رجعت اتصلت بي سامي وقلت ليه انا موافقة بيك بس عندي شرط اول ،،
قال لي أأمري عيوني انا اديك ليهم ،،
اخ الكلمة دي منو قاعدة تجيب لي الهبوط ،، حناك ،، اها قلت ليه لو انت عايزني تطلق مرتك،،
سكت ما نطق حرف ،، قلت ليه الوو الووو حتي بعد مسافة قال لي ما بقدر انا كلمتك انو اهلي صعبين وكمان دي بت عمي وفي بينا بت يعني مستحيل اقدر اطلقا شوفي المشاكل الحا تحصل ،،
قلت ليه خلاص اعتبر البينا انتهي يلا سلام وطق قفلت الخط فيه ،، قفلت بي جاي هو اتصل طوالي ابيت ارد عليه كلو كلو لما المكالمة ال15 اتصل قمت رديت وما فتحت خشمي ،،
قال لي بي عصبية انتي عارفة لو ما كنت بحبك وعارف انتي بالنسبة لي شنو اقسم بالله ما ارجع اتصل بيك تاني دي انانية منك ،،لو قفلتي فيني الخط بكسر راسك دا انتي فاهمة ،،،
وااي ياخ انا امشي وين الساعة ديك وهو بتكلم معاي بالرجولة دي بقيت بتبسم براي عجبني ليك الكلام للاخر ،، قلت ليه انت ما بتحبني ،،
قال لي اها وريني اعمل شنو يا جيلا دا بدل تقيفي معاي وبتاع تلوي لي يدي وتخيريني ب خيار كل واحد اصعب من التاني ،،
سكته وفكرت بيني وبين نفسي انو سامي دا بالطريقة دي لا بطلق مرتو ولا اعشم الا اتصرف براي معناها واخلق مشكلة ،، اتونسنا شوية وودعتو وبقيت بفكر اصل لي مرتو كيف ،،
رسلت ليه رسالة قلت ليه انت في بيتك ولا شقة زي ما قلت لي ،،
قام اتصل تاني ،، اول كلمة قالا لي بتسالي مالك عايزة تجيني ؟
طبعا اتخلعته ما كان قصدي كدا ،، بس قال لي انا قاعد في الشقة براي مرتي ما عندها فكرة ،، اجيك اسوقك ونقعد نتونس بي راحتنا وكمان نتكلم في تفاصيل العرس عشان تمشي تكلمي اهلك وتبدي تشتري حاجات شنطتك انا خلاص ما قادر استحمل بعدك بعد شفت الصورة انتي عندك جسم يجنن المجنون زيادة ،، اتهجمت بي كلامو اكتر وبقيت مبسوطة والضحكة للسنوان ما فكرت في عواقب الحاجة الانا بمشي فيها بي طيش بدون تفكير ،، قلت ليه لالا انا هسي ما بقدر اطلع من بيتنا الا بكرا بجيك بس وصف لي وين الشقة ،، تاني يوم كالعادة طلعت من الصباح علي اساس اني ماشة المدرسة اتصلت بيه وقلت ليه انا ماشة علي شقتك بتجي بتين عشان ما اتشرا ساي ،، قال لي خلاص انا بغشاك طالع هسي دي ،، قلت ليه لالا ،، قال لي مالك اتخلعتي انتي هسي ،، خلاص اقيفي لي نهاية الشارع لو خايفة زول يشوفك ،، قلت ليه ما كدا بس انا ما في بيتنا ،، قال لي شنووو الليلة بكسر راسك وين انتي وقبل اخليني اتكلم بقي جايط فيني ،، لشنو ما كلمتيني وانتي لحدي امس بالليل مساهرة معاي ما جبتي لي سيرة ،، قلت ليه ياخ اصبر خليني اشرح ليك انا في بيت ناس بت خالتي في حي...... بنقرا مع بعض وامتحاناتنا قربت قمت اتاخرت عندهم وقالو لي الا ابيت معاهم فهمته،،
قال لي تمام بس تاني اوعي تعملي كدا ،، قولي عندك اولاد خال ،،
قعدت اضحك لالا ما عندي ،،
قال لي تمام احسن لاني بغير وبغير شديد كمان اعرفي الحتة دي ويلا رسلي لي اشوفك اصبح بي مرتي المزة دي وسريع اطلعي بتلقيني وصلت قدامك وسوقي براحة ،،
من جواي الليلة نسيت اعمل حساب الحاجة دي موضوع العربية قلت ليه حاضر واتوادعنا وقفلت الخط ،،
المهم عدي الوقت ولما وصلت المهندسين اتصلت بيه وبدا يوصف لي مكان الشقة لما وصلت وطلعت فوق بقيت خايفة وبتلفت يمين وشمال زول يشوفني وتبقي كارثة ،، الخط كان فاتح قلت ليه وصلت افتح الباب سريع ،، وطوالي دخلته وكان نفسي قايم وخايفة بالجد ما حسيت بي روحي الا وانا في حضنو وهو بهدي فيني جيلا مالك في شنو يديك باردات وبترجفي كدا ونفسك قايم ،،
فجاة انتبهت انو ماسكني ويديه فيني بعدته وزحيت هناك ،، قلت ليه انت مجنون كيف تعمل حاجة زي دي ،، قال لي اسف حبيبي بس شفتك خايفة وترتيني معاك وما قدرت استحمل اشوفك كدا انتي مني يا جيلا افهمي الحتة دي ،،
