في الحلم ( روايات ليبية )

حلقة 11

حلقة 11
-
بعد مرور أيام وأسابيع وشهور وفاتت سنة
-
في هذا الوقت خدت الام سعاد نادين وأسماء من الميتم تكفلت بيهم ورجعت بنتها وجابت مع بنتها بنت تكون ليها أم.
-
في صباح جديد ♥️
-
سعاد : يا بنات الفطور واتي واني طلعت
نادين : تمااام
طلعت سعاد لخدمتها "مُدرسة" ونزلو نادين واسماء فطرو وضمو وبالنسبة لنادين تعلمت السواقة ودارت رخصة ودارتلها امها سيارة وبدت توصل في اسماء لكليتها وبعدها تتجه لكليتها في هذا الوقت تفكر بينها وبين نفسها
»أني خشيت قانون لشي معين فقط والي هوا أمي لكن بما اني لقيت امي ومش محتاجة للقانون أكثر ونخش لحاجة نبيها لحاجة نتمناها مثلا نكون كاتبة! الله محلاها كلمة كاتبة ليها معنى معنوي وحرفي كاتبة نغير في النفوس هلبا نغير تفكير عقلية حتى لو بشي بسيط والله حنغير بما ان أمي مسؤلة عليا خلي نغير مساري الافضل ♥️«
فعلا غيرت مساري ومشيت للادارة وطلبت نقل ومشيت لكلية الفنون وتم التسجيل مزال القبول وبعد يوم شاق ومتعب روحت للحوش لقيت اسماء مروحة وامي قاعدين في المربوعة يتفرجو غيرت حوايجي ونزلت تغديت وبعدها قعمزت معاهم في المربوعة وضبطت امي بالقوة لاني كنت متوقعة نشوفها *في الحلم* بسس وحكيتلهم ع الي درته ودعموني واصريت ع هذا الطريق بنمشي فيه الطريق وربي يكون معاي زي ما ديما هوا معاي (أسعَ يا عبدي وأنَا أسْعى معكَ) ربي معانا في كل وقت سوى ضعف سوى قوى الانسان القوي الي متخد ربي سند ليه لانه السند لما يكون قوي يكون الشخص قوي لان متكي ع سند مايطيحش ولا حتى ينهز لما تكون متوكل ع ربي صعب أنه حد يدبرلك اي مسيئة حتى لو اتحد عليك اهل الارض جميعا وانت توكلت ع ربي يُهلك أهل الارض وتنتصر أنت الي خلقهم يقدر ياخدهم في ثانية فقط توكل ع الله ♥️
-
مرت الايام وبدت علاقة اسماء بـمحمد "خو أية" علاقتها بخو محمد خلاها تحن وبدت تبين طيبة قلبها كأنه ربي امتحنها وتم امتحانها بنجاح الي هوا الصبر
»فعلا الايتام والمساكين الي هما اللقيطين والفقراء امتحان ربي ليهم هوا الصبر ع البلاء كل شخص في الدنيا مبتلي بحاجة سوى فقير او غني الفقير مبتلي بفقره والغني مبتلي بغناه واليتيم مبتلي باليُتم والابن مبتلي بأهل الدنيا إمتحان والبلاء الي نقصده مش بلاء من ناهية انه تكون هم لا البلاء هذا معناه امتحان لكل شخص امتحان وكل يوم نتعرضو لامتحان جديد الصبح امتحان عشية امتحان ليل امتحان هي الدنيا معناها امتحان امتحان ع ايمانك بالله وع صبرك بالبلاء وع تصرفك الصحيح اتجاه البلاء احيانا البلاء نعمة واحيانا نقمة مثلا الاهل نعمة انه يكونو مسلمين ويكونو يخافو ربي وصبورين واحيانا انك تكون يتيم هي الي نعمة يكونو الاهل مش مسلمين وما يخافوش ربي وانت تكون مسلم وتخاف ربي لانك تعلمت الاسلام في الميتم ما شفتش كره الاهل للاسلام فتتبعهم للضلال فيه لهذا احيانا البلاء نعمة واحيانا نقمة«
تعلقت اسماء بمحمد بأسلوبه بشخصيته والاكثر تفكيره ولكن الشعور بالحقد اتجاه جنس ادم ما غابش موجود في قلبها مزال يعني مستعدة للحظة الي حيوخر فيها محمد ومعش يعدل عليها او انه يتجاهلها مستعدة لهاديك اللحظة بالاكثر!!
