اثناء ما احنا قاعدين سمعنا صوت رساله واتس وتقريبا نحنا الاتنين بنفكر في نفس الشي لين حترسل متين واذا الرساله دي منها او لا
ساجد بلهفه ما طبيعيه فتح التلفون وعاين للرساله
ما مصدق ما مصدق قالت لي ساجد انا بحبك ما تخليني ابعد عنك تاني سمر لين قالت كده خدي شوفيها انا ما بحلم صاح
اهدى اهدى الحمد لله ياااخ
ارد اقول شنو اقول ليها انا بموت فيك اقول ليها انا كنت زي الميت من دونك
فجأه اتغيرت نبره صوتو
ولا اقول ليها عملتي كده ليه سبتيني ليه وهسي رجعتي ليه اعمل شنو ارد بشنو
ساجد اهدى قول ليها على مشاعرك بس ما تبالغ وتديها كل حقيقه مشاعرك مع اعترافك خلي عندك استفهامات كل الحابب تعرفو قولو بس بلطف وصدقني حتحاوبك
طيب طيب انا اصلا ما نفسي اذي مشاعرها او اجرحها بكلامي
طيب اكتب الانت حاسيه ورد عليها
انتي عارفه قدر ايه انا بحبك صاح ؟ وانو مستحيل في يوم الحب دا يقل وما انا البتخلى عن حب حياتي في يوم الا انتي التكوني عايزه كده يا لين انا مستعد اكون معاك وما اسيبك عمري كلو بس وضحي لي اسبابك الخلتك تعملي فيني كده شنو وهسي رجعتي لي لشنو
عارفه انك بتحبني قدر الدنيا كلها واكتر باضعاف واضعاف وعارفه انك مستحيل في يوم تتخلى عني ودا احساسي وقلبي بقولو كده بس انت هسي بحبيبتك واللي بتعرف من قبل ما تعرفني ولا دا شنو الخاصل دا يا ساجد طمن قلبي المشتاق ليك الما قادر يصدق انو قلبك بنبض لغيرو
فعلا عمرو قلبي ما نبض لحد في الدنيا غيرك واللي انتي شفتيها معاي بس صحبتي وما اكتر وحبت توعيك للفي قلبك علشان كده جات معاي ومثلت التمثيليه دي
قلبي وجعني انا عارفه اني بحبك واني كنت انانيه بس كان لي اسبابي عمر كان عيان وحسام كان اولى واحد يتولى علاجو وكنت مجبوره اكون معاه علشان اعالج عمر ولمن فاض بي اعترفت لحسام بكل شي اني ما بقدر ابعد عنك واني ما حاقدر اسعدو وحاكون جسد بلا روح لانو روحي معاك انت وهو قدر واتكفل انو يمكل علاج عمر للاخر اصلا فضل اخر شهر في العلاج
ليه ما قلتي لي كنت عملت المستحيل علشان اعالجو ليه خليتيني اسيئ الظن فيك ليه شلتي الوجع براك يا لين انا كان ممكن اعمل المستحيل علشان اساعد عمر ليه خليتيني اتحمل كل الفتره دي وانا بعيد عنك وفي اليوم بموت ميه موته
وانا كمان كنت بموت مليون موته حتى لمن اكون مع حسام بحب انك تكوني جنبي رغم اني عارفه انك موجوع بس بحس بالامان وانا معاك بحس اني بطفي نار الشوق وانا بشوفك قدام عيوني ساجد ما تسيبني انا بالجد بموت من غيرك
وانا مستحيل ابعد عنك تاني يا روح ساجد
انا عايزه اشوفك انت وين خلينا نتلاقى
انا في شارع النيل مع سمر
شنو ؟؟ وليه ان شاء الله
اااه انا من الغيوره دي يا ناس حيرتي قلبي معاك وجننتيني بحبك ياخ ماف شي بس هي مكتئبه شويه وانا كمان مكتئب علشان كده جينا قعدنا هنا علشان نحكي همومنا للنيل
ايوه غيوره مش دا من حقي
المهم انا حاجي خليكم في مكانكم
