بعد ما قريت كلام همام حسيت بفرحه شديده باقي اليوم كلو وانا بغني ومبسوطه وطلعت الاولاد مشينا بيت ناس حبوبتهم وبقينا نتونس انا وسهى وحكيت ليها وطبعا انبسطتت شديد 💜 لحدي المغرب واحنا هناك رجعنا انا وامي بيتنا وبقيت مستنيه الاسبوع دا يمر بفارغ الصبر علشان حبيبي يرجع لي ايوه حبيبي اخيرا حلمي اتحقق حلم السنين انو همام يكون حبيبي اتخيلو انو راجلك ما يكون بحبك ورغم حبك ما تقدري تعبري عنو بس حاليا زمن الوجع خلاااص انتهى اخيرا حنكون مع بعض وحنعيش بسعاده الحمد لله ي رب الحمد لله 💙
همام صحى من النوم صلى ورقد شال تلفونو فتح الاشعارات لقى تعليقي انبسط شديد وحسى انو انا بحبو وانو مشاعري الزمان اتجاهو لسه موجوده بعد فتره حسى انو يمكن انا فاهمه انو هو في وحده في حياتو وحسب ما انا حاسبه نفسي صحبتو وكده حبيت اديه طاقه ايجابيه واشجعو علشان يخطي الخطوه الجايه ويمكن انا لسه بحب الزول داك ومتمنيه انو هو يلقى وحده تحبو ويعيش حياتو بسعاده معاها حسى بإحباط بقى ما عارف يعمل شنو حسى انو تفكيرو عاجز في النهايه قرر انو يتكلم مع قصي لانو قصي قريب مني واحتمال كبير اكون وريتو عن حياتي الخاصه
اتصل عليه وحكى ليه كل شي عن مشاعرو اتجاهي قصي بينو وبين نفسو انبسط شديد وانبسط انو اخيرا الشخص الانا بحبو حيكون معاي بس ما حبا انو يحكي ليه عن مشاعري اتجاهو قال احسن يختبرها براهو ويحس بمشاعري اتجاهو براهو من نفسو
مرا الاسبوع بسرعه سبحان الله ولا يمكن انا علشان مبسوطه وطول اليوم بكون مبسوطه ما حسيت بيه ما عارفه غايتو لكن بالجد كل ما تقرب جيه همام بحس اليوم اجمل واجمل وخلاص بكره همام جايي
ما بنكر اني قاعده اتحنن عادي لانو امي وخالتي بصرو علي دايما انو اتحنن واتدخن وكده لكن المره دي براااي مشيت الكوافير ظبطت شعري ورسمت كمان وشلت جسمي ونضفت وشي وحواجبي انفعلت شديد وسهى مشجعاني كمان مشت معاي وهي زاتها رسمت وظبطت وشها رجعنا البيت بالليل وقعد في غرفتنا طبعا سرحت وبقيت بتخيل كيف همام حيعترف لي بحبو وكيف حنكون مبسوطين واحنا مع بعض حسيت اني مبسوطه شديد ووسعت خيالي شديد لدرجه اني اتخيلت ادق التفاصيل ميه مره وبميه طريقه مختلفه حتى الحوارات لحدي الساعه 2 صباحا انا صاحيه بعدها صليت ركعتين ودعيت ربنا يهون علي ويفرح قلبي ويكمل علي فرحتي وهمتم يجيني سالم ونكون مبسوطين بعدها مشيت نمت صحيت الصباح بدري لانو همام الساعه 11 صباحا حيكون في البيت قمت جهزت الفطور خلصت الساعه9 صباحا قمت حممت الاولاد ولبستهم وسرحت لوجن ناس خالتو وسهى وقصي واحمد ومرتو واولادو جو وامي اصلا كانت قاعده دخلت استحميت وسرحت شعري لبست لي توب ظريف وطبعا لابسه فستان حلاااتو وما طويل نص رجولي براا والرسمه في رجولي تسوي كده كنت مبسوطه شديد وحابه انو لمن يشوفني يكون مبسوط بشوفتي
انا وسهى جهزنا عصير لهمام وللكل طبعا بعد 10 دقايق همام وصل ومع رنه الجرس الدلوكه اشتغلت في قلبي كأني راجيه مولود واداني انذار انو حينزل زي المره لمن تحس بطلق الولاده الاخير شفتو ضربه القلب القويه البتجيها بس نفس القلبي قاعد يضربها هسي بقيت بتبسم زي الهبله وما قدرت اطلع من المطبخ رغم اني سامعه اصواتهم وهم بسلمو عليه كانت حالتي صعبه ما قدرت اقعد ولا اقيف ولا اطبع برا حسيت نفسي خجلانه شديد خصوصا بعد منشورو وبعد تعليقي بقيت حاسه اني عايشه حاله من المراهقه متوتره ومبسوطه وخجلانه وكلو علي
