكوافير بس قلنا ليهم حناخد ترحال وفعلا وصلنا سهى اتصلت على قصي ورتو انو وصلنا قالو لينا اول ما تدخلو حتلقونا في وشكم
وفعلا اول ما دخلت عيني وقعت عليهم اشرت ليهم ومشينا عليهم لكن نظره همام ما عجبتني حسيتو عاضي على اسنانو كإنو في شي مزعلاهو شديد ما عارفه رغم اني اتوترت بس حاولت اتعامل عادي سلمنا عليهم
اشي اشي يا بنات طالعات قمرات مزز شديد
احم احم دا من زوقك
احلا انا ولا سمر يا همام
الاتنين حلوين
اممم علشان مرتك ما حابب تحرجها ولا ما حابب تحرجني انا اعترف
لالا ماف حاجه زي دي بالجد الاتنين حلوين
قصي احلا انا ولا سمر
بدون مجامله سمر طبعا احلا لكن في عيوني انا انتي احلا من كل البشر
اممم تسلم لي عيونك انت ياخ
عاينو ما تتغزلو لينا في بعض ما تخلونا نتدردق ليكم هنا
ما هدا راجلك اتدردقي بعيد بعيد مننا
اممم طيب انا ماشه اشوف باقي الدفعه واسلم عليهم
اخدي همام معاك
همام تمشي معاي
لا امشي انتي ما ناقص عواره مع طلابي
كيف يعني ما فهمت
ولا حتفهي امشي امشي
مشيت فعلا وبقيت بسلم ع البنات جاء ولد من دفعتنا اسمو وليد سلم علي
سموره يا اموره ما شاء الله جميله شديد كالعاده ما صدق انك اتزوجتي ما اتغيرتي كتير لسه جسمك رهيب ولسه جميله وتسحري من نظره
اتضايقت من كلامو وكشرت في وشو وقلت ليه تسلم عايزه امشي وقفني ومسكنيمن يديشنو ما ترقصي معانا حبه ولا دكتور همام خلاص سرقك مننا عرف يكسب مزه جامده بالجدويا بختو بيك
انا هنا خلاص اعصابي باظت قلت ليه عن اذنك انا ماشه اشوف راجلي ممكن تفك ايدي قبل ما يفكها لقيت همام في وشي وعيونو بتنضح شرار
الحاصل هنا شنو يا شاب
ماف شي مجرد زميلتي وبسلم عليه زميلتك تسلم عليه بخشمك ماف داعي تكون ماسك ايدها ما تنسى انها متزوجه مسك ايدي وقال ليه عن اذنك اصلا محتاج مرتيفي كلمتين
طبعا الغيره والزعل كانو باينين عليه شديد وانا انبسطت من جووه قلبي خصوصا انو قال علي مرتو
فضل ماسكني من ايدي لحدي ما طلعنا برا الصاله
الزفت دا كان بقول ليك في شنو يا سمر وماسك ايدك ليه
ماف شي مجرد كلام عادي وعايزه امشي قال لي ارقصي معانا شويه
دا الفضل يقول ليك ارقصي معانا والله الا اكسر ليه ايديه ورجليه كمان عايز يرقص مع مرتي انا وانتي دا شنو الهباب اللابساهو دا ايديك بدا وصدرك مصو برا وفاكه شعرك حتى طرحه ما لابساها قايله المحل دا بيت ابوك الله يرحمو تمشي بيه على كيفك ولا راجلك المعيد هنا ما عاجبك وما عندو قيمه عندك بتضربي بيه عرض الحايط قدام طلابو
لا ما كان قصدي كده
قصدك او لا الموضوع حصل وخلاص ورجوع جوه للحفله المهببه دي ماف يلا نرجع بيتنا علشان انا لو دخلت بكسر المحل في راس الزفت دا ولو ما كان متخرج كنت ما رحتمو والله لاربت بيه خمسه سنه لقدام
خلاص اهدى اصلا ما حابه ارجع جوه بس وري قصي وسهى اننا ماشين
اتصل عليهم حاولو يحنسوه علشان نقعد لكن رفض ركبنا العربيه واتحركنا طبعا انا بكيت وكنت بعاين بس بالشباك وهو كل شويه بعاين لي وحاسس انو في نار مشتعله جواهو من لما شافني كدا ما قدر يفسر احساس الغيره الاتملكو دا شنو ليه حسى اني ملكو وما مفروض الناس تشوفني كده كان متلخبط ما قادر يحدد موقفو شنو او احساسو شنو اتجاهي استغفر ربو واخد نفس عميق ووقف العربيه
استغربت لمن العربيه وقفت مسحت دموعي وعاينت ليه ورجعت عاينت برا
انا اسف اني كوركت فيك بس من البدايه فستانك ما عجبني ومبين مفاتنك شديد وغير كده الناس كلها بتعاين ليك وتعلق عليك وانتي في عصمتي وما صاح اسمح انو الناس تعاين ليك او تفكر فيك وما بقدر اتحمل الفكره دي حتى وبعدين الكلب دا نرفزني لما شفتو ماسك ايدك ما قدرت امسك نفسي عارف انو انا ما من حقي اتحكم فيك واني اصلا ما معاملك كزوجتي بس
اسكت يا همام انا زوجتك غصبا عني وعنك ومن واجبي احترمك واحترم قراراتك وغلط مني اضايقك وانا اسفه اني اظهرت مفاتن جسمي قدام غرباء وبتمنى ربنا يسامحني وعلى فكره ما متضايقه لانو سبنا الحفله اتضايقت من نفسي لانو عرضتك لموقف بيش قدام طلابك وقللت من احترامك قدامهم وانا بالجد بعتذر
لا عادي ماف داعي تعتذري ويا ستي كتعويض اطلبي مني اي شي وانا حاسويها ليك نمشي نشتري ايسكريم بيتزا شكولاته اطلبي العايزاهو ولا اقول ليك خليني اعزمك انا على زوقي موافقه?
