في الحلم ( روايات ليبية )

حلقة 2

حلقة 2
-
بعد مأساة اول يوم الجامعة مرو اسبوعين ما نقيمش في راسي من الارض لانهم حيفتحو فمهم زي العادة ويقولو أهيا أهيا " اللقيطة " حينادوني بالاسم الي اني ما اخترتاش لروحي شفت الشفقة في عيون ناس وشفت الهزوة في عيون البعض اني مانبيش لا شفقة ولا هزوة نبي حد يعاملني عادي ما يشوفليش بنظرة تجرح نبي حد يصاحبني يحبني لنفسي مش لاهلي ولا ناسي اني تعبت تعبت هلبااا من كلام الناس ومن دوتهم ومن نظرتهم ليا تعبت هلبا هلبااا عارفة الحياة مش واقفة عليهم لكن الكلام الرزين ما ينتساش ابداً خاصة الكلام هذا مرو الاسبوعين ومشت الحياة هي هي ناس ما تعذرش وناس تجرح وهكذا بس اليوم نضت بتفاؤل الصبح نضت نتفائل بالحاجات الحلوة نضت قبل وقت غسلت وجهي وسنوني وتوضيت وصليت وقعدت ندعي انه يمشي اليوم بس حلو كانت محاضرتي متأخرة شوية فقعدت فطرت في الميتم ولبست سروال اسود وبوتيل اسود وسورية سودة للركبة وكبوطي طويل اسود ودرت شعري كودة ودرت روج متاعي البودري بناتي ودرت ع خدودي شوية هههههه المهم خديت شنطتي وطلعت ومشيت ركبت الباص ووصلت للجامعة ومزال ع المحاضرة ساعة غير شوية فخشيت للكافتيريا كانت نوعاً ما زحمة خشيت طلبت نسكافيه وقعمزت طلعت مذكرتي وقعدت نراجع في محاضرة الي قبل هادي بلكي الاستاذ يسأل بش نوض انجاوبه وكنت مقعمزة عادي لين شرين تليفوني كانت طاسة النسكافيه سخونة هلبا قاعدة و جنبها المذكرة وع اساس تلفتت بنرد ع تليفوني تجي وحدة تحدف شنطتها بش تبزع النسكافيه اني لوهلة شفت للمذكرة ما حسيتش بألم رجليا حسيت بالمذكرة كاتبة هلبا اني الي قاله الدكتور كله ضاع بكل وقاحة ردت
البنت بضحكة مستفزة : اووويي سوري ههههه
اني نزلت من عيني دمعتي بس حاولت نحبسها ما قدرتش شوية شوية بدت نحس برجليا يتخدرو نحط يدي ع رجلي نلقا النسكافي حرقني نضت نبكي في مكاني وبدت الحرارة تزيد ولانها بتنتفخ خلاص رجليا علاش هكي تليفوني كمل شحنه مشيت للعامل
اني وعيوني معبية دموع : ممكن تعطيني تليفونك تليفوني كمل شحنه
العامل : شن تحسابيه محل اتصالات مالا ؟ بري غادي بنتي
وقعد يلوح بيده قعدت نشوفله وعيوني معبيات دموع ونوخر قمت حاجاتي ومذكرتي الي مبزعة عليها نسكافيه وطلعت برا قعدت نمشي بالشوية ورجليا يحرقو فيا لدرجة لا توصف مش عارفة من من بنستنجد اني كلهم يشوفولي ويضحكو اصلا لعند وصلت للحمام وطحت ع الارض نبكي بصوتي وخلاص دموعي نزلت خشو بنتين عليا جو يواسو فيا ويطبطبو عليا
أية وايمان 🖤
أية : تي علاش تعدلي عليهم هما هكي ناس حقيرة صايرلهم النقص يبوك تبكي مفروض تخليك عادي بش ينقهرو ويطربقو
ايمان : ايه والله كلاب هادو راه ما تعدليش عليهم متاعين مظاهر هيا نوضي اغسلي وجهك وامسحي دموعك ياسر هي
اني وعبرتي خانقتني :حبيبتي بارك الله فيك زي ما هونتي عليا ربي يهون عليك
وكيف جاية بنوض تألمت هلبا في رجليا ولكن تحملت ونضت وقفت غسلت وجهي واعطوني تليفونهم كلمت مربيتي جت وخدتني مشينا للمستشفى خشينا ع الحروق
الدكتور :الحمدلله انه الحرق ما جاهاش في اماكن حساسة رغم انه الحرق من الدرجة التانية لكن حنكتبلها مرهم وتداوم عليه ولما خلاص يبدا يلتم تعاود تجيني بش نشوفو النتيجة
المربية سالمة : تمام بارك الله فيك دكتور
طلعنا اني ومربيتي ومشينا للميتم جت ماما سالمة دارتلي المرهم ولفت عليه ودارتلي حاجة ناكلها ورقدت
-
خشيت في حلم،  حلم حلو هلبا كان فيه ناس دارولي مفاجأة وفرحت هلبا ورقدت بعمق بش ما يكملش الحلم ولكن للاسف رنت الصفارة ونضت وقت العشي رنة الصفارة مزعجة هلبا اني قعدت راقدة في مكاني نراجي فيها تنطفي بش نرقد وفعلا انطفت ورقدت وخشيت في حلم تاني حلم مزعج ويخوف نضت نص الليل منه نعيط وبعرقي ناضو البنات الي معاي نخلعو كانت وحدة اكبر مني وزوز اصغر مني الي اكبر مني جت تجري لسريري تواسي فيا وجت بتنحي شعري من ع وجهي مست راسي لقتني سخونة هلباااا وايديا مصقعات ايه مرضت مع الاسف الشديد رجعتني ع سريري وغطتني ومشت جابت كمّادة ومية مصقعة وقعدت اديرلي فيها واني نتأوه من البرودة متاع المية وقعدت ساهرة ع راسي للصبح لين جت ماما سالمة لقتني راقدة وع راسي كمادة ولقتها مقعمزة جنبي ع الكرسي وخداها النوم وهي مقعمزة جت مستني لقت حرارتي عالية ونوضتها ترقد ع سريرها وداومت هي ع راسي وجابتلي دواء وهكي وقعدت جنبي واني راقدة
بعد شوية جت مربية تانية قعمزت جنبها ويهدرزو نسمع فيهم
المربية امال : والله حرام هالبنية تلوحها امها شن ذنبها بالله تتلوح يمينه ويساره ومرة تمرض ومرة حقد الناس يجي عليها
المربية سالمة : بالله اني لما جابتهالي امها تقولي بالله عليكم ردو بالكم عليها شوفي البنت من وراك قاعدة تمرض وتتلوح اهني واهني
المربية امال : والله الا حقراء هالناس والمجتمع احقر منهم بالله المسكينة هادي مفروض الكل يحبها بنية بلا اهل مقطوعة من شجرة تتعامل هكي والله قلبي يوجع فيا عليهم لو جو بناتي والله كان بالحرام ما نسيبهمش لحد نموت عادي لكن ما نعطيهمش لحد
المربية سالمة : شن تقولي اني نفرح لما ينادو فيا ماما ونبيهم هكي ينادو لانهم مالقوش من يعطيهم اهتمام ولما ينادو هكي لاني عاطيتهم اهتمام رغم تقصيري
المربية امال : والله ما عندي ما نقول غير ربي يجازينا خير ما نديرو ربي يكتبهولنا اجر عنده ان شاء الله يارب 🖤....يتبع