طيب منتظرك يا روح الروح الرجعت لي روحي من تاني
ساجد كان مبسوط وطاير من الفرحه حسيت انو الارض بالجد ما سايعه فرحتو دي وانو لو عليه يطير ويحلق في السماء من السعاده وانا كمان انبسطت لمن شفتو مبسوط قعدنا زي نص ساعه كده جات بشعرها المعمول كيرلي كانت نقيه وجميله وباين على عيونها الحب لما شافت ساجد قدامها ابتسمت ملئ فمها جات علينا بلهفه سلمت وقعدت جنب ساجد شبكت اصابعها مع اصابعو وبقت بتعاين ليه ما قالت ولا كلمه
يا جماعه انا استئذنكم بعد دا
لا خليك يا سمر خليك معانا انا حابه اشكرك على اللي عملتيه انا بسببك رجعت لساجد ورجعت للدنيا والحياه من تاني
لا على شنو العفوو بالجد ساجد بحبك جدا وشكلك بتحبيه برضو وانتو الاتنين تستاهلو كل خير وربنا يسعدكم ويفرحكم دايما يا رب يلا يا جماعه بالجد انا اتأخرت وماما اتصلت علي مرتين ما رديت مفروض امشي
طيب خلينا نوصلك
لا يا ساجد خليكم انا بطلب ترحال
لا ياخ ترحال شنو نحنا حنقوم نوصلك ودا اقلا واجب صاح يا ساجد
صاح يا لين ساجد صاح
طييب مدام مصرين مع انو كان نفسي تقعدو مع بعض لانكم طولتو
لا عادي حنوصلك
وصلوني البيت الساعه كانت 10 ونص لما نزلت من العربيه شفت همام وربا طالعين من البيت واااه من همام ومن وجع القلب المسكني بقيت مبحلقه فيه وعيوني ما قادره اشيلها منو ساجد انتبه اني واقفه ومتنحه نزل هو ولين الاتنين علشان يودعوني ويتأكدو اني دخلت البيت بسلام وكده ساجد لقى عيوني مثبته على همام عاين لي وليه ولي ربا مسافه
همام صاح ؟
ايوه
مين همام فهموني حاجه
قصه طويله يا لين ما وقتها هسي
سمر ادخلي البيت وما تفكري في حاجه وحاولي ارتاحي
هنا همام انتبه لينا ولما شافني نبه ربا وجو علينا الاتنين انا حسيت اني اتجمدت في مكاني
اهدي يا سمر اهدي
وصلنا لابسه جلابيه ووشو منور وبصوتو الرجولي والبحه الظاهره نطق
ازيكم ي شباب اتفضلو جووه سمر كيفك
تمام حمد لله على السلامه قبيل ما لاقيتك
اي قالو لي جيتي وساعدتي الحاجه في ترتيب البيت كلو تسلمي يا بت العمه ما قصرتي
الله يسلمك
فضلي الشباب ديل جوه
لالا والله احنا مستعجلين غرصه سعيده ومؤه تانيه مبروك ليكم وربنا يسعدكم وبيت مال وعيال
تسلم يا حبوب انا لاقيتك قبل كده ؟ حاسس انك ما غريب عني
ايوه جيت عرسك مع سمر وباركت ليك
ايواااا اتذكرت فعلا تسلم مره تانيه يا حبوب
الله يسلمك ياخ يلا بعد اذنكم يا جماعه اتأخرنا احنا يلا يا سمر ادهلي وزي ما قلت ليك ما تفكري وكل شي حيكون تمام ولمن اصل البيت برسل او بتصل عليك لو كنتي صاحيه واحسن تنومي
ان شاء الله يلا يا لين مع السلامه
الله يسلمك باي ونتلاقى تاني ان شاء الله
ان شاء الله
كل الفتره دي ربا ما قالت ولا كلمه بس سلمت وسكتت مشو وهم مشو وانا دخلت وكالعاده غلبني النوم ما قدرت اشيل صوره همام من راسي مسكت ربا ليدو والحنه والرسم على ايديها ابتسامتو العريضه وهو بعاين ليها فضلت اتذكر واتذكر لحدي ما غلبني النعاس ونمت
