في الحلم ( روايات ليبية )

حلقة 7

حلقة 7
-
تلفتت ع جنب لان اية كانت جنبي
اني : وية
اية : نعم
اني : مانبيش نثقل عليك لكن عادي تروحو بينا معاكم لحوشكم المربية متاعنا صارتلها خدمة وقتلي استأذني حتى انك تباتي لانه في احتمال زي هذا!
اية : كلميها قوليلها بنباتتتتووو تواااا الله عالجو وايمان تروح معانا اللللهههه قوليلها بنبات بسرعة 😍😍😭
فرحت لما استقبلتني بالشكل هذا هلبا فرحتنا اني واسماء وبعتت رسالة للمربية بش ما يقعدش بالها عندنا وخشت اخت اية العروسة مع راجلها طالعين يجنننووو والعرس يجنن وعيلتها تجننن ما نعرفش نوصف جوهم وجمالهم واخلاقهم وقلوبهم البيضاء ولا نيتهم الي مافيش اصفى منها امهم كملت الحفلة وروحنا لحوش اية بنباتو عندها وجت معانا ايمان ركبنا في سيارة خو اية الي جابنا 🤤🤣
بس المرة هادي ركبت اية القدام واسماء في النص بيناتنا اني وايمان وكلنا لاحظنا نظراته لاسماء من المراية الا اسماء كانت نعسانة هلبا وتعبانة هلبااا ما نتبهتلاش بكل 😂
المهم روحنا حوش اية كبير هلبا تعرفو حياش الليبيين انتو المهم تلات ادوار هوا الدور الارضي الناس بايته فيه والدور التاني فيه الديار بايتين فيه نساوين بصغارهم من عيلتهم بحكم عيلتهم كبيرة وخواتها كلهم متزوجات وخوتها برضو وقعدت هي وخوها هذا بس المهم ركبنا للدور الثالث فيه تلات ديار صغار وحدة فيها اسرة ديارهم قبل ما يتزوجو خواتها والتانيات الي مخزن والي شنو والباقي فيه صالون وكوجينة وحمام صغار {عفاكم} المهم خوها وزوز من ولاد عمامها يدقدو في الصالون الي فوق عموماً
-
ركبنا فوق بدلنا ولبسنا توت وقعدنا نهدرزو ونضحكو وجونا حلو في مكانه تماماً وقعدت كل وحدة تحكي في مواقف صارولها في حياتها وضحكنا هلبا هلبا ناضت اسماء
اية : لوين ؟
اسماء : حتى الحمام بنستأذن منك ولا كيف ؟
اية : لا طبعا غر خلعت ع النوضة الفجائية هادي
اسماء : استغفرالله العلي العظيم
الحمام الي في الدور الفوقي لازم تخشي الكوجينة بش تخشيله واسماء كانت ماشية اول ما جت خاشة تخبط في محمد وتطيح منه الصونية وتتكسر حتى الي ما يسمعش سمع
اسماء بتشهيق : هيييي حي عليا اسفة اسفة
محمد نزل يقيم في الصونية : عادي حصل خير ما صار شي
اسماء خشت تدور في مكنسة
محمد وهوا يلم في الشظايا الصونية : انتي صاحبة اية الجديدة
اسماء : ايه كيف عرفت ؟
محمد : ماه اني نعرفها ايمان ومرام من صغرهم واصلا هي ديما تحكي لامي ع صاحباتها الجدد وهكي
اسماء وهي تكنس مقرنة حواجبها : اهاااا
محمد : اسمي محمد اني خو اية الي اكبر منها مش الكبير
اسماء : تشرفت اني اسماء
محمد : اذكريلي واحد
اسماء كانت عابسة وجهها لانها كسرت صونية ولما قاللها هكي طول ضحكت : مبردككك
محمد يتمتم : يا نجيلي هالضحكة
اسماء تمتم :  ياربي شحلاته حتى دمه خفيف وطيب زي اخته وامه محلاهم ياربي الي هكي كثر منهم
محمد : ايييه كملنا
اسماء : ايه تبي نديرلك عشي ؟ تعويض يعني
محمد : ايه صح هيا خشي عوضيلي عشاي
اسماء : ههههه باه توا تاكل صوابعك من وراهم
محمد : ترا ورينا طبعا بنقعمز ع الطاولة اهني ونشوف ونحافظ ع سلامة روحي مازال نبيها الحق 😗😂
اسماء : تخلينيش نمشي ونخليك تاكل الهواء
محمد : الله الهواء يتاكل هوا ؟
اسماء : ممكن معش تركز
محمد : باهي شن ندير نسرح ؟
اسماء : يابارد والله انك بارد ما ضحكش راه
محمد : عارفه دمي ثقيل عادي
اسماء : ايه وهلبا رزين مش شوية
محمد : شن قصدك ؟
اسماء : قصدي انه دمك رزين هلبا
محمد : اني ؟
اسماء : لا غولتي
محمد بعبط : اها نحساب
اسماء : شهالثقة ياربي 😂
محمد : عيب عاد 😂😂
جتهم اية بعد ما حسينا بطول غياب اسماء
اية : يا سعد سعيد بسعيدته ان شاء الله سنة مباركة عليكم
وغمزت لاسماء
اسماء وجهها ولا احمر وحاولت ترقع : نشت خوك وكسرت صونية عشاه وقاعدة نعوض يعني
محمد : قتلها مش لازم لكن عناد
اية : ايه ايه صدقتكم توا نخليكم براحتكم
اسماء تخزرطت : راحت شنو ؟
محمد جاته مكالمة استغلها وطلع من الكوجينة تلفتت اية لاسماء
اية: المكالمة الي خربت ما درت شي اني
اسماء : شن تقولي ؟
اية : ما تخافيش والله خوي حنينن هلباا وطيب وحتى انه كلنا ملاحظين انه مهموم ليا زماااان ما سمعتاش يضحك هكي
اسماء : ربي يفرج عليه وانا مالي ؟
اية : بنحط املي فيك توا انتي ترديه خوي متاع زمان
اسماء : شن تقولي
اية : الي تسمعي فيه
اسماء : بلا خرط
اية : علاش ؟
اسماء : اني ما نبيش نتزوج بش لما نتزوج نجيب بنت يلوحهالي في الميتم ع انها عار
اية : ما تعمميش شوفي اهو اني وخواتي عندنا خوت وبو وام مش كل الناس تفكر زي بعضها مش كل الناس بنفس التفكير
اسماء : لكـ...
قاطعتها اية : مافيش لكن انتي تصعبي فيها عليك بس لكن هي مش صعبة مش كل الناس تشبه بعضها انتي مرات حتى خوتك ما يندروش عليك لو تتلاقو تحبو بعض العيب في بوك وامك مش حد تاني
اسماء : ما تحاوليش ما تحاوليش
اية : جربي باهي
محمد وهوا كيف جاي سمع نقاش اية واسماء الحاد جاه فضول يعرف قعد يستمع
اسماء : اية ما تحاوليش اني مش حنتزوج بش يلوح بناتي في الميتم طبعاً لا وبيني وبين خوك مستحيل تصير حاجة هوا خوك وانتي اختي معناها حتى خوي اني
محمد كان يسمع وتحطم نوعاً ما ، شن قصدها بخوي حتى اني البنت هادي خلتني نضحك من قلبي علاش دارت هكي باهي مدام اني خوها...يتبع