طول الحلفه وهمام ما اتكلم معاي اي كلام جانبي حتى مبروك ما قالها لي وانا ما جاتني الشجاعه علشان ابارك ليه اها لما خلصت الحفله وصدمونا بخبر انو حنمشي شقه نبيت فيها والصباح نسافر مصر نقضي اسبوعين هناك انا وهو بقينا نبلع في ريقنا وطبعا همام علشان ما يجرحني او يزعلني ما قدر يبدي رفضو وانا علشان ابين ليه اني ما لي صله بالموضوع اعترضت وقلت انو ما ممكن نمشي ونخلي الاولاد ورانا ولازم نحنا نقعد وماف داعي لشهر العسل والكلام دا ورغم اني اصريت على الرفض لكن ما اشتغلو بي وفي النهايه وافقت بعد همام عرف اني رافضه الفكره واقتنع انو ما لي صله بالموضوع
يا جماعه طيب انا عايزه ارجع البيت ابيت هناك واعيد ترتيب شنطتي براي
يا بت الشنطه نحنا رتبناها وانتهينا ماف داعي
ما هو علشان رتبتوها انتو يبقى لازم اعيد ترتيبها انا يا سهى الله يرضى عليكم انا عارفه ما حتكونو ختيتو لي شي اقدر البسها علشان كده لازم ارتبها براي
يا بت دا كلام شنو والشقه الحجزناها ودفعنا قروشها تضيع ساي وبعدين قلنا ليك رتبناها ماف داعي تعندي ساي
يا بتي سهى كلامها صاح خلاص امشي ساي ونحنا دايرين مصلحتك ما بنعمل شي تضرك
ياخ انتو ما فاهمين شي حتبوظو لي اي شي انا بفكر فيها بعمايلكم دي
يا بت خلاص اسكتي وامشي مع راجلك من سكات نحنا ما قصرنا جهزت ليك الشنطه تمام على اكمل وجه
اهو تجهيزكم دا انا يشهد الله مخوفني خوف خايفه ما القى شي البسها ابيت بفستان الزفاف من عمايلكم دي
المهم بعد جدال ودعتهم وامي تشيل وتوصي لمن قلت ليها حفظتهاااا الوصايا دي خلاص بعد داك مشيت العربيه لهمام علشان نمشي الشقه لانو ديل لي بكره ما حيخلوني ارجع البيت وحيمشو الفي راسهم وانا مجبوره طبعا اتقبل البحصل
ركبت جنب همام من سكات طبعا كان سايق ومركز في السواقه الشقه كانت في الخرطوم قريبه للمطار وهمام ليه معرفه كويسه بالمكان علشان كده قصي وصف ليه بس وقال ليه امشو براكم وانا مجهز ليكم اي شي للاكل في التلاجه والبارد وكل شي بقيت افكر مفروض انا اكسر الصمت دا علشان نقدر نتعامل عادي وما نخت حواجز لكن ما لاقيه مدخل علشان اتكلم معاه بيه في النهايه اتشهدت واستغفرت وقلت يا زوله انتحار بس تتكلمي ان شاء الله تغني المهم لازم تفتحي خشمك دا معاه المهم اتنحنحت كده على اساس يشتغل بي ولااا هببني تاني اتنحنحت مدا لي كرستاله مويه صحه قلت ليه شكرا شربت بقتين وقفلتها راجعه مديتها ليه ختاها جنبو وكمل سواقه وهو ساكت في سري قلت دي ن شنو دي يا سمر الراجل ما شغال بيك الشغله تسوي شنو في النهايه غمضت وقلت ليه همام؟!
