في الحلم ( روايات ليبية )

حلقة 12 ( النهاية ) 🔥

حلقة 12 و النهاية
-
اية : لا هادي بالذات مسكينة بتتزوجك
محمد : ندوي معاك جديات
اية : والله البنت ما عندهاش علاقة بحد وفي حالها
محمد : باهي اسأليها لو نخطبك لمحمد شن رايك
اية : اوباا ع الكبرياء
محمد : ماتبيش ؟ الحق فيا الي بنتزوج صاحبتك بش نسكنها معاك هي تشاو
اية : سكر وراك الباب
محمد فتحه ع وسعه عناد ومشي
فتحت اية تليفونها وبعتت لقروبنا ع الفايبر "يا بنات خلونا نتلاقو غدواا بعد الجامعة نتغدو مع بعض"
-
تم اليوم وجي اليوم التاني واتفقنا ع مكان مع بعض ونتلاقو
-
بعد تمت الجامعة خديتهم اني وطلعنا كنا اني وايمان واية واسماء ومشينا تغدينا وكذا وبدينا نهدرزو وما سكتناش بكل بدينا صاحبات بشكل متماسك ما نتفارقوش وعندنا صاحبات في الجامعة بس احني الصاحبات وقت »الكسرة« واقترحت اية ع اسماء واسماء قالتلها عادي لكن شرط يكون هوا يبيني مش انتو تخطبوني وهوا تحت الامر الواقع ومشت اليوم جميل شرينا حاجات وضهورنا ووصلتهم لحياشهم وروحنا اني واسماء روحت اية حكت لخوها ومن خوها قالت لامها وطبعا فرحت هلبا وقالتلها انهم بيجو يوم الكذا خطب محمد اسماء واية خطبها احمد صاحب عبدالرحمن وكان عرسهم بنفس الوقت تزوجو واهني جي شعار »يا محاسن الصدف« من قال يجي هاليوم الي هيجبد الدم ومن قال انه الدنيا صغيرة للدرجة هادي ومن قال انه القلوب تحن ومن قال انه العيون حتتعرف ع بعضها نازلة اسماء من شقتها لقت اية وعريسها أي خوها .... كان يضحك وسكت فجأة ملامح مألوفة بالاصح متشابهة لشخص يعرفه هلبا نفس الشكل نفس العيون نفس الخشم والفم نفس لون العيون الخضر نفسه نفسه اية عرفاته بأسماء وأسماء حاسة فيه حاجة غلط في الموضوع قالتله بإستغراب بعد ما دقق فيها لين خافت
اسماء : تعرفني ؟
اية بإستغراب : كيف يعني
احمد : من انتي ؟
محمد : مرتي !
احمد : نقصد عيلة منو
اسماء نزلت راسها وناضت من مكانها وكانت ماشية بتركب وقفها صوت احمد
احمد : ما تفهمينيش غلط بس هلبا هلبا يعني يشبه اربعين لكن انتي هلبا
تلفتت اسماء : شن قصدك
طلع تليفونه وفتح صورة : شوفي هذا خوي
اسماء : وباهي
احمد : تي تقولي خوي مداير روحه بنت
اسماء ضربها الشك : عادي يخلق من الشبه
احمد : هلبا والله عادي تمشي معاي ؟ تفلت لمحمد نبي نرفعها لامي
اسماء بإستغراب : مانبيش نعرف
احمد : شن قصدك
اسماء : لو كانت امك امي مانبيش نعرفها ومانبيش نتعرف عليها
الكل يشوف لاسماء بصدمة
احمد : وعلاش
اسماء : مدامها كتبت في ملفي غير مرغوب بيها حتى اني مش راغبة شوفتها
احمد : جربي !
