في الحلم ( روايات ليبية )

حلقة 6

حلقة 6
-
من قساوة هاليوم روحت نبكي لين رقدت !
ايه اني الي خفت ع حد وهالحد اعطاهالي عربية واضحة وصريحة !
مش كل من تصنع لبس مستور معناها معصوم من الغلط ومش كان تلبس وتطرح بإحترام معناها فاسدة !
تعرفو شن الفاسد في الموضوع الفاسد هوا العقول، العقل هوا الفاسد !!
ايه فيه بنات يضربو بيهم المثل لابسات جبتهم يخافو ربي وفيه بنات رغم جبتهم وخمارهم الا تنزل روس قبايل من الي ادير فيه { مش مقصود بحد } الموضوع ومافيه انه كل وحدة اختارت طريقة تعيش بيها حياتها !
كل وحدة اختارت طريق كل انسانة شافت لسعادتها والي يريحها مش كل من لبست خمار لبساته لانها تبي لا فيه الي مغصوبة عليه برضو الحجاب برضو هلبا حاجات لو انكم بدل ما تغصبو تقنعو بحسن ورفق ! وقتها كلهم حيديرو الي تبيه لكن المعاملة هي الي تحدد مصير الي تعامل فيه !
فاتو هلبا ايام ع هذاك اليوم ومعش قابلت ريان بكل ونمشي ونروح وحياتي حلوة هلبااا واسماء عجبها جو الجامعة متاعي لانها بروحها في جامعتها قررت انها تتخصص فيهم الزوز معانا الصبح والعشية تخصصها !
فاتو شهور هلبا واني ما عنديش علم بهاديك الرسالة والي نساني فيها القراية معش خطرت عليا بكل بكل عموماً جي اليوم الموعود بهلبا حاجات !
بس اني واسماء معزومات ع عرس اخت اية الفرحة مش متسعتنا بنحضرو عرس حاجة هلبا كبيرة العيون قلوب قلوب ع خاطرها 🖤
لبسنا جينز عادي وسوريات ودرت كودة واسماء فتحت شعرها وخلاص !
وقلنا لمربيتنا ترفعنا ولان احني عندنا وقت معين تتسكر فيه ابواب الميتم لهذا خدت اذن من الادارة بنباتهم عندها واحني بنمشو للعرس بشرط الي هوا تمشي هي معانا تكلمت مع البنات وبعدين قالولنا تعالو لحوش وحدة منهم يوتو في روحهم غادي مشينا !
-
ايمان فتحتلنا الباب 🖤
ايمان : اهلا اهلا انستو
اني واسماء : اهلا بيك الله يأنسك 🖤
ايمان : خشو هي بدلو حتى انتو اهني ونديرلكم مكياج
اني : لابسة اني لكن نبي نستشور شعري بس وديريلي شوية مكياج خفيف هلبااا وخلاص
اسماء : شعرك مافيه شي شعري هوا الي يبي استشوار
ايمان : غر خشو انتو الزوز نديرولكم غر بسرعة هيا
خشينا لقينا مرا تدير لـ أية في تسريحة ورحبت بينا وكملنا شعرنا والمكياج
ايمان : هي بدلو !
اسماء مبدلات احني اهو
اية : لالالالا بتطلعو نجمات العرس نبيكم ماحدش احلى منكم غير اني واطلعو احلى حتى من العروسة 🤣
اني واسماء وايمان طربقنا ضحك
ايمان : غر تعالو عندي قفاطين هلبا اختارو منهم
اني : لالا يا بنت احني مرتاحين هكي
اية : احني سألناكم مرتاحين هكي ولا نجيبولكم ؟ احني قلنا حتلبسو غصباً عنكم
اسماء : خلاص اني بنلبس
تلفتت لاسماء : شن تقولي
اسماء : هوا راس عرس بنهيج فيه خلي نطرح فيه شن فيها !!
اية : ايوه هكي الصح يا البي وحتى انتي بتلبسي هياااا
ما عندي ما ندير مشيت وخلتنا نختارو قفطان الي نبوه اني عجبني واحد طويل وسمبل اسود وكم تام وظهره مفتوح وشبه لاصق وفتحت شعري طويل كان طلقته واسماء لبست قفطان بيج كم تام لكن مش من الكتف وطويل حتى هوا المهم طلقت شعرها حتى هي وايمان لابسة قفطان اسود طويل بس عليه نقش ومش لاصق كله مدايرة تسريحة بس عادي وطالقة باقي شعرها 🤤
اماا اية طالعة عروسة تجنن شي خيالي لابسة قفطان دم غزال ليه ديل ودايرة تسريحة ومكياج طالعة تجنن 🤤🖤
-
المهم طبعاً خو اية الي حيرفعنا للصالة لبسنا عبايات وكذا وركبنا السيارة طبعا احني متحجبات بس اني لبست وشاح العباية لكن اسماء لا حاطاته حطان وشعارها يبان اصلا ، عموما اية كان مكياجها هلبا وجو شعرها برا وهكي ما بتش خوها يشوفها سبقت قعمزت التالي ركبنا اني وايمان واية التالي واسماء لحقت ع القدام تقبلت الامر وقعمزت القدام شافها خو اية وخلا لـ جملة "الحب من اول نظرة " معنى ، نعجب بيها بجمالها وهداوتها المتصنعة في السيارة طبعاً ههههه مهم مشينا وفتحنا اغاني وقعدنا نغنو وهيجنا وغيرنا جونا لين ما وصلنا نزلنا ومشينا لغرفة العروس ونحينا عباياتنا وخليناهم غادي وساوينا روحنا وطلعنا خشينا للصالة لما خشينا كانت العيون علينا اني توترت هلبا بس اسماء واثقة في نفسها والبنات عادي عندهم بس قعدت لاصقة في اسماء وخشينا وعرفتني اية بعيلتها رقصنا وغنينا وهيجنا وحطو رزاطة مشينا قعمزنا لقيت مكالمات فائتة من المربية مشيت عاودتلها
-
اني : ماما سالمة سامحيني ما سمعتاش
المربية : لالا عادي اني بنقولك اني جتني خدمة ما نقدرش نجيكم
اني : خدمة في الليل ؟
المربية : ايه لقينا بنت قدام الجامع اني لازم نكون قاعدة قولي لصاحبتك لو يقدرو تروحي معاهم ونجيكم من غادي وكان ماجيتش معناها مزال ما روحتش اني خايفة تقعد الخدمة للصبح
اني : باهي توا نسألها لو نقدرو نباتو عندها
المربية : كان ما تصلتش بيك في ساعتين روحو معاهم كان اتصلت معناها جايتكم
اني : تمام تمام توا نقوللها ع البيتان عندها
المربية : تمام بنسكر اني لازم ردو بالكم ع بعضكم هاا
اني : ما تشغليش بالك علينا
المربية : بناتي كيف ما نشغلش بالي !
اني : ربي يخليك لينا يارب ما نشغلكش اكثر هي
المربية : استمتعو بوقتكم 🖤
-
تلفتت ع جنب لان اية كانت جنبي
اني : وية
اية : نعم
اني :....يتبع