مرت تلاته شهور على وفاه احمد في التلاته شهور دي امي وخالي وخالتو الهام رجعو يزنو على همام وعلي انو خلاص مفروض نبدأ تجهيزات عرسنا رغم اني كنت بالجد متشوقه لاني اكون زوجه همام الا انو وفاه احمد وحاله سهى سببو لي فتور في قلبي ما عارفه لكن بقيت شايفه الدنيا مسيخه ويمكن يداب حسيت بوجع همام لما شفت الوجع دا في سهى حسيت قدر شنو الزول بكون موجوع لمن يفقد شريك حياتو خفت ما اقدر اسعدو رغم حبي ليه خفت ما يقدر في يوم يبادلني الحب ما يقدر يتخطى حبو لزوجتو لين خفت من حاجات كتيره لكن بقى صعب علي اتراجع بعد كلامي لناس خالي يمكن لو شرحت وجهه نظري لامي واني خايفه تفهمني رغم انو احساسي بقول انها حتشجعني علشان اخطي الخطوه وما افكر في البحصل قبل ما يحصل بس خالو وخالتو اقول ليهم شنو وقلبي الفي كل ثانيه بكون عايز يخوض التجربه رغم انو عقلي ابتدأ يفكر عكس بس حأخطيها واطاوع قلبي وان شاء الله ربنا حيعيني على اني اسعد همام ويكون مرتاح معاي
الغريبه انو الخوف مخليني كل ما امي تفتح معاي الموضوع دا بتحجج انو لسه سهى بحاله صعبه وانا ما بقدر اعمل عرس وهي بالحاله دي بس من جواي عارفه انو ما دا السبب الاساسي رغم اني فعلا متأثره لوجع سهى
سهى بعد فتره فطنت لانها عقدت قبل اسبوع كامل من الدخله يعني يمكن يغتفر ليها ذنب تسليم نفسها لاحمد على اساس انو زوجها وعاقد عليها رغم انها حتواجه كتير من المحاضرات وانها ما كان مفروض تعمل كده بس برضو في النهايه حيتبرر موقفها واهلها حيعذروها وكده حياتها رغم انو حيكون فيها صعوبه الا خانها حتكون احسن من الاول حمدت ربها الف مره على العقد الكان قبل العرس بفتره ولو بيوم المهم انو الناس ما حتقول انها عملت حاجه بالحرام رغم انها عارفه انها غلطت من زمان بس استمرت في الاستغفار والشكر لرب العالمين انو لطف بحالها ونجاها من مأزق كبير كان ممكن يدمر حياتها للابد بس رغم كده قررت تتمسك بحبها لاحمد وانها ما عايزه اي ارتباط في حياتها تاني
سمر يا بت وين انتي
اي يا امي انا في الصالون هنا
يا بتي الهام ضربت لي قالت لي سمر مالها كان غيرت رأيها التورينا ما بنلومها هي برضها زي بتنا وما عايزين نجبرها على اي شي
لالا يمى دا كلام شنو ما غيرت اي رأي انا
لمن سمعت جمله امي دي زي الكشحو فيني مويه سخنه اتوترت وخفت واتوجعت شديد كإني ما قبل شويه كنت بفكر في البعد حسيت انو حب السنين وحلم السنين حيضيع من ايديني انكرت كل افكاري المتضاربه وفي لحظه وحده لاحساسي بالخساره اتراجعت عن كل شي كنت بفكر فيه
طيب يا بتي ليه نحنا بنأجل اكتر من كده
ما تأجلو يمى احمد قرب يتم الاربع شهور بعد دا سهى ما اظن تلومني وبعدين ليها اكتر من اسبوعين زانه في راسي علشان موضوع العرس دا وانو خلاص كفاي حرمان لنفسي علشانها هي زاتها عايزاني اكمل حياتي مع همام ونكمل الخطوه البديناها
الحمد لله يا بتي خلاص بكلم خالك نعلن الموضوع رسمي خلاص ونبدأ تجهيزات
كويس يمى ربنا يسهل
خلاص بعد شويه انتي زاتك ارح معاي ومنها تشوفي الاولاد وتغيري جو حبه ليك اكتر من اسبوع ما مشيتي عليهم
حاضر يمى انا زاتي اشتقت للاولاد والله
بعد الفطور طلعنا مشينا ناس خالي لقينا قصي وخالي وخالتو قاعدين في البرندا يتونسو امي سألتهم من همام قالو ليها مشى الصباح بدري عندو محاضره وحده درسها وجاء هسي مع الاولاد قلبي كان بضرب وانا بسمع الكلام دا كنت مشتاقه لشوفتو في اللحظه دي حسيت نفسي اقوم اجري على الغرفه اشتقت ليه شديد