اكيد موافقه
وداني اشترينا بيتزا جابها واكلناها في العربيه رفض اني انزل علشان لبسي وتاني وداني ايسكريم الكيلو في بحري اشترينا منو وبرضو مشينا شارع النيل وفتحنا شباك العربيه مع الهوا وقعدنا نتونس وناكل ونحنا راجعين البيت مرينا بمحل السلاسل بتاع المره الفاتت الاشترى لي منو لمن جبنا بوظه لربا دخل جاب لي سلسل وخاتم حقات فضه ومن السوبر ماركت الجنبو جاب لي نيوتيلا
ما كان فاهم نفسو بعمل كدا ليه بس كان حاسس انو مبسوط وهو شايف ابتسامتي وفرحتي الظاهره في عيوني
رجعنا البيت وانا طايره من الفرحه وحاسه انو همام ابتدأ يحس بشويه مشاعر اتجاهي وانو مع الوقت حنبقى احسن
مرو اربعه شهور ونحنا تمام جدا صاح ماف واحد اعترف بالحب للتاني بس احنا الاتنين فاهمين انو في انجذاب بينا انا عارفه اني بحب همام بس ما متأكده من حبو وهمام حاسس بإنجذاب من ناحيتي بس ما عارف احساسي اتجاهو شنو وما قادر يمشي خطوه بدون ما يفهم انا احساسي اتجاهو شنو وكان برضو مشوش وبلوم نفسو احيان كتيره على احساسو دا ومرات كتيره بشيل الموضوع عن بالو وبتذكر حبو لربا وبقول انو مكتفي بيه بس برجع تاني يميل لي
الليله همام رغم انو ما شغال قال في اجتماع مهم لبعض اساتذه الجامعه وهو من ضمنهم مشى ولمن جاء وراني انو ضروري يسافر اسبوعين تبع الجامعه رحله علميه
اتضايقت شديد لاني ما متعوده يغيب عن البيت يوم خلي اسبوعين وحتى هو اتضايق بس قال فرصه ابعد فيها عنها واحاول اشيلها شويه من بالي واقيم احساسي اتجاها واكيد حانساها اول ما ابعد عنها كم يوم ما عايزه اتعلق بيها وانا حتى ما فاهم احساسها اتجاهي شنو صاح زمان كانت معجبه بس قبل ما اتزوج بس هسي ما عارف وبعدين هي قالت انو في زول في حياتها وهي كل يوم بتحبو اكتر وما قادره تشيلو من بالها لازم اخليها على راحتها وما اضغط عليها انا اتحرمت من حبي بس غلط احرمها رغم انو حبها من طرف واحد بس يمكن هي مبسوطه بكده قبل الموضوع بإنو الفتره الجايه اثناء سفرو يحاول يشيلني من بالو
جهزت ليه شنطتو وحاولت ارسم ابتسامه رغم انها باهته ومزوره ووراها كميه من الحزن والزعل بس ما بقدر امنعو دا شغلو وصعب يتخلى عنو علشاني اصلا بصفتي شنو في حياتو حاقدر اطلب منو ما يمشي اكيد من حقو يعمل العايزو وبدون ما يستشيرني حتى هو كونو قعدني ووراني وشرح لي ظروف شغلو الخلتو يمشي دا زاتو كتير
السفره كانت للولايات المتحده مع خمسه طلاب ودكتور تاني معاه استلمو منحه من هناك علشان يقرو السنه الاخيره هناك وطلبو استاذين يجو معاهم لحدي ما يتأكدو من اقامتهم وكل شي ويرتبو ليهم امورهم ويرجعو ووقع الاختيار على همام لانو لغتو كويسه جدا وتواصلو كان ممتاز مع الاجانب
اليوم الاول من سفر همام كان صعب بس كنت بحاول اشغل نفسي مع الشفع وشغل البيت وامي جات قعدت معاي
عند همام اليومين الاوائل كان مشغول شديد بس طمني عليه في الواتس انو وصل كويس وتاني ما اتكلم معاي وهو كان اصلا بحاول يشغل بالو عني