اما عن محمد "هوا خريج هندسة مدنية ويكبر اسماء بـ9 سنين وامه تبي تخطبله بس هوا يأجل في الموضوع ما يحبش من يتدخل في خصوصياته وديما في حاله صحابه خوته الباقي معارف"
-
في حوش أية
-
أم أية : كلم خوك خلي نزوجوه اني نبي نفرح بيه ونتهنى عليه وع الاقل يسكن فوق حتى يصيرلي حاجة يهنيني ع روحه واخته اية
عبدالرحمن خو أية : انتي تعرفيه ولدك ما يحبش من يفتحله الموضوع هذا شن بنديرله
أم اية : قداش بنقعد هكي ؟ والله ماني مرتاحة الله
عبدالرحمن تلفت للدرج يضبح : اية يا اية
اية وهي نازلة : نعمممم
عبدالرحمن : تعالي نبيك في موضوع
اية : نعمين وخيي الغالي
عبدالرحمن : ينعم عليك وخيتي تعالي قعمزي
جت اية قعمزت جنبه وحست بغرابة وحتى امه استغربت
عبدالرحمن : توا بتخلوني نتكلم ومش حتقصو عليا لين نكمل كلامي وبعدين تكلمو باهي
اية وامها : باهي حاضر
عبدالرحمن : اييه هذا كان سخر ربي فيه واحد متقدملك هوا صاحبي كويس وولد عيلة وخدوم ع نفسه بحوشه هوا قداش ليه يبي يخطب لكن مالقاش الي يبيها هوا بالمواصفات الي تمشي معاه يعني هوا مشترط انه يكمل دينه وتخاف ربي وتصونه وتحترمه مش مواصفاة شكل ولا وزن ولا طول قالوله الجماعة ان عندي اخت وكلمني هوا الفرق بيناتكم 13 سنة لكن كان بتقوليلي اني كيف نفكر عاجبني الراجل وسائل عليه وولد ناس ومحترم رغم اني نعرفه سنين لكن عاودت سألت وتأكدت لككككن مش مغصبك اني ما يعجبكش ولا ما يمشيش معاك قولي طول مانبيش لكن نصيحتي اني اعتبريها كأنها من صاحبتك مش من خوك الكبير شوفيه وتعرفي عليه قبل وبعدين قرري براحتك حتى لو القبيلة كلها وافقت انتي قولي لا بس والله ثم والله ثم والله ما يغصبك عليه حي واني حي تمام توا اعطوني موافقين نقوله يجيب ماليه تتعرفو ولا نقوله لا !
اية تحشمت ونزلت راسها وامها فهمت
ام اية : قوللهم يتفضلو وان شاء الله الي كاتبه ربي يصير
عبدالرحمن : تمام
ع خشة محمد : شن هوا الي تمام
ام اية : هيا وليدي خلي نخطبولك
محمد : ايااااه
اية ناضت من مكانها متحشمة ركبت مشي وراها محمد خشت للدار خش معاها
مدلها شكارة : ويوووو
اية : مصلحتك شن هي
محمد : مصححح وجههكك اني خوك الكبير راه
اية : لا الكبير الله بعدين عبدالرحمن وبعدين طالما انك مش متزوج قاعد صغير
محمد : باهي زوجيني
اية : من امتى بديت امك اني ؟
محمد : عادي تقعدي امي لدقيقتين وتزوجيني ؟
اية : الله الله ومن هي سعيدة الحظ الي بنولي حماتها
محمد : مصحح الله وجهههك
اية : تحسابه سعيدة حظ الي بتاخدك عليك انت لالا غالط
محمد : تي من زيهاااا 😏
اية : صداع من كثرة الثقة
محمد : تي هيا باهي ولا نمشي لامي
اية : من هي ؟
محمد : صاحبتك
اية : عندي صاحبات
محمد : ع اساس ما عرفتيش منو يعني !
اية : برا لامي
محمد : ياودي اسماء
اية : لا هادي بالذات مسكينة بتتزوجك
محمد : ندوي معاك جديات
...يتبع