قصي ميل علي وهمس لي بدون ما يسمعو البقيه
شنو يا اصليه ما اشتقتي للاصلي دا ما نشوف صرفه نكبرها من الكبار ديل ونهجم على المعلم دا جوه
هههههه ياخ انت مجنون
مجنون اي ارح يا زوله
ارح يا مجنون
يا جماعه نحنا نقوم نشوف الشفع ديل انا وسمر لانها طولت منهم وانا زاتي اشتقت ليهم وداير اكون محرم بين العرسان ولا كيف وغمز لي عينو
كلهم ضحكو طبعا وكانو مبسوطين شديد بعد امي بثت ليهم خبر اني خلاص موافقه وما عايزه انو نأجل اكتر من كده
دخلنا الغرفه همام كان شايل وجن وبشاغل يزن القاعد في نص السرير وبضحك مع ابوه كان شكلهم جميل مع بعض حسيتهم كاملين كانهم ما ناقصين وحده تجي تدخل بينهم
احم احم همام نحن هنا
اتلفت عاين لينا
اهليين اتفضلو سموره كيفك
تمام الحمد لله انت كيف والحلوين ديل كيفهم
تمام كويسين يلعبو من قبيل
شكلو مزاجك رايق علشان كده هم مبسوطين شديد
يعني الحمد لله
الحمد لله ان شاء الله دايما تكونو مبسوطين كده
امييين ي رب بوجودك
في اللحظه دي وجن كانت بتعاين لي حسيت انها بتقول لي تعالي شيليني بعيونها جيت عليهم واول ما وصلت جنبهم جات علي من تلقاء نفسها شلتها وبستها وابتديت اشاغل فيها يزن بكى ابوه شالو ولسه بيبكي ويصرخ اديت همام وجن وشلت يزن بديت العبو بقى يضحك ومبسوط حسيت انهم بعرفوني كانهم فتره الاسبوع الفاتت دي كانو فاقدين وجودي جنبهم انبسطت انو وجودي بينهم مرحب بيه
شفتي يا سمر الاولاد اتعودو عليك من هسي من قبل ما تجي وتعيشي معاهم علشان كده عجلو من موضوعكم علشان بيبيهاتنا ديل
ان شاء الله ربنا يقدم الفيه الخير
رديت برواقه رغم اني من جوااي انبسطت شديد واتمنيت اقول ليه من بكره خلينا نعقد بس ما كنا برانا انا وقصي علشان نتعاور مع بعض همام كان شايل وجن وبعاين لينا بعدم استيعاب شكلو لسه ماف زول قال ليه اني خلاص وافقت نبدأ ترتيبات العرس لانو طول الفتره الفاتت انا بأجل في الموضوع دا وشكلو اتخيل اني غيرت رأيي يا ربي بكون بالو رايق علشان كده معقوله همام كان مبسوط بتأجيلي للعرس? يا رب الطف بي وهون علي
همام خلاص سمر وافقت على العرس اخيرا وبعد دا حنكون ناس عرس وبيتنا حيتملي فرح وحيكون عندنا مناسبه احم احم انا اخو العريس والعروس طبعا يعني طرف محايد ولي نصيب من جنتين
همام بقى بعاين ليه وما ردا ابتسم ابتسامه باهته وسكت بعد مسافه لمن لقاني بعاين ليه بستياء كده وبصراحه ما قدرت اخفي ملامح الاستياء والخوف الظهرت علي من رده فعلو قام قال اخيرا يا سمر راجين الموافقه دي من تلاته شهور عذبتي الناس ديل معاك ابتسمت ليه وسكت الرد كان مغتضب ظاهر فيه الاصطناع بدل على انو هو ما كان راجي موافقتي اهلو هم الراجين وانا عذبتهم بتأخيري دا
عن اذنكم انا طالعه برا لناس خالي اقعد معاهم
طيب يا سموره وانا لاحقك بعد شويه
طيب يا قصي
طلعت وانا ببلع في ريقي بالعافيه علشان انزل القصه الفي حلقي وعلشان دموعي ما تنزل اتوجعت رغم اني عارفه انو طريقي ما ساهل من البدايه بس من اول حاجه قلبي نزف دم رغم بساطه الموضوع انا اصلا من زمان عارفه انو ما مهتم لامري ولاني اكون مرتو بس علشان اولادو وافق وقلت الحاجه دي حتتغير لما اكون معاه بس هسي ليه عايزه انو من البدايه يكون مبسوط فوقي يا سمر واستهدي كدي وخليها على الله واكيد مع الايام كل شي بتصلح ما تمشي ورا قلبي وفكري بعقلك علشان تفرحي قلبك في اخر المطاف