لمن مرا اسبوع انا بالجد بقيت مستاءه شديد وظاهر فيني وامي كانت حاسه بي انو انا متضايقه
عند همام بعد خلص اجراءات الطلاب وكده بقى ما قادر يشغل نفسو عن التفكير فيني ضحكتي عفويتي وكيف بعاملو اهتمامي بأولادو اتذكر غيرتو علي بقى راقد في السرير وبازكر في كل اللحظات اللي جمعتنا سوا ولمن قلت ليه انا خايفه خليك جنبي افكارو جاطت حسى انو مشتاق لي شديد ونفسو يخلي كل شي ويرجع لي حسى نفسو يضمني بين ايديه بعد كم ثانيه حاول يشيل الافكار دي عن راسو اتذكر ربا اتضايق من نفسو
طلع البلكونه وعاين للسماء ورفع ايديه ودعا رب العالمين
يا رب انت ختيتها في قلبي وفي عقلي واكيد فيها خير لي يا رب الطف بحالي وما تخليني احس اني خنت ربا او ظلمت سمر يا رب العالمين بعد كم دقيقه الضيق دا اتشال من قلبو حسى انو ربا اكيد ما حتكون زعلانه انو يكون مبسوط في حياتو
تاني رجع يقول بس هي يمكن ما عايزاني يمكن لسه بتحب الشخص اللي حكت لي عنو حاسس علاقتي بيك غريبه يا سمر
اتحرك وشال تلفونو وفتح المذكره
هل اقول عن ما يجتاح قلبي اتجاهك حب ام انني سأخطئ القول اشعر ان ما بيننا ليس حب بل علاقه بنكهه الكاكاو انتي كالكاكو يستطيع المرء اضافتك لكل شي ليصبح طعمه اجمل كما اضفتك انا لكل علاقتي فإزدانت في عيني اكثر ولكن من الصعب اخد قضمه واحده منك كما انت تقبلت كاكاوك في الاخوه جميله انت كاخت اهداني اياها الله بعد زمن تقبلت كاكاوك في الصداقه فما حظيت بيها جميله غير معك وبك تقبلت كاكاوك في المسانده فما ساند عائلتي وطفلاي غيرك
اشعر انني اريدك ان تكوني كاكاو خالص بدون اضافات ولكن من الصعب علي تقبل ذلك
هل ابدي ما في قلبي ام اخفيه اجيبي يا صاحبه الوجه المشرق يبدو ان ملامحك قد استوطنت افكاري اصبحت اشرد فيها واسرح كلما مرا طيفك في خيالي اود لو اعبث بخصلات شعرك الاسود هل من حقي ان افعل ؟ اجيبي يا صاحبه الوجه المشرق ايريد الكاكاو ان يأكل ان يصبح حب يتغلل في اورده الجزء الايسر في قلب كاد ان يذبل اجيبي حتى يتسلل كاكاوك في قلبي المهمل ليضيف النكهه والمنظر اجيبي هل يمكن للكاكاو ان يفعل؟ !
قفل المذكره وخت التلفون ورقد في السرير يا رب ما تبتليني في حبها يا رب كفايه علي وجع فقد ربا الطف بي وخليني اعيش سعيد بقيه عمري اكتب لي حبها شيل حب الشخص داك من قلبها هو ما بحبها يا رب يا رب لين قلبها علي انا حبيتها يا رب حبيتها بمشيئتك فأعني على ان اصون هذا الحب وان يكتب لي ان اسعد به وان اسعدها يا الله
بقى يفكر كيف حيقدر يعترف ليها بحبو ما فكر في شي غير انو ينشر الحاجه الكتبها دي في الفيس وفعلا في نفس اللحظه عمل ليه نشر
ورقد نام
هناك الزمن كان عندنا صباح جاني اشعار انو همام نشر حاجه فتحتها بلهفه لاني كنت مشتاقه ليه شديد ونفسي اعرف اي شي عنو لانو من مشى غير انو طمني عليه تاني ما اتكلم معاي ابتديت اقرأ في الكلام دموعي نزلو وانبسطت شديد حسيت انو الكلام لي قلت اعلق ليه لكن كنت متردده هسي لو طلع ما لي اعمل شنو في النهايه رديت
قد يفعل ومعاها قلب ازرق
*🌸يتبع🌸*