اممممم
عارف موضوع الشقه والسفر ودا كلو انا ما عاجبني لكن لمن فكرت فيها لقيتها فكره سمحه يا صحبي
كيف
صاح انا وانت ما حابين نعيش حياه المتزوجين الممله دي 😂لكن بيني وبينك سفره زي دي ما بتتفوت وبتكسر الحواجز بينا
كيف
يعني انا ما حاسافر معاك كزوج لي ولا حاقعد اتخجل منك ولا حنكون مجبورين نتجنب بعض بالعكس نطلع ونتفسح وفرصه نعرف بعض بعيد عن ضغوطات الاهل الحيحاولو يقربونا بطريقه مقرفه كده نحنا ما حابين نتطرق ليها ولما نعرف بعض بأسلوبنا الخاص حنسهل على بعض انو نقدر نتقبل فكره انو نعيش في بيت واحد ونتشارك قرارات اولادنا ونستشير بعض كأصدقاء ونثق في بعض وغيرو وطالما هي حياه حنعيشها لعمر لقدام انا شايفه يستحسن نكون فيها اصدقاء وسند لبعض ونعرف كيف نتعامل بطريقه طبيعيه يعني خليك عارف اني حاقوم بكل واجباتي اتجاهك ما علشان بينا عقد زواج علشان بينا طفلين وعلشان نحنا اولاد اهل واصحاب واخوان كمان وكذلك بتمنى منك كده في المقابل موافق
موافق
امممم اشك في ذلك
لا والله كلامك دا ريحني جدا يا سمر لاني كنت خايف اني ما اعرف اتعامل معاك وما نقدر نتعامل بأرايحيه مع بعض ويكون في كميه من الحواجز بينا وانا ما نفسي اظلمك او احسسك بالضغط وما نفسي انو احسسك انك اتحرمتي من حياه جميله عفويه وهاديه مع الشخص الحتكملي معاه حياتك الباقيه لكن طالما الموضوع بخص صحبتنا واخوتنا واننا اهل حارجع اوعدك نفس وعدي الزمان انو انا حاكون سندك وحمايتك وانو اذا احتجتي اي شي فأنا اول زول حاكون جنبك وحألبي احتياجاتك واني اذا احتجت صحبه احكي معاها او استشيرها في شي حتكوني اول خياراتي او عندك انك تكوني التوب عندي من بعد امي وابوي بالجد بتمنى اقدر اعوضك النقص اللي حيكون بينا بأي طريقه كانت ولو انتي شايفه انو في شي ممكن تعوضك بتمنى انك توريني وانا اكيد حأنفذها ليك
اممممم في طبعا
أمري يا ستي
انو لمن نكون مع بعض زي هسي يعني ما تسكت تخليني لازم تتونس معاي كاني قصي اخوك او واحد من اصحابك بدون اي حواجز اتفقنا يا مان
اتفقنا يا مان 😂😂
لالا ياخ انا ما مان لكن 💔😂
لكن زي قصي واصحابي اذا مان يا اصليه انتي براك فرضتي كده
خير يا زول المهم ما يكون في حواجز في التعامل بينا بالجد بتمنى نتعامل بأرايحيه مع بعض والحاجه التانيه اللي ممكن تعوضني بيها هي اني ما بحب اقعد في بيتي متكمكمه بالتوب او العبايه اسمح لي اعاملك كأخوي والبس عادي قدامك
طيب حاضر ما عندك مشكله وعلى فكره وصلنا وابتداء من الان البسي الحاجه البتريحك وانا كمان حأعاملك زي اختي عادي تلبسي العايزاه في بيتك بدون اي حواجز او قيود
شكرا شكرا شكرا يا احلى همام في الدنيا
ما تبكشي لي يا بت 😂💔
حاضر حاضر خلاص خلينا ننزل جعانه انا
انا زاتي جعان والله
نزلنا وانا الحمد لله كل الهم الفي قلبي انزاح وحاليا متأكده اني حأقضي ايام حلوه مع همام وحنقدر نتفاهم ونتأقلم مع بعض ونتعود على بعض في اسرع وقت ممكن وكمان مرتاحه لانو اكيد همام كمان كان شايل هم انو كيف حيقدر يتعامل معاي لكن حاليا حاسه انو مرتاح اكتر بخصوص الموضوع دا