اسماء : اني كنت عشرين سنة عايشة بيه الجرح هذا ماباش يبرا نهائي وكأنها لعنة تجري في جرتي ولما نخطبت لمحمد فجأة اختفي الجرح وكأنه ما كانش موجود لقيت خوات ولقيت خوت في حوش راجلي لقيت أم عطتني حب نتمنى في ربعه حياتي كلها لقيت عيلة ما شافتش لعيوبي نهائي واستقبلتني برحابة صدر اما توا مش حنمشي للام الي بدلتني بالدنيا الفانية ونطلب منها تحبني غصبا عنها وانت تعرف كل شي بالسيف الا حبني يا بنادم بالعكس اني لولاها ما كنتش حنتعرف ع نادين ولا كانت ام نادين حتاخدني وتحطني مكانة بنتها او حتى انها تفرح بيا وديرلي عرس حلمت بيه حياتي واني متأكدة مش حنديره حققتلي حلمي وقفت معاي وما كنتش حنتعرف ع اية ولا كنت حنتزوج محمد ولا كنت عرفت العيلة الي اختارتني ليا اني مش ع خاطر حد تاني بالعكس اني اليوم حابة اني نكون يتيمة أكثر من أني نكون معاكم
احمد : بس امنا مريضة طريحة فراش
اسماء : ان شاء الله لاباس عليها واكيد انتو كولاد توكلو فيها وتشربو وتغسلولها ودوشو فيها اكيد نفعتوها اليوم غر ما تخلوهاش تندم ع ساعتها بس
احمد : هي تبكي ديما لكن ما حدش يعرف علاش بس اني عرفت توا
اسماء : مافيش داعي تقوللها انك لقيتني لانك حتقهرها ولسلامة امك ما تجيبلهاش السيرة نهائياً وخليها تشوفني في الحلم بس وانت بالنسبة ليا سلفي فقط نستأذنكم !
-
ما كانتش نتيجتها أحضان أم وبنتها بل كانت لحظات نُسي فيها من أم من البطن ومن أم من الأمومة وحدة تحميك ووحدة تحمي نفسها الأم هي الوطن هي الحضن الحنان الطيبة هي المدرسة هي الصديقة هي الاخت هي ناصحتك هي الي عندها انتي قبل الدنيا كلها هادي هي الأم مش ضروري تكون ام من البطن لكنها من مارست الامومة فينا هي الأم ♥️
-
بغض النظر ع كل الالم وع كل الجروح وع كل طيحة ملجأنا هوا للشخص الي يحبنا لنفسنا لا للي يحبونا لاصلنا او فلوسنا او او او ...
الحياة دروس واكبر درس فيها هوا الصبر، يعني ع قد صبرك تُجازي مهما كنت تعاني مهما كنت متحطم اصبر وإن الله مع الصابرين ، ما تتخدوش من اي بني ادم سند وما عمرك تقول انه فلان صاحبي ومستحيل يرخي سندك ربي بعدها من لحمك ودمك خوتك لانه حتى ولد العم لمصلحته يبيعك !
أعذر كل حد خلي لكل شخص عذر ع غيابه حتى لو ما بررش مافيش انسان مجبور يبرر ع غيابه مافيش انسان لازم تشرحله سبب غيابك ومش ملزوم اصلا مهما كان هذا الشخص قريب مرات المبرر يفتح جروح مرات ومرات ومرات مش لازم نذكرو الناس بجروحهم !
هكي هي الدنيا مرة ليك ومرة عليك ، لما تكون ليك امشي صح بش لما تولي عليك ، تولي عليك صح !
اتركو العتاب وأبدو بإعطاء الاعذار حتى لو مافيش بش الدنيا تضحكلك والناس تحبك أكثر ♥️
-
ما تحكمش ع الناس من مظهرها عاشر صاحب ما ارتحتلاش تجنبه مش لازم من الكلام الي يجرح مش لازم من الحركات الي تقتل هذا واقعنا لا مفر منه لكن نقدرو نغيروه بقدرتنا احني نغيروه بتفكيرنا ما تجرحش حد وتقول صاحبي لا انت بتخليه يكرهك مش يصاحبك اكثر ديما "عامل الناس كما تحب أن تُعامَل" ♥️
-
النهاية
في الحلم من نَسَجِ الخيالِ شهد الطاهر ♥️
Shahid T.Haj ♥️