في الحلم ( روايات ليبية )

حلقة 4

حلقة 4
-
وصلنا للجامعة حطتنا ومشت قعدت نمشي ع مهلي قعمزت في الكافتيريا شوية جوني ايمان واية وقعمزو جنبي وقعدنا نهدرزو تعرفنا ع بعض وتعرفو ع اسماء ممكن هي ساعة لكن حسسوني انه نعرفهم زمان مش ساعة ولا اتنين وحتى اسماء حبيتها هلبا ووقفتها معاي رغم علاقتنا السطحية ساعدتني هي بدت في الجامعة من اول ما طلعت من الجامعة نتفكر كيف كانت لما تروح من الجامعة في البداية تقعد تبكي وتسب في امها وبوها
•
نعرفكم ع أسماء
هي نديدتي طبعاً جينا في نفس السنة لكن هي قبلي وهي تكره امها وبوها كره شديد الفرق بيناتنا اني وياها انه اني غلطة حب اما هي جابوها امها وبوها ما يبوش بنات لان عندهم " البنت عار ع بوها وخوتها " وهي بنت ع سبع ولاد امها وصتهم انهم يقولولها بش ما دورش عليهم انتو بتسألو باهي الناس كانت تعرف ان امها حامل ! ايه عرفو انها حامل لكن كانت توأم ولد ! وقعدت ع اساس انها جابت ولد وخلاص ! جهل حقير بشكل .
أسماء ما تحملش اسم بوها ولا لقبها فدرجوها حتى هي في قائمة اللقيطين ! شفتو قداش ما اني هينة قدامهم اني امي نقدتني من خوتها لكن هي امها ما همهاش حتى لو بنتها تنجرح من قصتها الي همها كلام الناس !
لو تبو تشوفو حد يكره ادم وجنسه فهادي اسماء ما تطيقهمش ولا تحب حد يجيب سيرتهم.
أسماء تقرا في الطب تخصص نساء واطفال في القصة تعرفو سبب دراستها التخصص هذا !
بتقولو كيف أسماء باردة في المجتمع ومش هامها حد لا همها في بداية جامعتها كانت لما تروح تقعد تبكي وتكسر في حاجاتها في دارها ويقعدو المربيات يشدو فيها هي الكل يعرفها قداش حساسة هلبا هلبا حساسة كانت ابسط كلمة تكرهها في روحها وتزيد تكره ماليها اكثر واكثر ، مرة وحدة شفتها كيف مكسرة حاجاتها في دارها الميتم فيه غرف صغار هلبا زي المخزن هي واخدة وحدة هكي تحب تقعد بروحها انطوائية هلباااا لكن تعودت ع قسوة قلوب الناس بس ، طيبة وقلبها نظيف هلبا مستحيل تكسر حد بكلمة ولا ترد حد الكل يحبوها لكن لما تنهار ماحدش يقربها لانها ما تتحملش ومتحسسة هلبا من قصتها ومن فعل ماليها ، ورغم هذا ، اسماء إنسانة طموحة درجة اولى عندها احلام وطموح وعندها حياة في خيالها حياة هي تحبها هي بنتها هي الي اختارتها ومع هذا واقعنا يقعد واقعنا !
نكون عرفتكم ع اسماء ونرجعو لقصتنا
-
كنا مقعمزين في الكافتيريا اني والبنات ونهدرزو ونضحكو وجونا جميل جداً 🖤
تجي بنت لابسة عبايا وشاربة وجهها مغسول بمية بس كيف جاية جت للبنات قالتلهم هيا وحدة منهم ناضت والتانية قالت بنقعد بري انتي !
اني وأسماء استغربنا علاش دارت هكي شن قصدها يعني ! المهم تسائلنا شوية بعدين هدرزنا نسيناها بكل !
جي وقت المحاضرة نضنا مشينا حضرنا وكملناها لما طلعت جت اية ومعاها بنت
أية : نادينوو أسماء هادي مرام
اني وأسماء : تشرفنا
مرام : الشرف ليا ههههه
اني مستغربة فيها لمحة من بنت شفتها لكن وين نسيت
إيمان شافتلي : تعالي نديرولك حتى انتي روج واحمر خدود
مرام : مش محتاجة طرف من ربي مش زيني كان ما مكيجت وجهي شاحب بالدات مع الشاربة
اني واسماء شفنا لبعض بصدمة
أسماء : قصدك انتي الي جيتي للكافتيريا
مرام : هههههه قصدك ما عرفتينيش
اني : لا والله ما عرفناك متغيرة هلبا
اسماء : هلبا هلبا
مرام : الله غالب ماليا مانعين اللبس وهكي
أسماء تجاهلت الكلام
مرام : كيف انتو ماليكم يخلوكم بلا وشاح هكي تطلعو عادي ؟
اني ابتسمت عادي رغم الكلام كان رزين اما اسماء شافت بلا مبالاة وردت
أسماء : لا احني ما عندناش اهل يعني
مرام : كيف يعني
اسماء : يعني متربيين في ميتم وهكي
مرام : اهااا عادي نعرف السبب ؟
اسماء : لما تشوفيهم ماليا قوليلهم علاش سيبتوها بنتكم
اني : غيرو الموضوع لو سمحتو
ايمان : ايه حق تعالي نحكيلك ع حبيبي
اسماء : هههههه ننصحك تسيبيه من توا
ايمان : علاش اللطف غر اعرفيه منو قاعدة ما قلتش
اسماء : مافيش داعي تقولي الرجالة كلهم كلاب
اية : ياربي قولي حاشا البعض
اسماء : بكيفك لكن اني هكي معتقداتي كلهم كذابين ويستغلو في بنات الناس بش يعبو شهواتهم ويستغلو في البنت الي تحبه ويعشم فيها ويخليها بعدين في نص الطريق من غير الفئة الي كارهة جنس حواء والي تشوف انه الإناث عيب وعالة ع المجتمع ويطمس فيهم حقيقةً ربي ياخد حق كل وحدة ظلمها واحد كلب وكذب عليها حسبي الله بس
ايمان : هوا كلامك صح من جهة لكن من جهة تانية مش صح لان فيه وفيه عرفتي مش كلهم زي بعض فيه وحدين كويسيين وتلقيه يحبك من كل قلبه ويدير اي شي ع خاطرك عادي مستعد يعني وفيه الي زي ما قلتي اني نعرف بنات تزوجو عن علاقة حتى حسيت انه توا بدي الزواج التقليدي يقل بدو اكثرية زواج عن حب ربي يحنن قلبك ويبعتلك واحد يساندك وينسيك كل شي 🖤
اسماء : لا مانبيش
اية اسكتي اسكتي زين ودين ورضا الوالدين كان ما جاكش واحد اليوم يجيك غدوا وحتحبي وتعاليلي بعد سنة باهي !!
اسماء : باهي نجيك بعد سنة عاادي لكن انه اني نحب هادي من المستحيلات
اني : ههههههه خلاص لينا موعد بعد سنة
مرام تسمعلنا وساكتة وعاطية بسمة عادية لين جتها مكالمة شافتها وارتبكت
مرام : هي بنات مشيت اني
ايمان : وين ؟
مرام : صاحبتي جت نشوفكم بعدين 😘
-
مشت مرام وشفت لقيت شكارتها في يدي مشيت وراها بنعطيهالها قعدت نمشي وهي كانت متسرعة شوية لين وصلت لنهاية الممر وكان عاطي ع الطريق ...يتبع