في الحلم ( روايات ليبية )

حلقة 5

حلقة 5
-
ما قدرتش نصدق الي شفته !!
لوهلة فكرت هل امي دارت هكي حتى هي ؟
انا خفت ع البنت بس اني نشليت معش نقدر نتحرك نمشي نزلها من السيارة !!!!
شن صارلي !
معش نقدر نتحرك نبي نمشي نقوللها هذا يضحك عليك هذا كذاب ايه اني مش خايفة عليها اني خايفة يكون ضحية لحبهم الكاذب !!!
حتى لو هي تحب ما تسلمش نفسها !
لالالالا ، لا يمكن !
رجعتلي قوتي قدرت نتحرك بس بعد شنو ! مشو عفس ع البنزينة ومشي !
مشو !! علااش باهي ياربي ياربي لازم ننقذ الوضع قبل ما يصير فيها ضحايا !!!
وليت للبنات نجري ما نشوف في شي الا مرام راكبة سيارة مع راجل كان كبير نوعاً ما بس اني متأكدة مش بوها لان بوها ملبسها شاربة وجبة بوها مانع عليها الي هي داراته في الجامعة !!!
شن الحل !! شن الحل لازم ما نلقا حل لازممممم !!
وصلت للبنات داهشة ومش قادرة نتكلم
اني : إيـ.. إيـ.. إيمان بسرعة اعطيني رقم مرام بسرعة ولا اتصلي بيها ولا اي حاجة
البنات شاديني كل وحدة تسأل خيرك
إيمان : اهو ينادي تليفونها
خديته منها وكيف ردت
اني : مرام ارجعي بسرعة ارجعي
مرام : خيرك ؟
اني جتني فكرة فوراً : بوك وخوك يدورو فيك من بكري
مرام انخلعت وقعدت تقوله ولي ولي ولي وسكرت عليا
اية : بجديات ؟؟؟؟
اني شفتلها بعد ما خديت نفس : مرام ركبت مع راجل قتلها هكي بش تولي مش حتولي بطريقة تانية
كلهم شهقو
ايمان : شنو
اني : والله زي ما نحكيلك
شوية تلفتنا وكانت مرام تنادي فينا وتجري اول ما وصلت ايمان واية وخرو التالي تقززو منها
مرام : بسرعة بسرعة بنات قبل لا يشوفوني والله يقتلوني
اسماء وهي تفنص ونبرة صوتها واضح عليه الغضب : مدامك تخافي منهم علاش ديري فيه من وراهم
مرام وهي تبكي : بالله استرو عليا بالله
اني : بوك وخوك ما جوش ما يدوروش فيك اني شفتك راكبة مع واحد قتلك ولي
اسماء بغضب : في شن تفكري وانتي راكبة معاه ؟؟ لوين تبي توصلي ؟ توا خايفة منهم باهي ما عرفوش كان حملتي شن اديري ؟؟ كيف بدسيه عليهم ؟؟
مرام تشوفلنا مصدومة بس مش عارفة شن تقول وحسيت كلامها طالع من قلبها بس كان هلباااا ثقيل
مرام : شوفو من يتكلم ؟ كان بوك خلا امك في نص الطريق مشكلتك وكان امك عاهرة ماشية مع كل من هب ودب برضو شي تاني
ايمان تعفلقت : ضمي فمك ، هادي امها هكي دارت مش هي لكن انتي اهني محور الموضوع بوك وخوتك وامك وخوتك قاعدين معاك وهكي اديري وهي الي ع اساس بلا اهل متربية احسن منك ع الاقل تخاف من ربي مش من خوتها وبوها !!
اية : وحتى خافت عليك رجعاتك بش توقظك ع الي ديري فيه هكي تردي عليها ؟؟؟ بش تعرفي حرام فيك الخير وحرام حد يدير فيك الخير !!
ايمان : تعرفي اني ما يلزمنيش نصاحب وحدة زيك كان انتي دماغك هكي كبره وفاضي زيك زي الباقي ما تلزمنيش وحدة زيك واساسا امي ديما تقولي ابعدي من بنات الحرام !!
مرام : بنات الحرام اهما قدامك
اسماء : اعرفي شن تقولي ولا والله ما يصيرلك خير !
مرام : شن بديري ؟؟
تلفتت لاسماء : فوتيها خليها ع ربي اني وقضتها وهي ادرى بنفسها سقط الذنب عنا وربي يهديها
وتليت اية وايمان ومشينا وخليناها بروحها
-
شي غريب لما تحذر حد يشوفك ع انك حاسده !!
لا راه مش اي حد نصحك وقالك نصيحة معناها ما يحبكش وما يتمنالكش الخير بالعكس الي ما يبيلكش الخير ما ينصحكش الي ما يبيلكش الاحسن ما يجيش لطريقك اصلا ولا يندري عليك !!
لما حد ينصحك حتى ما عجباتكش نصيحته تفاديها بدون جرح مشاعر !
قوله اوك تمام ان شاء الله النصيحة تقبلها بحسن او تفاديها بحسن ما تجرحش صاحبه !
لانه ما يكونش نصحك الا لانه مار بشعوره وما يبيكش تحس بيه حتى انت 🖤....يتبع