في الحلم ( روايات ليبية )

حلقة 9

حلقة 9
نضنا الصبح كان اجمل صباح يمر علينا وبالاخص ع اسماء حتى الشعور بأن الي قدامك انعجب فيك وهوا ما انعجبش حلو حلو الشعور هلبا حلو لكن ما كانتش امالها عالية خوفا من انها تطيح ع راسها !
اما عني اني كان صبح جميل لانه ام اية خاصةً قعدت تعزم فينا بين الناس والناس يعرفو ان اني " لقيطة " بس ما همهمش يهدرزو ويضحكو وحسسوني ان اني منهم وفيهم خلوني واثقة من حاجة مش اني الي اخترت الاسم هذا لنفسي وما كانش هامهم ابداً الا وحدة الا وحدة كانت تتبعد من علينا وحدة كانت ما تضحكش وما تهدرزش بس كانت نظراتها عليا اني مستغربة وفي نفس الوقت خفت وتحشمت وكله جي مع بعضه تخلط عليا الشعور كان شعور بكل شي في نفس اللحظة !
جت اية جنبي كيف ناضت من النوم قعمزت جنبي اني تلفتت نهمسلها
اني : اية ردي عليا بالشوية
اية بنفس الهمس : نعم
اني : من هي المرا هاديك الي مقعمزة غادي
اية : هادي ابلة سعاد
اني : لاحظت انها من بكري تشوف فيا وخوفتني الحق
اية : جايبة خمس بنات وزوز ولاد ماتولها كلهم
اني انصدمت : لا حول ولا قوة الا بالله من شنو
اية : كل واحد بحاجة واحد حادث واحد طاح واحد شنو صارله مسكينة ربي يصبرها
اني : ايه والله ربي يصبرها ان شاء الله من دارها لجنتها طول
اية : ان شاء الله
قمنا الفطور وضمينا وكذا وقعمزنا النساوين يهدرزو والبنات كذلك والي ناضو يديرو في الغدي كنت مقعمزة نهدرز ع بنت خالة اية جتني المرا جارتهم سعاد
سعاد : عادي نسألك سؤال
اني برحابة صدر : تفضلي
بنت خالة اية نادو عليها ناضت
سعاد : اكبر بنت ليا نديدتك
اني : الله قداش عمرها ؟
سعاد : م 98
اني : هههههه نديدتي تماما
سعاد : يا محاسن الصدف
اني : قاعدة معاك
سعاد واضح عليها العبرة خانقتها : الله يرحمها
اني : سامحيني ما نعرفش ربي يرحمها ويصبرك
سعاد : بنصبر غصباً عني
اني : علاش غصباً ؟
سعاد : اني درت اثم وموت صغاري الي نجيبه يموت بسبب الاثم هذا
اني : ربي يسامحك ان شاء الله
سعاد وتتأمل في عيوني : مش حيسامحني لين يسامحني شخص تاني
اني : ابلة سعاد لو تحبي تحكيلي احكيلي نسمعلك وبلكي نهون عليك
سعاد نزلت دمعتها : تعالي ديما لاية
اني : علاش تبكي باهي
سعاد : تشبهي لبنتي هلبااا تقول هي مقعمزة قدامي ياريتها ياريتها
اني : ربي يصبرك
سعاد : يارررب
اني : من عايش معاك في الحوش ؟
سعاد : بروحي الحوش ورثة من راجلي توفى ليه سنة الا شوية اهو قاعدة نعاني بروحي
اني : علاش ما تتبنيش باهي يعني بنت تونسك في بيتك
سعاد : كان قبل توا معاش من بتقبل تجي تعاني عزوزة
اني : عادي في هلبا بنات مدابيهم يطلعو من الميتم
سعاد : باهي تجي انتي ؟
اني : اني : عادي نجي نونسك وتونسيني ع الاقل نلقا من وراي !
سعاد ابتسمت : والبنت هادي الي معاك شن اسمها
اني : اسماء
سعاد : خلاص توا نشوف ونجي ناخدكم من الميتم وتونسوني وتونسو بعضكم 🖤
اني فرحت هلبا : جد ؟
سعاد : ايه وعلاش لا نتكفل بيتامة بلكي بنتي تسامحني بعد تعرف اني درت هكي
اني : ان شاء الله تكون مسامحاتك
سعاد : علاش في الميتم انتي
اني : حسب ما اني فهمت حب اعمى بنت وثقت في واحد ورخي بيها
سعاد قلبها قبضها : شن اسمك ؟
اني بإبتسامة : نادين
سعاد وجهها تخطط الوان وقعدت تكح نضت جبتلها مية وجيتها بسم الله بسم الله
سعاد : صحيتي
اني : خيرك شن صارلك ؟
سعاد : لا شي بس هكي
اني : باهي
المربية متاعي لقت باب الجنان مفتوح خشت لباب الحوش وكان مفتوح لكن طقت ونادت
المربية طق طق : السلام عليكم نادين ؟
ام اية : خشي خشي انتي مدام سالمة ؟
المربية : ايه اني
ام اية : تفضلي تفضلي خشي كلهم داخل
المربية : مانبيش نعطل عليكم بالك عندكم حاجة ولا هكي
ام اية : تي غر خشي عندنا ع صبح ربي
المربية خشت ولقتني مقعمزة جنب سعاد وطول شهقت
اني : اسم الله »اسملا« اسم الله خيرك
المربية : نوضي نوضي من جنبها
اني رعشت وبصدمة : خيرك ؟؟؟
المربية : شي شي هيا بنمشو وين اسماء خودو حاجاتكم هيا
ام اية : خيرك قعمزي نهدرزو
سعاد وقفت مع تشهيقة المربية وقعدت تشوفلها وكنت طالعة من المربوعة شدتني من يدي
سعاد : نادين
المربية : اطلقيها لو انتي ام وتحبيها راه ما لوحتيهاش يوم الي ما تعرف شي يوم الي كانت اضعف مخلوق ع وجه الارض راه ما خليتيش اسمها لقيطة بلا اصل ولا فصل حولي غادي
سعاد تعفلقت : ما دخلكش انتي !! اني وبنتي ادرى ببعضنا وهي سامحتني اصلا انتي ما خصكش فينا " اني كنت نشوف ومصدومة وجهي ولا احمر ديما كنت نحساب قلبي ميت لكن لا في اللحظة هاديك قلبي وجعنننييي هلباااا عرفت اني مازلت حية نعيش اني مش في حلم امي كنت نشوف فيها في الحلم بس امي تزوجت وشافت حياتها ودارت حتى صغار بس ما نستنيش كانت تحكي عليا لكن اني ما كنتش مركزة ما عرفتش انها تتكلم عليا وما قدرتش نعرف لاني بعد العمر هذا بديت نشوف فيها في الحلم بس ! تلخبط عليا كل شي اكيد فاهمين عليا شعور تبي تبكي وما تبيش تبي تعاركيها وما تبيش وتعذري فيها وما تعذريش عارفين شعور التلخبط الي يخليك متناقضة الي يولع حرب بين قلبك وعقلك وانتي تقعدي بينهم تستني اي واحد يربح اي واحد تمشي بيه لكن كل الي درته هوا اني وقفت نشوف بس واقفة ما تحركتش ما تكلمتش نشوف بنضرات باردة هلبا البرود ما تحركتليش حتى شعرة واقفة نسمع في القصة ، ....يتبع