همام بعد سلم عليهم وقعد سأل مني
انتو سمر وين
قصي عاين ليه وغمز
يا سموره تعالي سلمي على راجلك دا
طبعا لما سمعت اسمي تلجت عديل اطلع ما اطلع اقعد ابكي اعمل شنو استغفرت واتشهدت وطلعت بقيت ماشه وكل شي فيني منزله مويه وبرجف عديل مديت ليه ايدي
حمد لله على السلامه
الله يسلمك كيفك
تمام انت كيف
في احسن حال وابتسم لي مع الجمله دي وانا خلاااص قربت اقع الفيني كملت دنقرت ووشي حمر عديل من الخجل
اقعدي ياسمر جنب همام
لا انا انا هناي العصير قصدي دايره اجيب ليه مويه وعصير انا لكن
اقعدي انا بجيبهم
لا يا سهى خليك قاعده انا بجيبهم
يا بت اقعدي قلت ليك مش عملتي العصير انتي انا بجيبو اقعدي اقعد
قعدت جنبو وطبعا ما قادره افتح خشمي بكلمه وحده
جابت ليه العصير شرب وعاين لي
تسلم ايديك
ما قدرت اقول شي ابتسمت ودنقرت بالجد الخجل كان باين فيني شديد
همام ابتسم وفي سرو حسى انو انا متغيره لكن غلبو يفسر التغيير دا وقال احسن اصبر لمن اتأكد عديل من حبها حتى افرح
قعدنا نتونس وبعد شويه قمنا انا وسهى نخت الفطور وطبعا طلعت التوب في المطبخ وبقيت بالفستان وهو صغنوني اول مره البسو من حاجات الشنطه الانا ما لبستهم اثناء ما بنجهز في الفطور همام جاء داخل طبعا انا صبت فيني مطره وما قدرت اقول شي بقيت منزله راسي بس فتح التلاجه شرب مويه وسهى طلعت برا مشت تجيب حاجه ما عارفه شنو وخلتنا برانا
همام جاء ماشي علي وانا خلاص هبطت
اها الفطور شنو
يعني حاجات عاديه كده
لمن قلت الجمله دي كان وصلني خلاص
عاين لي مسافه
حلوه الرسمه وحلو الفستان حلو شديد عليك ان شاء الله تكوني اتحصنتي
شكرا ليك ما محتاجه تحصين عادي يعني
لا محتاجه انا قلت ليك اصبري انا حأحصنك ما ناقص يسحروك لي لينا اقصد علشان ما حنلقى زول يهتم بينا تاني
قرب مني وخت ايدو على راسي وابتدأ يتمتم بأيات ياسين وانا في اللحظات دي حرفيا كنت دايبه يا جماعه عن كميه الراحه والسعاده والنشوه اللي انا حاسه بيها انو همام جنبي لا وكمان بحصن فيني ما اتوقعت نصل المرحله دي في يوم
طلع برا ختيت باقي الحاجات وناديت قصي يشيل الفطور شالو ومشو فطرو سوا هم الاربعه ونحنا فطرنا سوا وقعدنا كلنا سوا للشاي وبقينا نتونس مشو الصلاه وجو عملنا القهوه وبقينا نتونس ولعبو كتشينه وضمنه لحدي العصر صلو وختينا الغداء وبعد الغداء كلهم مشو بقينا قاعدين انا وهمام بعد وصلناهم الباب دخلنا جينا قعدنا في الهول افتكرت انو خلاص حنتونس على راحتنا وحيعترف لي بمشاعرو بس ما قال اي شي ولا حتى اتونس معاي مسك تلفونو وبقى يطبظ فيه مسافه نص ساعه كامله ما قال شي في البدايه قلت يمكن متوتر اصبر شويه بس بعد النص ساعه فقدت الامل ليه ما اتكلم معاي وليه مركز مع التلفون كده الاولتد كانو قاعدين في الارض بلعبو وانا قاعده بعاين ليه مستنياه يفتح خشمو معاي بس خالص ما اتكلم معاي حيرني قلت اكسر الحاجز ابدأ الحوار بأي طريقه وهو اكيد حيتشجع
همام !
ايوه
كيف كانت سفرتك ؟
تمام والله حلوه شديد انبسطت بيها
كويس طيب
......