طبعا الكلام الحنين والسمح دا بنسيني اي شي وبكتل قلبي طوالي ،، دخلنا قعدنا قال لي بتشربي نسكافي ولا عصير ؟ قلت ليه اي شي ،، قال لي شنو انتي ما عندك شي محدد طوالي معاك معاك خلاص نسكافي وقعدنا نضحك ،، مشي مني وانتبهت لي تلفونو ختاه في التربيزة شلتو وبسرعة فتحت الاسماء ياربي مسجل مرتو بي منو ،، بقيت افتش بس كانت الاسماء كتيرة غلبني اعرفها قفلت التلفون وختيتو ما يقوم يجي داخل يلقاني شايلاه ،،
شوية وجا قلت ليه مسجلني في تلفونك ب منو ،، ضحك وقال لي اشمعني السؤال ،، قلت ليه انت مالك بس ورريني ،، قال لي بي ام اويس ،، ياالله من الكلمة دي انتهت مني نهائي وانا النوع الرومانسي البتغشي بالكلام ،،
سرحته معاه وبقيت مركزة في دقنو وعيونو وهو كان بعاين لي لما غمز لي ب عينو والله العظيم تلاتة زي الضربتني كهربة جسم شعري كلو قام ،،
قلت ليه طيب مسجل مرتك بي شنو ،، قال لي ب ام نسمة ،، قلت ليه اها بتك اسمها نسمة قال لي اي ،، بقينا نتونس ومشي جاب ورقة وقلم وجا قعد جمبي وبقينا نكتب في حاجات الشنطة طبعا اصر انو اي شي اشتريه 12 ،، انا كنت زي البحلم طايرة من الفرح ،، وقت كنت بكتب بديت احس بي يدو ختاها وراي قلت عادي امكن ما قاصد بس لما بدا يمررها انا اتشنجت قبلي وعايزة اقوم جراني لما اتلفت عليه بي صرة وش لقيتو بقي ما طبيعي ونفسو قايم وفتح زرار قميصو الفوق ،، بقيت عايزة ابكي حاولت ابعد منو بس مسكة يدو كانت قوية ما قدرت اجر نفسي لما لقيت روحي استسلمت ليه والشيطان شاطر شديد وسط اي اتنين يكونو براهم ،، عدت نص ساعة ونحن كنا راقدين في الكنبة مع بعض لما فجاة التلفون ضرب قام مني رد عليه سمعتو زي بتكلم مع واحدة بس عرفتها مرتو لما قال ليها نسمة مالا خلاص بحجز ليها عند الدكتور ،، قال لي يلا انا بدخل استحمي بتي عيانة وبوصلك معاي في الشارع ولا تستحمي معاي هدومك اتملت ،، خجلته وقلت ليه لالا بعد ارجع البيت بلبس العباية هسي ،، دخل ومشيت وراه لما اتاكدته دخل الحمام جيت فتحت التلفون وسجلت رقم مرتو ،، بقيت سارحة في الحصل هسي وحمدت ربنا انو التلفون جا في وقتو قبل تحصل كارثة كان ضعته فيها وفقدت نفسي ،، بقيت بلمس في شفايفي والاحساس الحلو الحسيتو معاه حسيت بالامان وانا في حضنو ،، باي حاجة حلوة ،، حنان الام والاب والاخ والاخت الانا فاقداهم في بيتنا ،، حسيت انو في شي فيني اختلف بين تانيب الضمير واللذة الحلوة ،، لما طق طق سامي صحاني من حلمي وهو بتكلم معاي ،، قلت ليه وصلني ناس خالتي [قصدي بيتنا] قال لي بترجعي بتين ،، قلت ليه المسا ،،قال لي اقيفي انتي جيتي بي شنو طيب وعربيتك؟ نسيت ليك الفكرة خالص وبي ربكة رديت ليه انا نسيت اقول ليك انو امس قطعت بنزين مشيت مع بت خالتي واتصلت ب اخوي يسوقها البيت معاه ،، قال لي تمام هسي ما وقت الحساب بعدين بتفاهم معاك في العملتيه دا يعني جيتي بالمواصلات ،، سكته ساي ولا حرف ما نطقتو ،،
وصلني بداية الشارع وجيت بي رجولي البيت ،، دخلته اوضتي وبديت افكر،، انتظرت بالليل جا ورسلت لي مرتو ،، راجلك الايام دي شايفو مع واحدة طالع نازل معاها وبمشو مع بعض شقة في حي ال.... ولو ما مصدقة بكرا بعد الفطور امشي اتاكدي ،، بقيت بضحك وطوالي طلعت شريحتي السوداني بعمل بيها البلاوي بس ،، تاني يوم سامي اتصل بي وقال لي تعالي الشقة قلت ليه جاية ،، وفعلا جيت بس المرة دي قلبي كان قوي ما خفته ولا حاجة حبيت الحصل المرة الفاتت ،، جبت معاي فستان قصير وكط ودخلنا غرفة النوم بقينا غايبين عن الوعي وهو بالذات بقي ما مجمع لما انتبهته انو فعلا زي في دق في الباب قمته جراني ماشة وين انا لسه.... قلت ليه عطشانة ورقدتو تاني وقمته جيت جهة الباب قلت منو ،، جاني صوت مرا احسن تفتحي الباب انا عارفة كل شي ،، فتحت الباب و قبل انطق حرف بقيت منططه عيوني بعاين للبت الواقفة قدامي وهي كمان نفس الشي والاتنين كنا مخلوعات في بعض ...
انتي؟
جيلا؟
جنات؟
يتبع