دا مالو حتى ما سأل مني بس رد علي اجي يا جماعه مالو همام دا مره يحسسني انو مشتاق لي وملهوف علي ومره يحسسني انو ما معبرني حتى في شنو راسي جاط بالجد
قعدت مسافه برضو ما قال شي
انا ماشه الغرفه ارتاح شويه لو احتجت شي ناديني
تمام
اتغظت شديد انو ما قال شي بس قلت يمكن يكون ما شايف انو دا الوقت المناسب لكن انا كنت شايفه انو انسب وقت وكنت ملهوفه انو يتكلم معاي لكن خيب املي
مشيت رقدت في سريري مسافه ما ناداني وما جاب خبري صليت العشاء وبقيت راقده وبس سرحانه لحدي 10 همام ما قال لي شي ولا حتى ناداني مع اني طلعت مرتين شفت الاولاد اخر مره لقيتو مقعدهم جنبو في الكنبه الكبيره وبلعب فيهم رجعت وحتى لمن اجي ما بقول لي اقعدي
الباب دق دقتين وفتح كان همام شايل وجن ختاها في سريرها وطلع جاب يزن وجاء ختاه في سريرو برضو وهو طالع قال لي تصبحي على خير رديت بأخر طاقه ونفس عندي وانت من اهل الخير طلع
لحدي 12 انا ما قدرت انوم قلت اطلع الهول احضر فيلم اصلا همام حيكون في غرفتو ويمكن نام لمن طلعت اتفاجئ بهمام قاعد وماسك تلفونو ويطبظ فيه وفاتح التلفزيون ومندمج مع التلفون عاينت ليه مسافه حتى ما حس بوجودي اتضايقت شديد انو مندمج كده في التلفون اتمنيت اعرف هو مشغول بشنو ومع منو للدرجه دي حسيت اني مخنوقه تاني احسنت الظن قلت يمكن بتكلم مع صحبو او اي شي رجعت الغرفه بدون ما اشعر بكيت
يعني الرسم والشعر والفستان وكل شي ضاع ساي حتى ما اشتغل بي والحسيتو منو قبيل دا كان تمثيل قدام اهلو يعني انا بالجد ما فاهمه شي بكيت مسافه وبعدها نمت طوالي بدون ما احس حتى انا نمت متين ما عارفه
صحيت الصباح عيوني واقعه وحالتي بالبلا وكل فرحتي بتاعت امبارح اتلاشت ولما طلعت برا لقيت همام ريحتو في الارياح ماف استغربت مشى وين
اتسوكت وصليت وقعدت حتى الشاي ما قدرت اشربو الزمن مشى ولحدي الظهر همام ما جاء وبتصل ما برد ما قدرت افطر وما قدرت اعمل اي شي بدون ما هو يجي
جاء داخل بعد الصلاه لابس بنطلون ومعاه تيشيرت اسود رهيب مبين اصغر من عمرو ب 5 سنين
اتكلمت معاه بلهجه حاده وباين عليها الزعل ما قدرت امسك نفسي
كنت وين انت صحيت بدري لقيتك ماف
رد لي بكل برود الدنيا
طلعت مشوار في شنو يعني عايزه حاجه انتي مثلا
رديت وانا الدنيا مضلمه في وشي وخلاص حابكي
لا سلامتك ماف شي عايزاها بس افتكرت من حقي اسأل منك ما اكتر معليش
قمت دخلت الغرفه وقفلتها بسرعه علشان ما يشوف دموعي
ما جاء وراي وما اشتغل بي قعد في الهول وبقى يطبظ في تلفونو ما طلعت من الغرفه غير العصر بعد كملت بكاء الدنيا والعالمين طلعت وانا عيوني منفخه عاين لي مسافه
كويسه انت؟ مالك عيانه ولا شنو نمشي الدكتور ؟
لا شكرا كويسه انا
ايوا كويس
مشيت اتوضيت صليت وجيت
انا جعان الغداء جاهز
لا ما عملت شي للان حاعمل هسي
طيب بس سريع لاني جعان
طيب
مشيت عملت اكل خفيف جيت ختيت ليه الاكل وما قعدت معاه
اقعدي اكلي
ما جعانه فطرت متأخر
طيب
دخلت الغرفه وانا دايره انفقع عديل من الزعل
اكل وبعدها دخل المطبخ عاين للحوض ما لقى عده وسخانه يعني عرف اني ما اكلت رجع قعد في التلفزيون ومسك تلفونو
تاني ما طلعت من الغرفه لحدي المغرب صليت وعملت ليه الشاي وقلت ما دايره وبرضو ما اشتغل بي قال لي لمن تجوعي اكلي ما تنومي جعانه وعمل رايح
بعد العشاء طلعت علشان اصلي دايره امشي اتوضى همام عاين لي ومسك تلفونو مشيت اتوضيت وجيت اسمعو بتكلم في التلفون
لا هو انتي في زول بمل منك ياخ انتي احلى شخصيه قابلتني
..........
معقوله بس ياخ طلعتنا القبيل مع بعض دي احلى طلعه
........
وقفت وبقيت مصدومه وطبعا بسمع في باقي الحديث
وانا كمان اشتقت ليك شديد
......
اكيد عايز الاقيك تاني هو انتي بنشبع منك
